1. ¿Matthew shuti huahuaca causarinapi sinchi feta charishcataca ima shinataj ricuchirca?

 MATTHEW shuti huahuamanta parlashun. Paitaca ancha ungushca cashcamantami achca cutincuna operashcacuna. Paica siete huatacunata charishpami paipaj familiahuan JW Broadcasting^® nishca programata ricucurcacuna. Chai programa tucurinallapimi shuj video musicaltapish ricurcacuna. Chaipimi achca huauqui panicunaca paicunapaj huañushca familiacunata chasquircacuna. b Chai videota ricushca huashaca Matthewca paipaj yaya mamapaj maquicunata japishpami: “Papito mamita, ña ricushca shinaca ñuca huañushpapish causarishami. Tucuimi alli llujshinga. Ama sustarichijchu” nirca. Matthewca chashna nishpami Dios causachinapi sinchi feta charishcata ricuchirca. ¿Chashna sinchi feta charishcamantaca paipaj yaya mamaca ima shinashi sintirishcangacuna?

2, 3. ¿Causarinapica imamantataj cutin cutin yuyarina canchij?

² Ima horas ancha ungunata, shuj cꞌuyashca familia o amigo huañunataca mana yachanchijchu. Chaimantami causarina promesapica cutin cutin yuyarina canchij (Eclesiastés 9:11; Juan 5:28, 29; Santiago 4:13, 14). Chai promesapi yuyarishpaca tucui laya llaquicunatami ahuantai tucushun (1 Tesalonicenses 4:13). Bibliapica Yayitu Dios ñucanchijta alli rijsishcata, achcata cꞌuyashcatami huillan (Lucas 12:7). Chaimantami paica ñucanchij ima shina cashca laya causachinga. Ashtahuancarin Yayitu Diosca para siempre causana oportunidadtami cunga.

³ Juan 11:23-pica Jesusca Martataca: “Cambaj turica jataringami” nircami. Shinapish ¿canca causarinapica imamantataj cringui? ¿Jesús Lazarota causachishcamantaca imatataj yachai tucungui? ¿Causarinapi tucui shunguhuan crishpa catingapajca imatataj rurana cangui? Cai yachaipica cai tapuicunamantami yachashun.

4. ¿Causarina promesapi confiangapajca imatataj yachana canchij? Shuj ejemplomanta parlapai.

⁴ ¿Shuj promesapi confiangapajca imatataj yachana canchij? Cai catij ejemplopi yuyashun. Cambaj huasica shuj jatun acapana tiyashcamantami dañarishcanga. Chaimi cambaj shuj amigoca: “Ama sustarichu. Cambaj huasitaca cutin alliyachishallami” nin. ¿Pai canta ayudanapi tucui shunguhuan cringapajca imatataj yachana cangui? Cambaj amigo jahua shimilla mana nishcata yachashcamanta, canta tucui shunguhuan ayudasha nishcata yachashcamantami paipi confiangui. Shinallataj pai alli albañil cashcata yachashcamanta, tucui herramientacunatapish charishcata yachashcamantami pai canta ayudanapi tucui shunguhuan cringui. Chashnallatajmi Jehová Diosca “huañushcacunata causachishami” nishca. Pero pai ima nishcapi confiangapajca Jehová Dios huañushcacunata causachina munaita charishcata, poderta charishcatapishmi alli yachana canchij. Chaita yachashpaca Jehová Dios cusha nishcacunapimi tucui shunguhuan confiashun.

5, 6. ¿Jehová Dios huañushcacunata causachina munaita charishcataca imamantataj crinchij?

⁵ ¿Jehová Diosca huañushcacunata causachina munaita charinchu? Ari. Paica chai munaitami charin. Jehová Diosca huaquin cꞌaricunataca causarinamantami Bibliapi quillcachirca (Isaías 26:19; Oseas 13:14; Apocalipsis 20:11-13). Yayitu Diosca pai tucui nishcacunatami siempre pajtachin (Josué 23:14). Ashtahuancarin paica huañushcacunata causachina punlla chayachunmi tucui shunguhuan, tucui munaihuan shuyacun. Pero ¿caitaca imamantataj crinchij?

⁶ Jobpi yuyashunchij. Jobca Yayitu Dios paita causachina munaita charishcata, paita cutin tigra ricuna munaita charishcataca allimi yacharca (Job 14:14, 15). Jehová Diosca paita tucui sirvijcunatami causachinata munan. Paica alli saludta charichun, tucuicuna cushilla causachunmi munan. ¿Cutin Jehová Diosta manaraj rijsishpa huañushcacunataca causachisha ningachu? Ari. Yayitu Diosca paicunata cꞌuyashcamantami paicunatapish causachisha nin (Hechos 24:15). Paicuna paita rijsina oportunidadta charichun, cai Allpapipish para siempre causachunmi munan (Juan 3:16). Caicunata yachashcamantami Yayitu Dios huañushcacunata causachina munaita charishcata seguros canchij.

7, 8. ¿Yayitu Dios huañushcacunata causachingapaj poderta charishcataca imamantataj crinchij?

⁷ ¿Jehová Diosca huañushcacunata causachingapaj poderta charinchu? Ari. Paica tucui poderta charij Diosmi can (Apocalipsis 1:8). Paica poderoso cashcamantami huañuitapish, paipaj contracunatapish tucuchinga (1 Corintios 15:26). Caicunata yachashpaca ñucanchij fetami sinchiyachinchij, animotapishmi japinchij. Cunanca pani Emma Arnoldpaj causaimanta yachashun. Segunda Guerra Mundialpica paipaj tucui familiahuanmi achca llaquicunata charircacuna. Nazi soldadocunaca paipaj huaquin familiacunatami huañuchircacuna. Paipaj cꞌuyashca ushushita cushichingapajmi: “Huahua, huañuica Yayitu Diostaca mana mishangachu. Huañushcacunaca mana chaipi saquiringacunachu. Chaipaj randica Yayitu Diosca huañuita mishashpami achca huañushcacunata causachinga” nirca. Chaica ciertomi can. Yayitu Diostaca imapish mana mishangachu. Paimi ñucanchijmanca causaita curca. Cutin tigra causachingapajpish poderta charinmi.

⁸ Yayitu Jehová Diosca tucuicunamanta yalli alli yuyaitami charin. Chaimantapishmi huañushcacunata pai causachinapica tucui shunguhuan crinchij. Bibliapica Jehová tucui estrellacunapaj shuticunata yuyarishcata, tucui huañushcacunatapish alli yuyarishcatami yachachin (Isaías 40:26; Job 14:13; Lucas 20:37, 38). Paica huañushcacuna ima shina cashcataca tucuitami yuyarin. Chaimantami paicuna ima  shina cashca laya paicunapaj tucui yuyaicunahuan causachinga.

9. ¿Causarinapica imamantataj cringui?

⁹ ¿Dios huañushcacunata causachinapica imamantataj cringui? Caicama ricushca shinaca Jehová Diosca huañushcacunata causachina munaitami charin. Chaita pajtachingapajpish achca podertami charin. Ashtahuancarin Bibliapica Jehová Dios huaquincunata ña causachishcatami parlan. Cai tucuita intindishpaca Dios huañushcacunata causachinapica tucui shunguhuanmi crinchij. Jehová Diosca huaquin runacunamanmi huañushcacunata causachichun poderta curca. Cunanca Diospaj poderhuan Jesús paipaj amigo Lazarota ima shina causachishcatami yachashun. Chaitaca Juan capítulo 11-pimi ricushun.

10. a) ¿Jesusca Jordán yacu caishuj ladopi cashpaca imatataj yachaj chayarca? b) ¿Chaita yachashpaca imatataj rurarca? (Juan 11:1-3).

¹⁰ (Juan 11:1-3-ta liyipai). Jesusca Lazarohuan, paipaj panicuna Mariahuanpish, Martahuanpishmi alli apanacurca. Paicunaca Betania llajtapimi causarcacuna (Lucas 10:38-42). Huata 32 tucurimujpica Lazaroca anchami ungurca. Chaimi paipaj panicunaca achcata preocuparircacuna. Lázaro ungüi horasca Jesusca Jordán yacu caishuj ladopimi carca. Chaimantami Lazaropaj panicunaca Lázaro ungushca cashcata Jesusman huillachunmi cacharcacuna (Juan 10:40). Jesús chaita yachaj chayajpimi Lazaroca huañurca. Jesusca paipaj amigo Lázaro ña huañushcata yachashpapish maipi cashcapi ishqui punllacunahuanmi saquirinata decidirca. Qꞌuipaca ña Betania llajtaman chayajpica Lazaroca ñami chuscu punllacunata pambana jutcupi churashca carca. Lázaro ña huañushca cajpipish Jesusca Yayitu Dios causachingapaj poderta charishcatami tucuicunapaj ñaupajpi ricuchigrirca (Juan 11:4, 6, 11, 17).

11. ¿Jesús shina alli amigo cangapajca imatataj rurana canchij?

¹¹ ¿Caicamaca imatataj yachai pudinchij? Mariapish, Martapish Jesustaca paicunata ayudanaman richunca mana mañarcacunachu. Paicunaca paicunapaj turi Lázaro huañushcata Jesusman huillachunllami cacharcacuna (Juan 11:3). Lázaro huañujpica Jesusca carupi cashpapish paitami causachi tucunmanlla carca. Pero chaita ruranapaj randica Jesusca paipaj amigacuna Mariahuan, Martahuan cangapajmi Betania llajtaman rinata decidirca. ¿Canpish Jesús shina shuj alli amigotachu charingui? Cambaj alli amigoca ima llaqui japijpipish canta ayudangapajmi listo can. Ñucanchijpish Jesús shinallataj alli amigos cangapajmi esforzarina canchij (Proverbios 17:17). Cunanca Jesús Betania llajtaman chayashca huasha ima tucushcata ricupashun.

12. a) ¿Jesusca Martapaj feta sinchiyachingapajca imatataj nirca? b) ¿Martaca Jesús nishcacunapica imamantataj confiai tucurca? (Juan 11:23-26).

¹² (Juan 11:23-26-ta liyipai). Jesús ña chayacujta yachashpaca Martaca Jesusta ricunamanmi rirca. Jesushuan tupashpaca Martaca: “Amito, can caipi cashca cajpica ñuca turica mana huañunmanchu carca” nircami (Juan 11:21). Jesusca Lazarotaca chai ungüimantami jambi tucunman carca. Shinapish Jesusca Martataca: ‘Cambaj turica jataringami. Ñucami  causaita cujpish, causachijpish cani’ nircami. Chashna nishpami Jesusca Martapaj feta sinchiyachirca. Jehová Diosca Jesusmanca huañushcacunata causachichunmi poderta curca. Chaimantami Jesusca Jairopaj ushushi ashalla tiempo huañushca huashaca paita causachishca carca. Shujtaj jovencitotapish pai huañushca punllallapitajmi ña causachishca carca (Lucas 7:11-15; 8:49-55). Pero Lázaro ña chuscu punllacunata huañushca cashcamantami paipaj cuerpoca ña ismui callarishca carca. ¿Paita causachingapajca Jesusca podertachu charirca?

13. Juan 11:32 al 35-pi nishca shinaca ¿Martapish, shujtajcunapish dimastij huacacujta ricushpaca Jesusca ima shinataj sintirirca? (Fotomanta parlapai).

¹³ (Juan 11:32-35-ta liyipai). Chai huasha ima tucushcapi yuyashunchij. Lazaropaj chaishuj pani Mariapish Marta shinallatajmi Jesustaca: “Amito, can caipi cashca cajpica ñuca turica mana huañunmanchu carca” nirca. Lazaropaj panicunapish, shujtajcunapish dimastij llaquillami cancuna. Paicuna dimastij huacacujta ricushpaca Jesuspish shungupi achcata nanarishpami huacai callarirca. Jesusca shuj cꞌuyashca familia o amigo huañui horas dimastij llaqui cashcataca allimi yachan. Chaimantami Lazaropaj panicunapish, shujtajcunapish ña mana sufrishpa catichun ayudasha nirca.

14. ¿Jehová Diospish ñucanchijcuna sufricujta ricushpaca ima shinataj sintirin?

¹⁴ Pasaj yachaipi ricushca shinaca Jesusca paipaj Yaya Jehová ima shina cashcatami tucuita alli ricuchin (Juan 12:45). Jesusca paipaj amigocuna llaquilla cajta ricushpami paipish huacai callarirca. Chai shinallatajmi Jehová Diospish ñucanchijcuna ima llaquimanta huacacujta ricushpaca achcata llaquirin (Salmo 56:8). ¿Caita yachashpaca manachu Jehová Diospajman cꞌuchuyanata munanchij?

15. Juan 11:41 al 44-pi nishca shinaca ¿ Lazarota churashca jutcuman Jesús chayajpica imataj tucurca? (Fotomantapish parlapai).

¹⁵ (Juan 11:41-44-ta liyipai). Jesusca Lazarota churashca jutcumanmi chayan. Chaipimi Jesusca: “Rumita anchuchichij” nirca. Chashna nijpica Martaca: “Amito, ñamari chuscu punlla pasashca, ñamari ashnacunga” nircami. Chashna nijpipish Jesusca: “¿Manachu can crishpaca Diospaj podertami ricungui nircani?” nircami (Juan 11:39, 40). Chai huashaca Jesusca  jahua pachata ricushpami tucuicunapaj ñaupajpi Yayitu Diosta ayudachun mañan. Chashna mañashpami Diospaj poderhuan Lazarota causachigrishcata ricuchin. Chaimi Jesusca sinchita caparishpa: “¡Lázaro, llujshimui!” nirca. Chashna nijpimi huañushca Lazaroca llujshimurca. Lazarota causachinaca pi mana pajtaipaj layami carca. Pero Jesusca Diospaj poderhuanmi chaita pajtachi tucurca (Juan 11:17-paj nota de estudiota españolpi ricui).

16. ¿Juan capítulo 11-pi yachachishca shinaca imamantataj causarinapica confiai tucunchij?

¹⁶ Juan capítulo 11-pica Dios huañushcacunata causachinapi confiai tucushcatami yachachin. Jesús Martata ima nishcata yuyarishunchij. Paica: “Cambaj turica jataringami” nircami (Juan 11:23). Jehová Diospish, Jesuspish huañushcacunata causachina munaitami charincuna. Chaita pajtachingapajpish achca podertami charincuna. Jesusca Lazaropaj familiacuna, amigocunapish huacacujta ricushpami paipish huacai callarirca. Chashnami huañuita tucuchina munaita charishcata ricuchirca. Lazarota causachijpicarin Jesusca huañushcacunata causachingapaj achca poderta charishcatapishmi ricuchirca. Shinallataj Jesusca Martataca: “Can crishpaca Diospaj podertami ricungui” nircami (Juan 11:40). Ñucanchijpish Marta shinallatajmi causarinapi tucui shunguhuan crina canchij. Pero ¿chaita mana dudashpa crishpa catingapajca imatataj rurana canchij?

17. ¿Bibliapi causarishcacunamanta yachacushpaca imacunapitaj yuyana canchij?

¹⁷ Bibliapi parlaj causarishcacunamanta yachashunchij. Bibliapica pusaj gentecuna cai Allpapi causarishcamantami parlan. c Paicunapuramantaca cꞌaricunapish, huarmicunapish, huahuacunapishmi  carca. Bibliapica cada unomanta yachangapajmi esforzarina canchij. Chaita ruracushpaca paicunamanta imata yachai tucushcapimi yuyana canchij. Jehová Dios huañushcacunata causachina munaita charishcatapish, achca poderta charishcatapishmi yuyarina canchij. Ashtahuancarin Jesús causarishcamantapishmi yachana canchij. Jesús causarishca huashaca paitaca achca gentecunami ricui tucurcacuna. Chashna Jesús causarishcamanta yachashpaca ñucanchij fetami ashtahuan sinchiyachishun (1 Corintios 15:3-6, 20-22).

18. ¿Causarinamanta parlaj cantocuna ñucanchij feta sinchiyachichunca imatataj rurana canchij? (Notatapish ricui).

¹⁸ Causarinamanta parlaj cantocunata uyashunchij (Efesios 5:19). d Chai cantocunaca causarinapi crishcacunatami sinchiyachin. Chaimantami ñucanchij familiahuan Bibliamanta yachai horasca chai cantocunata cantana canchij. Chai cantocunamanta imata yachashcatapishmi paicunahuan parlana canchij. Ashtahuancarin chai cantocunataca de memoria yachangapajpish, ñucanchij shungupi huaquichingapajpishmi esforzarina canchij. Chashnami ima llaqui atraso japijpipish o shuj cꞌuyashca familia huañujpipish Diospaj espíritu santota chasquishpa chai cantocunata yuyarishun. Chashna yuyarishpaca causarinapi tucui shunguhuan confiashpami cushicuihuan ahuantashpa catishun.

19. ¿Ñucanchij feta sinchiyachingapajca imacunapitaj yuyana canchij? (“ ¿Causarigrijcunataca imatataj tapunguiman?” nishca recuadrota ricui).

¹⁹ Paraíso Allpapi ña causacushcapi yuyashunchij. Shuj panica: “Paraisopi yuyashpaca sumaj sisacunata alajata ashnacucuj shina, chaipi ña causacuj shinami sintirini” ninmi. Canpish chashnallatajmi yuyana cangui. Por ejemplo, Bibliapi parlaj Diosta sirvijcuna causarijpi paicunata rijsishcapimi yuyana cangui. ¿Paicunapuramantaca pitataj ashtahuan rijsinata munangui? ¿Paitaca imatataj tapunguiman? Ashtahuancarin cambaj cꞌuyashca familiacuna o amigocuna causarijpi paicunahuan cutin tupacushcapimi yuyana cangui. Por ejemplo, paicunaman imata parlasha nishcapi, paicunahuan ugllanacushpa cushilla sintirishcapipishmi yuyana cangui.

20. ¿Imata rurangapajtaj esforzarishpa catina canchij?

²⁰ Cai yachaipi ricushca shinaca Jehová Diosca huañushcacunata causachinatami munan. Chaita pajtachingapajpishmi achca poderta charin. Caicunata yachachishcamantami Jehová Diostaca achcata agradicinchij. Jehová Diosca Jesús, Martata nishca shinallatajmi ñucanchijtapish “cambaj huañushca familiacuna, amigocunapish jataringacunami” nishpa cushichicun. Chaimantami causarinapi tucui shunguhuan crishpa catingapaj esforzarishunchij. Chaita rurashpami Jehová Diospajman ashtahuan cꞌuchuyashun.