CONGREGACIONPI ima trabajota rurashpa ayudanatachari munanchij. Pero munashpapish manachari chaipi ayudai tucunchij. Ñucanchij munashca trabajopica shujtaj huauquichari sirvicun. Mana cashpaca Dios mingashca trabajotachari saquina tucushca. Tal vez ungushca cashcamanta, cullqui illaj saquirishcamanta, mayorlla cashcamanta, familiata cuidana tucushcamantachari mana ñucanchij munashca shina Diosta sirvi tucunchij. Shinallataj Diospaj organizacionpi cambiocuna tiyashcamantachari Dios mingashca trabajota achca huatacunata pajtachicushpapish chaita saquina tucushcanchij. Chaimantami maipica llaquilla sintirishun. Pero, ¿Diosta cushilla sirvishpa catingapajca imatataj rurana canchij?

Diosca bautizaj Juanmanca huaquin valishca trabajocunatami mingarca. Pero Juanca paipaj causaipi ima cambiocuna tiyanataca mana yuyashcachu canga. Paica carcelpi cashcamantami Dios mingashca trabajotaca mana achca tiempota pajtachi tucurca. Shinapish Diosta cushilla sirvishpami catirca. ¿Imamantataj Diosta cushilla sirvirca? Ñucanchijpish cambiocuna tiyajpipish Diosta cushilla sirvingapajca ¿imatataj rurana canchij?

Jesús huacharishca qꞌuipa huata 29 abril quillapimi Bautizaj Juanca Mesiasta gentecuna chasquichun predicai callarirca. Paica: “Mana alli ruracushcata saquishpa cutirichij. Jahua pachamanta mandanamari ña cꞌuchuyamushca” nishpami huillarca (Mateo 3:2; Lucas 1:12-17). Chashna huillajpica achcacunami caru lugarmanta uyanaman shamurcacuna. Shinallataj taucacunami arrepintirishpa bautizarircacuna. Juanca religionta pushajcuna mana cambiajpi ima tucuna cashcatapishmi mana manchashpa huillarca (Mateo 3:5-12). Huata 29 octubre quillapimi Juanca Jesusta bautizarca. Chaimi Juanpajca tucuimanta yalli valishca carca. Chai punllamantami Juanca Jesús Mesías cashcata crirca. Chaimantami gentecuna Jesusta catichun animarca (Juan 1:32-37).

Dios mingashca trabajota Juan pajtachijta ricushpami Jesusca: “Cai pachapica, Bautizaj Juanta yalli allica shujllapish mana tiyashcachu” nirca (Mateo 11:11). Juanca sumaj trabajocunata chasquishcamantami cushilla sintirirca. Cunan punllacunapish achca huauqui panicunaca  Dios mingashca trabajocunatami cushilla pajtachishcacuna. Por ejemplo, huauqui Terry, paipaj huarmi Sandrapish 50 huatacunatami tucui punllacuna Jehová Diosta sirvishpa causashcacuna. Huauqui Terryca: “Precursor regular, betelita, precursor especial, superintendente de circuito, superintendente de distritomi carcani. Cunanca cutinmi precursor especial cani. Chashnami Yaya Diosca ñucaman sumaj trabajocunata mingashca” ninmi. Diospaj organizacionpi sumaj trabajocunata mingajpica cushillami sintirinchij. Pero cambiocuna tiyajpipish Diosta cushilla sirvishpa catingapajmi esforzarina canchij. Bautizaj Juanpish chaitami rurarca.

Juanca Dios mingashca trabajocunata valichishcamantami cushilla causarca. Por ejemplo, Jesusca bautizarishca qꞌuipaca achca catijcunatami rurarca. Pero Juanpaj catijcunaca ashallami tucurcacuna. Chaimantami Juanpaj catijcunaca preocuparirca. Paicunaca Juantaca: ‘Jesusca bautizacunmari. Tucuicunamari paipajmanca ricuncuna’ nircacunami (Juan 3:26). Chaimi Juanca: “Bodapi amigoca noviohuan cashpa novio rimajta uyashpaca achcatami cushicun. Noviaca noviopajmari, mana amigopajchu. Chashnallatajmi ñucaca noviopaj amigo shina cashpa, chashna nijta uyashpaca achcata cushicuni” nirca (Juan 3:29). Juanca Jesustaca shuj contrata shinaca mana ricurcachu. Shinallataj Jesuspaj trabajo ashtahuan importante cashcamanta, paipaj trabajo mana valishca cashcataca mana yuyarcachu. Ashtahuanpish “noviopaj amigo” canata valorashcamantami cushilla sintirirca.

Juanca Dios mingashca trabajota pajtachina sinchi cajpipish cushillami sintirirca. Por ejemplo, Juanca huacharishca pachamantami nazareo carca. Chaimantami vinotapish mana ubyana carca (Lucas 1:15). Jesusca: “Juan shamushpaca, mana micurcachu. Mana ubyarcachu” nircami. Pero Jesuspish paita catijcunapish mana Nazareo gentecuna shina causarcacunachu (Mateo 11:18, 19). Juanca milagrocunataca nunca mana rurarcachu. Shinapish Jesusta catijcuna milagrocunata rurai tucushcataca allimi yacharca. Juanpaj huaquin discipulocunapish Jesusta catijcuna tucushpami milagrocunata rurarcacuna (Mateo 10:1; Juan 10:41). Juanca imata mana rurai tucushcapi mana yuyarcachu. Paiman mingashca trabajota alli pajtachingapajmi esforzarirca.

Ñucanchijpish Dios mingashca trabajota tucui shunguhuan valichishpaca cushillami causashun. Ñajaman parlashca huauqui Terryca: “Jehová Dios ñucaman mushuj trabajota mingajpica alli pajtachingapajmi esforzarircani. Yayitu Diosta ima shina sirvicushcata yuyarishpami mana imamanta arrepintirini” ninmi.

Dios mingashca trabajota pajtachishpaca “Diospajta paihuan rurajcunami” canchij. Chaita yuyarishpaca ashtahuanmi cushilla sintirishun (1 Corintios 3:9). Caipi yuyashun. Ñucanchij familiaca ñaupa tiempopi tiyaj cosascunatachari charin. Chai cosascunataca pꞌichashpa, allichishpami charinchij. Chaimi huatacuna pasajpipish mushuj shinallataj ricurin. Chashnallatajmi ñucanchijca Diosta sirvina tucuimanta valishca cashcata yuyarina canchij. Chaita rurashpaca huatacuna pasajpipish Diostaca cushillami sirvishpa catishun. Shujtajcunahuanpish mana compararishunchu. Shinallataj Diosca ashtahuan valishca trabajotami shujtajcunaman mingashca nishpaca mana yuyashunchu (Gálatas 6:4).

Juanca Diospaj Shimita ashalla tiempota huillana cashcatami yachashcanga. Pero Dios mingashca trabajota ñapish saquina cashcataca mana yuyashcachu canga (Juan 3:30). Huata 30-pimi Herodesca Juantaca carcelpi churarca. Jesusta bautizashca 6 quillacuna qꞌuipallami cashna tucurca. Carcelpi cashpapish Juanca Diosmantami huillashpa catirca (Marcos 6:17-20). Juanca cambiocuna tiyajpipish cushilla causangapajca Diosta sirvina yuyaillami causarca.

Juanca carcelpi cashpaca Jesús imata ruracushcatami yachaj chayarca (Mateo 11:2; Lucas 7:18). Jesús Mesías cashcataca Juanca tucui shunguhuanmi crirca. Shinapish Mesiasmanta quillcashcacunata Jesús tucuita pajtachingachu nishpami tapurishcanga. Por ejemplo, ¿Mesiasca ñallachu mandanga? ¿Ñucata carcelmanta llujshichingachu?  nishpami tapurishcanga. Juanca Jesús imata ruragrishcataca allimi yachasha nirca. Chaimantami paipaj ishqui catijcunataca: “¿Canchu chai shamuna cashcaca cangui, mana cashpaca shujtajtachu shuyana canchij?” nishpa tapuchun cacharca (Lucas 7:19). Paicuna tigrashpaca Jesús milagrocunata rurashcatami huillarca. Paicunaca: ‘Ñahui mana ricujcunaca ricucunmi, cojocunaca puricunmi, leprahuan cajcunaca alliyanmi, mana uyajcunaca uyacunmi, huañushcacunaca causaricunmi, huajchacunamanpish alli huillaitami Jesusca predicacun’ nishpami huillarcacuna. Caicunata huillajpica Juanca atentomi uyarca (Lucas 7:20-22).

Chai noticiacunata uyashpaca Juanca cushillami sintirirca. Shinallataj Mesiasmanta quillcashcacunata Jesús pajtachicujtami cuenta japirca. Jesusca Juantaca carcelmanta mana llujshichircachu. Shinapish Juanca Dios mingashcata pajtachishca mana denvaldi cashcatami ricurca. Paica chashna laya causaita charishpapish Diostaca cushillami sirvirca.

Juan shina Dios yuyailla causashpaca ima llaquicuna ricurijpipish pacienciahuanmi ahuantashun (Colosenses 1:9-11). Cushilla ahuantangapajca Bibliata liyishcapimi cutin cutin yuyana canchij. Shinami Diospajta rurana valishca cashcata yuyarishun (1 Corintios 15:58, NM). Ñajaman parlashca pani Sandraca: “Punllantami Bibliamanta shuj capitulota liyini. Chashnami ñucallapi yuyanapaj randica Diosta sirvina yuyailla causani” ninmi. Huauqui panicuna Diospaj imalla ruracushcatami yuyaipi charina canchij. Chaita rurashpaca ñucanchijllapi yuyanapaj randica Jehová Dios imallata ruracushcatami mana cungarishun. Sandraca: “Cada quilla JW Broadcasting^® programa tiyashcamantami Diospaj organizacionman ashtahuan cꞌuchuyashcata sintinchij. Dios mingashca trabajocunatapish cushillami pajtachinchij” ninmi.

Bautizaj Juanca Dios mingashca trabajotaca “Eliaspaj espirituhuan, Elías charishca poderllahuantajmi” pajtachirca. Paica Elías shina “tucuipi ñucanchij shinallatajmi” carca (Lucas 1:17; Santiago 5:17). Ñucanchijpish Juan shinallatajmi Dios mingashca trabajota valorana canchij. Shinallataj Diosta sirvina yuyaillami causana canchij. Chaita rurashpaca ima cambiocuna tiyajpipish cushillami Diosta sirvishun.