1. ¿Jehová Diosca Abrahanmanca imatataj huillarca?

 JEHOVÁ DIOSCA paipaj amigo Abrahanmanca, ‘cambaj huahua huahuacunamantami tucui llajtacuna bendiciashca canga’ nircami (Génesis 15:5; 22:18). Abrahanca sinchi feta charishcamantami Jehová Diospaj nishcacuna pajtarinataj cashcata seguro carca. Shinapish Abrahanca Sarahuanca manaraj huahuacunata charishcacunachu carca. Chai punllacunapica paicunaca 100 y 90 huatacunatami charircacuna (Génesis 21:​1-7). Abrahanca huahuacunata mana chari tucushpapish ‘feta charishcamantami Jehová Dios huillashca shina achca llajtacunapaj yaya canata shuyacurca’ (Romanos 4:18). Abrahán shuyacushcaca pajtarircami. Chaimi pai shuyacushca huahuata charirca. Paitaca Isaac nishpami shutichirca. Pero ¿Abrahanca imamantataj Jehová Diospi tucui shunguhuan confiaj carca?

2. ¿Abrahanca Jehová Diospaj nishcacuna pajtarinataj cashcataca imamantataj seguro carca?

² Abrahanca Jehová Diostaca allimi rijsirca. Chaimantami Jehová Diospaj nishcacuna pajtarinata tucui shunguhuan crirca (Romanos 4:21). Abrahán sinchi feta charishcamantami Jehová Diosca paitaca cashcata rurajta shina ricurca (Santiago 2:23). Shinallataj Romanos 4:​18-pi nishca shinaca Abrahanca sinchi feta charishcamantami Jehová Diospi tucui shunguhuan shuyarca. Cunanca apóstol Pablo esperanzata charinamanta Romanos capítulo 5-pi imata quillcashcatami ricushun.

3. ¿Pabloca imallatataj yachachirca?

³ Pabloca Jehová Diospi shuyashcamanta imamanta mana pingaipi saquirinatami intindichirca (Romanos 5:5). Shinallataj paica tucui shunguhuan shuyashpa catingapaj imata ruranatami yachachirca. Cunanca Romanos 5:1 al 5-pi ima nishcatami yachashun. Cai versocunapi ima nishcata yachacushpaca can charishca esperanza cada punlla ima  shina sinchiyarishpa catishcata yuyai. Caita yachashca qꞌuipaca cambaj esperanzaca ashtahuanmi sinchiyanga. Callaringapajca maijancuna imata shuyacushcatami ricushun. Paicuna chaita shuyacushcamantaca mana pingaipi saquiringacunachu.

4. ¿Romanos 5:​1, 2-pica imatataj yachachin?

⁴ (Romanos 5:​1, 2-ta liyipai). Pabloca Romanos 5:​1, 2-pi nishcacunataca Romapi caj huauqui panicunamanmi quillcarca. Paicunaca Jesusmanta, Jehovamanta yachashca qꞌuipaca paicunapimi feta churarcacuna. Chaimi paicunaca Jesusta catijcuna tucurcacuna. Paicuna sinchi feta charishcata ricushpami Jehová Diosca paicunataca “cashcata rurajcunata” shina ricui callarirca. Shinallataj espíritu santohuanmi shuj esperanzata charichun paicunataca agllarca. Chai huauqui panicunaca paicuna shuyacushca pajtarinataj cashcatami seguros carcacuna.

5. ¿Ungidocunaca ima esperanzatataj charincuna?

⁵ Pabloca Efesopi caj huauqui panicunamanmi ‘jucha illajcuna’ shuj bendicionta chasquina cashcata intindichirca (Efesios 1:18). Shinallataj Colosaspi caj huauqui panicunamanca chai bendicionta maipi chasquinatami nirca. Paica ‘Jahua pachapi cancunapaj huaquichishca bendiciontami shuyacunguichij’ nircami (Colosenses 1:​4, 5). Shinashpaca ungidocunaca causarishca qꞌuipaca jahua pachapi huiñai huiñaita causana esperanzatami charincuna. Paicunaca jahua pachapica Jesushuanmi mandangacuna (1 Tesalonicenses 4:​13-17; Apocalipsis 20:6).

6. ¿Shuj ungido huauquica pai charishca esperanzamantaca imatataj nirca?

⁶ Ungido huauqui panicunaca Jehová Dios paicunaman cugrishca bendiciontaca achcatami valorancuna. Por ejemplo, 1991 huatapica huauqui Frederick Franzca: “Ñucanchij shuyacushcaca pajtaringatajmi. 144.000 ungidocunaca tucuicunami imata shuyacushcata japishun. Chai bendicionta japinaca ñucanchij  yuyashcatapish yalli sumajmi canga” nircami. ¿Achca huatacuna pasajpipish huauqui Franzca ima shinataj sintirishpa catirca? Paica: “Huatacuna pasajpipish ñucanchij esperanzaca valishcami can. Chaimantami chai esperanza pajtarichun huaranga huaranga huatacunata shuyana cashpapish cushicushpa shuyashpa catishun. Cunanca chai esperanzaca ñucapajca ashtahuan valishcami can” nircami.

7, 8. ¿Diosta sirvijcunaca casi tucuicuna ima esperanzatataj charincuna? (Romanos 8:​20, 21).

⁷ Cunan punllacunapi Diosta sirvijcunaca la mayoriami shujtaj esperanzata charincuna. ¿Chai esperanzaca maijantaj can? Chai esperanzataca Abrahanpishmi charirca. Paica Diospaj Reino mandacujpi cai Allpapi huiñai huiñaita causana esperanzatami charirca (Hebreos 11:​8-10, 13). Pablopish chai esperanzamantami parlarca (Romanos 8:​20, 21-ta liyipai). ¿Shamuj punllacunapi sumaj causai tiyanata yachashpaca canca ima shinataj sintirircangui? Por ejemplo, Paraisopi tucuicuna jucha illajcuna tucushpa huiñai huiñaita causanata yachashpaca seguramente cushillami sintirircangui. Shinallataj huañushca gentecuna Paraisopi causarinata yachashpaca sorprendidochari saquirircangui. Shamuj punllacunapi chai bendicioncunata chasquinata shuyacushcamantami cunanca cushilla causangui.

⁸ Jahua pachapi o cai Allpapi huiñai huiñaita causana esperanzata charishcamantami cushilla sintirinchij. ¿Pero tucui shunguhuan shuyashpa catingapajca imatataj rurana canchij? Chaipajca apóstol Pablo nishcacunamantami yachashpa catina canchij. Chashnami yangamanta mana shuyacushcata seguros cashun.

9, 10. ¿Apóstol Pablo shina Jehová Diosta sirvishcamantaca ima llaquicunallata charishun? Romanos 5:3; fotocunamantapish parlapai.

⁹ (Romanos 5:​3-ta liyipai). Apóstol Pablo nishca shinaca llaquicunata ahuantashpaca  shamuj punllacunapi bendicioncunata chasquina cashcatami seguros cashun. Diosta sirvijcunaca llaquicunata charina cashcataca allimi yachanchij. Chaimantami Pabloca Tesalonicapi caj huauqui panicunataca: “Cancunahuan cashpaca cashna llaquicunata apana cashcatami huillaj carcanchij. Cancuna yachashca shinaca chashnami tucushca” nirca (1 Tesalonicenses 3:4). Shinallataj Pabloca Corintopi caj huauqui panicunataca: ‘Ima llaquicunata ñucanchij charishcata cancunapish yachachunmi munanchij. Causanatapish, huañunatapish mana yacharcanchijchu’ nishpami quillcarca (2 Corintios 1:8; 11:​23-27).

¹⁰ Punta siglopi causashca huauqui panicuna shina ñucanchijpish llaquicunata charina cashcataca allimi yachanchij (2 Timoteo 3:12). Canca ¿Jesuspi feta churashcamanta, paita cati callarishcamantaca llaquicunata charishcanguichu? Tal vez cambaj familiacuna, amigocunachari Diosta sirvi callarijta ricushpaca burlarishcangacuna o hasta llaquichishcangacuna. ¿Mana cashpaca tucuipi honrado cashcamantachu trabajopica mana alli tratashcacuna? (Hebreos 13:18). O ¿shamuj punllacunapaj imata shuyacushcata shujtajcunaman parlashcamantachu autoridadcunaca catirashpa llaquichishcacuna? Ima laya llaquicunata apashca cashpapish apóstol Pablo nishcacunapi yuyashpami cushilla sintirishun. ¿Imamanta?

11. ¿Llaquicunataca imamantataj ahuantana canchij?

¹¹ ¿Llaquicunata charishpaca imamantataj cushicunchij? Romanos 5:​3-pica “llaquicunaca ahuantachunmi ayudan” ninmi. Diosta sirvijcunaca tucuicunami llaquicunata apacunchij. Chaimantami chai llaquicunata ahuantangapaj esforzarina canchij. Chaita rurashpallami ñucanchij shuyacushca bendicioncunata chasquishun. Jesusca huaquin gentecunaca rumicunapi urmaj muyucuna shina cashcatami nirca. Paicunaca ‘Diospaj shimita uyashcahuanmi cushicun. Pero jatun llaquicuna japijpi, catirashpa llaquichijpica feta charinata saquinllami’ (Mateo 13:​5, 6, 20, 21). Ñucanchijca chai gentecuna shinaca mana canata munanchijchu. Llaquicunata ahuantanaca maipica sinchimi can. ¿Pero llaquicunata ahuantashcamantaca ima shinataj beneficiarishun?

12. ¿Llaquicunata ahuantashpaca ima shinataj beneficiarishun?

¹² Santiagoca llaquicunata imamanta ahuantana cashcatami nirca. Paica: “Ahuantanata mana saquishpaca alli allichirishcami canguichij. Chashnami tucuipi completo, tucuipi alli canguichij. Shinallataj cancunapajca ima mana illangachu” nircami (Santiago 1:​2-4). ¿Shinashpaca llaquicunataca imamantataj ahuantana cashcanchij? Llaquicunata ahuantashpami pacienciata charinata, sinchi feta charinata, Jehová Diospi confianata yachashun. Pero mana chaillatachu yachashun.

13, 14. ¿Llaquicunataca imamantataj ahuantana canchij? (Romanos 5:4).

¹³ (Romanos 5:​4-ta liyipai). Pabloca “ahuantashpaca Diospaj ñaupajpimi alli nishca cashun” nircami. Shinaca, ñucanchijcuna sufricujta ricushpaca ¿Jehová Diosca cushillachu sintirin? Mana. Ashtahuanpish llaquicunata ahuantacujta ricushpami paica cushilla sintirin. ¿Llaquicunata ahuantashpa Jehová Diosta cushichi tucushcata yachashcamantaca manachu cushilla sintirinchij? (Salmo 5:12).

¹⁴ Abrahanca llaquicunata ahuantashcamantami Diospaj ñaupajpica alli ricurirca. Shinallataj Jehová Diosca paipaj alli amigo cashcamantami Abrahantaca cashcata rurajta shina ricurca (Génesis 15:6; Romanos 4:​13, 22). Ñucanchijca ¿Diospaj obrata rurangapaj esforzarishcallamanta, congregacionpi achca privilegiocunata charishcallamantachu  Diospaj ñaupajpica alli ricurishun? Mana. Ashtahuanpish Diospaj ñaupajpi alli ricuringapajca paitami tucuipi cazuna canchij. Ima llaquicuna shamujpipish ahuantanami canchij. Tucuicunami mashna huatacunata charishpapish, ima llaquita apacushpapish chaita rurangapaj esforzarina canchij. ¿Canca llaquicunata apacunguichu? Caita yuyari: llaquicunata ahuantangapaj esforzarishpaca Diospaj ñaupajpimi alli ricuringui. Jehová Dios cambaj esfuerzocunata ricushpami cushilla sintirin. Chaita yachashcamantami shamuj punllacunapi bendicioncunata chasquina cashcata seguro cangui.

15. a) ¿Pabloca Romanos 5:​4, 5-pica imatataj nirca? b) ¿Romanos 5:​4, 5-ta liyishpaca tal vez imatataj tapurishun?

¹⁵ Apóstol Pablo nishca shinaca llaquicunata ahuantashpaca Diospaj ñaupajpimi alli ricurishun. Pabloca Romanos 5:​2-pica Romapi caj huauqui panicunaca ‘Jehová Dios paicunata jatunyachinata shuyacushcatami’ nirca. Chaita nishca qꞌuipaca Pabloca caitapishmi nirca: “Diospaj ñaupajpi alli nishca cashcamantami shuyashpa catishun. Ñucanchij shuyacushcamantaca mana pingaipi saquirishunchu” (Romanos 5:​4, 5). Chai versocunata liyishpaca, “¿Pabloca Romanos 5:​2-pi Diospi shuyanamanta ña parlashca cashpapish imamantataj chaimanta parlashpa catirca?” nishpachari yuyashun.

16. ¿Bibliapi nishcacuna pajtarinataj cashcataca ima shinataj cri callarircanchij? (Fotocunamantapish parlapai).

¹⁶ Apóstol Pabloca shamuj punllacunapi ñucanchij shuyacushca pajtarinataj cashcata seguros cashpapish chaicunapi ashtahuan cringapaj esforzarina cashcatami yachachisha nirca. Por ejemplo, cai Allpa shuj paraíso tucujpi huiñai huiñaita cushilla causai tucushcata primera vez uyashpaca ¿ima shinataj sintirircangui? Chai nishcacunaca cambajca mana cripaj layami cashcanga. Pero Jehová  Diosmanta ashtahuan ashtahuan yachashpa catishpa, Bibliapi nishcacunata ashtahuan intindishpaca Diospaj nishcacuna pajtarinataj cashcatami ashtahuan seguro carcangui.

17. ¿Ña bautizarishca cashpapish Diospaj nishcacunapi ashtahuan cringapajca imatataj rurashcangui?

¹⁷ Ña bautizarishca cashpapish Diosmanta yachashpa catishcamantami Jehová Diospaj nishcacuna pajtarinataj cashcata ashtahuan seguro cangui (Hebreos 5:13–6:1). Romanos 5:2 al 4-pi nishca shinaca llaquicunata ahuantashcamantami Diospaj ñaupajpi alli ricuringui. Shinallataj Diospaj shunguta cushichishcamantami paipaj nishcacuna shamuj punllacunapi pajtarinataj cashcata ashtahuan seguro cangui. Chai esperanzata charishcamantami cunanca alli yuyashpa imatapish decidingui, cambaj tiempotapishmi alli utilizangui, cambaj familiatapish alli tratangapajmi esforzaringui.

18. ¿Pabloca imatataj yuyachirca?

¹⁸ Apóstol Pabloca ‘Diospaj ñaupajpi alli nishca cashcamantami shuyashpa catishun’ nishca qꞌuipaca shujtaj sumaj yuyaitami yachachirca. Paica ñucanchij shuyacushca pajtarinataj cashcata seguros cai tucushcatami yachachirca. Chaipajca Pabloca Jehová Dios imata rurasha nishcatami yuyachirca. Paica: “Ñucanchij shuyacushcamantaca mana pingaipi saquirishunchu. Diosca cꞌuyashcata ricuchingapajmi paipaj espíritu santota ñucanchijman cushca” nircami (Romanos 5:5). Shinashpaca ñucanchij shuyacushca pajtarinataj cashcatami tucui shunguhuan crina canchij.

19. ¿Imatataj tucui shunguhuan crinchij?

¹⁹ Tucuicunami Abrahanpi yuyana canchij. Jehová Diosca paimanca imata rurasha nishcatami huillarca. Chai qꞌuipaca Abrahantaca cashcata rurajta shinami ricui callarirca. Shinallataj Abrahanca Diospaj alli amigomi tucurca. Abrahán shuyacushcaca pajtarircami. Chaimantami Bibliapica, “Abrahanca pacienciata ricuchishca huashami Dios cusha nishcataca chasquirca” nin (Hebreos 6:15; 11:​9, 18; Romanos 4:​20-22). Ñucanchijpish Abrahán shina Jehová Diosta tucuipi cazushpaca ñucanchij esperanza pajtarinataj cashcatami seguros cashun. Ñucanchij shuyacushca pajtarijpica sumaj bendicioncunatami chasquishun. Chaita yachashcamantami cushilla sintirinchij (Romanos 12:12). Pabloca “shuyana yuyaita cuj Diosca paipi confiashcamanta cushicuitapish, sumaj causaitapish cancunaman cuchun. Chashnami cancunaca espíritu santo poderta cujpi tucui shunguhuan shuyashpa catinguichij” nircami (Romanos 15:13).