1, 2. ¿Shuj Paraíso tiyanapi crishpa catingapajca imatataj rurana canchij?

 JEHOVÁ DIOSCA cai millai mundota tucuchishca huashami shuj Paraisota ruranga. Chaita yachashpami ñucanchijca cushilla sintirinchij (2 Pedro 3:13). Jehová ima hora caita pajtachinataca mana yachanchijchu. Pero cai millai mundopi ima tucucushcata ricushpaca ña tucuri punllacunapi causacushcatami intindinchij (Mateo 24:32-34, 36; Hechos 1:7).

² Tucuicunami mashna huatacunata Diosta sirvicushpapish Jehová Dios cusha nishcapi tucui shunguhuan crishpa catina canchij. ¿Imamantataj chaita rurashpa catina canchij? Apóstol Pablo nishca shinaca ñucanchij fe sinchi cashpapish ratomi chiriyai tucun (Hebreos 12:1). Chaimantami cai Allpapi shuj Paraíso tiyanata crishpa catingapajca Biblia yachachishcacunatapish, Diospaj rurashcacunatapish cutin cutin yuyarina canchij (Hebreos 11:1).

3. ¿Cai yachaipica imallatataj ricushun?

³ Cai yachaipica shuj Paraíso tiyanapi imamanta tucui shunguhuan crina cashcatami yachashun. Shinallataj ñucanchij feta sinchiyachingapaj Jesús ñucanchijmanta huañushcata, Dios achca poderta charishcatapish yuyarina cashcatami ricushun. Diosta sirvina yuyailla cana cashcatapishmi yachashun. Tucuripica Jehová Dios Habacucman ima nishcata ricushpami ñucanchij feta sinchiyachishun.

¿IMAMANTATAJ ÑUCANCHIJ FETA SINCHIYACHINA CANCHIJ?

4. ¿Sinchi feta charishpaca ima laya decisioncunatataj agllashun?

⁴ Tucui punllacunami huaquin decisioncunata agllana canchij. Chaipajca sinchi feta charishcatami ricuchina canchij.  Por ejemplo, amigocunamanta, diversioncunamanta, imata estudianamanta, cazaranamanta, huahuacunata charinamanta, imapi trabajanamantapishmi decisioncunata agllana canchij. Chaimanta: “¿Cai mundo ashallapaj cashcata crishpachu alli decidingapaj esforzarini? ¿Dios ñalla shuj Paraisota ruranapichu tucui shunguhuan crini? ¿O Paraíso tiyanata mana crij gentecuna shinachu causani?” nishpa tapurishunchij (Mateo 6:19, 20; Lucas 12:16-21). Cai Allpata Dios ñalla shuj Paraisota rurana cashcata tucui shunguhuan crishpaca alli decisioncunatami agllashun.

5, 6. ¿Llaquicunata charishpaca imamantataj sinchi feta charishcata ricuchina canchij? (Shuj ejemplomanta parlapai).

⁵ Shinallataj catirashpa llaquichijpi, shuj millai ungüi japijpi o shujtaj problemacunata charishpaca desanimari tucunchijmi. Callaripica chai llaquicunataca ahuantai tucuj layami sintishun. Pero chai llaquicunaca achca tiempo pasajpipish manachari tucuringa. Chaimantami chai llaquicunata ahuantashpa catingapaj, Jehová Diosta cushilla sirvishpa catingapajca sinchi feta charinata minishtinchij (Romanos 12:12; 1 Pedro 1:6, 7).

⁶ Achca llaquicunahuan cashpa, dimastij llaquilla sintirishpaca “Jehová Diosca cai Allpataca mana nunca shuj Paraisota rurangachu” nishpachari yuyashun. Maipica chashna yuyanaca normalmi can. Caipi yuyashun. Achca semanacunata tamiashpa pasacujta ricushpaca “intica mana llujshipai layami ricurin” nishpachari yuyanchij. Pero mana chashnachu can. Intica siempremi llujshinga. Chashnallatajmi yallitaj desanimarishca cashpaca maipica panda yuyaicunata chari tucunchijlla. Pero ñucanchij fe sinchi cajpica Jehová Diospaj nishcacunata pajtachinataca seguromi cashun (Salmo 94:3, 14, 15; Hebreos 6:17-19). Jehová Dios cusha nishcapi confiashpaca paita sirvinatami punta lugarpi churashun.

7. ¿Ima gentecuna shinataj mana cana canchij?

⁷ Predicangapajpish sinchi fetami charina canchij. Paraisomanta huillajpica achca gentecunaca “chai alli huillaicunaca mana ciertochu canga” nishpami yuyancuna (Mateo 24:14; Ezequiel 33:32). Pero chai gentecuna shina ama yuyangapajmi cuidadota charina canchij. Paicuna shina ama cangapajca ñucanchij fetami sinchiyachishpa catina canchij. Ima laya chaita rurana cashcata yachangapajca quimsa yuyaicunata ricushun.

JESÚS ÑUCANCHIJMANTA HUAÑUSHCATA YUYARISHUNCHIJ

8, 9. ¿Jesús ñucanchijmanta huañushcataca imamantataj yuyarina canchij?

⁸ Jesús ñucanchijmanta huañushcata yuyarishpami ñucanchij feta sinchiyachishun. Jesús huañushcamantami Jehová Diosca pai tucui nishcacunata pajtachi tucunga. Chaimantami Jehová Diospish, Jesuspish ñucanchijta quishpichingapaj imallata rurashcapi yuyana canchij. Chashnami shamuj punllacunapi shuj Paraíso tiyanata, chaipi huiñaita causai tucushcatapish tucui shunguhuan crishun. ¿Imamantataj chaita ninchij?

⁹ Jehová Diospish, Jesuspish ñucanchijta quishpichingapaj imallata rurashcapi yuyashunchij. Jehová Diosca paipaj shujlla Churi Jesustaca achcatami cꞌuyarca, paihuanca dimastij allimi apanacurca. Shinapish Diosca ñucanchijmanta huañuchunmi Jesustaca shuj jucha illaj runa shina cai Allpapi huacharichun cacharca. Jesusca cai Allpapica achca llaquicunata apashpami llaquinaita huañurca. Pero caipi yuyashun: ¿Jehová Diosca paipaj Churi yangamanta chashna  huañuchunchu saquirca? ¿Ñucanchijcuna ashalla huatacunata alli causachunchu paipaj Churi huañuchun saquirca? Mana, Jehová Diosca gentecuna para siempre cushilla causachunmi paipaj Churi chashna llaquinaita sufrishpa huañuchun saquirca (Juan 3:16; 1 Pedro 1:18, 19). Paipaj Churipaj valishca causaita cushcamantami cai Allpata shuj Paraisota rurangapajca tucuita ruranga.

JEHOVÁ DIOSPAJ PODERPI YUYASHUNCHIJ

10. Efesios 3:20-pi nishca shinaca ¿Jehová Diosca imatataj rurai tucun?

¹⁰ Jehová Diosca achca podertami charin. Chaipi yuyashpami ñucanchij feta ashtahuan sinchiyachishun. Paica pai tucui imata nishcata pajtachingapajmi poderta charin. Gentecunapaj yuyaipica Paraisopi huiñai huiñaita causanaca shuj muscui shinallami ricurin. Pero Jehová Diosca tucui poderta charij cashcamantami gentecuna mana rurai tucushcata pajtachinga (Job 42:2; Marcos 10:27). Diosca ñucanchij yuyashcatapish yallimi rurai tucun (Efesios 3:20-ta liyipai).

11. Jehová Dios nishca huaquin promesacunamanta parlai (“ Mana pajtarina laya cashca promesacunatami Jehová Diosca pajtachirca” nishca recuadrota ricui).

¹¹ Diosca ñaupa punllacunapi paita sirvijcunamanmi mana pajtaripaj laya ricurijpipish huaquin promesacunata rurarca. Abrahanman, Saramanca ña mayorllacuna cajpipish “shuj huahuatami charinguichij” nirca (Génesis 17:15-17). Shinallataj Abrahanmanca “cambaj huahua huahuacunamanmi Canaán llajtata cusha” nircami. Pero Abrahanpaj huahua huahuacunaca achca huatacunatami Egipto llajtapi esclavocuna shina causarcacuna. Paicunaca Jehovapaj promesa mana nunca pajtarina cashcatami yuyashcangacuna. Shinapish Jehovapaj promesaca pajtarircami. Achca huatacuna qꞌuipaca Jehová Diosca Elisabettaca ña mayorlla cajpimi shuj huahuata charina cashcata huillarca. Shinallataj Diosca María shuti solteramanmi Diospaj Churipaj mama cana cashcata huillarca. Chashnami Edén huertapi huaranga huaranga huatacuna huashaman Jehová imata nishcaca pajtarina carca (Génesis 3:15).

12. Josué 23:14, Isaías 55:10 y 11-pi nishca shinaca ¿Jehová Diosca imallata pajtachingapajtaj poderta charin?

¹² Jehová Diospaj promesacuna ima shina pajtarishcata ricushpaca pai achca poderta charishcatami cuentata cunchij. Chaita ricushpami cai Allpata shuj Paraisota ruranata tucui shunguhuan crinchij (Josué 23:14; Isaías 55:10, 11-ta liyipai). Chashnami Dios cusha nishca Paraíso mana shuj muscuilla cashcataca shujtajcunaman intindichingapaj listos cashun. Jehová Diosca mushuj jahua pachamanta, mushuj allpamanta parlashpaca: “Cai shimicunaca crinalla, mana llulla shimicunami can” nircami (Apocalipsis 21:1, 5).

JEHOVÁ DIOSTA SIRVINA YUYAILLA CASHUNCHIJ

13. ¿Tandanacuicunapi cashpaca ima shinataj ñucanchij feta sinchiyachinchij?

¹³ Jehová Diospajman ashtahuan cꞌuchuyashpaca ñucanchij fetami sinchiyachishun. Por ejemplo, tandanacuicuna ima shina ñucanchijta ayudashcapi yuyashun. Anna b shuti panica achca huatacunatami tiempo completopi sirvishca. Paica: “Tandanacuicunaca barcota charicuj fierro shinami ñuca feta sinchiyachin. Yachachij turicuna mana tucuipi alli yachachijpipish, ima mushuj yuyaita mana yachachijpipish tandanacuicunapi Bibliamanta valishca yuyaicunatami siempre uyani. Chashnami ñuca feta sinchiyachini”  ninmi. Huauqui panicunapaj comentariocunatapish uyashpami ñucanchij feta sinchiyachinchij (Romanos 1:11, 12; 10:17).

14. ¿Predicanaman llujshishpaca ima shinataj ñucanchij feta sinchiyachinchij?

¹⁴ Shinallataj predicanaman llujshishpami ñucanchij fetaca sinchiyachinchij (Hebreos 10:23). Bárbara shuti panica 70 huatacunatami ña testigo de Jehová can. Paica: “Predicanaman llujshinami ñuca feta siempre sinchiyachishca. Jehová Diosmanta pai cusha nishca promesacunamanta shujtajcunaman parlashpaca ñuca fe ashtahuan sinchi tucujtami cuentata cuni” ninmi.

15. ¿Bibliata estudianaca ima shinataj ñucanchij feta sinchiyachin?

¹⁵ Bibliata estudiashpami ñucanchij feta ashtahuan sinchiyachishun. Ima shina caita ruranata ricushun. Susan shuti panica: “Shuj horariota ruranami achcata ayudan. Domingocunapica caishuj semanapajmi Huillaj revistata estudiani. Cutin lunescunapi, martescunapica chaupi semanapi tiyaj tandanacuipajmi allichirini. Cutin shujtaj punllacunaca ñuca agllashca tematami estudiani” ninmi. Cai horariota pajtachishcamantami pani Susanpaj feca ashtahuan sinchi tucushpa catin. Cutin Irene shuti panica ña achca huatacunatami central mundialpi sirvin. Bibliapi tiyaj profeciacunata estudianami paipaj fe ashtahuan sinchiyarichun ayudashca. Paica: “Jehová Dios nishca profeciacuna tucuipi pajtarijta ricushpami mancharishca saquirini” ninmi. c

“CHAICA PAJTANGAMI”

16. ¿Jehová Dios, Habacucman nishca shimicunata yachashpaca imatataj intindinchij? (Hebreos 10:36, 37).

¹⁶ Jehová Diosta sirvijcunamanta maijancunaca achca huatacunatami cai millai mundo ña tucurichun shuyacuncuna. Huaquincunaca “cai millai mundoca ñami tucurina horas can” nincunami. Jehová Diosca paita sirvijcuna  ima laya sintirishcataca intindinmi. Chaimantami profeta Habacucmanca: “Muscuipi shina ricushcacunaca asha huatacunata qꞌuipayashpapish, utcami tucuringa, mana llullangachu. Qꞌuipayajpipish chaparacuilla, shamungami mana uniyangachu, chaica pajtangami” nirca (Habacuc 2:3). ¿Cai shimicunaca cunan punllacunapipish ñucanchijta animai tucunchu? Ari, Jehová Diosca apóstol Pablomanca Habacuc quillcashca shimicunata shinami ñucanchijpajpish quillcachirca. Chai shimicunata yuyarishpami Jehová nishca promesa mana uniyana cashcata, pajtarinataj cashcatapish seguros canchij (Hebreos 10:36, 37-ta liyipai).

17. ¿Jehová Dios Habacucman cushca consejotaca ima shinataj shuj panica catirca?

¹⁷ Jehová Diosta sirvijcunamanta maijancunaca achca huatacunatami chaparashpa causacushcacuna. Louise shuti panimanta parlashun. Paica 1939 huatapimi Jehová Diosta sirvi callarirca. Paica: “Ñucaca manaraj 18 huatacunata charijpimi Armagedonca ña chayamunga nishpami yuyarcani. Pero mana chaica pasarcachu. Tucui cai huatacunapica Noemanta, Abrahanmanta, Josemanta, Jehová Diosta sirvij shujtaj runacunamanta yachanami achcata ayudashca. Paicunaca Jehová Dios nishcacuna pajtarijta ricungapajca achca huatacunatami pacienciahuan shuyarcacuna. Paicuna shinami Dios cusha nishcacuna pajtaringacamaca chaparashpa causana canchij. Chashnami Paraíso Allpata chasquina yuyailla causashun” ninmi. Achca huatacunata Diosta sirvijcunaca seguromi chashnallataj yuyancuna.

18. ¿Imacunallata ricushpataj Jehová Dios cai Allpata shuj Paraisota ruranata yachanchij?

¹⁸ Cai Allpaca mana shuj Paraíso canchu. Pero chaita manaraj ricushpapish shuj Paraíso tiyanataca mana dudanachu canchij. Caipi yuyashunchij. Achca huaranga huatacuna huashamanca estrellacuna, yuracuna, animalcuna, gentecunapish manaraj tiyarcachu. Shinapish tucui chaicunataca Jehová Diosmi rurai tucurca (Génesis 1:1, 26, 27). Chai shinallatajmi cai Allpapi shuj Paraisota manaraj ricujpipish Jehová Diosca chaita pajtachi tucunga. Chaipimi ñucanchijca huiñai huiñaita causashun, alli saludtami charishun. Paraíso Allpaca Jehová agllashca punllapimi tiyai callaringa (Isaías 65:17; Apocalipsis 21:3, 4).

19. ¿Imata rurashpataj ñucanchij feta sinchiyachishun?

¹⁹ Cai Allpapi Paraíso tiyangacamaca ñucanchij fetami sinchiyachishpa catina canchij. Chaipajca Jesús ñucanchijmanta huañushcata, Dios achca poderta charishcatapish yuyarishunchij. Diosta sirvina yuyaillapish causashunchij. Chaita rurashpaca feta charishcamanta, pacienciata charishcamanta Dios cusha nishcacunata chasquijcunapurapimi cashun (Hebreos 6:11, 12; Romanos 5:5).