1. ¿Filipos llajtapi mushuj congregación tiyachunca picunataj ayudarcacuna?

APÓSTOL Pablo, Silas, Lucas, Timoteo huauquicuna Filipos llajtaman chayajpica achca gentecunami Diospaj Shimita uyanata munarcacuna. Cai huauquicunaca chai llajtapi mushuj congregación tiyachunmi ayudarcacuna. Tucui discipulocunami pani Lidiapaj huasipi Diosta adorangapaj tandanacui callarishcangacuna (Hechos 16:40).

2. ¿Mushuj congregacionpi caj huauqui panicunaca ima llaquicunatataj charirca?

² Mushuj congregacionpi caj huauqui panicunaca ñapishmi llaquicunata charirca. Diabloca Jesusta catijcuna ama huillachunmi huaquin contracunata jarcachun churarca. Chaimantami autoridadcunaca Pablota, Silastapish macashpa prezupi churarcacuna. Cayandij punllaca prezumantami llujshichircacuna. ¿Pablo, Silasca prezumanta llujshishpaca imatataj rurarcacuna? Mushuj huauqui panicunatami visitashpa animarcacuna. Paicunata animajpica ¿imatataj rurarcacuna? Diospaj espíritu santo ayudajpimi Jehová Diosta sirvishpa catircacuna (Filipenses 2:12). Chaimantami Pabloca cushilla sintirirca. Qꞌuipaca paipish, Silaspish Timoteondijmi Filipos llajtamanta rircacuna. Pero Lucasca chai llajtapimi saquirirca.

3. Filipenses 1:9 al 11-pi nishca shinaca ¿Pabloca Yaya Diosta mañashpaca imallatataj nirca?

³ 10 huatacuna qꞌuipaca Pabloca Filipos llajtapi saquirij congregacionmanmi shuj cartata quillcarca. Chai cartata liyishpami huauqui panicunata Pablo achcata cꞌuyashcata ricunchij. Pabloca paicunataca Jesús cꞌuyashca shinallatajmi  cancunataca cꞌuyani, cancunataca tigra ricunatami munani nircami (Filipenses 1:8). Shinallataj cancunamantaca Yaya Diostami mañani nircami. Chai mañaipica Pabloca huauqui panicunapaj cꞌuyai ashtahuan mirarichun, imacuna ashtahuan importante cashcata ama cungarichun, shujtajcunata ama pandachichun, jucha illaj cachun, alli granota pꞌucushca shina cachunpishmi Yaya Diosta ayudahuai nirca. Apóstol Pablo mañashcacunaca cunan punllacunapipish alli causachunmi ayudan (Filipenses 1:9-11-ta liyipai). * Cai yachaipimi Pablo imallata mañashcamanta yachashun.

4. a) 1 Juan 4:9, 10-pi nishca shinaca, ¿Jehová Dios ñucanchijta cꞌuyashcamantaca imatataj rurashca? b) ¿Jehová Diostaca mashnatataj cꞌuyana canchij?

⁴ Jehová Diosca achcata cꞌuyashcamantami paipaj Churita ñucanchij juchacunamanta huañuchun cai Allpaman cacharca (1 Juan 4:9, 10-ta liyipai). Dios ñucanchijta chashna cꞌuyashcamantami paita tigra cꞌuyasha ninchij (Romanos 5:8). ¿Yaya Diostaca mashnatataj cꞌuyana canchij? Jesusca shuj fariseotaca: “Cambaj Mandaj Taita Diosta tucui shunguhuan, tucui almahuan, tucui yuyaihuan cꞌuyangui” nircami (Mateo 22:36, 37). Jehová Diostaca mana jahua jahuallachu cꞌuyana canchij. Ashtahuanpish cada punllami shungu ucumanta cꞌuyana canchij. Pabloca Filipos llajtapi causaj huauqui panicunamanca cancunapaj cꞌuyaica ashtahuan mirarichun nircami. ¿Diosta ashtahuan cꞌuyangapajca imatataj rurana canchij?

5. ¿Diosta ashtahuan cꞌuyangapajca imatataj rurana canchij?

⁵ Jehová Diosta cꞌuyangapajca paitami rijsinaraj canchij. Bibliapica: “Maijanpish mana cꞌuyajca, Diostaca manaraj rijsishcachu. Diosca cꞌuyajmari” ninmi (1 Juan 4:8). Apóstol Pabloca Yayitu Diosta ashtahuan cꞌuyangapajca paimantami ‘alli yachana’, pai ima shina yuyashcatapish ‘intindinami’ canchij nircami (Filipenses 1:9). Bibliata yachai callarishpaca Jehová Diosmantami huaquin cosascunata yacharcanchij. Chaimantami paitaca cꞌuyai callarircanchij. Pero Diosmanta ashtahuan yachashpaca paitaca ashtahuanmi cꞌuyarcanchij. Yaya Diosta cꞌuyashpa catingapajca punllantami Bibliata estudiana, chaipi imalla yachashcatapish yuyarina canchij (Filipenses 2:16).

6. 1 Juan 4:11, 20, 21-pi nishca shinaca ¿picunallatataj cꞌuyana canchij?

⁶ Jehová Dios ima shinami ñucanchijta cꞌuyan, shinallatajmi huauqui panicunata cꞌuyana canchij (1 Juan 4:11, 20, 21-ta liyipai). Maipica Jehová Diosta sirvicushcamanta, pai shina cangapaj esforzaricushcamanta huauqui panicunataca cꞌuyashallami ninchijchari. Shinallataj Jesusca ñucanchijta cꞌuyashcamantami paipaj causaita curca. Pai shina cangapajpish esforzaricushcamanta huauqui panicunataca cꞌuyashallami ninchijchari. Pero caishuj chaishuj cꞌuyanacuichij nishpa mandashcata pajtachinaca maipica sinchimi ricurin. Filipos llajtapi tiyaj congregacionhuan ima tucushcata ricushunchij.

7. ¿Evodia y Síntique huarmicunaman Pablo cushca consejomantaca imatataj yachanchij?

⁷ Evodia y Síntique huarmicunaca tandallami apóstol Pablohuan Diosta sirvishca carcacuna. Shinapish paicunapura pꞌiñanacushcamantami chꞌicanyarircacuna. Chaimantami Pabloca paicunapaj shuticunata  cartapi quillcashpa consejota curca. “Shuj yuyailla tucuchunmi rogani” nircami (Filipenses 4:2, 3). Pabloca tucui huauqui panicunamanpishmi: “Ama huashalla parlanacushpa, ama rimanacushpa tucui imatapish alli ruraichij” nirca (Filipenses 2:14). Evodia, Sintiquepish shujtaj huauqui panicunapish cai consejocunata uyashcamantami caishuj chaishuj ashtahuan cꞌuyanacurcacuna.

8. a) ¿Huauqui panicunata cꞌuyanaca imamantataj maipica sinchi can? b) ¿Chai problemacunata mishangapajca imatataj yuyarina canchij?

⁸ Tucuicunami cada punlla pandarinchij. Pero shujtajcunapaj pandarishcallata ricushpaca Evodia y Síntique panicuna shinami problemacunata charishun. Chashna tucujpica shujtajcunata cꞌuyanaca sinchimi canga. Caipi yuyashun. Shuj huauquica Tandanacuna Huasita pꞌichanatachari cungarin. Chaimantachari paihuanca pꞌiñarinchij. Pero cada punlla paipaj pandarishcacunallata yuyarishpaca ashtahuanmi pꞌiñarishun. Chai huauquitaca ña mana tanto cꞌuyashunchu. Ñucanchij congregacionpi cashna shina problemata charishpaca caita yuyarishun. Jehová Diosca ñucanchij juchayujcuna cashcataca allimi yachan. Shinapish tucuicunatami cꞌuyashpa catin. Chaimantami ñucanchijpish Jehová Dios shina shujtajcunata cꞌuyashpa, paicunapaj alli ruraicunata ricuna canchij. Huauqui panicunata cꞌuyangapaj esforzarishpaca ashtahuanmi tandalla sintirishun (Filipenses 2:1, 2).

9. ¿Pabloca Jesusta catijcunamanca ima importante cosascunatataj ama cungaringuichij nirca?

⁹ Pabloca Diospaj espirituta charishcamantami Jesusta catijcunamanca: ‘Imacuna ashtahuan importante cashcata ama cungarichij’ nirca (Filipenses 1:10, NM). ¿Cai importante cosascunaca maijantaj can? Diospaj shutita jatunyachina, Diospaj munai pajtarichun ayudana, congregacionpi tandalla cana (Mateo 6:9, 10; Juan 13:35). Ñucanchij causaipi caicunata pajtachishpaca Jehová Diosta cꞌuyashcatami ricuchicunchij.

10. ¿Diospaj ñaupajpi jucha illaj shina ricuringapajca imatataj rurana canchij?

¹⁰ Pabloca “jucha illaj cachun” nircapishmi. Caica mana nisha ninchu Jehová Dios shina jucha illaj cana cashcata. Pero Diostapish shujtajcunatapish ashtahuan cꞌuyashpa, imacuna ashtahuan importante cashcata mana cungarishpaca, Diospaj ñaupajpi jucha illaj shinami ricurishun. Ashtahuancarin huauqui panicunata cꞌuyashpaca paicunata mana pandachishunchu.

11. ¿Jesús nishca shinaca shujtajcunataca imamantataj mana pandachina canchij?

¹¹ Shujtajcunataca mana pandachinachu canchij. Pero maipica ricushcacunahuan, uyashcacunahuan, churarishcacunahuan, hasta ima agllashca trabajohuanmi shujtajcunata pandachi tucunchij. Chaicunata rurashpaca ima juchataca mana ruracunichu nishpachari yuyashun. Shinapish ñucanchij agllashca decisioncunahuan shujtajcunata pandachishpaca mana allitami ruracunchij. Jesusca paita catijcunata pandachijpica, “maijan cajpipish burrohuan cutana rumita cungapi huatashpa, mama cuchapi ucujta shitanami alli canman” nircami (Mateo 18:6).

12. ¿Shuj cusa huarmi precursorcunamantaca imatataj yachanchij?

¹² Catij ejemplopi yuyashun. Congregacionpica shuj cusa huarmimi cunanlla bautizarishca carca. Chai cusa huarmica mana tucuita rurachun saquij familia ucupimi huiñashcacuna carca. Chaimantami paicunaca cinepi peliculacunata ricunaman rinaca  mana allichu can nishpa yuyajcuna carca. Shuj cutinca shuj cusa huarmi precursorcunami cinepi peliculata ricunaman rishcacuna carca. Chaita yachaj chayashpami cunanlla bautizarishca cusa huarmica mancharircacuna. Cai precursorcunaca paicunata ama pandachingapajca ¿imatataj rurarcacuna? Cunanlla bautizarishca cusa huarmi Yaya Dios yachachishcacunapi ashtahuan sinchiyangacamami cinemanca ña mana rircacuna (Hebreos 5:14). Shinami cai precursorcunaca ruraicunahuan cꞌuyashcata ricuchircacuna (Romanos 14:19-21; 1 Juan 3:18).

13. ¿Ima shinataj shujtajcunata juchapi urmachun pandachi tucunchijman?

¹³ Shujtajcunataca juchapi urmachunmi pandachi tucunchij. Caipi yuyashun. Bibliamanta yachacujca tragota ubyana viciotami saquishca. Chaimantami chai viciopi cutin ama urmangapaj ni imata mana ubyana cashcata alli yachan. Paipaj causaipi achca cambiocunata rurashpami bautizarin. Pero shuj punllaca shuj huauquimi paita, shujtaj huauqui panicunatapish paipaj huasiman invitan. Chaipimi huasiyuj huauquica tragota ricuchishpa: “Canca ñami bautizado cangui, ubyailla. Diospaj espiritutapishmi charingui. Yuyari, canllataj jarcarishpaca ashallatami ubyai tucungui” nin. Cai huauquipaj consejota uyashpaca cunanlla bautizarishca huauquica machana viciopimi cutin urmai tucun. Chaica llaquimi canman.

14. Filipenses 1:10-pi nishcacunata pajtachingapajca ¿imamantataj tandanacuicunaman rina canchij?

¹⁴ Tandanacuicunapica Filipenses 1:10-pi nishca consejocunata pajtachinatami  yachanchij. Por ejemplo, tandanacuicunapica Diospaj imacuna importante cashcatami yuyarinchij. Shinallataj Diospaj ñaupajpi jucha illaj shina ricuringapaj pai munashcata rurana cashcatami yachachin. Shujtajcunata cꞌuyashcamanta paicunapaj allicunata rurana cashcatapishmi yachachin (Hebreos 10:24, 25). Huauqui panicuna ñucanchijta animajpica Yayitu Diosta, paicunatapishmi ashtahuan cꞌuyashun. Shungumanta cꞌuyashpaca huauqui panicunataca mana pandachishunchu.

15. Alli granota pꞌucungapajca ¿imatataj rurana canchij?

¹⁵ Apóstol Pabloca Filipos llajtapi causaj huauqui panicuna ‘alli granota pꞌucushca shina allita rurachunmi’ Jehová Diosta mañarca (Filipenses 1:11, NM). Yaya Diosta, huauqui panicunatapish cꞌuyashpami allita ruracunchij. Shinallataj Pabloca huauqui panicunataca: “Cai pachapi achijyachijcuna shina achijyachichij” nircami (Filipenses 2:15). Jesuspish paita catijcunamanca “cancunaca cai pachapaj luzmi canguichij” nircami (Mateo 5:14-16). Ashtahuancarin “cai pachapi tiyaj tucui llajtacunapi” predicachun, yachachichunmi mandarca (Mateo 28:18-20; Hechos 1:8). Caicunata pajtachishpaca ‘alli granota’ pꞌucuj shinami cashun.

16. Filipenses 1:12 al 14-pi nishca shinaca cai pachapi achijyachijcuna cangapajca ¿imatataj rurana canchij? Página 1-pi tiyaj fotota ricui.

¹⁶ Diosta sirvijcunaca cai pachapi achijyachijcuna shinami cana canchij. Chaipajca jarcaicuna ricurijpipish Diospaj Shimitami huillana canchij. Apóstol Pabloca chaitami rurarca. Paica Filipos llajtaman cachangapaj cartata quillcacushpaca Roma llajtapimi carcelpi carca. Pero carcelpi cashpapish paita visitajcunaman, paita cuidajcunamanmi Diosmanta cushilla huillaj carca. Paipaj alli ejemplomi huauqui panicuna Diospaj Shimita  mana manchashpa huillachun animarca (Filipenses 1:12-14-ta liyipai; 4:22).

17. ¿Huaquin huauqui panicunaca jarcaicuna ricurijpipish predicashpa catingapajca imatataj rurancuna?

¹⁷ Achca huauqui panicunapish Pablo shinallatajmi Diosmanta mana manchashpa huillacuncuna. Pero huaquin llajtacunapica huasin huasin, callecunapi Diosmanta huillachunca mana saquincunachu. Chashna jarcajpipish cai huauqui panicunaca ima shina huillanatami ricuncuna (Mateo 10:16-20). Diosmanta huillachun mana saquij shuj llajtapica shuj superintendente huauquica: “Cada publicadorcunami cancunapaj huillana lugarllapitaj predicana canguichij. Por ejemplo, cancunapaj familiacunaman, vecinocunaman, escuelapi, trabajopi, rijsishcacunamanpish huillaichij” nircami. Ishqui huata qꞌuipaca chai llajtapi tiyaj congregacioncunaca achcami mirarirca. ¿Cai ejemplomantaca imatataj yachanchij? Ñucanchij causan llajtapi Diosmanta huillachun saquijpica tucui laya huillangapajmi esforzarina canchij. Jehová Diosmi ima jarcaicunata charijpipish mana manchashpa huillachun fuerzata cushpa ayudanga (Filipenses 2:13).

18. ¿Imacunata rurangapajtaj esforzarina canchij?

¹⁸ Cunan punllacunapish Apóstol Pablo Filipos llajtaman cachashca consejocunatami cazuna canchij. Chaipajca imacuna ashtahuan importante cashcatami mana cungarina canchij. Shinallataj jucha illaj shina cangapajmi esforzarina canchij. Shujtajcunatapish mana pandachinachu canchij. Alli grano pꞌucuj shinami allita rurana canchij. Caicunata rurashpaca huauqui panicunatami ashtahuan cꞌuyashun. Shinallataj Jehová Diospaj shutitapishmi jatunyachishun.