1, 2. a) ¿Juchaca imataj can? (“Alli intindishunchij” nishcatapish ricui). b) ¿Juchata mishangapajca imatataj rurana canchij? c) ¿Cai yachaipi, catij yachaicunapipish imatataj yachashun? (Cai revistapi tiyaj “Cꞌuyashca huauqui panicuna” nishca partetapish ricui).

 ¿JEHOVÁ DIOS canta mashnata cꞌuyashcata yachasha ninguichu? Chaita yachangapajca juchamanta, huañuimanta canta quishpichingapaj pai imallata rurashcatami yachana cangui. Juchaca a ñucanchij enemigo shinami can. Juchataca ñucanchijllaca mana mishai tucunchijchu. Tucuicunami punllanta pandarinchij. Ashtahuanpish juchayujcuna cashcamantami huañuna canchij (Romanos 5:12). Shinapish Yayitu Jehová Diospaj ayudahuanmi juchataca mishai tucushun.

² Jehová Diosca gentecuna juchayujcuna cajpipish paipajman cꞌuchuyachunmi ayudan. Paica casi 6.000 huatacunatami gentecunataca ayudacushca. Pero ¿imamantataj ayudashpa catishca? Ñucanchijta cꞌuyashcamanta. Paica Adán, Evata rurashcamantapachami gentecunata cꞌuyashcata ricuchishca. Chaimantami ñucanchijtapish juchata mishachun ayudasha nin. Yayitu Jehová Diosca ñucanchijcuna juchayuj cashcamanta huañuna cashcataca allimi yachan. Pero paica ñucanchijcuna huañuchunca mana munanchu. Ashtahuanpish huiñai huiñaita causachunmi munan (Romanos 6:23). Cai yachaipica cai quimsa tapuicunatami yachashun: ¿Jehová Diosca ñucanchijta ayudangapajca imatataj rurarca? ¿Ñaupa punllacunapi  causajcunaca Jehová Diospaj ñaupajpi alli ricuringapajca imatataj rurarcacuna? ¿Jesusca ñucanchijta quishpichingapajca imatataj rurarca?

¿JEHOVÁ DIOSCA ÑUCANCHIJTA AYUDANGAPAJCA IMATATAJ RURARCA?

3. ¿Adán y Evaca ima shinataj juchayujcuna tucurcacuna?

³ Jehová Diosca punta cꞌarita, punta huarmita rurashpaca cushilla causachunmi munarca. Paicunataca Paraisopi cusa huarmi shina causachunmi churarca. Paicunaca huahuacunata charishpami cai Allpapi jundarina carcacuna. Shinallataj tucui Allpa pacha Edén huerta shina tucuchunmi trabajana carcacuna. Pero Yaya Diosca paicunataca caillata ama rurachunmi mandarca: ‘Ñuca mandashcata mana cazushpaca juchayujcuna tucushpami huañunguichij’ nishpami advirtirca. Adán, Evahuan ima tucushcataca tucuicunami alli yachanchij. Mana cazuj, shuj millai angelmi paicunata pandachishpa juchapi urmachirca. Adán y Evaca Jehová Diospi mana confiashcamantami juchapi urmarcacuna. Paicunaca Jehová Dios ima nishcata mana cazushcamantami yuyajyashpa huañuna carcacuna(Génesis 1:​28, 29; 2:​8, 9, 16-18; 3:​1-6, 17-19, 24; 5:5).

4. ¿Jehová Diosca juchataca imamantataj mana ricunayachin? (Romanos 8:​20, 21).

⁴ Jehová Diosca juchataca manataj ricunayachinchu. Juchami Jehová Diosmanta caruyachishpa ñucanchijtaca huañuiman apan. Chaita yuyarichunmi Jehová Diosca Adán y Eva ima shina juchayujcuna tucushcata Bibliapi quillcachirca (Isaías 59:2). Satanasca Jehová Diostapish, gentecunatapishmi pꞌiñan. Chaimantami Adán y Evata juchapi urmachirca. Paica ñucanchijtapishmi juchapi urmachisha nin. Adán y Evata juchapi urmachijpica Diabloca Jehová Diospaj munai cai Allpapi ña mana pajtari tucushcatami yuyashcanga. Pero paica Jehová Dios yallitaj cꞌuyaj cashcataca mana intindircachu. Jehová Diosca cai Allpapi paipaj munai pajtarichunmi munarca. Chaimantami Adán y Eva juchapi urmajpica chai rato imata ruranata yuyarirca. Chashnami ñucanchijta yallitaj cꞌuyaj cashcata ricuchirca (Romanos 8:​20, 21-ta liyipai). Jehová Diosca Adanpaj huahua huahuacunamanta maijancuna paita sirvinata agllana cashcatami yacharca. Paica chai gentecuna juchamanta, huañuimanta quishpirishpa paipajman cꞌuchuyachunmi ayudasha nirca. Pero ¿paicunataca ima shinataj ayudarca?

5. ¿Jehová Diosca gentecunata ayudangapajca imatataj rurarca? (Génesis 3:15).

⁵ (Génesis 3:​15-ta liyipai). Jehová Diosca Satanasta tucuchinatami huillarca. Shinallataj gentecunamanca shuj esperanzatami curca. Jehová Diosca ‘huarmipaj shuj huahua’ gentecunata ayudagrishcatapishmi huillarca. Chai huahuami Diablota tucuchishpa tucui llaquicunata allichina carca (1 Juan 3:8). Shinapish chai huahuaca achcatami sufrina carca. Diablo talonpi chugrichijpimi chai huahuaca huañuna carca. Jehová Diosca paipaj huahua huañujpica llaquillami sintirigrirca. Pero Jehová Diosca gentecunata quishpichingapajmi paipaj huahua huañuchun saquirca.

ÑAUPA TIEMPOPI CAUSAJCUNACA DIOSPAJMANMI CꞋUCHUYARCACUNA

6. ¿Abelpish, Noepish, shujtaj runacunapish Diospajman cꞌuchuyangapajca imatataj rurarcacuna?

⁶ Huatacuna pasajpica Jehová Diosca juchayuj gentecuna paipajman ima shina cꞌuchuyai tucushcatami intindichirca. Adán y Eva Diospaj contra tucushca qꞌuipaca paicunapaj qꞌuipa churi Abelmi Diospi feta churarca. Abelca Jehová Diosta cꞌuyashcamantami paipajman cꞌuchuyasha nirca. Chaimantami huaquin bachujcitocunata huañuchishpa sacrificiota shina Jehová Diosman curca. ¿Chaita ricushpaca  Jehová Diosca ima shinataj sintirirca? ‘Jehová Diosca Abeltapish, paipaj ofrendatapish allimi chasquirca’ (Génesis 4:4). Jehová Diospi confiaj shujtaj runacunapish chashna laya sacrificiocunata cujpica Jehová Diosca allimi chasquirca. Por ejemplo, Noé runami chaitaca rurarca (Génesis 8:​20, 21). Chai sacrificiocunata chasquishpami Jehová Diosca juchayuj gentecuna paipajman cꞌuchuyai tucushcata ricuchirca. b

7. ¿Abrahanmantaca imatataj yachanchij?

⁷ Abrahanca Jehová Diospimi sinchi feta charirca. Pero Jehová Dios paipaj churi Isaacta sacrificiota shina paiman cuchun mandajpica Abrahanpajca chaita cazunaca sinchimi cashcanga. Shinapish Abrahanca Jehová Diostami cazurca. Pero Isaacta ñalla huañuchigrijpimi Jehová Diosca Abrahantaca jarcarca. ¿Caimantaca imatataj yachanchij? Jehová Diosca gentecunata yallitaj cꞌuyashcamantami paipaj propio Churita sacrificiota shina cugrirca (Génesis 22:​1-18).

8. ¿Israelitacuna cushca sacrificiocunaca imatataj ricuchirca? (Levítico 4:​27-29; 17:11).

⁸ Huatacuna pasajpica Jehová Diosca israelitacunamanca shuj Leytami curca. Chai Leypi nishca shinaca israelitacunaca paicunapaj juchacunamanta perdonashca cangapajca Diosmanmi sacrificiocunata cuna carca (Levítico 4:​27-29; 17:​11-ta liyipai). Chai sacrificiocunaca Jehová Dios gentecunata juchamanta quishpichingapaj shuj ashtahuan valishca sacrificiota cugrishcatami ricuchirca. Jehová Dios yuyachijpimi profetacunaca, ‘huarmipaj huahua huahuacunamanta shuj huahua’ llaquinaita sufrishpa huañuna cashcata huillarcacuna. Chai huahuaca Jehová Diospaj cꞌuyashca Churimi carca. Paitami ovejata sacrificiota cushca shina Jehová Diosca cugrirca (Isaías 53:​1-12). Shinashpaca Jehová Diosca juchamanta, huañuimanta canta quishpichingapajmi paipaj cꞌuyashca Churita cugrirca.

¿JESUSCA GENTECUNATACA IMA SHINATAJ QUISHPICHIRCA?

9. ¿Bautizaj Juanca Jesusmantaca imatataj nirca? (Hebreos 9:22; 10:​1-4, 12).

⁹ 29 huatapimi Bautizaj Juanca Jesusta ricushpaca: “¡Ricuichij, paimari Diospaj Malta Oveja. Paimi cai pachamanta juchata anchuchinga!” nirca (Juan 1:29). Bautizaj Juan chaita nishpaca Jesús Génesis 3:​15-pi parlashca ‘huarmipaj huahua’ cashcatami ricuchirca. Jesusmi sacrificio shina curigrirca. Chashnami gentecunaca juchamanta, huañuimanta quishpiri tucurca (Hebreos 9:22; 10:​1-4, 12-ta liyipai).

10. ¿Jesusca juchayujcunata ‘cayanaman shamushcataca’ ima shinataj ricuchirca?

¹⁰ Jesusca paicunapaj juchacunamanta llaquilla caj gentecunatami ashtahuanca ayudarca. Paica gentecuna juchayujcuna cashcamanta achca llaquicunata charishcatami yacharca. Chaimi: ‘Sano gentecunaca jambijtaca mana minishtincunachu. Ungushcacunami jambijtaca minishtincuna. Ñucaca cashcata rurajcunata cayanamanca mana shamurcanichu. Ashtahuanpish juchayujcunata cayanamanmi shamurcani’ nirca (Mateo 9:​12, 13). Jesusca chai versopi nishcacunatami pajtachirca. Por ejemplo, shuj juchayuj huarmi paipaj huiquicunahuan Jesuspaj chaquicunata maillajpica Jesusca paipaj juchacunatami perdonarca (Lucas 7:​37-50). Shinallataj samaritana huarmi juchata rurashpa causajpipish Jesusca Diosmantami paimanca yachachirca (Juan 4:​7, 17-19, 25, 26). Gentecunaca juchamantami huañunchij. Pero Jehová Diosca cꞌaricunata, huarmicunata, huahuacunata  causachichunmi Jesusmanca poderta curca (Mateo 11:5).

11. ¿Juchayuj gentecunaca imamantataj Jesushuan cashpaca tranquilo sintirircacuna?

¹¹ Jesusca juchata rurashpa causaj gentecunatapishmi cꞌuyaihuan tratarca. Chaimi paicunaca Jesushuan cashpaca tranquilo sintirircacuna (Lucas 15:​1, 2). Jesusca chai gentecuna sinchi feta charishcata ricushpaca paicunatami felicitarca, bendiciarcapish (Lucas 19:​1-10). Shinallataj Jesusca Jehová Dios yallitaj cꞌuyaj, llaquij cashcatami ricuchirca (Juan 14:9). Chaitaca paipaj rimaicunahuan, ruraicunahuanmi ricuchirca. Paica gentecuna juchamanta quishpirichun Jehová Dios ayudasha nishcatami ricuchirca. Jesusca juchayuj gentecuna mana allita ruranata saquishpa paita catichunmi ayudarca (Lucas 5:​27, 28).

12. ¿Jesusca paipaj huañuimantaca imatataj yachachirca?

¹² Jesusca paihuan ima tucuna cashcataca allimi yacharca. Chaimi shuj discípulo paita traicionagrishcata, racu caspipipish huañuna cashcata paipaj discipulocunaman huillarca (Mateo 17:22; 20:​18, 19). Shinallataj Jesusca paipaj causaita cushpa cai pachamanta juchata anchuchigrishcatami yacharca. Chaitaca Bautizaj Juan, shujtaj profetacunapishmi ña huillashca carcacuna. Shinallataj Jesusca pai huañushca qꞌuipa ‘tucui laya gentecuna’ paimanta yachana cashcataca allimi yacharca (Juan 12:32). Juchayuj gentecunaca Jesusmanta yachashpa, paipaj ejemplota catishpami Diospaj  ñaupajpica alli ricuri tucurcacuna. Chaita rurashpallami paicunaca juchamanta quishpiri tucurcacuna (Romanos 6:​14, 18, 22; Juan 8:32). Chaita yachashcamantami Jesusca llaquinaita sufrishpa huañurca (Juan 10:​17, 18).

13. a) ¿Jesusca ima shinataj huañurca? b) ¿Jehová Diosca imamantataj Jesús huañuchun saquirca? (Fotomantapish parlapai).

¹³ Jesustaca shuj alli amigomi traicionarca. Chai qꞌuipaca paipaj enemigocunaca prezu japishpami paita cꞌamircacuna. Chai huashaca cꞌuyaillatami macarcacuna. Soldadocunaca Jesustaca jatun caspipimi clavarcacuna. Chashna huañucushpaca Jesusca llaquillami sintirishcanga. Jehová Diospish chaita ricushpaca yallitajmi llaquirishcanga. Pero paita ayudangapaj poderta charishpapish imata mana rurarcachu. ¿Jehová Diosca paipaj Churita achcata cꞌuyashpapish imamantataj chashna huañuchun saquirca? Ñucanchijta cꞌuyashcamanta. Chaimantami Jesusca: “Diosca cai pachapi causajcunata yallitaj cꞌuyashpami paipaj shujlla Churita curca. Maijanpish paipi feta charijca ama chingarichun, ashtahuanpish huiñai causaita charichunmi curca” nirca (Juan 3:16).

14. ¿Jehová Diosca imamantataj paipaj Churi huañuchun saquirca?

¹⁴ Jehová Diosca paipaj Churita cushpami ñucanchijta achcata cꞌuyashcata ricuchishca. Paica cantapish achcatami cꞌuyan. Chaimantami juchamanta, huañuimanta canta quishpichingapaj paipaj Churi huañuchun saquirca. Chaita ruranaca Yayitu Diospajca sinchimi cashcanga (1 Juan 4:​9, 10). Caipi ricushca shinaca ñucanchij juchayujcuna cajpipish Jehová Diosca paita sirvichunmi ayudasha nin. Ashtahuanpish shamuj punllacunapica ñucanchijta cꞌuyashcamantami juchataca anchuchinga.

15. ¿Jehová Dios ñucanchij juchacunamanta perdonachunca imatataj rurana canchij?

¹⁵ Jehová Dios paipaj Churita sacrificiota shina cushcamantami ñucanchij juchacunamanta perdonashca cai tucunchij. ¿Pero Jehová Dios ñucanchijta perdonachunca imatataj rurana canchij? Bautizaj Juanpish Jesuspish caimanta parlashpaca: “Arrepintirichij, jahua pacha Gobiernoca ñamari chayamucun” nircacunami (Mateo 3:​1, 2; 4:17). Chaimantami Jehová Diospaj perdonta chasquingapaj, paipajman cꞌuchuyangapajpish ñucanchij juchacunamanta arrepintirina canchij. ¿Pero shungumanta arrepintirishca cashcataca ima shinataj ricuchinchij? ¿Juchayujcuna cashpapish Jehová Diosta cushichingapajca imatataj rurana canchij? Catij yachaipimi chai tapuicunamanta yachashun.