1. ¿Espiritualmente huiñashpa catingapajca imatataj rurana canchij?

 HUAHUACUNACA ratomi huiñancuna ¿nachu? Pero espiritualmente huiñashpa catinaca mana chashnachu can (1 Corintios 13:11; Hebreos 6:1). b Espiritualmente huiñashpa catingapajca Jehová Dioshuanmi alli apanacuna canchij. Shinallataj Diospaj espirituta chasquishpa alli cualidadcunata charingapaj, alli trabajajcuna cangapaj, qꞌuipa punllacunapi shujtaj ruraicunata alli pajtachingapajmi esforzarina canchij (Proverbios 1:5).

2. a) ¿Génesis 1:​27-pica imatataj yachachin? b) ¿Cai yachaipica imatataj yachashun?

² Jehová Diosca cꞌaritapish huarmitapishmi rurarca (Génesis 1:​27-ta liyipai). Cꞌaripaj cuerpopish, huarmipaj cuerpopish chꞌicanmi can. Shinallataj Jehová Diosca cꞌaritapish, huarmitapish cada uno chꞌican chꞌican ruraicunata pajtachichunmi rurarca. Pero chai ruraicunata alli pajtachichunmi Jehová Diosca cada unoman chꞌican chꞌican cualidadcunata curca (Génesis 2:18). Cai yachaipica joven panicuna espiritualmente sinchi tucungapaj imata rurana cashcatami yachashun. Cutin, catij yachaipica joven huauquicunapish imata rurana cashcatami yachashun.

3, 4. ¿Joven panicunaca picunamantataj yachai tucuncuna? (Fotomantapish parlapai).

³ Bibliapica achca huarmicuna Jehová Diosta cꞌuyashcamanta  paita tucui shunguhuan sirvishcatami nin (jw.org paginapi “¿Que aprendemos de las mujeres de la Biblia?” nishca temata ricui). Chai huarmicunaca 1 Timoteo 3:​11-pi nishca shinami ‘tucuipi jarcarij, Diosta tucuipi cazujcuna carca’. Ñucanchij congregacioncunapipishmi Jehová Diosta alli sirvij panicuna tiyan. Joven panicunaca paicunamantami achcata yachai tucuncuna.

⁴ Joven panicuna, Jehová Diosta alli sirvij cancuna rijsishca panicunapi yuyaichij. Seguramente paicunamantaca achcatami yachai tucunguichij. Por ejemplo, chai panicunapaj alli cualidadcunapi yuyai. Canpish chai cualidadcunata charingapajca, ¿imatataj rurai tucungui? Catij parrafocunapica espiritualmente sinchi cangapaj quimsa cualidadcunata ricuchina cashcatami yachashun.

5. ¿Diostaj alli sirvij panicunaca imamantataj humildes cana can?

⁵ Espiritualmente sinchi caj huarmicunaca humildesmi cana can. Chashnami Jehová Dioshuan, shujtajcunahuanpish alli apanacungacuna (Santiago 4:6). Shinallataj humilde huarmicunaca congregacionpi, familiapi Jehová Dios churashca pushajcunatami respetancuna (1 Corintios 11:3). c

6. ¿Joven panicunaca Rebecamantaca imatataj yachai tucuncuna?

⁶ Rebecapaj ejemplopi yuyai. Paica yuyaisapa, mana manchaj huarmimi carca. Shinallataj paica manaraj imata rurashpami alli yuyaj carca (Génesis 24:58; 27:​5-17). Pero yuyaisapa cashpapish respetaj, shujtajcunata cazujmi carca (Génesis 24:​17, 18, 65). Canpish Rebeca shina Jehová Dios mandashcacunata cazujpica cambaj familiapish, congregacionpi caj huauqui panicunapishmi tandalla cangacuna.

7. ¿Joven panicunaca Estermantaca imatataj yachai tucuncuna?

⁷ Shinallataj espiritualmente sinchi caj panicunaca paicunalla mana tucuita rurai tucushcatami yachancuna. Bibliapi nishca shinaca humildecuna cashpaca ‘ñucanchijlla mana tucuita rurai tucushcatami yuyaipi charishun’ (Proverbios 11:2). Por ejemplo, Estermanta  parlashun. Paica mandaj tucushpapish mana jatun tucurcachu. Shinallataj pailla tucuita rurai tucushcataca mana yuyarcachu. Chaimantami paipaj primo Mardoqueo consejashcataca alli chasquirca (Ester 2:​10, 20, 22). Joven panicunapishmi paicunalla mana tucuita rurai tucushcata yuyaipi charishpaca shujtajcuna consejashcataca alli chasquingacuna (Tito 2:​3-5).

8. 1 Timoteo 2:​9, 10-pi nishca shinaca, ¿huarmicunaca humildecuna cashcata ricuchingapajca imatataj rurana can?

⁸ Shinallataj Esterca shujtajcuna ima shina sintirishcata yuyashpami imatapish ruraj carca. Paica “sumaj ñahui, alaja huarmimi carca”. Shinapish tucuicuna pai sumaj cashcata ricuchunca mana mashcarcachu (Ester 2:​7, 15). ¿Joven panicunaca Estermantaca imatataj yachai tucuncuna? Por ejemplo, 1 Timoteo 2:​9, 10-pi nishcatami pajtachina can (liyipai). Apóstol Pabloca ‘alli yuyaihuan churarichij’ nishpaca huarmicuna paicuna churarishcahuan Jehová Diosta respetashcata ricuchina cashcatami nisha nirca. Shinallataj huarmicunaca shujtajcunata ama ñitcachingapajmi alli yuyashpa imata churarinata agllana can. Diosta alli sirvij panicuna, ¡cancuna chaita ruracushcamantaca achcatami felicitanchij!

9. ¿Abigailmantaca imatataj yachanchij?

⁹ Shinallataj Diosta alli sirvij panicunaca alli yuyaiyujcunami cana can. ¿Chaica imatataj nisha nin? Alli yuyaiyujcuna cashpaca ima alli cashcata, ima mana alli cashcata yachashcamantami alli decisioncunata japishun. Por ejemplo, Abigailmanta parlashun. Abigailpaj cusa mana alli decisionta japishcamantami tucui paipaj familiaca achca llaquicunata charigrirca. Pero Abigailca paipaj familia ama llaqui tucuchunmi imata ruranata alli yuyarca. Chashnami paipaj familiata salvarca (1 Samuel 25:​14-23, 32-35). Shinallataj alli yuyaiyujcuna cashpaca ima hora parlanata, ima hora upalla saquirinatami yachashun. Manaraj shujtajcunata ayudashpapish paicunata ama mana alli sintichingapajmi ima shina ayudanata alli yuyashun (1 Tesalonicenses 4:11).

10, 11. ¿Alli liyinata, alli escribinata yachanaca imamantataj valishca can? (Fotomantapish parlapai).

¹⁰ Diosta alli sirvij panicunaca chꞌican chꞌican trabajocunata, ruraicunatami alli ruranata yachana can. Can uchillaraj cajpi imalla yachashcacunaca tucui vidapajmi sirvinga. Huaquin ejemplocunata ricushun.

¹¹ Alli liyinata, alli escribinata yachai. Huaquin gentecunaca “huarmicunaca liyinata, escribinataca mana yachanachu can” nishpami yuyancuna. Pero Diosta sirvij panicunapajca liyinata, escribinata yachanaca achca valishcami can (1 Timoteo 4:13). d Chaimantami panicunaca jarcaicuna ricurijpipish alli liyinata, alli escribinata yachana can. ¿Chaita ruranaca imamantataj valishca can? Alli liyijcuna, alli escribijcuna cashpaca  trabajota japinaca ashtahuan jahuallami canga. Shinallataj chaicunata yachanami Bibliata alli estudiachun, shujtajcunamanpish Diosmanta yachachichun ayudanga. Ashtahuantajca Diospaj Shimita liyi tucushcamantami Jehová Diospajmanca ashtahuan cꞌuchuyai tucungui (Josué 1:8; 1 Timoteo 4:15).

12. ¿Proverbios 31:​26-pica imatataj yachanchij?

¹² Sumajta parlanacunata yachai. Diosta sirvijcunaca shujtajcunahuanmi sumajta parlanacuna canchij. Chaimantami Santiagoca: “Tucuicunallataj alli uyajcuna, mana utca rimajcuna, mana utca pꞌiñarijcuna caichij” nishpa animarca (Santiago 1:19). Shujtajcuna parlacujpi atencionhuan uyashpami paicunata “shungumanta llaquijcuna” cashcata ricuchinchij (1 Pedro 3:8). Paicuna ima nicushcata, ima shina sintirishcata mana intindishpaca respetohuanmi tapuicunata rurana cangui. Shinallataj manaraj imata nishpaca allimi yuyana cangui (Proverbios 15:28). Por ejemplo: “¿Ñuca nigricushcaca ciertochu can? ¿Chaita nishpaca shujtajcunata sinchiyachishachu? ¿Cꞌuyaihuan, respetohuanchu parlasha?” nishpami tapurina cangui. Sumajta parlanacunata yachangapajca Jehová Diosta alli sirvij panicunapaj ejemplotami catina cangui (Proverbios 31:​26-ta liyipai). Paicuna parlacujpica atencionhuan uyai. Sumajta parlanacunata yachashpaca shujtajcunahuanmi alli apanacungui.

13. ¿Huasipi ruranacunata ima shina ruranata yachangapajca imatataj rurana cangui? (Fotomantapish parlapai).

¹³ Huasipi imapish alli cachun ricuranata yachai. Achca llajtacunapica huarmicunami huasipi imapish alli cachun ashtahuan ricurancuna. Cambaj mama o Diosta alli sirvij shuj panimi huasipi ruranacunata alli pajtachinata yachachi tucuncuna. Pani Cindyca: “Ñuca mamitami sinchita trabajashpa cushicuna cashcata yachachirca. Shinallataj paica micunitata yanunata, limpianata, siranata, cosascunata ima shina randinatami yachachirca. Pai chashna yachachishcamantami Jehová Diostaca ashtahuan sirvi tucushcani. Shinallataj ñuca mamita puzachinata yachachishcamantami Diosta alli sirvij turi ñañacunata rijsi tucushcani. Paicunamantaca achcatami yachai tucushcani” nircami (Proverbios 31:​15, 21, 22). Huasita alli cuidaj, sinchita trabajaj, puzachij huarmicunaca paicunapaj familiacunataca allimi cuidancuna, congregacionpipish achcatami ayudancuna (Proverbios 31:​13, 17, 27; Hechos 16:15).

14. a) ¿Pani Crystalmantaca imatataj yachanchij? b) ¿Causaipica imatataj punta lugarpi churana canchij?

¹⁴ Canllataj imatapish mashcarinata yachai. Diosta alli sirvijcunaca tucuicunami mashcarina canchij (2 Tesalonicenses 3:​7, 8). Pani Crystalca: “Ñuca colegiollapitajmi chꞌican chꞌican cursocunata cujcuna carca. Chaimi ñuca yaya mamaca huaquin oficiocunata yachachij cursocunata japichun animarcacuna. Shinallataj ñuca yayaca contabilidadta yachachunmi shuj cursopi churarca. Chai cursopi imalla yachashcacunaca cunancamami valishca can” nircami. Trabajota japingapaj huaquin ruraicunata yachashpapish mashna cullquita gastai tucushcatapishmi yachana cangui (Proverbios 31:​16, 18). Shinallataj  mana yangamanta dibiyashpa imalla charishcacunallahuan causashpaca Jehová Diosta sirvingapajmi ashtahuan tiempota charingui (1 Timoteo 6:8).

15, 16. ¿Soltera panicunaca ima shinataj ayudancuna? (Marcos 10:​29, 30).

¹⁵ Alli cualidadcunata charingapaj esforzarishpa, chꞌican chꞌican trabajocunata ruranata yachashpaca shamuj punllacunapi shujtaj ruraicunatapish pajtachingapajmi allichirishca cangui. Catij parrafocunapimi shamuj punllacunapi imallata rurai tucushcata yachashun.

¹⁶ Asha tiempocama mana cazaranatami agllai tucungui. Jesús nishca shinami maijan huarmicunaca mana cazaranata agllancuna. Maijan culturacunapica huarmicunaca cazaranataj cashcatami yuyancuna. Chashnapish huaquin panicunaca mana cazaranatami agllashcacuna (Mateo 19:​10-12). Shujtaj huarmicunaca shujtaj razoncunamantami mana cazarancuna. Pero, soltera panicunaca Jehová Diospaj, Jesuspajpish achca valishcacuna cashcatami yuyarina can. Muyundij Allpapimi soltera panicunaca congregacioncunapica achcata ayudacuncuna. Paicuna cꞌuyaita ricuchishcamantami achcacunapajca panicuna shina, mamacuna shina tucushcacuna (Marcos 10:​29, 30-ta liyipai; 1 Timoteo 5:2).

17. ¿Shuj joven panica Jehová Diosta ashtahuan sirvisha nishpaca ima shinataj prepararina can?

¹⁷ Tiempo completo Jehová Diosta sirvinatami agllai tucungui. Panicunami muyundij Allpapi Diosmanta alli huillaicunata huillashpa achcata ayudacuncuna (Salmo 68:11). ¿Canca tiempo completota Jehová Diosta sirvinata yuyashcanguichu? Por ejemplo precursora shina, tandanacuna huasicunata shayachishpa o Betelpimi sirvi tucungui. Shuj metata pajtachisha nishpaca Jehová Dios canta ayudachun mañai. Chai qꞌuipaca chai metata ña pajtachishca huauqui panicunahuan parlai. Paicunami chai metata pajtachingapaj imata ruranata ricuchi tucuncuna. Chai qꞌuipaca chai metata pajtachingapaj imallata ruranata yuyai. Jehová Diosta ashtahuan sirvingapaj esforzarishpaca chꞌican chꞌican ruraicunata rurashpami cushilla causangui.

18. ¿Shuj pani cazaranata yuyacushpaca imamantataj alli yuyashpa decidina can? (Fotomantapish parlapai).

¹⁸ Cazaranatami agllai tucungui. Alli cualidadcunata charishpa, chꞌican chꞌican ruraicunata alli ruranata yachashpaca ña cazarashpaca alli huarmimi cangui. Pero cazaranata yuyacushpaca pihuan cazaranatami alli yuyashpa decidina cangui. Pihuan cazaranata agllanaca mana shuj pugllaillachu can, jatun decisionmi can. ¿Imamanta? Cazarashpaca cambaj cusatami tucuipi cazuna cangui (Romanos 7:2; Efesios  5:​23, 33). Chaimanta pihuan cazaranata yuyacushpaca cashna nishpa tapuri: “¿Chai turica espiritualmente sinchichu can? ¿Jehová Diosta sirvinatachu punta lugarpi churan? ¿Alli yuyashpachu decisioncunata japin? ¿Imapi pandarishpaca pandarishcatachu reconocin? ¿Huarmicunataca respetanchu? ¿Diospajman ashtahuan cꞌuchuyashpa catichunchu ñucata ayudanga? ¿Familiata ima shina mantininata yachanchu? ¿Cazarashca qꞌuipaca ñucahuanca allichu apanacushpa catinga? ¿Congregacionpica ima shinataj ayudacun? ¿Paiman mingashcacunataca ima shinataj pajtachicun?” nishpami tapurina cangui (Lucas 16:10; 1 Timoteo 5:8). Pero shuj alli cusata charisha nishpaca canrajmi alli huarmi cana cangui.

19. ¿Bibliapica ‘huarmica cusata ayudajmi can’ nishpaca huarmicuna mana tanto valishca cashcatachu ricuchin?

¹⁹ Bibliapi nishca shinaca alli huarmica cusata ‘ayudaj, compañajmi’ can (Génesis 2:18). ¿Cai nishcacunaca huarmicuna mana tanto valishca cashcatachu ricuchin? Mana. Ashtahuanpish huarmicuna achca valishca cashcatami ricuchin. Bibliapica Jehová Diosmanta parlashpapishmi ‘ayudaj’ cashcata nin (Salmo 54:4; Hebreos 13:6). Cusata ayudaj huarmica paitaca imapipishmi apoyan, alli decisioncunatapish japichunmi ayudan. Shinallataj Jehová Diosta cꞌuyashcamantami shujtajcunapish paipaj cusata respetachun ayudan (Proverbios 31:​11, 12; 1 Timoteo 3:11). Alli huarmi casha nishpaca Jehová Diosta ashtahuan cꞌuyangapajmi esforzarina cangui. Shinallataj huasipi, congregacionpi imapipish ayudangapajmi esforzarina cangui.

20. ¿Alli mamacunaca familiataca ima shinataj ayudancuna?

²⁰ Mama tucunatami agllai tucungui. Cazarashca qꞌuipaca huahuacunatachari charinguichij (Salmo 127:3). Chaimantami manaraj huahuacunata charishpallataj alli mama cangapaj prepararina cangui. Cunan yachashca shinaca huarmicunaca sumaj cualidadcunata charingapaj, chꞌican chꞌican ruraicunata ima shina ruranata yachangapajmi esforzarina can. Chaicunata pajtachingapaj esforzarishpaca alli huarmi, alli mamami tucungui. Cꞌuyaita, respetota, pacienciata ricuchijpimi huahuacunaca cushilla huiñangacuna (Proverbios 24:3).

21. ¿Diospaj pueblopi achca panicuna sirvicushcamantaca ima shinataj sintirinchij? (Página 1-pi tiyaj fotota ricui).

²¹ Panicitacuna: Jehová Diosta tucui shunguhuan sirvicushcamanta, huauqui panicunata siempre ayudashcamantami cancunataca achcata cꞌuyanchij (Hebreos 6:10). Cancunaca alli cualidadcunata charingapaj, chꞌican chꞌican ruranacunata yachangapajmi esforzaringuichij. Chaicunata rurashpami cancunaca cushilla causai tucunguichij, shujtajcunatapishmi ayudai tucunguichij. Ashtahuancarin shamuj punllacunapi shujtaj ruraicunatapish pajtachingapajmi allichirishca canguichij. Chaimantami Jehová Diospaj pueblopica achca valishca canguichij.