1, 2. ¿Imamantataj huaquinpica huacashcanchij?

 TUCUICUNAMI maipica huacashcanchij ¿nachu? Por ejemplo, ñucanchij huahuacuna huacharijpi, cushilla pasashcata yuyarishca rato o achca huatacunata mana ricushca amigohuan tupanacushpaca de contentochari huacarcanchij.

² Pero shungupi llaquilla cashcamantami maipica huacaillata huacashcanchij. Tal vez ñucanchij cꞌuyashca familiacuna, amigocuna achcata llaquichishcamanta, millai ungüita charishcamanta, o familiacuna huañushcamantami achcata huacashcanchij. Babiloniocuna Jerusalenta tucuchijta ricushpa Jeremías sintirishca shinachari ñucanchijpish sintirishcanchij. Paica: “Ñuca ñahuicunamantaca jatun yacuta shina huiquita jichani. Manataj ashallatapish samarina tiyanchu. Chaimantami huacanataca, manataj upallashpa huacani” nircami (Lamentaciones 3:​48, 49).

3. ¿Jehová Diosca paita sirvijcuna llaquita cajpica ima shinataj sintirin? (Isaías 63:9).

³ Jehová Diosca ñucanchijcuna llaquilla cashcamanta ñucanchij causaipi mashna cutincuna huacashcataca allimi yachan. Bibliapi nishca shinaca Yayitu Diosca ñucanchijtaca allimi intindin. Ñucanchijta ayudachun mañajpipish uyanmi (Salmo 34:15). Pero ¿Yayitu Diosca ñucanchij mañashcacunata uyashca qꞌuipaca imatataj ruran? Ñucanchijcuna llaquicunamanta sufricujta ricushpaca paipish llaquillami sintirin. Chaimantami  ñucanchijta rato ayudan (Isaías 63:​9-ta liyipai).

4. a) ¿Cai yachaipica picunamantataj yachashun? b) ¿Cai yachaipica Jehová Diosmantaca imatataj yachashun?

⁴ Bibliapica Jehová Dios paita sirvijcuna huacajta ricushpaca imata rurashcatami nin. Por ejemplo, ¿Anapish, rey Davidpish, Ezequiaspish imamantataj huacarcacuna? ¿Jehová Diosca paicunataca ima shinataj ayudarca? ¿Llaquilla sintirishpa, pi ñucanchijta achcata llaquichishca cajpi o sustarishca cashpaca imamantataj paicunapaj ejemplota yuyarina canchij?

HUAQUINPICA LLAQUILLA CASHCAMANTAMI HUACANCHIJ

5. ¿Anaca ima shinataj sintirij carca?

⁵ Anaca achca llaquicunata charishcamantami huacaj carca. Paipaj cusaca Peniná huarmihuanpishmi cazarashca carca. Chai huarmica Anata achcata pꞌiñashcamantami paitaca mana alli trataj carca. Shinallataj Anaca huahuacunataca mana chari pudijchu carca. Pero Peniná huarmica huahuacunatami charirca (1 Samuel 1:​1, 2). Chaimantami Peninaca Anamanta burlarij carca. ¿Canta chashna llaquichijpica ima shinataj sintiringuiman carca? Anaca llaquilla sintirishcamantami cꞌuyaillata huacashpalla pasaj carca. Imatapish mana micujchu carca (1 Samuel 1:​6, 7, 10).

6. ¿Anaca tranquila sintiringapajca imatataj rurarca?

⁶ ¿Anaca tranquila sintiringapajca imatataj rurarca? Paica Diospaj huasimanmi rirca. Diospaj huasi cꞌuchullapi cashpami Anaca Yaya Diosta huacashpa mañarca. Paica, ‘cambajta ruraj ñuca llaquihuan cajta ricuhuayari’ nishpami Yaya Diosta rogarishpa mañarca (1 Samuel 1:10b, 11). Anaca pai ima shina sintirishcatami tucuita Yaya Diosman huillarca. Yayitu Diosca chaita uyashpaca achcatami llaquirishcanga.

7. ¿Anaca Jehová Diosta mañashca qꞌuipaca ima shinataj sintirirca?

⁷ Ana pai ima shina sintirishcata Yaya Diosman huillashca qꞌuipaca, sacerdote Eliasmi ‘Jehová Diosca can mañashcatami cutichinga’ nishpa paitaca animarca. Chaimi Anaca tranquila sintirca. Bibliapica: “Pai maita shamushcallatataj tigrashpaca, micurcami. Ña mana ashtahuan llaquilla purircachu” ninmi (1 Samuel 1:​17, 18). Anapaj llaquicunaca manaraj tucurishcachu carca. Pero tucuita Diospaj maquipi saquishcamantami paica tranquila sintirirca. Yaya Diosca Ana mañashcatami uyarca. Chaimi Anaca huahuacunata chari tucurca (1 Samuel 1:​19, 20; 2:21).

8, 9. ¿Hebreos 10:​24, 25-pi nishca shinaca tandanacuicunaman ringapajca imamantataj esforzarina canchij? (Fotomantapish parlapai).

⁸ ¿Anamantaca imatataj yachanchij? ¿Llaquicunata apacushcamantachu huacacushcangui? Tal vez shuj amigota o shuj familiatami huañuipi chingachishcangui. Cashna jatun llaquicuna tiyajpica ñucanchijllami pasanata  munanchij. Pero chashna sintirishpaca Anatami yuyarina canchij. Diospaj huasiman rishcamantami Jehová Diosca Anata animarca. Canpish shaicushca cashpapish, llaquilla cashpapish tandanacuicunaman rijpica Jehová Diosmi cantaca animanga (Hebreos 10:​24, 25-ta liyipai). Tandanacuicunapica sinchiyachij versocunatami uyanchij. Chashnami Jehová Diosca llaquicunallapi ama yuyachun, tranquilo sintirichun ayudan. Ñucanchij llaquicuna mana tucurijpipish tandanacuicunaman rishpaca asha ashami tranquilo sintirishun.

⁹ Tandanacuicunapi huauqui panicuna cꞌuyaita ricuchijpi, alaja shimicunahuan sinchiyachijpimi animarinchij (1 Tesalonicenses 5:​11, 14). Precursor especial shina sirvij huauqui paipaj huañushca huarmita yuyarishpa ima shina sintirishcata ricushun. Paica: “Ñuca finaditata yuyarishca ratoca huacaillatami huacani. Chaimi ñucalla casha nini. Chashnapish tandanacuicunaman ringapajmi esforzarini. Tandanacuicunaman chayashpaca sustarishca, llaquillami cani. Pero huauqui panicunapaj comentariocunata uyashpa, paicuna alaja shimicunahuan animajpimi tranquilo sintirini. Tandanacuicunaman rishcamantami ñaupajman catingapaj fuerzata japishcani” nircami. Shinashpaca tandanacuicunaman rijpica Jehová Diosca huauqui panicunata utilizashpami ñucanchijta sinchiyachin.

10. ¿Yallitaj llaquilla, sustarishca cashpaca Ana shinaca imatataj rurana canchij?

¹⁰ Anaca pai ima shina sintirishcata Yayitu Diosman tucuita huillashpaca tranquilami sintirirca. Canpish 1 Pedro 5:​7-pi nishcata pajtachingapajmi esforzarina cangui. Chaipi nishca shinaca Jehová Dios ñucanchijta uyaj cashcata seguros cashcamantami tucui ñucanchij preocupacioncunata paiman mingana canchij. Shuj panica paipaj cusata shuhuacuna huañuchijpica shungu pꞌaquirishca, yallitaj llaquillami carca. Paica: “Cunanmantaca llaquillami causasha” nishpami yuyaj carca. Pero ¿ama chashna sintiringapajca imatataj rurarca? Paica: “Yayitu Diostami cutin cutin mañaj carcani. Huaquinpica ñuca ima shina sintirishcata paiman huillanaca sinchimi carca. Pero paica siempremi ñucata uyaj carca. Paita mañashcahuanmi ñuca shungupi tranquila sintirij carcani. Ñaupajman catingapajpish fuerzastami charircani” nircami. Canpish ima shina sintirishcata Yaya Diosman huillajpica paica can ima shina sintirishcataca allimi intindinga. Chaimi cambaj llaquicuna mana tucurijpipish Yayitu Diosca tranquilo sintirichun canta ayudanga (Salmo 94:19; Filipenses 4:​6, 7). Ashtahuancarin llaquicunata ahuantashcamantami sumaj bendicioncunata canman cunga (Hebreos 11:6).

HUAQUINPICA ÑUCANCHIJTA ACHCATA LLAQUICHIJPIMI HUACANCHIJ

11. ¿Shujtajcuna llaquichijpica Davidca ima shinataj sintirirca?

¹¹ Davidca achca llaquicunahuanmi chꞌimbapurarca. Maijancunaca Davidpaj familiacuna, amigocuna cashpapish paitami llaquichisha nircacuna (1 Samuel 19:​10, 11; 2 Samuel 15:​10-14, 30). Chaimi Davidca: “Tucui tutacunami ñuca sauna shutujyajta huacani. Ñuca camapipish ñuca huiquita jichacunillami. Huacana fuerzapish ña mana tiyanchu” nirca. ¿Davidca imamantataj chashna sintirirca? Paica: ‘Ñucata pꞌiñajcuna llaquichijpimi huacani’ nircami (Salmo 6:​6, 7). Shinashpaca Davidca shujtajcuna llaquichishcamantami achcata huacarca.

12. ¿Salmo 56:​8-pi nishca shinaca Davidca imatataj tucui shunguhuan crirca?

¹² Davidca achca llaquicunata apashca cashpapish Jehová Dios paita cꞌuyaj cashcatami seguro carca. Chaimi: “Ñuca huacashcataca, Mandaj Diosca ñami uyahuashca” nirca (Salmo  6:8). Shinallataj shuj cutinca alaja shimicunahuanmi Jehová Dios ñucanchijta cꞌuyaj cashcata, ñucanchijcuna ima shina sintirijta alli intindij cashcata quillcarca (Salmo 56:​8-ta liyipai). Davidca Yayitu Dios ñucanchij huiquicunata shuj huallupi o capachupi churaj cashcatami nirca. Shinallataj ñucanchij huiquicunata shuj libropi anotaj cashcatapishmi nirca. Chaita nishpaca Yayitu Dios ñucanchijcuna ima shina sufricujta alli yachaj cashcatami nirca. Ashtahuancarin Yayitu Diosca chai llaquicunata apacushcamanta ñucanchijcuna ima shina sintirishcatami alli intindin.

13. ¿Shujtajcuna ñucanchijta llaquichijpica imatataj yuyarina canchij? (Fotomantapish parlapai).

¹³ ¿Davidmantaca imatataj yachanchij? ¿Shuj cꞌuyashca amigo, o familiachu canta llaquichirca? O ¿cambaj novio, novia, cusa o huarmi saquishpa rishcamantachu shungu pꞌaquirishca cangui? O ¿tal vez shuj amigo o familia Jehová Diosta sirvinata saquishcamantachu llaquilla cangui? Shuj huauquipaj ejemplomanta yachashun. Paipaj huarmica shujtajhuanmi rirca. Chaimi paica: “Ñuca huarmi ñucata chashna llaquichinataca mana yuyarcanillapishchu. Maijan ratoca imapaj mana valij shina, colerahuan, llaquillami sintirij carcani” nirca. ¿Cantapish chashna llaquichishca cajpica imatataj rurana cangui? Jehová Dios nunca canta mana saquinatami yuyarina cangui. Shinallataj chai huauquica: “Shujtajcuna ñucata saquijpipish Jehová Dios ñucata mana nunca saquinatami yuyarircani. Yayitu Diosmi jatun rumi shina ñucapajca can. Ima tucujpipish paica siempremi ñucahuan canga. Paipaj agllashcacunataca manataj saquingachu” nircami (Salmo 37:28). Shinallataj Jehová Dios canta achcata cꞌuyashcatami yuyarina cangui. Chaimanta, shujtajcuna llaquichijpipish Jehová Dios canta ña mana cꞌuyashcata ama yuyaichu (Romanos 8:​38, 39).

14. ¿Salmo 34:​18-pica imatataj yachachin?

¹⁴ Pi canta llaquichishcamanta llaquilla cashpaca rey David imata quillcashcatami yuyarina cangui (Salmo 34:​18-ta liyipai). Shuj diccionariopica: “Cai versopi espiritupi llaquilla cajcunamanta parlashpaca ‘llaquicunallahuanmi causashun’ nishpa yuyajcunamantami parlacun” ninmi. ¿Chashna yuyajcunataca Yayitu Diosca ima shinataj ayudan? Chai salmopi nishca shinaca Jehová Diosca llaquilla cajcunapaj cꞌuchullapimi can. Ima shinami shuj yaya paipaj huahua llaquilla cajpi paita ugllashpa cushichin, chashnallatajmi Yayitu Diosca ñucanchijcunamanta llaquirishpa utca ñucanchijta ayudasha nin. Shinallataj ñucanchij llaquicunata ahuantashpa catichunca sumaj bendicioncunata ñalla chasquinatami yuyachin (Isaías 65:17).

 HUAQUINPICA YALLITAJ SUSTARISHCA CASHCAMANTAMI HUACANCHIJ

15. ¿Ezequiasca imamantataj mana jahuallata huacarca?

¹⁵ Mandaj Ezequiasca 39 huatacunata charishpaca ungushpami yallitaj ancha tucurca. Jehová Diosca Isaiasta cachashpami chai ungüihuan huañuna cashcata Ezequiasman huillarca (2 Reyes 20:1). Chaita uyashpaca Ezequiasca mana jahuallatami huacai callarirca. Chaimi Yaya Dios paita ayudachun rogarishpa mañarca (2 Reyes 20:​2, 3).

16. a) ¿Ezequías mañashcata uyashpaca Yayitu Diosca ima shinataj sintirirca? b) ¿Jehová Diosca Ezequiastaca ima shinataj ayudarca?

¹⁶ Ezequiasca huacashpa, rogarishpa Yayitu Diosta mañajpica paica uyarcami. Chaimi achcata llaquirirca. Shinallataj Ezequiasman caita nichunmi Isaiasta cacharca: “Can mañashcataca uyashcanimi, cambaj huiquitapish ricushcanimi. Chaimantami cantaca sanoyachigrini” nircami. Shinashpaca Yayitu Diosca ashtahuan huatacunata causachunmi Ezequiasta saquirca. Asiriocunapish Jerusalenta ama llaquichichunmi ayudarca. Chashnami Yayitu Diosca cꞌuyaj, llaquij cashcata ricuchirca (2 Reyes 20:​4-6).

17. ¿Millai ungüicuna japijpica Yayitu Diosca ima shinataj ñucanchijta ayudan? (Salmo 41:3; fotomantapish parlapai).

¹⁷ ¿Ezequiasmantaca imatataj yachanchij? ¿Millai ungüita charishpaca imatataj rurana canchij? Huacashpami Yayitu Diosman ima shina sintirishcata huillana canchij. Bibliapi nishca shinaca Jehová Diosca yallitaj cꞌuyaj, tucuipi cushichij Yayami can. Paica “tucui ñucanchij llaquicunapimi cushichin” (2 Corintios 1:​3, 4). Pero Jehová Dios tucui ñucanchij llaquicunata cunan punllacunapi tucuchinataca mana shuyanchijchu. Chashnapish llaquicunata ahuantashpa catichun ñucanchijta ayudanatami seguros canchij (Salmo 41:​3-ta liyipai). Por ejemplo, Yayitu Dios espíritu santota cujpimi ñaupajman catingapaj fuerzata japinchij. Shinallataj Yayitu Diosca sabiduría, entendimientota cushpami tranquilo sintirichun ayudan (Proverbios 18:14; Filipenses 4:13). Ashtahuancarin Yayitu Diosca ñalla tucui ungüicunata tucuchinata yuyachishpami ñucanchijta cushichin (Isaías 33:24).

18. ¿Jatun llaquicunahuan chꞌimbapuracushpaca canca ima versota yuyarishpataj animarishcangui? (“ Yayitu Diosca sumaj shimicunahuanmi ñucanchij huiquicunata pꞌichan” nishca recuadrota ricui).

¹⁸ Ezequiasca Jehová Dios nishcacunata uyashpami tranquilo sintirirca. Ñucanchijpish Jehová Dios paipaj Shimipi nishcacunata uyashpami tranquilo sintirishun. Jehová Diosca ñucanchijcuna llaquicunahuan chꞌimbapuracujpi animarichunmi Bibliata quillcachirca (Romanos 15:4). Por ejemplo, Africapi causaj shuj panica cáncer ungüita charishcamantami dimastij huacaj carca. Paica: “Isaías 26:​3-pi nishcata yuyarishpami animarij carcani.  Chaipi nishca shinaca, huaquin llaquicunata allichingapaj ñucanchijllataj imata mana rurai tucujpipish Jehová Diosca chai llaquicunata chꞌimbapurachunmi ayudan” nircami. ¿Canpish jatun llaquicunahuan chꞌimbapuracushpaca ima versota yuyarishpataj animarishcangui?

19. ¿Ima bendicioncunatataj ñalla japishun?

¹⁹ Tucuri punllacunapi causacushcamantami achca llaquicunahuan chꞌimbapuracunchij. Chaimantami huaquinpica huacashun. Pero ima shinami Jehová Diosca Ana, David, Ezequías llaquilla cajpi ima shina sintirishcata alli intindirca, chashnallatajmi Yayitu Diosca ñucanchijcuna huacajpica ima shina sintirishcata alli intindin. Jatun llaquicunahuan chꞌimbapuracushpaca ima shina sintirishcataca tucuita paiman huillashunchij. Ñucanchijta cꞌuyaj huauqui panicunamantapish ama caruyashunchij. Ashtahuanpish animota japingapajca Bibliapi nishcacunata yuyarishunchij. Tucuringacama ahuantashpaca sumaj bendicioncunatami chasquishun. Ñallami Yayitu Diosca tucui ñucanchij huiquicunata pꞌichanga (Apocalipsis 21:4). Paraisopica yallitaj cushilla cashcallamantami huacashun.