JEHOVÁ DIOSCA ñucanchijcunamanca achca regalocunatami cushca. Chai regalocunata cada uno ima shina utilizanata decidichun saquishcamantami paitaca achcata agradicinchij. Por ejemplo, Jehová Diosca ñucanchijmanca vinotami cushca. Bibliapica: “Cushicui tiyashcamantami, jatun micuitaca rurarin. Causaj runacunataca, vinomi cushichin” ninmi (Eclesiastés 10:19; Salmo 104:15). Shinapish maijan gentecunaca achca tragotami ubyancuna. Shinallataj huaquin gentecunaca maipi causashcamanta o ima culturata charishcamantami tragota ubyanamantaca chꞌican chꞌican yuyaicunata charincuna. ¿Diosta sirvijcunaca tragota ubyanamantaca imatataj yuyanchij?

Shuj decisionta agllagricushpaca tragomanta ñucanchij causan ladopi gentecuna imata nishcata cazunapaj randica, Jehová Dios imata nishcatami cazuna canchij. Chaita rurashpami cushilla causashun.

Cai mundopica maijan gentecunaca casi tucui punllacunami achca tragota ubyancuna. Huaquincunaca alli sintiringapaj, problemacunata cungaringapajmi tragota ubyancuna. Cutin huaquin llajtacunapica gentecunaca sinchi cashcata ricuchingapajmi achca tragota ubyancuna.

Pero ñucanchijta ruraj Jehová Diosca tragomanta imata yuyana cashcatami yachachishca. Paica paipaj Shimipimi yallitaj tragota ubyashcamanta llaquicunata charina cashcata yachachin. Por ejemplo, Proverbios 23:​29-manta 35-camaca shuj runa machashcamanta achca llaquicunata charishcatami parlan. a Europapi causaj huauqui Danielca manaraj Jehová Diosta rijsishpaca machajmi carca. Pero cunanca ancianomi can. Paica: “Achca tragota ubyashcamantami mana alli decisioncunata japircani. Shinallataj achca llaquicunatami charircani. Chai llaquicunata apashcataca cunancamami yuyarini” nircami.

Yallitaj tragota ubyashpaca achca llaquicunatami charishun. Chaimantami mashna tragota ubyanata decidicushpaca Jehová Dios yuyashca shina yuyangapaj esforzarina canchij.

Bibliapi tragota ubyanamanta imata yachachishcata, gentecuna tragota imamanta ubyajcuna cashcatami cunanca ricushun.

Bibliapica asha tragota ubyanaca jucha cashcataca mana ninchu. Ashtahuanpish asha vinota ubyanaca alli cashcatami nin. Por ejemplo, Eclesiastés 9:​7-pica: “Cushicushpa cambaj micunata micuilla, cushi shunguhuan cambaj vinota ubyailla” ninmi. Shinallataj Bibliapica Jesuspish, Diosta alli sirvij shujtaj gentecunapish vinota ubyashcatami nin (Mateo 26:​27-29; Lucas 7:34; 1 Timoteo 5:23).

Asha tragota ubyana alli cashpapish machajta ubyanaca mana allichu can. Chaimantami Bibliapica: “Vinohuan ama machaichijchu” nin (Efesios 5:18). Shinallataj Bibliapica: ‘Machajcunaca Diospaj Gobiernopica ima herenciata mana chasquingacunachu’ ninmi (1 Corintios 6:10). Caipi ricushca shinaca Jehová Diosca yallitaj tragota ubyachun, machangacama ubyachunca mana munanchu. Chaimantami ñucanchij causan ladopi gentecuna tragomanta imata yuyashcata uyanapaj randica Jehová Dios tragomanta imata yuyashcata uyangapaj esforzarina canchij.

Maijancunaca ñucaca achca tragota ubyashpapish mana machanichu nincunami. Pero chashna yuyanaca llaquimanmi apai tucun. Bibliapi nishca shinaca achca tragota ubyaj cꞌaricuna  huarmicunaca jatun juchacunapimi urmai tucuncuna, Jehová Diosmantapishmi caruyai tucuncuna (Tito 2:3; Proverbios 20:1). Shinallataj Jesusca yallitaj tragota ubyajcunaca Paraisoman mana yaicui tucushcatami nirca (Lucas 21:​34-36). Shinashpaca ¿Diosta sirvijcunaca yallitaj tragota ubyashcamanta llaquicunata ama charingapajca imatataj rurana canchij?

Ñajaman nishca shinaca ñucanchij causan ladopi tragomanta gentecuna imata nishcata catishpaca llaquipimi urmai tucunchij. Chaimantami Diosta sirvijcunaca micucushpapish, ubyacushpapish ima shujtaj ruraicunata ruracushpapish Jehová Diosta jatunyachingapaj tucuita rurana canchij (1 Corintios 10:31). Manaraj shuj decisionta japishpa Biblia cai jahua imata nishcata ricushunchij.

¿Shujtajcunahuan alli cangallapajchu ubyani? Éxodo 23:​2-pica: “Millaita rurajcuna achcacuna cashcallamanta ama canpish paicunahuan shuj yuyailla tucungui” ninmi. Cai versopica Jehová Diosca israelitacuna millai gentecunapaj ejemplota ama catichunmi animacurca. Ñucanchijpish chaitami rurana canchij. Shujtajcunapaj mana alli ejemplota catishpaca Jehová Diospaj mandashcacunatami ladoman saquishun. Ashtahuancarin paimantami caruyashun (Romanos 12:2).

¿Sinchi cashcata ricuchingapajllachu tragotaca ubyani? Huaquin lugarcunapica cada punlla achca tragota ubyanaca normalmi can (1 Pedro 4:3). Shinapish 1 Corintios 16:​13-pica: “Rijcharishca caichij, crishcapi sinchi caichij, ama manchaichijchu, sinchi caichij” ninmi. Tragoca sinchicuna cachunca mana ayudanchu. Ashtahuanpish yallitaj tragota ubyashpaca cuerpopi, yuyaipimi débil tucushun. Chaimantami yuyaita chingachishpa mana alli decisioncunata japi callarishun. Isaías 28:​7-pi nishca shinaca yallitaj tragota ubyajcunaca musparishpami yuyai illaj tucuncuna.

Jehová Diospi confiashpaca allicunata rurangapajmi fuerzasta charishun. Shinallataj rijcharishca cangapaj, sinchi feta charingapajmi esforzarina canchij (Salmo 18:32). Jehovamanta caruyachij mana alli ruraicunapi ama urmangapajca siempremi cuidadota charina canchij. Jesusca cai allpapi cashpaca chaitami rurarca. Chashnami paica sinchi, imata mana manchaj cashcata ricuchirca.

 ¿Ñuca llaquicunata cungaringapajchu tragotaca ubyani? Salmota quillcaj runaca Jehová Diostaca: ‘Yallitaj yuyaicunahuan ñuca yuyaipi cajpica, quiquinpaj cushicuimari ñucataca cushichirca’ nircami (Salmo 94:19). Shinaca imamantapish sustarishca cashpaca tragota ubyanapaj randica Jehová Diostami mashcana canchij. Chaipajca punllantami paita mañana canchij. Shinallataj experienciata charij huauqui panicunapaj ayudatami mashcai tucunchij. Pero ñucanchij llaquicunapi ama yuyangapaj tragota ubyashpaca tentacioncunapi ama urmangapaj fuerzastaca mana charishunchu (Oseas 4:11). Huauqui Danielca: “Ñucaca preocupado cashcamanta, ñuca pandarishcacunamanta llaquilla cashcamantami ubyaj carcani. Pero ñuca llaquicunaca mana tucurircachu. Ashtahuanpish ashtahuan llaquicunatami charircani. Amigocuna illajmi saquirircani, achca pingaitapishmi charircani” nircami. ¿Huauqui Danielca alli sintiringapajca imatataj rurarca? Paica: “Tragota ubyanapaj randica Jehová Diospaj ayudatami mashcarcani. Pai ayudajpimi ñuca problemacunata allichi tucurcani” nircami. Shinashpaca jatun problemacunata charijpipish Jehová Diosmi chai problemacunata allichichun ayudai tucun (Filipenses 4:​6, 7; 1 Pedro 5:7).

Can tragota de vez en cuando ubyaj cashpaca cashna nishpami tapurina cangui: “¿Familiacuna, amigocunaca canca achca tragotami ubyacungui nishcacunachu?”. Tal vez ñucanchijcuna mana cuentata cushpami tragota ubyana costumbreta chari callaricunchij. Chaimantachari familiacuna amigocunaca chashna nin. Shinallataj “¿Cunanca ñaupa tiempota yallichu ashtahuan tragota ubyacuni?” nishpami tapurina canchij. Ari nishpa cutichishpaca mana cuentata cushpachari asha asha ubyana viciopi urmacushcata ricuchinchijman. Shinallataj “¿Huaquin punllacunata tragota mana ubyanaca ñucapajca sinchichu can?” nishpami yuyarina canchij. Ari nishpa cutichishpaca ubyana viciota charishcatami ricuchinchijman. Ubyana viciota charishpaca tal vez doctorcunapaj ayudata mashcanami minishtiringa.

Maijan huauqui panicunaca llaquicunata mana charisha nishpami shuj copallatapish mana ubyancuna. Shujtajcunaca trago jayaj cashcamantami  mana ubyancuna. Tragota mana ubyasha nij huauqui panicunata cꞌuyashcata ricuchingapajca paicunata criticanapaj randica respetanami canchij.

Cutin shujtajcunaca mashna tragota, ima hora ubyanatami alli decidishcacuna. Huaquincunacarin micui horasllapi o semanapi shuj punllallata ashata ubyanatami decidishcacuna. Ima tragota ubyanata, ima tragota mana ubyanatapishmi decidi tucunchij. Por ejemplo, maijancunaca cervezallata o vinollatami ashata ubyancuna. Pero shujtaj sinchi tragocunataca mana ubyancunachu. Paicunaca chai sinchi tragocunataca imahuan chagrushpapish mana ubyancunachu. Tragota ubyanamanta alli decisioncunata japishpaca ñucanchij decidishcata pajtachinaca jahuallami canga. Shinallataj ñucanchij decidishcacunamantaca mana pingarinachu canchij.

Shinallataj caishujcunapipishmi yuyana canchij. Romanos 14:​21-pica: “Aichata micushcamanta, vinota ubyashcamanta, ima shujtaj ruraita rurashcamantapish cambaj huauqui pandarina cajpica chaicunata mana ruranami ashtahuan alli can” ninmi. Shinashpaca shujtajcunapi yuyashpaca paicunata cꞌuyashcatami ricuchishun. Chaimantami ñucanchijcuna tragota ubyajpi huauqui panicuna mana alli sintirishcata cuentata cushpaca mejor chai ratoca tragotaca mana ubyashun. Chaita rurashpaca ñucanchijllapi yuyanapaj randi, shujtajcunapi yuyashcatami ricuchishun (1 Corintios 10:24).

Shinallataj Diosta sirvijcunaca autoridadcuna churashca leycunatapishmi respetana canchij. Por ejemplo, autoridadcuna menores de edad, carrota o maquicunacunata manejagrijcuna tragota mana ubyana cashcata nijpica cazunami canchij (Romanos 13:​1-5).

Jehová Diosca pai cushca regalocunata cada uno ima shina utilizanata agllachunmi saquishca. Chaimantami cada unomi imata micunata, imata ubyanata agllana canchij. Pero imata agllashpapish Jehová Diosta jatunyachingapajmi agllana canchij.