¿Huillaj revistacunapi imalla yachachishcacunata yuyaringuichu?

¿“Cancunapaj yuyaita cambiaichij” nishpaca imatataj nisha nin? (Romanos 12:2)

Alli ruraicunallata rurana cashcataca mana nisha ninchu. Ashtahuanpish ñucanchij yuyaita cambiashpa Jehová Dios munashca shina causangapaj cambiocunata rurana cashcatami nisha nin (w23.01, páginas 8 a 9).

¿Cai mundopi ima tucucushcata ricushpaca ima shinataj alli yuyayujcuna cashcata ricuchi tucunchij?

Cai mundopi ima tucucushcata ricushpaca Bibliapaj profeciacuna ima shina pajtaricushcatami cuentata cunchij. Ñucanchij ima yuyashcallata ninapaj randica Diospaj organización cushca publicacioncunamantami parlana canchij. Chashnami tucuicuna tandalla, shuj yuyailla cashun (1 Corintios 1:10). (w23.02, página 16).

¿Jesuspaj bautismohuan, paita catijcunapaj bautismohuanca imapitaj chꞌican can?

Jesusca Diosta sirvingapaj ari ninacushca llajta ucupimi huacharirca. Chaimantami paica ñucanchij shinaca Diosman mingarinataca mana minishtirca. Shinallataj Jesusca jucha illaj cashcamantami ima juchamanta arrepintirinataca mana minishtirca (w23.03, página 5).

¿Huauqui panicuna comentariocunata cuchunca ima shinataj ayudai tucunchij?

Ñucanchij comentariocunataca ashalla shimicunapimi cuna canchij. Chashnami shujtaj huauqui panicunapish comentariocunata cuchun tiempota cushun. Shinallataj mana achca yuyaicunamantachu parlana canchij. Parrafopi ricurij tucui yuyaicunamanta parlajpica shujtajcunaca comentariocunata mana cui valingacunachu (w23.04, página 23).

¿Isaías 35:​8-pi nishca ‘Jucha illaj Ñanca’ imataj can?

Jehová Diosca shuj ñanta pushaj shinami Babiloniamanta llujshishpa Israelman chayachun judiocunata ayudarca. Chai ñanca “Jucha illaj Ñan” nishcami can. ¿Jehová Diosca cunan punllacunapipish paita sirvijcunata cashna laya ñantachu pushacun? Ari. 1919 huatamantami achcacunaca ‘Jucha illaj Ñanpi’ puri callarishcacuna. Chaimantami chai huatamanta chꞌican chꞌican shimicunapi Bibliata traduci callarishcacuna, achca Bibliacunatapishmi imprimishcacuna. Tucuicunami Diospaj bendicioncunata japingacama chai ñanpi purishpa catina canchij (w23.05, páginas 15 a 19).

¿Proverbios 9-pi parlashca ishqui huarmicunaca picunataj can?

Proverbios 9-pica ishqui huarmicunamantami parlan Shujca ‘chꞌahuanyashca, yuyai illaj’ huarmimi can. Cai huarmipaj invitacionta chasquishpaca llaquillami causashun. Caishuj huarmica ‘yachaisapa’ huarmimi can. Paipaj invitacionta chasquishpaca cunanpish shamuj punllacunapishmi cushilla causashun (Proverbios 9:​1, 6, 13, 18). (w23.06, páginas 22 a 24).

¿Jehová Diosca humilde, llaquij cashcataca ima shinataj ricuchishca?

Diosca angelcunata cachashpami urcucunapi miticunaman richun Lottaca mandarca. Pero Lotca chaimanca mana risha nircachu. Chaimi Jehová Diostaca ‘Zoar pueblopi miticugrichun saquihuai’ nishpa mañarca. Pai mañashcata rurachunmi Jehovaca saquirca (w23.07, página 21).

¿Cambaj cusa pornografía viciota charijpica imatataj rurana cangui?

Can culpata charishcataca mana yuyanachu cangui. Chaipaj randica Jehová Diospajman ashtahuan cꞌuchuyangapajmi esforzarina cangui. Bibliapica huaquin huarmicuna jatun llaquicunata charishpapish tranquilas sintirishcatami parlan. Canca cambaj cusa chai viciopi ama cutin urmachunmi ayudai tucungui (w23.08, páginas 14 a 17).

¿Trabajopi, escuelapi o colegiopi ñucanchij crishcacunamanta tapujpica imatataj rurana canchij?

Chai tapuita imamanta rurashcatami intindina canchij. Pero ima munaihuan tapushca cajpipish siempremi respetota, cꞌuyaita ricuchina canchij (w23.09, página 17).

¿Mariamantaca imatataj yachai tucunchij?

¿Mariaca sinchi mingashcata pajtachingapaj fuerzasta, animotaca ima shinataj japirca? Paica shujtajcunapaj ayudatami mashcarca. Jehová Diosca ángel Gabrielta, Elisabetta utilizashpami Mariamanca fuerzasta curca. Cunan punllacunapipishmi Jehová Diosca huauqui panicunata utilizashpa ñucanchijmanca fuerzasta, animota cun (w23.10, página 15).

¿Diosca ñucanchij mañaicunataca ima shinataj cutichin?

Yaya Diosca ñucanchij mañaicunataca uyanmi. Pero ñucanchij mañaicunata cutichingapajca Jehová Diosca cai Allpapi paipaj munai ima shina pajtarinapimi yuyan (Jeremías 29:12). Maijancuna chaillatataj mañajpipish Jehová Diosca maipica shujtaj shujtaj layami cutichin. Ima laya cajpipish paica siempremi ayudashpa catinga (w23.11, páginas 21 a 22).

¿Romanos 5:​2-pi esperanzamanta parlashpapish imamantataj verso 4-pipish chaillamantataj parlan?

Diosmanta yachai callarishpaca Paraisopi sumajta causanatami asha asha cri callarircanchij. Pero llaquicunata chꞌimbapurashpa, Jehová Diospaj amigo tucushcata cuentata cushpaca ñucanchij esperanzataca ashtahuanmi sinchiyachishun (w23.12, páginas 12 a 13).