1. ¿Diosta sirvijcunaca imatataj tucui shunguhuan crinchij?

 DIOSTA sirvijcunaca Jehová Dios ñucanchijta achcata cꞌuyashcata, ñucanchijta ayudasha nishcatapishmi alli yachanchij (Romanos 8:35-39). Shinallataj Dios yachachishcacunata cazushpa alli causaita charinatapishmi seguros canchij (Isaías 48:17, 18). Shinapish ¿ima llaqui ñapish ricurijpica? Chashna ricurijpipish Jehová Diospimi confiashpa catina canchij

2. a) ¿Ima llaquicunatataj charinchij? b) ¿Chashna llaquicunata charishpaca imatataj tapurinchij?

² Diosta sirvijcunaca tucuicunami chꞌican chꞌican llaquicunata charinchij. Por ejemplo, shuj familiaca paipaj rurashcacunahuan o rimashcacunahuanchari ñucanchijta llaquichicun. Mana cashpaca, ima ungüita charishcamantachari ña mana ñucanchij munashca shina Jehová Diosta sirvi tucunchij. Cutin ima desastre natural tiyashcamantachari achca llaquicunata apacunchij. Contracunapish ñucanchij crishcacunamantaca achcatachari llaquichicun. Cashna laya llaquicunata charishpaca: “¿Imamantataj cai llaquicunaca ñucata japicun? ¿Manachu allicunata ruracuni, imashi? ¿Jehová Diosca ñucataca ña manachu ayudasha nin?” nishpachari tapuringui. Chashna sintirishca cashpapish mana yallitaj preocuparinachu cangui. Diosta achca sirvijcunapishmi chashnallataj sintirishcacuna (Salmo 22:1, 2; Habacuc 1:2, 3).

3. ¿Salmo 34:19-pica imatataj yachachin?

³ (Salmo 34:19-ta liyipai). Cai versopica cashcata rurajcuna llaquicunata charigrishcatami yachachin. Shinallataj chai llaquicunata ahuantachun Jehová Dios ñucanchijta ayudana cashcatapishmi yachachin. ¿Jehová Diosca ñucanchijtaca ima shinataj ayudacun? Ñucanchijca Diosta sirvicushcamantami  cushilla causanchij. Pero Yayitu Diosca llaquicuna ricurinatapishmi ñucanchijman yachachishca (Isaías 66:14). Chaimantami pai cusha nishca bendicioncunata huiñai huiñaicama ñalla charigrishcapi yuyachun animan (2 Corintios 4:16-18). Chai punlla chayangacamaca paica ñucanchij charishca llaquicunata ahuantashpa catichunmi punllanta ayudacun (Lamentaciones 3:22-24).

4. ¿Cai yachaipica imatataj yachashun?

⁴ Cai yachaipica ñaupa tiempopipish, cunan tiempopipish Diosta sirvijcuna ima llaquicunata charishcatami yachashun. Shinallataj ñucanchijcuna Jehová Diospi confiashpa pai ñucanchijtapish manataj saquinatami ricushun (Salmo 55:22). Diosta sirvijcunamanta yachashpaca cashna nishpami tapurina canchij: “¿Ñucapish pai shina llaquicunata charishca cashpaca imatataj ruraiman carcani? ¿Pai shina Diospi ashtahuan confiangapaj, paipaj ejemplota catingapajpish imatataj rurana cani?”.

5. ¿Labanca imata rurashpataj Jacobta llaquichirca? (Página 1-pi tiyaj dibujomanta parlapai).

⁵ Ñaupa tiempopi Diosta sirvijcunaca mana yuyashcapimi achca llaquicunata charircacuna. Jacobpaj causaipi yuyashunchij. Jacobpaj yayaca paitaca: ‘Ñucanchij familiamanta Labanpaj shuj ushushihuanmi cazarana cangui. Labanca Jehová Diosta sirvijmi can. Chaita rurajpica Jehová Diosca cantaca achcatami bendicianga’ nircami (Génesis 28:1-4). Chaimi Jacobca Canaanmanta Labán causashca llajtaman rirca. Labanpaj punta ushushica Leami carca. Cutin Labanpaj qꞌuipa ushushica Raquelmi carca. Jacobca Raquelta cꞌuyai callarishpami paihuan cazarasha nirca. Pero paihuan cazarangapajca Labanpaj siete huatacunatami trabajana carca (Génesis 29:18). Shinapish Labanca Jacobta umashpami paipaj punta ushushi Leahuan cazarachirca. Shuj semana huashaca Raquelhuan cazarachunmi saquirca. Shinapish Jacobtaca paipaj siete huatacunahuan trabajachunmi nirca (Génesis 29:25-27). Ashtahuancarin Labanca Jacobhuan negociocunata ruracushpaca imata pagana cashcataca mana pagajchu carca. Chashnami Jacobca 20 huatacunata achca llaquicunata apashpa causarca (Génesis 31:41, 42).

6. ¿Jacobca ima shujtaj llaquicunatataj charirca?

⁶ Jacobca ashtahuan llaquicunatami charirca. Paica achca huahuacunayujmi carca. Shinapish paipaj huahuacunaca paicunapura mana alli apanacujcunachu carca. Chaimantami Jacobpaj churicunaca paicunapaj huauqui Josetaca esclavota shina cꞌaturcacuna. Shinallataj Jacobpaj churi Simeonpish, Levipish mana allita rurashpami tucui familiatapish, Jehová Diostapish malpi saquircacuna. Jacobpaj huarmi Raquelpish paipaj tucuri huahuata huachashcahuanmi huañurca. Jatun yaricai tiyashcamantacarin Jacobca ña mayorlla cashpapish Egipto llajtapi causanamanmi rina carca (Génesis 34:30; 35:16-19; 37:28; 45:9-11, 28).

7. ¿Jehová Diosca Jacobmanca ima bendicioncunatataj curca?

⁷ Jacobca achca llaquicunata charishpapish Jehová Diospimi feta churashpa catirca. Chaimantami Jehová Diosca paitaca achcata bendiciarca. Por ejemplo, Labán Jacobta cutin cutin umashca cajpipish Jehová Diosca Jacobmanca achca cosascunatami curca. Shinallataj Jacobca paipaj churi Josehuan cutin tupashpami pai mana huañushca cashcata yachaj chayarca. Chaimi Jacobca dimastij cushilla sintirishcanga. Jacobca Jehová Dioshuan alli apanacushcamantami tucui llaquicunata ahuantai tucurca (Génesis 30:43; 32:9, 10; 46:28-30). Pai shinallatajmi ñucanchijpish ima llaquicunata ahuantangapajca Diospaj alli amigos cana canchij.

8. ¿Rey Davidca imatataj rurasha nirca?

⁸ Mandaj Davidca Yayitu Diosta sirvingapajca  pai tucui munashcacunataca mana pajtachi tucurcachu. Por ejemplo, paica Diosta adorana templotami rurasha nirca. Pai chaita rurasha nishcata profeta Natanman huillajpimi Natanca: “Cambaj shungupi imallata yuyarishcataca chaita rurailla. Taita Diosca canhuanmari” nirca (1 Crónicas 17:1, 2). Chai shimicunata uyashpami Davidca achcata cushiyarishcanga. Ashtahuancarin chaita uyashcahuanmi templota rurangapaj tucuita organizai callarishcanga.

9. ¿Davidca llaquirishpalla saquirinapaj randica imatataj rurashpa catirca?

⁹ Shinapish chai tutallapitajmi Jehová Diosca profeta Natantaca Davidpaj randi paipaj churi Diospaj templota shayachigrishcata huillachun cacharca (1 Crónicas 17:3, 4, 11, 12). ¿Chaita yachaj chayashpaca Davidca imatataj rurarca? Paica llaquirishpalla saquirinapaj randica tucui pudishcahuanmi paipaj churi Salomonta apoyarca. Davidca templota shayachichunca minishtishca cullquitapish, minishtishca materialcunatapish tandachingapajmi esforzarirca (1 Crónicas 29:1-5).

10. ¿Jehová Diosca Davidtaca ima shinataj bendiciarca?

¹⁰ Jehová Diosca Davidtaca: ‘Canca ñuca templota mana ruragrishpapish cambaj huahua huahuacunamanta huiñaipaj mandajmi shamunga’ nishpami huillarca (2 Samuel 7:16). Chai mandajca Jesucristomi tucurca. Jesús cai Allpata mil huatacunata mandacui horas Davidca causarishpami chaita yachaj chayashpaca achcata cushiyaringa. ¿Davidpaj causaimantaca imatataj yachai tucunchij? Ñucanchijpish David shinallatajmi Diosta sirvingapajca mana tucui ñucanchij munashcacunata pajtachi tucushun. Shinapish Jehová Diosca ñucanchij mana yuyashcapimi achcata bendicianga.

11. ¿Diospaj Gobierno ima hora mandai callarinata mana yachashpapish Jesusta punta catijcunaca ima bendiciontataj chasquircacuna? (Hechos 6:7).

¹¹ Jesusta punta catijcunaca chꞌican chꞌican jarcaicunatami charircacuna. Por ejemplo, paicunaca Diospaj Gobierno ña mandai callarichunmi shuyacurcacuna. Pero ima hora chashna tucunataca mana alli yacharcacunachu (Hechos 1:6, 7). ¿Chaita mana yachashpapish imatataj rurarcacuna? Paicunaca tucui shunguhuanmi gentecunaman predicana yuyailla causarcacuna. Alli huillaicuna shujtaj llajtacunacama chayacujta ricushpacarin Jehová Dios paicunata bendiciacushcatami intindircacuna (Hechos 6:7-ta liyipai).

12. ¿Jatun yaricai tiyai horasca Jesusta catijcunaca imatataj rurarcacuna?

¹² Chai tiempopica muyundij Allpapimi shuj jatun yaricaipish tiyarca (Hechos 11:28). Chaimi Diosta sirvij yaya mamacunaca familiata mantinina cashcamanta achcata preocuparircacuna. Yaricai tiyashcamantaca jovencunapish: “¿Yayitu Diosta ashtahuan sirvingapajca shuyanachu cani?” nishpachari tapurishcangacuna. Chashna jarcaicunata charishpapish Jesusta punta catijcunaca predicacionpi tucui pudishcahuanmi apoyashpa catircacuna. Paicuna charishca cosascunatapishmi Judeapi caj huauqui panicunaman cujcuna carca (Hechos 11:29, 30).

13. ¿Jatun yaricai tiyai horasca Jesusta punta catijcunaca ima bendicioncunatataj chasquircacuna?

¹³ ¿Chashna esforzarishcamantaca huauqui panicunaca ima bendicioncunatataj chasquircacuna? Ña ricushca shinaca achca huauqui panicunaca minishtirishca cosascunata cushpa, imata rurashpami shujtaj huauqui panicunata ayudarcacuna. Chashna ayudashcamantami paicunaca dimastij cushilla sintirircacuna (Hechos 20:35). Shinallataj chai ayudata chasquij huauqui panicunapish Jehová Dios paicunata cuidacushcatami ricurcacuna (Mateo 6:31-33). Chashna caishuj chaishujhuan ayudanacushcamantami ashtahuan tandalla carcacuna. Jehová Diosca chai llaquicunata ahuantashcamanta, ayudanacushpa catishcamantami paicunataca achcata bendiciarca.

14. a) ¿Bernabepish, Pablopish imataj tucurcacuna? b) ¿Predicanata mana saquishcamantaca ima bendicioncunatataj chasquircacuna? (Hechos 14:21, 22).

 ¹⁴ Huaquin gentecunaca Jesusta punta catijcuna mana yuyashcapimi paicunatapish catirashpa llaquichircacuna. Listra llajtapi Bernabé y Pablo predicacushpa ima tucushcata ricushunchij. Callaripica achca gentecunaca paicuna imata huillashcata uyashpami alli chasquircacuna. Pero chai punllallapitajmi huaquin millai gentecunaca Bernabetapish, Pablotapish yangamanta juchachircacuna. Chaimi achca gentecunaca paicunata alli chasquishca cashpapish paicunapaj contrami tucurcacuna. Chaimantami Pablotaca rumicunahuan shitashpa huañushcami yuyashpa chai llajta canllaman sirijta aisarcacuna (Hechos 14:19). Chashna llaquichishca cajpipish Bernabepish, Pablopish shujtaj ladopi predicanamanmi rircacuna. Chashna predicanata mana saquishcamantami achca gentecunataca Jesusta catijcuna tucuchun ayudarcacuna. Huauqui panicunatapish sinchiyachij shimicunahuanmi animarcacuna. Paicunamanca shuj alli ejemplotapishmi curcacuna (Hechos 14:21, 22-ta liyipai). Bernabepish, Pablopish mana shaicushpa predicanata mana saquishcamantami paicunallataj, shujtaj gentecunapish achca bendicioncunata chasquircacuna. Chai shinallatajmi ñucanchijpish mana saquirishpa, gentecunaman yachachinata mana saquishpaca achca bendicioncunata chasquishun.

15. ¿Huauqui Alexander Macmillanpaj ejemplomantaca imatataj yachai tucungui?

¹⁵ 1914 huata manaraj chayajpica achca huauqui panicunaca 1914 huatapi ñapish jahua pachaman rina cashcatami yuyarcacuna. Huauqui Alexander Macmillan ima tucushcata ricushunchij. 1914 huatamanta septiembre quillapica paica shuj conferenciatami yachachicurca. Chaimi huauqui Macmillanca: “Caica ñuca tucuri discurso cangachari” nirca. Pero mana chashnachu carca. Qꞌuipaca huauqui Macmillanca: “Huaquincunaca 1914 huatapi ñapish jahua pachaman rinatami shuyajcuna carcanchij. Pero chaita shuyashpalla saquirinapaj randica Dios mingashcacunata pajtachishpami ocupados cana carcanchij” nircami. Huauqui Macmillanca chaita pajtachingapajmi esforzarirca. Paica tucui shunguhuan predicashpami catirca. Carcelpi caj huauquicunatapishmi achcata animarca. Ña mayorlla cashpapish tandanacuicunamanca manataj faltarcachu. ¿Paica Diosta sirvinapi ocupado pasashcamantaca ima bendicioncunatataj charirca? 1966 huatapica manaraj huañushpami huauqui Macmillanca: “Ñuca feca mana nunca chiriyashcachu” nirca. Cunan tiempopipish huaquincunaca cai millai mundo tucuringacamaca achca tiempotami shuyacushcanchij. Shinapish huauqui Macmillan shinallatajmi Dios cusha nishcacuna pajtaringacamaca pai mingashcacunata pajtachishpa ocupados cana canchij (Hebreos 13:7).

16. ¿Huauqui Jenningspish, paipaj huarmipish ima llaquicunatataj charircacuna? (Santiago 4:14).

¹⁶ Achca huauqui panicunaca mana yuyashcapimi ungurincuna. Por ejemplo, huauqui Herbert Jenningsca b paipaj huarmihuanmi Ghana llajtapi misionerocuna carcacuna. Chaipica Yayitu Diosta cushillami sirvicurcacuna. Pero tiempo huashaca huauqui Jenningsmanca umapi shuj millai ungüita charishcatami huillarcacuna. Huauqui Jenningsca chashna ungurinataca mana shuyarcachu (Santiago 4:14-ta liyipai). Shinapish paica: “Chaita yachaj chayashpaca Ghana llajtapi sirvinata, achca amigocunatapish saquina cashcatami alli intindircanchij. Shinapish Canadá llajtapi alli  tratamientota chasquingapajmi tucuita allichircanchij” ninmi. Chashna jarcaicunata charijpipish Jehová Diosca paicunataca cushilla sirvishpa catichunmi ayudarca.

17. ¿Huauqui Jenningspaj causaimanta yachashpaca huaquin huauqui panicunaca ima shinataj sintirishcacuna?

¹⁷ Huauqui Jenningspaj causaimanta yachashpami achca huauqui panicunaca animarishcacuna. Shuj panica: “Huauqui Jenningspaj causaimanta yachashpaca achcatami animarircani. Huauqui Jenningsca paipaj saludta cuidangapajmi pai maipi sirvicushcata saquinata decidirca. Chaita ricushpaca ñucapish imata rurana cashcatami intindircani” ninmi. Shujtaj huauquica: “Ñucaca 10 huatacunatami anciano carcani. Pero ñuca umapi shuj millai ungüi japishcamantami anciano canata saquircani. Dimastij llaquilla sintirishcamantami huauqui panicuna Yayitu Diosta ima shina sirvishcamantaca revistacunapica mana liyisha nircani. Pero huauqui Jennings ungushca cashpapish ñaupajman catishcata liyishpaca achcatami sinchiyarircani” ninmi. Ñucanchijpish ñapish ima llaquicuna ricurijpipish chaicunata ahuantashpaca shujtajcunatami sinchiyachi tucushun (1 Pedro 5:9).

18. ¿Nigeria llajtamanta shuj viuda panimantaca imatataj yachanchij? (Fotocunamantapish parlapai).

¹⁸ COVID-19 nishca ungüi tiyai horasca achca huauqui panicunaca chꞌican chꞌican llaquicunatami charishcacuna. Por ejemplo, Nigeria llajtamanta shuj viuda panica ashalla micunahuan, ashalla cullquihuanmi saquirirca. Shuj punllaca chai panipaj ushushica paitaca: “¿Cai ashalla arrozta micushca huashaca imatataj micushun?” nishpami tapurca. Chaimi mamaca: “Ñuca huahua, ña ima micunata, ima cullquitapish ña mana charishcamantami Sarepta llajtamanta viuda shina cana canchij. Cai micunata micushca huashaca Jehová Dios ñucanchijta cuidashpa catinatami tucui shunguhuan crina canchij” nirca (1 Reyes 17:8-16). Chai qꞌuipaca almorzana horas manaraj chayajpica  huauqui panicunaca ishqui semanacunapaj micunacunata saquinamanmi rircacuna. Chaita ricushpami chai panica Jehová Dios paicunata cuidacushcata intindirca. Jehová Diosca chai pani ima shina sintirishcata, imata parlacushcatapishmi alli yacharca. Ñucanchijpish Jehová Diospi tucui shunguhuan confiashpaca pai ñucanchijta ima shina ayudanatami ricushun. Chaimi paipajman ashtahuan cꞌuchuyashun (1 Pedro 5:6, 7).

19. ¿Aleksey Yershov shuti huauquica ima jarcaicunatataj charirca?

¹⁹ Huaquin huatacuna huashamanca huauqui panicunataca catirashpami llaquichi callarishcacuna. Rusia llajtamanta Aleksey Yershov shuti huauquimanta parlashunchij. Paica 1994 huatapimi bautizarirca. Chai huatapajca autoridadcunaca testigo de Jehovacuna Diosta sirvichunca ima jarcaicunata mana churajcunachu carca. Pero huaquin huatacuna huashallami autoridadcunaca chꞌican chꞌican jarcaicunata churai callarircacuna. Huauqui panicunatapishmi catirashpa llaquichi callarircacuna. 2020 huatapica policiacunaca huauqui Alekseypaj huasiman yaicushpa paita juchachingapajmi huaquin cosascunata apashpa rircacuna. Huaquin quillacuna qꞌuipapish paitaca yangamanta juchachishpami carcelpi churasha nircacuna. Ashtahuancarin shuj runaca nij tucushpallami Alekseyhuanca Bibliamanta shuj huatata yalli estudiacurca. Paica huauqui Alekseyhuan imata parlanacushcacunataca tucuitami videocunapi grabarca. Chai videocunatami pruebacunata shina policiacunaman curca.

20. ¿Huauqui Alekseyca Diospajman ashtahuan cꞌuchuyangapajca imatataj rurashca?

²⁰ ¿Huauqui Alekseyca cai tucui llaquicunata ahuantashcamantaca ima bendicioncunatataj charishca? Paica Jehová Diospajmanmi ashtahuan cꞌuchuyashca. Huauqui Alekseyca: “Dios ñucata ayudashcata ricushcamantami cunanca ñuca huarmisitahuanca cutin cutin Yayitu Diosta ayudachun tandalla mañanata yachashcanchij. Shinallataj Bibliapica Diosta sirvijcuna ima shina llaquicunata ahuantashcamantami yachanata munani. Chaita yachashpaca tranquilomi sintirini. Jehová Diospi ashtahuan confianatapishmi yachani” ninmi.

21. ¿Cai yachaipica imatataj yachashcanchij?

²¹ ¿Cai yachaipica imatataj yachashcanchij? Maipica llaquicunaca mana yuyashcapimi ricurin. Shinapish Jehová Dios ñucanchijta ayudanapimi tucui shunguhuan confiashpa catina canchij. Salmo 34:19-pi nishca shinaca Jehová Diosca ñucanchijta ayudangapajca listomi can. Chaimantami llaquicunapi yuyashpalla saquirinapaj randica apóstol Pablo ima nishcata yuyarina canchij. Paica: “Dios poderta cujpimi ñucaca tucuita rurangapaj fuerzata charini” nircami (Filipenses 4:13).