1. ¿Diosta sirvijcunaca huiñai causaita charingapajca imatataj rurashpa catina canchij?

DIOSTA achca huatacunata sirvishpapish o asha huatacunata sirvishpapish huiñai causaita japingapajmi shuj carrerapi callpacuj shina canchij. Chaimantami Diosta sirvishpa catina canchij. Filipos llajtapi causaj huauqui panicunaman cachashca cartami cai carrerata mishachun ayudanga. Ñaupa punllacunapipish achca huatacunata Diosta sirvijcunami Pablopaj consejocunata chasquircacuna. Diosta alli sirvicujpipish carrerapi callpacuj shina ñaupajman catichunmi Pabloca animarca. “Japina cashcata” japingapaj paipaj ejemplota catichunpishmi animarca (Filipenses 3:14).

2. ¿Filipos llajtaman Pablo cushca consejocunaca imamantataj alli carca?

² Filipos llajtapi causaj huauqui panicunaca callari punllacunamantami huaquin jarcaicunata chꞌimbapurarcacuna. Chaimi Pablopaj consejocunaca paicunata animarca. Huata 50-pi Pablo, Silas Filipos llajtaman chayajpimi cai sinchi jarcaicunaca callarirca (Hechos 16:9). Chai llajtapi Pablo, Silas huillacujpimi Lidia huarmica Diosmanta yachai callarirca. Diosmi alli huillaicuna paipaj shunguman yaicuchun ayudarca (Hechos 16:14). Asha punllacuna huashallami Lidia huarmipish paipaj huasi ucu familiapish bautizarirca. Pero Diabloca caita ricushpami achcata pꞌiñarirca. Chaimantami chai llajtapi causaj huaquin cꞌaricunaca: “Gentecunatami pandachicun” nishpa Pablota, Silasta sirijta aisashpa mandajcunapaj ñaupajman aparcacuna. Chaimi paicunataca macashpa carcelpi churarcacuna. Filipos llajtamantapish richij nircacunami (Hechos 16:16-40). Chaita rurajpipish Pablo, Silasca  Diosta sirvinataca manataj saquircacunachu. Paicunapaj alli ejemplota ricushpami Filipos llajtapi caj mushuj congregacionca Diosta sirvishpa catircacuna.

3. a) ¿Pabloca ima yuyaillataj causarca? b) ¿Ima tapuicunamantataj yachashun?

³ Pabloca Diosta sirvinataca manataj saquircachu (2 Corintios 4:16). Paica huañuna horascamami huiñai causaita charina yuyailla causarca. ¿Pablomantaca imatataj yachanchij? ¿Llaquicunata ahuantangapajca picunamantataj yachai tucunchij? Diosta sirvishpa catingapajca ¿imamantataj ñucanchij shuyacushcata manataj cungarina canchij? Cai yachaipimi cai tapuicunata yachashun.

4. ¿Pabloca prezupi cashpapish imatataj rurarca?

⁴ Pabloca Roma llajtapi prezu cashpapish Filipos llajtapi caj huauqui panicunamanmi shuj cartata escribirca. Shinapish Diospaj Shimitaca gentecunaman mana huillai tucurcachu. Pero paita visitajcunamanmi predicaj carca. Caru llajtapi caj congregacioncunamanpishmi cartacunata escribishpa cachaj carca. Cunan punllacunapish achca huauqui panicunaca ungushca, mayorlla cashcamantami shujtajcunamanca mana predicai tucuncuna. Pero paicunata visitajcunamanmi Diospaj Shimimanta huillancuna. Shinallataj animachij cartacunata escribishpami mana visitai pudishca gentecunapajpish cachancuna.

5. Filipenses 3:12 al 14-pi nishca shinaca huiñai causai yuyailla cangapajca ¿Pabloca imatataj rurarca?

⁵ Pabloca ñaupa ima allicunata, ima mana allicunata rurashcamanta chai yuyaillaca mana causarcachu. Ashtahuanpish “huashaman saquirishcataca cungarishpami” huiñai causaita charingapaj Diosta sirvishpa catirca (Filipenses 3:12-14-ta liyipai). Pabloca judiocunapurapi rijsishca, yachaj cashcamantami Diosta sirvinamantaca caruyai tucurca. Pero “tucui chaicunataca yangataj cashcata” shinami ricurca (Filipenses 3:3-8). Shinallataj Jesusta catijcunata catirashpa llaquichishcata yuyarishcamantami Diosmanta caruyai tucurca. Pero cai yuyaicuna paita mishachunca mana saquircachu. Ashtahuanpish Pabloca azutishca, rumicunahuan shitashca, carcelpi churashca, yacupi casi huañushca, yaricaihuan, yacunaihuan, churana illaj cashpapish Diosta sirvinataca manataj saquircachu. Paica chaita rurashpapish ñami tucuita rurarcani nishpaca mana yuyarcachu (2 Corintios 11:23-27). Ñucanchijpish Pablo shinallatajmi Diosta sirvinataca manataj saquina canchij.

6. ¿Imalla saquishca cosascunatataj cungarina canchij?

⁶ Pablo shina huashaman saquishcacunata cungarinaca maipica sinchimi can. Ñaupa punllacunaman juchata rurashcamantachari llaquilla sintirinchij. Chashna sintirishpaca Jesús huañushcamantami ashtahuan yachana canchij. Imata yachashcatapish yuyarinami canchij. Shinallataj Jehová Diosta mañashpami Jesús ñucanchijta quishpichishcamanta pagui nina canchij. Chashnami llaquirina yuyaicunata saquishun. Ñucanchij juchacunatapish Jehová Dios perdonashcatami yuyarishun. ¿Pablomantaca imatataj ashtahuan yachanchij? Tal vez Diosta ashtahuan sirvingapajmi alli trabajocunata saquishcanchij. Shinapish mana chai trabajota cutin charina yuyaillachu causana canchij. Shinami huashaman saquishcacunata cungarishun (Números 11:4-6; Eclesiastés 7:10). Jehová Diosta sirvingapaj imallata rurashcata, pai ima shina  ayudashcata mana cungarishpami paipajman ashtahuan cꞌuchuyashun. Pero ñami tucuita rurashcani nishpaca mana yuyanachu canchij. Ashtahuanpish Diosta sirvishpami catina canchij (1 Corintios 15:58, NM).

7. 1 Corintios 9:24 al 27-pi nishca shinaca huiñai causaita charingapajca ¿imatataj rurana canchij? Shuj ejemplomanta parlai.

⁷ Jesusca amataj shaicurishpa, ñaupajman catichij nircami. Chaitaca Pabloca allimi intindirca (Lucas 13:23, 24). Pabloca Jesús shinallataj tucui vida Diosta sirvina cashcatami yacharca. Chaimantami paica Diosta sirvinataca shuj carrerahuan chꞌimbapurarca (1 Corintios 9:24-27-ta liyipai). Por ejemplo, callpajcunaca ganana yuyaillami callpancuna. Chaimantami shuj ciudadpi callpacushpaca tiendacunapi o negociocunapi imata cꞌatucujtaca mana ricushpa saquirincuna. Ñucanchijpish huiñai causaita charina yuyaillami causana canchij. Chaipajca Pablo shinami Diosta ashtahuan sirvina canchij. Chashnami carrerapi mishaj shina huiñai causaita charishun.

8. ¿Imacunamantataj Diosta sirvinata saqui tucunchij?

⁸ Ñucanchij shuyacushcacuna mana utca pajtarijpi, fuerza illaj saquirishpa, achca huatacunata llaquicunahuan causashpaca Diosta sirvinatami saqui tucunchij. Diosta sirvijcuna chaicunata chꞌimbapurangapaj imata rurashcata yachashun (Filipenses 3:17).

9. Ñucanchij shuyacushcacuna mana utca pajtarijpica ¿ima shinataj sintiri tucunchij?

⁹ Ñucanchij shuyacushcacuna mana utca pajtarijpi. Dios cusha nishcacuna pajtarichunmi munanchij. Profeta Habacucpish Judá llajtapi millai ruraicuna tucurichunmi munarca. Chaimantami Jehová Diosca Habacuctaca: ‘Chaparacuilla, tucuchishatajmi’ nirca (Habacuc 2:3). Ñucanchij shuyashcacuna mana utca pajtarijpica llaquillami sintiri tucunchij. Hasta desanimari tucunchij (Proverbios 13:12). Por ejemplo, 1914 huata chayajpimi huauqui panicunaca cieloman rinata shuyacurcacuna. Pero maijancunaca  paicuna shuyacushca mana pajtarijpipish ¿imatataj rurarcacuna?

10. Shuj cusa huarmica paicuna shuyacushca mana utca pajtarijpica ¿imatataj rurarcacuna?

¹⁰ Cunanca huauqui Royal, paipaj huarmimantapish yachashun. Huauqui Royalca 20 huatacunata charishpami 1908-pi bautizarirca. Paica 1914 huatapimi cieloman rinata tucui shunguhuan crirca. Chaimantami 1911 huatapica paipaj noviataca: “1914 huatapi ima tucunata allimi yachanchij. Utca cazarashun” nirca. ¿1914 huatapi paicuna shuyacushca mana pajtarijpica Diosta sirvinata saquircacunachu? Mana. Paicunaca Diosta tucui shunguhuan sirvingapajmi dedicarircacuna. Cieloman rinallapica mana yuyarcacunachu. Huañuna horascamami Diosta sirvishpa causarcacuna. Ñucanchijpish Jehová Dios paipaj shutita jatunyachichun, pailla jatun mandaj cashcata ricuchichunmi shuyanchij. Shinallataj pai nishcacunata pajtachichunmi munanchij. Yaya Diosca pai agllashca horaspimi chaitaca pajtachinga. Chaicamaca Diosta sirvishpa catishunchij. Ñucanchij shuyacushcacuna mana utca pajtarijpipish ama desanimarishunchij.

11, 12. Ñaupa shina fuerzata ña mana tanto charishpapish ¿imamantataj Diosta sirvishpa cati tucunchij? Shuj ejemplomanta parlai.

¹¹ Fuerza illaj saquirishpa. Callpaj runaca carrerapi mishangapajmi achca fuerzata minishtin. Pero ñucanchijca fuerza illaj saquirishpapish ñucanchij feta sinchiyachishpami cati tucunchij. Huaquin huauqui panicunaca chaitami rurashpa causancuna (2 Corintios 4:16). Huauqui Arthur Secordmanta yachashun. Paica 55 huatatami Betelpi sirvicurca. Chai tiempopajca 88 huatatami charirca. Paita cuidaj shuj panica cꞌuyaihuanmi: “Canca Jehová Diosta sirvingapajmi achcata esforzarishcangui” nirca. Pero huauqui Arthurca pai imata rurashcallapi yuyashpaca mana causarcachu. Chaimantami asirishpa panimanca: “Ari, chaica ciertomi. Pero ñuca imalla rurashcaca mana tanto importanchu, sino cunanmanta imata ruragrishcami ashtahuan importante can” nirca.

¹² Jehová Diostaca achca huatacunatachari sirvinchij. Pero cunanca ungushca cashcamantachari ña mana tanto sirvi pudinchij. Chashna sintirishpaca mana desanimarinachu canchij. Jehová Diosca ñucanchij imalla rurashcacunata yuyarishpaca cushillami sintirin (Hebreos 6:10). Paica “ñucataca ashallata cꞌuyashcamantami ashallata sirvin o achcata cꞌuyashcamantami achcata sirvin” nishpaca mana yuyanchu. Chaita yuyarishpaca Diosta sirvingapajmi tucui pudishcata rurashun. Shinami paita cꞌuyashcata  ricuchishun (Colosenses 3:23). Paica ñucanchij imallata rurai pudishcataca allimi yachan. Chaimantami mana rurai pudishcataca mana mañan. Chaitaca ama cungarishunchij (Marcos 12:43, 44).

13. a) ¿Huauqui Anatoly paipaj huarmica ima llaquicunatataj chꞌimbapurarcacuna? b) Ñucanchijpish llaquicunata charishpaca ¿ima shinataj paicunapaj ejemplota cati tucunchij?

¹³ Achca huatacunata llaquicunahuan causashpa. Maijan huauqui panicunaca achca huatatami llaquicunata, jarcaicunata ahuantashcacuna. Moldavia llajtamanta huauqui Anatolymanta yachashun. Huauqui Anatolyca paipaj yayata carcelman cachajpica 12 huatacunallatami charirca. Paipaj yayataca Siberia caru llajtamanmi cacharcacuna. Shuj huata huashaca Anatolyta, paipaj mamata, paipaj abuelota abuelatapish Siberia llajtamanmi cacharcacuna. Qꞌuipaca tandanacuicunamanmi ri pudircacuna. Pero 30 kilometrocunatami razu ñanta chaquillahuan rina carcacuna. Chai huashaca huauqui Anatolyca quimsa huatacunatami carcelpi carca. Chaimantami paipaj huarmita, paipaj uchilla ushushita mana ricui tucurca. Achca huatacunata chashna llaquicunata charishpapish paicunaca Diosta sirvinataca mana saquircachu. Anatolyca cunanca 82 huatacunatami charin. Asia centralpi saquirij shuj comité de sucursalpimi sirvicun. Ñucanchijpish Anatoly, paipaj huarmi shina llaquicunata ahuantashpa, tucui pudirishcata rurashpa Yayitu Diosta sirvishunchij (Gálatas 6:9).

14. ¿Cielopi causagringapajca Pabloca imata rurashpataj catina carca?

¹⁴ Apóstol Pabloca huañuna horascama Diosta sirvishpa imata japina cashcataca tucui shunguhuanmi crirca. Paica ungido cashcamantami cielopi causagrinata shuyarca. Pero chaita chasquingapajca Diosta sirvishpami catina carca (Filipenses 3:14). Filipos llajtapi causaj huauqui panicuna Dios cusha nishcata japichunca Pabloca shuj chꞌimbapuraitami churarca. Cunanca chaimanta yachashun.

15. Pabloca romano tucunamanta parlashpaca ¿ima shinataj Filipos llajtapi causaj huauqui panicunata animarca?

¹⁵ Apóstol Pabloca Filipos llajtapi causaj huauqui panicunamanca ñuca causanaca jahua pachapimi can nircami (Filipenses 3:20). ¿Paicunaca Pablo nishcataca imamantataj mana cungarina carca? Chai tiempopica  Roma llajtamanta canaca dimastij valishca shinami ricurirca. * Roma llajtamanta cajcunaca chai llajtapica gobiernocuna mandashcatami cazuna carca. Pero Dios agllashca huauqui panicunaca cielopimi ashtahuan alli causaita charina carca. Chaimantami Pabloca Filipos llajtapi caj huauqui panicunataca: “Cancunataca Cristopaj alli huillaipi nishca shinataj purichunllami rogani” nishpa animarca (Filipenses 1:27). Cunan punllacunapish Dios agllashca huauqui panicunaca jahua pachapi huiñai causaita charingapajmi Diosta sirvishpa caticuncuna. Paicunaca alli ejemplotami ñucanchijman cun.

16. Filipenses 4:6, 7-pi nishca shinaca Paraíso Allpapi huiñaita causasha nijcunapish, jahua cielopi huiñaita causasha nijcunapish ¿imata rurashpataj catina canchij?

¹⁶ Paraíso Allpapi huiñaita causasha nijcunapish, jahua cielopi huiñaita causasha nijcunapish Diosta sirvinataca mana saquinachu canchij. Ima laya causaita charishpapish huashaman saquishcacunata cungarishpami Diosta sirvina yuyailla causana canchij (Filipenses 3:16). Tal vez ñucanchij shuyacushcacunaca manachari utca pajtarin. Ñaupa tiempopi laya manachari fuerzata charinchij. Achca huatacunatachari llaquicunahuan, jarcaicunahuan causacunchij. Chashna cajpipish mana yalli sustarinachu canchij. Ashtahuanpish Jehová Diosta mañashpami ñucanchij ima shina sintirishcata huillana canchij. Chaita rurajpica Yayitu Diosca tranquilo sintirichunmi ayudanga (Filipenses 4:6, 7-ta liyipai).

17. ¿Catij yachaipica imatataj yachashun?

¹⁷ Carrerapi callpaj runaca ganana yuyaillami callpan. Ñucanchijpish callpacuj runa shinami huiñai causaita charingacama Diosta sirvishpa catina canchij. Yaya Diospajta ruranapi tucui pudishcata rurashpaca ashtahuanmi sinchiyarishun. Chashnami Dios cusha nishcacunata japishun. Catij yachaipica Diosta sirvishpa catingapaj imacuna ashtahuan importante cashcatami yachashun (Filipenses 1:9, 10, NM).