Ñucaca 1927 huatapimi Estados Unidos llajtapi huacharircani. Ñuca yaya mamaca pichca huahuacunatami charirca. Ñuca huauqui panicunaca Jetha, Don, Karl, Joy shuticunami can. Ñucanchijca Jehová Diosta tucui shunguhuan sirvinatami munarcanchij. Ñuca pani Jethaca 1943 huatapimi Escuela de Galaad clase número 2-man rirca. Cutin ñuca huauqui Donca 1944 huatapimi Brooklynpi saquirij Betelpi sirvinaman rirca. Karlca 1947 huatapimi Betelman rirca. Ñuca pani Joyca 1951 huatapimi Betelman rirca. Paicunapaj alli ejemplota ricushpami ñucapish Jehová Diosta ashtahuan sirvinata munarcani.

Ñuca yaya mamaca Yaya Diosta achcata cꞌuyashcamantami Bibliata liyijcuna carca. Ñucanchijmanpish Yaya Diosta cꞌuyachunmi yachachijcuna carca. Ñuca yayaca Primera Guerra Mundial tiyai tiempopimi Europa ladopi soldado carca. Chaipi cashpami iglesiacunata pushajcunapi confianata saquishca carca. Ñuca yaya guerrapi mana huañushcamantami ñuca mamitaca cushilla carca. Chaimi ñuca yayataca: “Karl jacu iglesiaman” nirca. Pero ñuca yayaca: “Iglesiacama compañashpapish mana yaicushachu” nircami. Ñuca mama “¿imamanta?” nishpa tapujpica ñuca yayaca: “Macanacuipi cajpica religionta pushajcunaca ñucanchij religionmantallataj cashpapish ñucanchij contra soldadocunata, paipaj armacunatapishmi bendiciarca. ¿Picunatataj Diosca apoyacushcanga?” nircami.

Shuj punlla ñuca mama iglesiapi cajpica ishqui testigocunami ñucanchij huasiman chayarcacuna. Paicunaca ñuca yayamanmi Luz nishca librocunata curca. Chaicunaca Apocalipsis librota estudiangapajmi ayudajcuna carca. Chaimi ñuca mamaca chai librocunata liyi callarirca. Shinallataj shuj punllaca periodicopi Luz librohuan Bibliamanta yachanata munajcunata shuj tandanacuiman invitacushcatami ricurca. Chaimi chaiman rinata decidirca. Chaiman chayajpica shuj mayorlla huarmimi punguta pascarca. Ñuca mamaca: “¿Caipichu cai librocunata estudianguichij?” nishpami tapurca. Chai mayorlla huarmica: “Ari. Chai librotami estudiacunchij. Yaicui” nirca. Catij semanaca ñuca mamaca ñucanchijtami chaiman apashpa rirca. Chai punllamantami cada semana chaiman rij carcanchij.

Shuj tandanacuipi cajpimi tandanacuita pushajca Salmo 144:​15-ta liyichun mañarca. Chai versopica Jehová Diosta adorajcuna cushilla causajcuna cashcatami nin. Chai versoca ñucapajca sumajmi carca. Cai versocunatapishmi munani: 1 Timoteo 1:​11-pica Jehová Dios ‘cushi Dios’ cashcatami nin. Shinallataj Efesios  5:​1-pica ‘Dios rurashca shinallataj tucuita rurachunmi’ animan. Chai versocunata liyishpami Jehová Diosta sirvishcamanta cushilla cana cashcata, agradecido cana cashcata intindircani. Ñuca causaipica chaita pajtachingapajmi esforzarishcani.

Chicago llajtapimi tandanacuj carcanchij. Chaiman ringapajca 32 kilometroscunatami viajana carcanchij. Tandanacuipi ñuca pani comentajpica “ñucapishmi respuestata yacharcani ¿imamantataj mana maquita alzarcani?” nishpami yuyarcani. Chaimantami tandanacuicunapi comentangapaj ashtahuan estudiai callarircani. Ñuca huauqui panicuna shinami ashtahuan Jehová Diosman cꞌuchuyashpa catircani. Chaimi 1941 huatapi bautizarircani.

1942 huatapimi Cleveland llajtapi shuj jatun tandanacui tiyarca. Chaimi ñuca familiapish, shujtaj ladomanta shamuj huauqui panicunapish jatun tandanacui tiyana cꞌuchullapi carpa huasicunapi saquirircanchij. Estados Unidosmanta achca huauqui panicunaca jatun tandanacuitaca telefonocunapimi uyarcacuna. Chai punllacunaca Segunda Guerra Mundialpishmi tiyarca. Jehová Diosta sirvijcunata catirashpa llaquichijcunapishmi ashtahuan miraricurca. Chaimi tutacunaca huaquin huauquicunaca tucuicunata cuidangapaj paicunapaj carrocunapi saquirijcuna carca. Llaquichijcuna shamucujta ricushpa, uyashpaca carrocunapaj fococunata japichishpa, sinchita pitashpami tucuicunaman huillana carcacuna. Chaita uyashcahuanmi shujtajcunapish paicunata ayudanaman utca rina carcacuna. Antés ima llaquipish mana tiyarcachu. Pero Jehová Diospaj pueblo tucuipi allichirishca cashcata ricushpaca sumajtami dormi tucurcani.

Huauquicuna ñucanchijta cuidacushcamantami ñuca mamitapish tranquila carca. Paica Jehová Diospi, pai churashca organizacionpimi tucui shunguhuan confiaj carca. Chashnami ñucamanca shuj alli ejemplota curca. Chaitaca cunancamami yuyarini.

Chai jatun tandanacui manaraj tiyajpica ñuca mamitaca precursorado regulartami japirca. Chaimantami jatun tandanacuipi tiempo completopi Diosta sirvinamanta parlaj discursocunataca ashtahuan atencionhuan uyarca. Jatun tandanacuimanta ña huasiman tigracushpaca ñuca mamitaca ñucanchijtaca: “Ñucaca precursora regular shina sirvishpa catinatami munani. Pero huasita, cancunatapishmi cuidasha nini. ¿Manachu cancuna ñucata ayudasha ninguichij?” nircami. Ñucanchij ari nijpica paica cada unomanmi shuj o ishqui cuartocunata limpiachun mingarca. Chaitaca tutamanta ladocunami ruraj carcanchij. Ñucanchijcuna escuelaman rijpica ñuca mamaca tucui huasi alli arreglashca, ordenpi cashcatami ricuj carca. Chai huashaca Diosmanta huillanamanmi llujshij carca. Ñucanchijta cuidanataca mana saquircachu. Escuela qꞌuipa huasipi micunaman rijpica ñuca mamitaca siempremi ñucanchijhuan micuj carca. Huaquin punllacunaca escuela qꞌuipami ñucanchij mamahuan Diosmanta huillanaman rij carcanchij. Chashnami precursorcuna imallata ruraj cashcata ricurcanchij.

16 huatacunata charishpami precursor shina sirvi callarircani. Ñuca yayaca manaraj testigochu carca. Pero siempremi precursoradopi ima shina ricujta tapuj carca. Shuj tutaca ñuca yayamanca: “Ñuca achcata esforzaricushpapish pi Bibliamanta yachanata munajtaca manaraj japishcanichu” nircanimi. Chai qꞌuipaca: “¿Manachu canca ñucahuan estudianata munanguiman?” nishpami tapurcani. Ñuca yayaca ashata yuyashca qꞌuipaca: “Ari, munanimi” nircami. Shinami ñuca yayaca ñucapaj punta estudiante tucurca.  Paiman Diosmanta yachachinaca sumaj privilegiomi carca.

Ñuca yayahuanca “La verdad os hará libres” nishca librotami estudiarcanchij. Asha tiempo qꞌuipaca ñuca yaya Bibliata alli estudiaj cachun, alli yachachij cachun ñucata ayudacushcatami cuentata curcani. Por ejemplo, shuj tutaca shuj parrafota liyishca qꞌuipaca paica: “Caipi ima nishcataca intindinimi. Pero ¿caipi nishcacuna cierto cashcataca ima shinataj yachangui?” nishpami tapurca. Ñucaca paipaj tapuita cutichingapajca manaraj listochu carcani. Chaimi: “Cai ratoca cambaj tapuitaca mana cutichi tucunichu. Pero estudiangapaj cutin tandanacushpaca cambaj tapuitami cutichisha” nircani. Chai qꞌuipaca ñuca yayaman yachachicushca tema verdad cashcata ñucaraj seguro cangapajca huaquin versocunatami alli investigarcani. Chai punllamantami Bibliamanta yachachingapaj, alli prepararingapaj, alli investigangapajpish esforzarircani. Chashnami Jehová Diospajman ashtahuan cꞌuchuyarcani, ñuca yayatapish chaita rurachunmi ayudarcani. Ñuca yayaca imalla yachashcata practicapi churashpami catirca. Chaimi 1952 huatapi bautizarirca.

17 huatacunata charishpami huasimanta rircani. Ñuca panica a misionera shinami sirvi callarirca. Cutin ñuca huauqui Donca betelitami tucurca. Paicunaca chai asignacioncunataca cushillami pajtachircacuna. Chaita ricushpami ñucapish Jehová Diosta ashtahuan sirvingapaj animarircani. Chaimi Betelman y Escuela de Galaadman ringapaj solicitudta cacharcani. Chaitaca Jehová Diospaj maquipimi mingarcani. 1946 huatapimi ñucataca Betelman invitarcacuna.

Betelpica ñami 75 huatacunata sirvicuni. Chai tucui huatacunapica chꞌican chꞌican asignacioncunatami charishcani. Por ejemplo, librocunata ruranata, contabilidadta ruranatapishmi yachashcani. Shinallataj Betelpi imalla minishtishcacunata randinata, Betelmanta shujtaj ladocunaman huaquin cosascunata cachanatapishmi yachashcani. Pero ashtahuantajca Bibliamantami achcata yachashcani. Por ejemplo, Diosta adorana tutamanta programata, betelitacunaman cushca conferenciacunata uyashpami achcata yachashcani.

Ñuca huauqui Karlmantapishmi achcata yacharcani. Paica 1947 huatapimi Betelman chayarca. Karlca Bibliamanta alli estudiaj, alli yachachijmi carca. Shuj cutinca shuj conferenciata cungapaj allichiricushpami paipaj ayudata mañarcani. Paimanca: “Achca informacionta mashcashcatami charicuni. Pero cai informacionta ima shina utilizanataca mana yachanichu” nircani. Chaimi ñuca huauquica: “Joel, ¿cambaj conferenciapica ima temamantataj yachachigringui?” nishpa tapurca. Pai chashna nijpica achca informacionta charishpapish conferenciapaj temamanta parlaj informacionllata utilizana cashcatami cuentata curcani. Chaita ruranataca mana cungarishcanichu.

 Betelpi cushilla cangapajca Jehová Diosmanta tucui shunguhuan huillangapajmi esforzarina canchij. Chashnami sumaj experienciacunata chari tucushun. Shuj tuta Bronx ciudadpi ima pasashcatami yuyarini. Shuj huauquipish, ñucapish shuj huarmitami visitarcanchij. Paica La Atalaya y ¡Despertad! nishca revistacunatami chasquishca carca. Ñucanchij shuticunata nishca qꞌuipaca: “Cunan tutaca gentecunataca Bibliamantami yachachicunchij” nircanchijmi. Chaimi chai huarmica: “Bibliamanta yachachijcuna cashpaca yaicuichijlla” nirca. Chaipi cashpaca Diospaj Gobiernomanta, Paraisomanta parlaj alaja versocunata liyishpami intindichircanchij. Chai huarmi chai versocunata ricushpaca achcatami animarirca. Catij semanapajca paipaj familiatapishmi ñucanchijhuan estudiachun invitashca carca. Shinami paipish, paipaj familiapish Diosta alli sirvijcuna tucurca.

Ñucaca cazaranatami munarcani. Chaimi Yaya Diostaca: “Alli huarmita taringapaj ayudahuai” nishpa mañarcani. Shinallataj: “¿Ña cazarashpaca Jehová Diosta sirvishpa catingapajca imatataj rurasha?” nishpami yuyaj carcani. 10 huatacuna qꞌuipami Diosta sirvij alli huarmita tarircani.

1953 huatapi Yankee nishca estadiopi jatun tandanacuita charishca qꞌuipaca Mary Aniol shuti panitami rijsircani. Paica ñuca panihuanmi Escuela de Galaad clase número 2-man rishca carca. Shinallataj ñuca panihuanmi misionera shina sirvirca. Chaimi Caribe ladopi misionera shina sirvishcata ñucaman parlarca. Paihuan yachacujcunamantapishmi cushilla parlarca. Chashna ashtahuan rijsinacushpaca ishquindij Jehová Diosta sirvisha nishcatami cuentata curcanchij. Chaimi abril de 1955-pi cazararcanchij. Ñuca huarmica Jehová Dios cushca regalomi carca. Ñucapajca alli ejemplopishmi carca. Paiman imata rurachun mingajpipish chaitaca cushillami pajtachij carca. Shujtajcunamantapishmi sustarij carca. Diospaj Reinotaca siempremi punta lugarpi churaj carca (Mateo 6:33). Quimsa huatacunatami superintendente shina sirvircanchij. Cutin 1958 huatapica ñucanchijtaca Betelpi sirvichunmi invitarcacuna.

Ñuca huarmisitamantaca achcatami yacharcani. Por ejemplo, recienlla cazarashca cashpaca ishquindij Bibliata liyinatami decidircanchij. 15 versocunatami liyij carcanchij. Chai qꞌuipaca chai versocunamanta imallata yachashcata, chaicunata ima shina pajtachi tucushcatapishmi parlanacuj carcanchij. Shinallataj ñuca huarmica Galaadpi imalla yachashcata, misionera shina sirvicushpa imalla yachashcatami ñucaman parlaj carca. Paihuan chashna parlanacunata yachashcamantami alli yachachij canata, panicunata ima shina animanatapish yacharcani (Proverbios 25:11).

Ñuca cꞌuyashca huarmisitaca 2013 huatapimi huañurca. Paraíso Allpapi paita cutin ricunataca tucui shunguhuanmi munani. Chai punlla chayangacamaca Jehová Diosmanta yachashpa, paipi confiashpa catinatami munani (Proverbios 3:​5, 6). Jehová Diosta sirvijcuna Paraíso Allpapi imallata ruranata yuyashpaca cushillami sintirini. Chaipica mushuj cosascunatami yachashun. Ñucanchijta yachachij Jehová Diosmantapishmi ashtahuan yachashun. Jehová Dios ñucaman achcata yachachishcamanta, cꞌuyaita ricuchishcamantapish ima shina agradicinataca mana yachanichu.