1. ¿Diosta sirvij cꞌaricunaca alli causasha nishpaca imatataj rurana can?

 DAVIDCA Salomontaca: “Canca sinchi, mana manchajmi cana cangui” nishpami mandarca (1 Reyes 2:​1-3). Diosta sirvij tucui cꞌaricunapishmi rey David nishcata cazuna can. Shinallataj Jehová Dios imalla mandashcacunatami tucui causaipi pajtachingapaj esforzarina can (Lucas 2:52). ¿Joven huauquicunaca imamantataj espiritualmente sinchi tucungapaj esforzarina can?

2, 3. ¿Joven huauquicunaca imamantataj espiritualmente sinchi tucuna can?

² Cꞌaricunaca familia ucupi, congregación ucupimi chꞌican chꞌican ruraicunata pajtachina can. Joven huauquicuna, seguramente cancunaca qꞌuipa punllacunapi imallata ruranatami yuyashcanguichij. Maijancunaca tiempo completotami Jehová Diosta sirvinata munanguichij. Mana cashpaca siervo ministerial, qꞌuipacarin ancianomi casha ninguichij. Ashtahuanpish cazaranata, huahuacunata charinatachari munanguichij (Efesios 6:4; 1 Timoteo 3:1). Pero cancuna imalla yuyashcacuna alli llujshichunca espiritualmentemi sinchi tucuna canguichij. b

³ ¿Espiritualmente sinchi tucungapajca imatataj rurana cangui? Puntapica huaquin ruraicunatami alli yachana cangui. Chashnami shamuj punllacunapica ima trabajotapish alli rurai tucungui. Pero ¿chaicunata alli pajtachingapajca cunamantaca imatataj rurana cangui?

4. ¿Joven huauquicunaca picunallamantataj yachai tucuncuna? (Fotomantapish parlapai).

⁴ Diosta alli sirvijcunapaj ejemplota cati. Bibliapimi Diosta alli sirvij cꞌaricunamanta yachai tucungui. Paicunaca Jehová Dios mingashcacunata alli pajtachijcuna, Diospaj pueblota alli cuidajcunami  carcacuna. Shinallataj congregación ucupi, cambaj familia ucupimi alli ejemplocunata tari tucungui (Hebreos 13:7). Ashtahuanpish Jesuspaj ejemplotami cati tucungui (1 Pedro 2:21). Diosta alli sirvij cꞌaricunamanta yachacushpaca paicuna ima shina cashcata yuyai (Hebreos 12:​1, 2). Shinallataj paicuna shina cangapaj imata rurai tucushcata yuyai.

5. ¿Yachaisapa tucungapajca imatataj rurana cangui? ¿Chaita ruranaca imamantataj minishtirishca can? (Salmo 119:9).

⁵ ‘Imatapish alli yuyashpa ruranata yachai’ (Proverbios 3:​21, NWT). Manaraj imata rurashpa alli yuyarinaca minishtirishcami can. ¿Imamanta? Cai mundopica achca jovencunami mana alli yuyashpa paicuna munashcata rurashpa causancuna (Proverbios 7:7; 29:11). Shinallataj televisionpi, internetpimi mana alli yuyashpa imatapish decidichun yachachincuna. Pero ¿alli yuyaiyuj cangapajca imatataj rurana cangui? Bibliapi nishcacunata alli yachashpa, chaicunata cazuna imamanta minishtirishca cashcata intindishpami yachaisapa tucungui. Shinallataj Bibliapi yachashcacunata yuyaipi charishpa Jehová Diospaj ñaupajpi alli ricuringapajmi alli decisioncunata agllangapaj esforzarina cangui (Salmo 119:​9-ta liyipai). Yachaisapa cangapaj esforzarishpaca espiritualmente sinchi tucucushcatami ricuchingui (Proverbios 2:​11, 12; Hebreos 5:14). Shinallataj yachaisapa cashcataca caicunapimi ricuchi tucungui: 1) Panicunata respetohuan tratashpa. 2) Imata churanata, ima shina allichirinata alli agllashpa.

6. ¿Joven huauquicunaca yachaisapa cashcata ricuchingapajca huarmicunataca ima shinataj tratana can?

⁶ Yachaisapa canami huarmicunata respetohuan tratachun ayudanga. Shuj panita ashtahuan rijsina munaita charinaca mana juchachu can. Pero ¿shuj joven huauquica yachaisapa cashcataca ima shinataj ricuchi tucun? Shuj panihuan cazaranata mana yuyacushpaca chai pani paimanta enamoraricushcata ama yuyachunmi chai huauquica imata ninata, imata quillcanata, ima shina comportarinata alli decidina can. Chashnami yachaisapa cashcata ricuchinga (1 Timoteo 5:​1, 2). Shinallataj cazarangapaj shuj panita rijsicushpaca maipipish paillahuanca mana saquiringachu. Ashtahuanpish siempremi shujtajcuna ricucunpi paihuan canga. Chashnami cai huauquica chai panita respetashcata ricuchinga (1 Corintios 6:18).

7. ¿Jovencunaca imata churanata, ima shina allichirinata agllacushpaca yachaisapacuna cashcataca ima shinataj ricuchincuna?

 ⁷ Shinallataj joven huauquicunaca yachaisapa cashcata ricuchingapajca imata churanata, ima shina allichirinatami alli decidina can. A la moda ropacunata rurajcuna, propagandacunata ruraj gentecunaca Dios mandashcacunataca mana cazuncunachu. Chai gentecunaca huainayana yuyailla causajcuna cashcamantami cuerpoman yallitaj pegaricuj churanacunata rurancuna. Shinallataj chai gentecunaca cꞌaricunapaj ropacunataca casi huarmicunapaj ropacuna laya ricurichunmi rurancuna. Chaimi joven huauquicunaca espiritualmente sinchi tucucushcata ricuchingapajca Bibliapi nishcacunata yuyaipi charishpa imata churanata alli agllana can. Shinallataj Diosta alli sirvij huauquicunapaj ejemplotami catina can. Ashtahuanpish cashna nishpami tapurina can: “¿Ñuca imalla churashcahuanca yachaisapa cashcata, shujtajcunata respetashcatachu ricuchicuni? ¿Gentecunaca ñuca ima shina churarishcata ricushpaca Jehová Diosta alli sirvij cashcatachu yuyangacuna?” (1 Corintios 10:​31-33; Tito 2:6). Yachaisapa cangapaj esforzarijpica huauqui panicunami cantaca respetangacuna. Ashtahuanpish Yaya Diospajca valishcami cangui.

8. ¿Joven huauquicunaca confianalla cangapajca imatataj rurana can?

⁸ Shujtajcuna canpi confiachun esforzari. Confianalla joven huauquicunaca paicunaman mingashcacunatami alli pajtachincuna (Lucas 16:10). Por ejemplo, Jesusca imatapish mala gana, jahua jahuallaca mana rurajchu carca. Paica Jehová Dios paiman imalla mingashcacunata pajtachina huaquinpi sinchi cajpipish chaicunataca tucui shunguhuanmi alli pajtachirca. Paica gentecunata, ashtahuantajca paipaj discipulocunata cꞌuyashcamantami paipaj causaita curca (Juan 13:1). Canpish canman mingashcacunata alli pajtachingapajmi esforzarina cangui. Chai mingashcacunata ima shina pajtachinata mana tucuita intindishpaca humilde shunguhuanmi Diosta alli sirvij huauquicunata ayudachun mañana cangui. Canman mingashcacunataca mana jahua jahuallachu pajtachina cangui (Romanos 12:11). Ashtahuanpish imata ruracushpapish Jehová Diospaj ruracushca shina ruracushcamantami tucui shunguhuan rurana cangui (Colosenses 3:23). Juchayuj cashcamantami huaquinpica pandaringui. Pero mana jatun tucushpami pandarishcata reconocina cangui (Proverbios 11:2).

9. ¿Jovencunaca imamantataj chꞌican chꞌican ruraicunata yachana can?

⁹ Espiritualmente sinchi tucungapajca chꞌican chꞌican ruraicunatami yachana cangui. Chashnami congregacionpi ayudai tucungui. Shinallataj canllataj mantiniringapaj o cambaj familiata mantiningapajmi imata ruranata yachangui. Shujtajcunahuanpishmi alli apanacungui. Pero ¿imacunallatataj yachana cangui?

10, 11. ¿Joven huauquicunaca imamantataj alli liyinata, alli escribinata yachana can? Salmo 1:​1-3; fotomantapish parlapai.

¹⁰ Alli liyinata, alli escribinata yachai. Bibliapi nishca shinaca alli runaca punllantami Diospaj Shimita liyin, chaipi nishcacunapipish yuyan (Salmo 1:​1-3-ta liyipai). Bibliata tucui punllacuna  liyishpaca Jehová Dios imata yuyashcatami intindingui. Chashnami imatapish alli yuyashpa rurangui (Proverbios 1:​3, 4). Chashna caj huauquicunaca congregacionpica valishcami can. ¿Imamanta?

¹¹ Congregacionpi caj huauqui panicunaca Diosta alli sirvij huauquicuna Bibliamanta yachachichun, alli consejocunata cuchunmi minishtincuna (Tito 1:9). Alli liyinata, alli escribinata yachashpaca conferenciacunata cungapajmi preparari tucungui. Sinchiyachij comentariocunatapishmi cui tucungui. Shinallataj Bibliata estudiacushpa, conferenciacunata uyacushpami apuntecunata rurai tucungui. Can anotashcacunapi yuyashpami cambaj feta sinchiyachi tucungui. Shujtajcunatapishmi animai tucungui.

12. ¿Shujtajcunahuan sumajta parlanacunata yachangapajca imatataj rurana cangui?

¹² Sumajta parlanacunata yachai. Diosta sirvij cꞌaricunaca sumajta parlanacunatami yachana can. Chashnami shujtajcuna imata nicushcata, imata yuyashcata, ima shina sintirishcata intindi tucunga (Proverbios 20:5). Shinallataj sumajta parlanacujcunaca shujtajcuna ima tonohuan parlacushcata uyashpa, paicunapaj ñahuita ricushpami ima shina sintirishcata yachai tucuncuna. Joven huauquicuna, ¿chashna parlanacunata yachanata munashpaca imatataj rurana canguichij? Shujtajcunaman correo electronicocunallata, mensajecunallata cachajcuna cashpaca paicunahuan ñahui ñahui parlanacunaca sinchimi canga. Chaimantami shujtajcunahuan ñahui ñahui sumajta parlanacungapaj esforzarina cangui (2 Juan 12).

13. ¿Joven huauquicunaca ima ashtahuantaj yachana can? 1 Timoteo 5:8; fotomantapish parlapai.

¹³ Canllataj imatapish mashcarinata yachai. Espiritualmente sinchi caj cꞌaricunaca paicunallataj mantinirinata, mana cashpaca paicunapaj familiata mantininatami yachana can (1 Timoteo 5:​8-ta liyipai). Huaquin llajtacunapica joven huauquicunaca paicunapaj yayamanta o shujtaj familiamantami ima shina trabajanata yachancuna. Cutin shujtaj llajtacunapica jovencunaca colegiopi cashpami huaquin trabajocunata yachancuna. Shinaca trabajota japingapajca huaquin ruraicunata, oficiocunatami yachana cangui (Hechos 18:​2, 3; 20:34; Efesios 4:28). Shinallataj ima trabajota chasquishpaca chaita alli rurangapaj, a tiempo tucuchingapajmi esforzarina cangui. Chashna trabajaj cashpaca trabajota japinaca ashtahuan jahuallami canga. Cunancama yachashcacunaca shamuj punllacunapi shujtaj ruraicunata alli pajtachichunmi ayudai tucun. Por ejemplo, ¿shamuj punllacunapica imallatataj rurai tucungui?

14. ¿Tiempo completota sirvingapajca joven huauquicunaca ima shinataj allichiri tucun?

¹⁴ Tiempo completotami Jehová Diosta sirvi  tucungui. Achca huauquicunaca jovenrajcuna cashpa tiempo completota Jehová Diosta sirvi callarishcamantami espiritualmente sinchi tucurcacuna. Jovenmantapacha precursor shina sirvishpaca chꞌican chꞌican huauqui panicunahuan trabajanatami yachangui. Shinallataj minishtirishcallahuan causanata, cullquita alli yuyashpa gastanatami yachangui (Filipenses 4:​11-13). Manaraj precursor regular cashpaca precursor auxiliar shinami sirvi tucungui. Chashnami precursor regular shina sirvingapaj allichiringui. Precursor regular shina sirvishpaca Jehová Diostaca ashtahuanmi sirvi tucungui. Por ejemplo, Tandanacuna Huasicunata shayachishpa, mana cashpaca Betelpimi sirvi tucungui.

15, 16. ¿Shuj huauqui anciano o siervo ministerial casha nishpaca imatataj rurana can?

¹⁵ Siervo ministerial o ancianomi cai tucungui. Diosta sirvij huauquicunaca congregacionta pushajcuna tucungapajmi esforzarina can. Chashnami huauqui panicunataca ayudai tucungacuna. Bibliapi nishca shinaca congregacionta pushaj tucungapaj esforzarinaca allimi can (1 Timoteo 3:1). Shuj huauquica anciano shina manaraj sirvishpaca puntapica siervo ministerial cangapajmi requisitocunata pajtachina can. Siervo ministerialcunaca chꞌican chꞌican ruraicunapimi ancianocunata ayudancuna. Pero ancianocunapish, siervo ministerialcunapishmi mana jatun tucushpa huauqui panicunata ayudancuna. Paicunahuan huillanaman llujshingapajpishmi esforzarincuna. Joven huauquicunaca 17 huatacunamanta 19 huatacunacama charishpapish ñami siervo ministerialcuna cai tucuncuna. Cutin Diosta alli sirvij siervo ministerialcunaca 20 huatacunata o ashtahuan huatacunata charishpapish ancianocunami cai tucuncuna.

¹⁶ ¿Anciano, siervo ministerial shina sirvingapajca imatataj rurana cangui? Cai huauquicuna ima shina cana cashcataca Bibliapimi huillan. Pero Jehová Diosta, cambaj familiata, huauqui panicunata cꞌuyashcamantami siervo ministerialcunapaj, ancianocunapaj Bibliapi tiyaj requisitocunata pajtachingapaj esforzarina cangui (1 Timoteo 3:​1-13; Tito 1:​6-9; 1 Pedro 5:​2, 3). Shinallataj cada requisito ima nisha nishcata alli intindingapajmi esforzarina cangui. Ashtahuanpish chai requisitocunata pajtachingapajca Jehová Diospaj ayudatami mashcana cangui. c

17. ¿Shuj joven huauquica alli cusa, familiata alli pushaj cangapajca ima shinataj preparari tucun? (Fotomantapish parlapai).

¹⁷ Cazaranata, huahuacunata charinatami agllai tucungui. Jesús nishca shinaca Jehová Diosta alli sirvij maijan huauquicunaca mana cazaranatami agllancuna (Mateo 19:12). Pero cazaranata agllashpaca alli cusa cangapajmi esforzarina cangui (1 Corintios 11:3). Jehová Diosca cusacuna  quiquin huarmita cꞌuyachun, imalla minishtishcata cuchun, paita cushichichun, espiritualmente sinchi cachun ayudachunmi munan (Efesios 5:​28, 29). Cai yachaipi imalla yachashcacunaca alli cusa cachunmi cantaca ayudanga. Chaimantami yachaisapa cangapaj, huarmita respetangapaj, confianalla cangapaj esforzarina cangui. Caicunata pajtachingapaj esforzarishpaca alli cusa, familiata alli pushajmi cangui.

18. ¿Shuj joven huauquica shamuj punllacunapi alli yaya cangapajca imatataj rurana can?

¹⁸ Cazarashca qꞌuipaca huahuacunatami chari tucungui. Alli yaya casha nishpaca Yaya Diosmantami achcata yachai tucungui (Efesios 6:4). Por ejemplo, Jehová Diosca tucuicunapaj ñaupajpimi paipaj Churi Jesusta achcata cꞌuyashcata, achcata valorashcata nirca (Mateo 3:17). Huahuacunata charishpaca siempremi paicunata cꞌuyashcata ningapaj esforzarina cangui. Shinallataj paicunapaj alli rurashcacunamantami felicitana cangui. Jehová Dios shina alli yaya cangapaj esforzarijpica cambaj huahuacunaca Jehová Diosta alli sirvijcunami tucungacuna. Alli yaya cangapajca cunanmantami allichirina cangui. Chaipajca cambaj familiata, huauqui panicunata cꞌuyaihuan cuidangapaj, paicunata cꞌuyashcata, valorashcata ningapajmi esforzarina cangui (Juan 15:9). Chashnami shamuj punllacunapica alli cusa, alli yaya cangui. Pero manaraj huarmiyuj, huahuayuj cajpipish cambaj familia, huauqui panicunapishmi can alli shunguta charishcamanta cꞌuyangacuna.

19, 20. ¿Joven huauquicunaca espiritualmente sinchi tucungapajca imatataj rurana can? (Página 1-pi tiyaj fotota ricui).

¹⁹ Joven huauquicuna maqui cruzashca saquirishpaca sinchi crijcunaca mana tucunguichijchu. Ashtahuanpish sinchi crijcuna tucusha nishpaca alli ejemplocunata catingapaj, yachaisapa cangapaj, confianalla cangapaj, chꞌican chꞌican ruraicunata alli rurajcuna cangapajmi esforzarina canguichij. Chashnami shamuj punllacunapi imata mingajpipish alli pajtachinguichij.

²⁰ Joven huauquicuna, espiritualmente sinchi tucungapaj sinchita esforzarina cashcata cuentata cushpaca ashatachari sustaringuichij. Pero Jehová Diosmi cancunata ayudasha nin (Isaías 41:​10, 13). Shinallataj congregacionpi caj huauqui panicunapishmi cancunataca ayudangacuna. Espiritualmente sinchi tucushpaca cushillami causanguichij. Joven huauquicuna, cancunataca achcatami cꞌuyanchij. Sinchi crijcuna tucungapaj sinchita esforzaricushcamanta Jehová Dios cancunata bendiciashpa catichun (Proverbios 22:4).