Apóstol Pabloca Tesalonicapi caj huauqui panicunamanca: “Maijanpish cai cartapi ñucanchij ima nishcata mana cazujpica paitaca señalanami canguichij” nishpami quillcarca (2 Tesalonicenses 3:14). Ñaupaca “ancianocunami chai mandashcataca pajtachina can” nishpami yuyaj carcanchij. Chaimantami maijan huauqui o pani achca consejocunata chasquishca cashpapish manataj cazusha nijta ricushpaca ancianocunaca paihuan cuidadota charichun huillangapaj congregacionmanca shuj conferenciata cuna carcacuna. Chai punllamantami huauqui panicunaca señalashca huauquihuan o panihuanca ña mana tandanacuna carca.

Shinapish cunanca shuj cambiota rurana cashcatami cuentata cushcanchij. Apóstol Pabloca cada uno mana cazusha nijta señalana cashcatami nicurca. Chaimantami ancianocunaca mana cazusha nijhuan cuidadota charichun congregacionman huillangapajca ña mana shuj conferenciata cuna can. Imamanta chai cambiota rurashcata ricushun.

Pabloca maijan huauqui panicuna Jehová Diospaj mandashcacunata manataj cazusha nishcatami cuentata curca. Chaimi Pabloca “maijanpish mana trabajasha nijca ama micuchun” nishpa huauqui panicunata mandashca carca. Shinapish maijancunaca mantiniringapaj trabajai tucushpapish manataj trabajasha nircacunachu. Shinallataj shujtajcunapaj causaipi satirishpami purijcuna carca. ¿Huauqui panicunaca paicunataca ima shinataj tratana carcacuna? (2 Tesalonicenses 3:​6, 10-12).

Pabloca “paitaca señalanami canguichij” nircami. Griego rimaipi señalanami canguichij nishpaca chai runa maijan cashcata cuentata cushpa ñucanchijtapish ama pandachichun cuidarina cashcatami nicun. Pabloca chai mandashcataca mana ancianocunallamanchu curca. Ashtahuanpish tucui congregacionmanmi curca (2 Tesalonicenses 1:1; 3:6). Chaimantami maijan huauqui o pani Jehová Diospaj mandashcacunata manataj cazusha nishcata cuentata cushpaca cada uno paihuan apanacunata o mana apanacunata decidina carcacuna.

¿Pero señalashca huauquita o panitaca congregacionmanta llujshichishcata layachu tratana carcacuna? Mana. Ashtahuanpish Pabloca ‘shuj huauquita shina paitaca consejashpa catichij’ nircami. Shinashpaca huauqui panicunaca paihuanca tandanacuicunapi, predicacionpimi apanacui tucurcacuna. Pero pugllaicunapi, huauqui panicunahuan divirtiringapaj tandanacuicunapipish paihuanca ña mana tandanacunachu carca. ¿Imamantataj chaita rurana carcacuna? Pabloca “chashnami paica pingai tucunga” nircami. Shinashpaca huauqui panicuna paihuan ña mana tandanacujpica mana cazusha nijca pingai tucushpami cambiai tucurca (2 Tesalonicenses 3:​14, 15).

¿Diosta sirvijcunaca chai mandashcataca cunan punllacunapica ima shinataj cazuna canchij? Puntapica chai huauqui o pani de verdad Bibliapi nishcacunata manataj cazusha nishcatami alli ricuna canchij. Pabloca ñucanchij shina mana yuyajcunamanta o ñucanchij shina concienciata mana charijcunamantaca mana parlacurcachu. Shinallataj ñucanchijta mana alli sintichijcunamantapish mana parlacurcachu. Ashtahuanpish paica cutin cutin consejashca jahua, Diospaj mandashcacunata manataj cazusha nijcunamantami parlacurca.

Chashna laya huauqui o pani ñucanchij congregacionpi tiyashcata cuentata cushpaca a cada unomi divirtiringapaj, pugllangapaj tandanacuicunapi paihuan mana pasanata decidina canchij. Ñucanchij ima decidishcataca ñucanchijhuan causaj familiallahuanmi parlanacuna canchij. Pero shujtaj huauqui panicunahuanca chaimantaca mana parlanachu canchij. Shinallataj chai huauquihuan chai panicunahuanca tandanacuicunapi, predicacionpipish tandanacunallami canchij. Chai huauqui o pani paipaj yuyaita cambiajpica cutinmi ñaupa shina paihuanca tandanacui tucunchij.