1. ¿Maijancunaca imatataj tapurishcanchij?

 ACHCA gentecunami Diosta sirvij Abrahán runa pi cashcataca mana achcata yachancuna. Pero ñucanchijca Abrahanmantaca achcatami yachanchij. Por ejemplo, ‘Abrahán feta charijcunapaj yaya’ cashcataca allimi yachanchij (Romanos 4:11). Pero tal vez: ‘¿Ñucapish Abrahán shinachu sinchi feta chari tucuni?’ nishpachari tapurishcanchij. Ari, tucuicunami Abrahán shina sinchi feta chari tucunchij.

2. ¿Imamantataj Abrahanmanta yachana canchij? (Santiago 2:​22, 23).

² Abrahán shina sinchi feta charingapajca paipaj causaimantami yachana canchij. Paica Jehová Diostaca siempremi tucuipi cazurca. Chaimantami caru llajtaman rirca, carpa huasicunapipishmi achca huatacunata causarca. Paipaj churi Isaactapish sacrificiota shinami Jehová Diosman cusha nirca. Caicunata rurashpami paica sinchi feta charishcata ricuchirca. Chaimantami paica Diospaj ñaupajpica alli ricurirca, Diospaj alli amigopishmi tucurca (Santiago 2:​22, 23-ta liyipai). Jehová Diosca canpish paipaj ñaupajpi alli ricurishpa paipaj amigo tucuchunmi munan. Chaimantami paica Pablomanpish, Santiagomanpish Abrahanmanta quillcachun yuyaita curca. Cunanca Romanos capítulo 4-pi, shinallataj Santiago capítulo 2-pi Abrahanmanta imata yachachishcatami ricushun.

3. ¿Pablopish, Santiagopish ima versomantataj parlarcacuna?

³ Génesis 15:​6-pica: “Abranca Jehová Diospimi feta churarca. Chaimantami Diosca paitaca cashcata rurajta shina ricurca” ninmi. Pablopish Santiagopish chai versopi nishcacunamantami parlarcacuna. Diosca paipaj shunguta cushichijcunatami cashcata rurajcunata shina ricun. Shinallataj paicunaca juchayujcuna  huacharishca cashpapish Diospaj ñaupajpica ima juchachina illajmi ricurincuna. Chaica alajami can ¿nachu? ¿Jehová Dios cantapish cashcata rurajta shina ricuchunchu munanguiman? Sinchita esforzarijpica Jehová Diosca chashnami cantaca ricunga. Cunanca Jehová Dios Abrahanta imamanta cashcata rurajta shina ricushcata, ñucanchijtapish cashcata rurajta shina ricuchun imata rurana cashcatami yachashun.

4. ¿Gentecunaca imamantataj cashcata rurajcuna mana cai tucunchij?

⁴ Pabloca Romanos libropica tucuicuna juchayujcuna cashcatami nirca (Romanos 3:23). Chashna jahuapish Jehová Diosca paita sirvijcunataca cashcata rurajcunata shinami ricun. ¿Imamanta? Apóstol Pabloca Abrahanpaj causaimanta parlashpami chaitaca alli intindichirca.

5. ¿Jehová Diosca Abrahantaca imamantataj cashcata rurajta shina ricurca? (Romanos 4:​2, 4).

⁵ Abrahán Canaán llajtapi causacujpimi Jehová Diosca cashcata rurajta shina ricui callarirca. Pero ¿imamantataj Jehová Diosca paitaca chashna ricurca? Tal vez ¿Abrahán Moisesman cushca tucui leycunata cazuj cashcallamanta? Mana. Mana chaimantachu carca (Romanos 4:13). ¿Imamanta shina ninchij? Abrahán causashca punllacunapica Moisesman cushca mandashcacunaca manaraj tiyarcachu. Israelitacunaca 400 huatacuna qꞌuipami chai mandashcacunataca chasquircacuna. Shinashpaca Abrahán sinchi feta charishcamantami Jehová Diosca cashcata rurajta shina paitaca ricui callarirca. Chaimantami cꞌuyaihuan paitaca ayudarca (Romanos 4:​2-4-ta liyipai).

6. ¿Shuj runa juchata rurajpipish Jehová Diosca imamantataj paitaca cashcata rurajta shina ricui tucun?

⁶ Pabloca ‘Diosca feta charijtami cashcata rurajta shina ricun’ nircami (Romanos 4:5). Shinallataj Pabloca: “Shuj runa leypi nishcata mana tucuita rurajpipish Diosca cashcata rurajta shinami paitaca ricun. Chaimantami chai runaca achcata cushicun. Chai cushicuj runamanta parlashpami Davidca: ‘Mana allita rurajcunaca paicunata perdonashcamantami cushicuncuna. Juchata rurajcunapish paicunapaj juchacunata perdonashcamantami cushicuncuna. Shuj runaca paipaj juchacunata Jehová Dios mana yuyarijpimi cushicun’” nircami (Romanos 4:​6-8; Salmo 32:​1, 2). Cai versocunapi nishca shinaca Jehová Diosca paipi feta charijcunapaj juchacunatami perdonan. Paicuna pandarishcacunataca mana yuyaricunllachu. Chaimantami paicunataca cashcata rurajta shina, ima juchachina illajta shina ricun.

7. ¿Jehová Diosca ñaupa tiempopi paita sirvijcunataca imamantataj cashcata rurajta shina ricurca?

⁷ Jehová Dios Abrahanta, Davidta, shujtajcunatapish cashcata rurajcunata shina ricujpipish paicunaca juchayujcuna cashpami catircacuna. Pero paicuna sinchi feta charishcamantami Jehová Diosca ima juchachina illajta shina paicunataca ricurca. Ashtahuanpish millaita rurajcunahuan paicunata chꞌimbapurajpica paicunaca jucha illajcuna shinami carcacuna (Efesios 2:12). Shinashpaca Pabloca Romanos libropica Jehová Diospaj amigocuna cangapaj sinchi feta charina cashcatami intindichirca. Chaimanta Abrahán shina, David shina sinchi feta charingapaj esforzarishunchij.

8, 9. ¿Apóstol Pablo, Santiago quillcashca librocunata liyishpaca maijancunaca imatataj pandata intindishcacuna?

⁸ Panda religioncunata pushajcunaca ñaupa punllacunamantami, ‘feta charishcata ruraicunahuan ricuchinaca mana minishtirinchu’ nishcacuna. Chaimi huaquincunaca: “Quishpiringapajca shungupi Jesusta chasquinallami minishtirin” nincuna. Cutin shujtajcunaca:  “Apóstol Pablollatajmi Yaya Dios cashcata rurajcunata shina ricuchun ima ruraita rurana mana minishtirishcata nirca” nincuna (Romanos 4:6). Huaquincunacarin, ‘quishpiringapajca procesioncunata rurana, iglesiacuna mandashca ruraicunata ruranallami’ minishtirin nincunami. Tal vez paicunaca Santiago 2:​24-pi nishcallata cazuna cashcatami yuyancuna. Chaipica: “Cancuna ricushca shinaca shuj runaca mana feta charishcallamantachu cashcata ruraj nishca can. Ashtahuanpish paipaj alli ruraicunamantami cashcata ruraj nishca can” ninmi.

⁹ Gentecuna chꞌican chꞌican yuyaicunata charijta ricushpaca maijancunaca, ‘apóstol Pablopish Santiagopish feta charinamanta, ruraicunamantaca chꞌican chꞌican yuyaicunatami charircacuna’ nincunami. Shinallataj paicunaca, ‘Pabloca Diospaj ñaupajpi alli ricuringapajca feta charina cashcallatami yuyarca. Pero Santiagoca alli ruraicunatapish rurana cashcatami yuyarca’ nincunami. Diosta mana sirvij Bibliata estudiaj shuj runaca: “Pabloca shuj runa cashcata ruraj nishca cangapajca fellatami ricuchina can nircami. Santiagoca apóstol Pablo imamanta chaita nishcataca mana intindircachu” nircami. Shinapish Pablopish Santiagopish Jehová Dios yuyaita cushcamantami paicunapaj librocunata quillcarcacuna (2 Timoteo 3:16). Shinaca ¿apóstol Pablopish, Santiagopish imatataj nisha nicurca? Chaita alli intindingapajca paicuna quillcashca librocunapimi huaquin versocunata ricuna canchij.

10. ¿Pabloca Romanos 3:21 y 28-pica ima ruraicunamantataj parlacurca? (Fotomantapish parlapai).

¹⁰ ¿Pabloca Romanos 3 y 4-pica ima ‘ruraicunamantataj’ parlacurca? Paica Jehová Dios Moisesman cushca mandashcacunamantami parlacurca (Romanos 3:​21, 28-ta liyipai). Apóstol Pablopaj punllacunapica maijan judío huauqui panicunapajca Moisesman cushca leyta cazuna ña mana minishtirishcata intindinaca  sinchimi carca. Paicunaca chai mandashcacunata cazushpa catina cashcatami yuyajcuna carca. Chaimantami Pabloca Abrahanpaj ejemplomanta parlashpa Diospaj ñaupajpi alli ricuringapaj imata rurana cashcata intindichirca. Paica, ‘Moisesman cushca mandashcacunata cazunapaj randica fetami charina canguichij’ nircami. Ñucanchijcunapish Jehová Diospi, Jesuspi sinchi feta charishpaca Diospaj ñaupajpica allimi ricurishun.

11. ¿Santiagoca ima ‘ruraicunamantataj’ parlacurca?

¹¹ Cutin Santiago capítulo 2-pica Moisesman cushca mandashcacunamantaca mana parlacunchu. Chaipica Santiagoca Diosta sirvijcuna cada punlla imallata rurajcuna cashcatami parlacurca. Santiago nishca shinaca ñucanchij ruraicunahuanmi sinchi feta charishcata o mana charishcata ricuchi tucunchij. Cunanca Santiago parlashca ishqui ejemplocunamantami yachashun.

12. ¿Santiago yachachishca shinaca feta charishcata ricuchingapajca imatataj rurana canchij? (Fotomantapish parlapai).

¹² Santiagoca Diosta sirvijcuna mana ñahuita ricushpalla tucuicunata alli tratana cashcatami nirca. Shinallataj paica pobrella cajcunata ladoman saquishpa charijcunallata alli tratashpaca mana sinchi feta charishcata ricuchicushcatami intindichirca (Santiago 2:​1-5, 9). Ashtahuanpish Santiagoca: ‘Maijan huauqui pani imata churanata, micunata minishtijta ricushca jahua imata mana rurashpaca sinchi fetami charini nishpapish cancunapaj ruraicunahuanmi feta mana charishcata ricuchicunguichij. Alli ruraicunata mana rurajpica ñucanchij fepish huañushcami can’ nircami (Santiago 2:​14-17).

13. ¿Santiagoca feta charishcata ruraicunahuan ricuchina cashcata yachachingapajca pimantataj parlarca? (Santiago 2:​25, 26).

¹³ Santiagoca feta charishcata ruraicunahuan  ricuchina cashcata yachachingapajca Rahabpaj ejemplomantami parlarca (Santiago 2:​25, 26-ta liyipai). Rahabca Jehová Dios alli Dios cashcata, israelitacunata ayudacushcatami uyashca carca (Josué 2:​9-11). ¿Paica feta charishcataca ima shinataj ricuchirca? Ishqui israelitacunami Jericó llajta ima shina cashcata pacalla ricunaman rishcacuna carca. Rahabca paicunata ama huañuchichunmi ayudarca. Chaita rurashcamantami Rahabca juchayuj cashcapish, Israelmanta mana cashpapish Abrahán shina Diospaj ñaupajpica cashcata ruraj shina ricurirca. Shinashpaca feta charishcataca ruraicunahuanmi ricuchina canchij.

14. ¿Pablopish, Santiagopish imatataj yachachircacuna?

¹⁴ Ima shinami ricushcanchij Pablopish, Santiagopish femanta, ruraicunamantaca chꞌican chꞌican ejemplocunahuan, chꞌican chꞌican yuyaicunahuanmi yachachircacuna. Pabloca judío huauqui panicunamanca Diospaj ñaupajpi alli ricuringapajca Moisesman cushca leycunata cazuna ña mana minishtirishcatami intindichirca. Cutin, Santiagoca feta charishcata ricuchingapaj alli ruraicunata rurana cashcatami intindichirca.

15. ¿Feta charishcata ricuchingapajca imallatataj rurana canchij? (Fotomantapish parlapai).

¹⁵ ¿Feta charishcata ricuchingapajca Abrahán rurashca ruraicunallatachu rurana canchij? Mana. Jehová Diosca shujtaj ruraicunatapish rurachunmi munan. Por ejemplo, congregacionman primera vez shamujcunatami alli chasquina canchij. Shinallataj llaquipi caj huauqui panicunata, ñucanchij familiatapishmi ayudana canchij. Ñucanchijcuna chaita rurajta ricushpami Jehová Diosca cushilla sintiringa (Romanos 15:7; 1 Timoteo 5:​4, 8; 1 Juan 3:18). Ashtahuancarin feta charishcata ricuchingapajca cushicushpami predicana canchij (1 Timoteo  4:16). Shinallataj Jehová Diospaj promesacunapi crishcata, pailla tucuita alli ruraj cashcata crishcatami ruraicunahuan ricuchina canchij. Chaita rurajpica Jehová Diosca cashcata rurajcunata shinami ñucanchijtaca ricunga. Ashtahuancarin paipaj amigocunami cai tucushun.

16. ¿Abrahanca imatataj tucui shunguhuan shuyarca?

¹⁶ Romanos capítulo 4-pica Abrahán shina Jehová Dios cusha nishcacunapi tucui shunguhuan crina cashcatami yachachin. Jehová Diosca Abrahanmanca paipaj huahua huahuacunamanta achca llajtacuna bendiciashca canatami huillarca. Chaita uyashpaca Abrahanca cushillami sintirishcanga (Génesis 12:3; 15:5; 17:4; Romanos 4:17). Shinapish Abrahanpish, Sarapish mayorllacunami carca. Paicunaca 100 y 90 huatacunata charishpapish manaraj shuj huahuata charishcacunachu carca. Mana sinchi feta charishpaca Jehová Dios nishcacuna pajtarinata crinaca paicunapajca sinchimi canman carca. Shinapish “Abrahanca huahuacunata mana chari tucushpapish feta charishcamantami achca llajtacunapaj yaya canata shuyacurca” (Romanos 4:​18, 19). Jehová Diospaj nishcacunaca pajtarircami. Chaimi Abrahanca pai tucui shunguhuan shuyacushca huahuata charirca. Paipaj shutica Isaacmi carca (Romanos 4:​20-22).

17. ¿Jehová Dios ñucanchijta cashcata rurajta shina ricunataca imamantataj seguros canchij?

¹⁷ Ñucanchijpish Abrahán shinami Diospaj ñaupajpica cashcata rurajta shina ricuri tucunchij. Shinallataj Diospaj alli amigocunami cai tucunchij. Chaimantami Pabloca Abrahanmanta parlashpaca: “‘Diosca cashcata rurajta shinami ricurca’ nishca shimicunaca mana Abrahanpajllachu quillcashca carca. Ashtahuanpish ñucanchijpajpishmi quillcashca carca. Ñucanchijpish Amito Jesusta huañushcacunapaj chaupimanta causachij Diospimi crinchij. Chaimantami paica ñucanchijtapish cashcata rurajta shina ricunga” nirca (Romanos 4:​23, 24). Shinashpaca, Abrahán shina feta charishcataca ruraicunahuan ricuchishunchij. Pero esperanzatapishmi charina canchij. Catij yachaipimi esperanzata charinamanta apóstol Pablo Romanos capítulo 5-pi imata nishcata yachashun.