1, 2. ¿Huahuacuna Bibliapi nishcacunamanta tapuicunata rurajpica yaya mamacunaca imatataj rurana can?

 HUAHUACUNATA alli huiñachinaca mana jahuallachu can. Huahuacunata sinchi feta charichun ayudacushcamantami yaya mamacunataca achcata felicitanchij (Deuteronomio 6:​6, 7). Pero huahuacunaca ashtahuan huiñashpa catishpaca Diospaj Shimimanta, Diospaj mandashcacunamantami tapuicunata charingacuna.

² Huahuacuna chashna tapujpica yaya mamacunaca Diosmanta caruyacushcata yuyashpami tal vez sustaringacuna. Pero huahuacunaca imatapish yachangapajmi tapuicunata rurancuna (1 Corintios 13:11). Chaimanta huahuacuna paicunapaj crishcacunamanta tapuicunata rurajpica yaya mamacunaca mana mancharinachu can. Ashtahuanpish huahuacuna Bibliapi nishcacunata alli intindishpa paicunapaj crishcacunata sinchiyachichunmi ayudana canchij.

3. ¿Cai yachaipica imatataj yachashun?

³ Cai yachaipica huahuacuna sinchi feta charichun, Diospaj mandashcacunata imamanta cazuna cashcata alli intindichun, paicunapaj crishcacunatapish difindichun yaya mamacuna ima shina ayudai tucushcatami yachashun. Shinallataj huahuacuna imamanta tapuicunata rurajcuna cashcatami intindishun. Familiacuna Diosmanta yachashpa catingapaj imallata rurai tucushcatapishmi ricushun.

JEHOVÁ DIOSPI CRICHUN HUAHUACUNATA AYUDAICHIJ

4. ¿Huahuacunaca imamantataj huaquinpica tapuicunata charincuna?

⁴ Yaya mamacunaca paicuna feta charishcallamanta huahuacunapish feta charinataca mana yuyanachu can. Gentecunaca Diospi crishpaca mana huacharinchijchu. Chaimantami maipica  huahuacunaca: “¿Jehová Dios tiyashcataca ima shinataj yachai tucuni? ¿Bibliapi nishcacunaca ciertochu canga?” nishpa tapurincuna. Shinallataj Bibliapica alli yuyaihuan tucuita ricurana cashcatami nin (Romanos 12:1; 1 Tesalonicenses 5:21).

5. ¿Huahuacunaca Bibliapi nishcacuna cierto cashcata crichunca yaya mamacunaca ima shinataj ayudana can? (Romanos 12:2).

⁵ Huahuacunallataj Bibliapi nishcacuna ciertotaj cashcata ricuchun animai (Romanos 12:​2-ta liyipai). Huahuacuna tapuicunata rurajpica paicunallataj investigachunmi ayudai tucunchij. Por ejemplo, Diospaj Shimi Bibliata Jehová Dios quillcachishcata huahuacuna seguro cachunca ñucanchij publicacioncunapi, videocunapi investigachunmi animai tucunchij (1 Tesalonicenses 2:13). Shinallataj ñaupa Nínive llajtamanta investigachunmi animai tucunchij. Huaquin gentecunaca Nínive llajta mana tiyashcatami yuyajcuna carca. Pero más o menos 1850 huatapica chai llajta maipi cashcatami japircacuna. Chaipica rumi montoncunallami saquirishcarca. Chashnami gentecunaca Bibliapi nishcacuna ciertotaj cashcata cuentata curcacuna (Sofonías 2:​13-15). Bibliapica Nínive llajta ima shina tucurinatami huillarca. Chai profecía ima shina pajtarishcata yachangapajca Huillaj revista de noviembre de 2021-pi “¿Yacharcanguichu?” nishca tematami estudiai tucunguichij. Ñucanchij publicacioncunapi yachachishcacunata shujtaj diccionariocunahuan, librocunahuan comparashpaca verdadta yachachishcatami huahuacunaca cuentata cungacuna. Chashnami paicunaca paicunapaj crishcacunata sinchiyachingacuna.

6. ¿Huahuacuna Diospaj Shimipi verdadta yachachij cashcata cuentata cuchunca yaya mamacunaca imatataj rurana can? Shuj ejemplota churashpa parlai. (Fotomantapish parlapai).

⁶ Biblia mana pandarishpa tucuita alli yachachij cashcata huahuacuna cuentata cuchun ayudai. ¿Yaya mamacunaca Bibliamanta, Diosmanta huahuacunaman yachachingapajca imatataj rurai tucuncuna? Por ejemplo, shuj museoman rishpa, parqueman rishpa o testigo de Jehovacunapaj sucursalcunata visitashpami chaitaca rurai tucuncuna. Museoman en persona o virtualmente rishpaca chaipi tiyaj ñaupa cosascunata ricuchishpami Bibliapi nishcacuna ciertotaj cashcata ricuchi tucuncuna. Por ejemplo, Francia llajtapica piedra moabita nishca rumitami charincuna. Chai rumipica más o menos 3.000 huatacuna huashamanmi Diospaj shutita quillcarcacuna. Chai rumimantaca huaquin copiacunatami rurashcacuna. Shujtaca testigos de Jehovacunapaj central mundialpi tiyaj museopimi charincuna. Cutin shujtaj copiataca Guayaquil sucursalpimi charincuna. Chai rumipica Moab llajtata mandaj Mesá israelitacunapaj contra tucushcatami nin. Chaitaca Bibliapipishmi yachachin (2 Reyes 3:​4, 5). Huahuacuna Bibliapi  nishcacuna ciertotaj cashcata cuentata cushpaca Jehová Diostami ashtahuan cꞌuyangacuna (2 Crónicas 9:​6-tapish ricui).

7, 8. a) ¿Cai Allpapi, jahua pachapi imalla tiyashcacuna sumajta rurashca cashcata ricushpaca imatataj cuentata cunchij? Shuj ejemplota churashpa parlai. (Fotomantapish parlapai). b) ¿Huahuacunaca Jehová Dios tucuita rurashcata seguro cangapajca imapitaj yuyana can?

⁷ Cai Allpapi, jahua pachapi imalla tiyashcacunata ricuchun huahuacunata animaichij. Chaitaca campopi paseacushpa, chagrapi trabajacushpami rurai tucunguichij. Por ejemplo, Jehová Dios rurashcacunaca achcacunami caracol shina redondo formata charin. Chaicunata ricushpami mana yangamanta tiyai callarishcata, ashtahuanpish Yayitu Dios chaicunata rurashcata cuentata cunchij. Cientificocunaca chai formataca achca huatacunatami estudiashcacuna. Por ejemplo, Nicola Fameli nishca biofisicoca: “Cai Allpapi, jahua pachapi imalla tiyashcacunaca maijancunaca shuj uchilla circulomanta callarishpa jatun círculo tucungacamami mirarishpa catin” nircami. Chaitaca sucesión de Fibonacci nishpami rijsincuna. Por ejemplo, jahua pachapi tiyaj galaxiacuna, nautilo nishca conchacuna, huaquin plantacunapaj pꞌangacuna, girasol nishca sisacuna, shujtaj cosascunapishmi chai formataca charincuna. a

⁸ Shinallataj huahuacunaca escuelapica jahua pachapi, cai Allpapi imalla tiyashcacunaca ordenpi huiñajcuna cashcatami yachancuna. Por ejemplo, ¿casi tucui yuracunaca ima shinataj huiñan? Troncomantaca puntaca jatun ramacunami huiñan. Chai jatun ramacunamantaca shujtaj ramacunami huiñan. Y chai ramacunamantaca uchilla ramitacunami huiñan. Chai ordentaca patrón fractal nishpami rijsincuna. Pero ¿yuracuna chashna ordenpi huiñachunca pitaj rurarca? Cambaj huahuacuna chaita alli intindishpaca Yayitu Jehová Dios tucui imalla tiyashcacunata rurashcatami seguros cangacuna (Hebreos 3:4). Shinallataj huahuacunataca: “Jehová Dios cai Allpapi imalla tiyashcacunataca ordenpi huiñachunmi rurashca. ¿Manachu ñucanchijtapish paipaj mandashcacunata cazushpa ordenpi causachun rurashcanga?” nishpami tapui tucunguichij. Chai qꞌuipaca Bibliapi valishca mandashcacunata Jehová Dios cushcatami ricuchi tucunguichij.

DIOS MANDASHCACUNA VALISHCA CASHCATA CUENTATA CUCHUN AYUDAICHIJ

9. ¿Huahuacunaca imamantataj Dios mandashcacunamanta huaquinpica tapuicunata rurancuna?

⁹ Jehová Dios mandashcacunamanta huahuacuna tapuicunata rurajpica imamanta chaita tapushcatami alli intindina canguichij. ¿Chai mandashcacuna mana alli cashcata yuyashcamantachu tapuncuna? O ¿paicunapaj crishcacunata  ima shina difindinata mana yachashcamantachu tapuncuna? Huahuacunaca Jehová Dios mandashcacuna valishca cashcata cuentata cungapajca Huiñai huiñaita cushilla causai nishca librotami estudiana can. b

10. ¿Huahuacuna Jehová Diospajman cꞌuchuyachunca yaya mamacunaca ima shinataj ayudana can?

¹⁰ Huahuacuna Jehová Diospajman cꞌuchuyachun animaichij. Huahuacunahuan Bibliata estudiacushpaca tapuicunata rurashpa, Huiñai huiñaita cushilla causai libropi tiyaj ejemplocunata churashpami shungumanta parlachun animana cangui (Proverbios 20:5). Por ejemplo, yachai 8-pica Jehová Dios shuj alli amigo shina cashcatami nin. Chai alli amigoca ñucanchijcuna ama llaqui tucuchunmi imata rurana cashcata, imata mana rurana cashcatapish intindichin. Chai qꞌuipaca 1 Juan 5:​3-pi ima nishcatami intindichi tucunguichij. Shinallataj “¿Jehová Dios shuj alli amigo cashcata yachashcamanta paipaj mandashcacunataca ima shinataj ricuna canchij?” nishpami tapui tucunguichij. “Chai tapuita cutichinaca jahuallami can” nishpachari yuyanguichij. Pero chai tapuita rurajpica huahuacunaca Jehová Dios ñucanchijta cꞌuyashcamanta mandashcacunata cuj cashcatami cuentata cungacuna (Isaías 48:​17, 18).

11. ¿Huahuacuna Bibliapi nishcacunata valorachunca yaya mamacunaca imatataj rurana can? (Proverbios 2:​10, 11).

¹¹ Bibliapi nishcacunata cazuna alli cashcata huahuacuna cuentata cuchun ayudaichij. Paicunahuan Bibliata liyicushpa o punllapaj versota liyicushpaca Bibliapi nishcacuna cancunata ima shina ayudashcata parlanacuichij. Por ejemplo, ¿huahuacunaca imamanta alli trabajajcuna cana cashcata, imamanta honrado cana cashcataca allichu intindincuna? (Hebreos 13:18). Shinallataj Bibliapi nishcacunata cazushpa alli saludta charinata, cushilla causanatami intindichina canguichij (Proverbios 14:​29, 30). Bibliapi nishcacunamanta huahuacunahuan parlanacujpica paicunaca Diospaj Shimitaca ashtahuanmi valorangacuna (Proverbios 2:​10, 11-ta liyipai).

12. ¿Huauqui Estivenca paipaj churi Bibliapi nishcacunata valorachunca imatataj ruran?

¹² Francia llajtapi causaj huauqui Estivenca 16 huatata charij churitami charin. Paica Ethan shutimi can. ¿Ethan Diospaj mandashcacunata imamanta cazuna cashcata alli intindichunca Estivenpish, paipaj huarmipish imatataj rurancuna? Estivenca: “Ñucanchij churitaca: ‘¿Jehová Diosca paipaj mandashcacunataca imamantataj cazuchun nin? ¿Bibliapi nishcacunaca Jehová Dios cꞌuyaj cashcataca ima shinataj ricuchin? ¿Chai mandashcacunata mana cazushpaca ima shinataj causangui?’ nishpami tapunchij” nircami. Shinallataj Estivenca: “Ñucanchij huahua Bibliapi nishcacuna gentecuna nishcacunata yalli valishca cashcata cuentata cuchunmi munanchij” nircami. Paipaj yaya mamahuan chashna parlanacushcamantami Ethanca Jehová Diospaj mandashcacunataca achcata valoran.

13. ¿Huahuacuna Bibliapi nishcacunata pajtachichunca yaya mamacunaca ima shinataj ayudana can? Shuj ejemplota churashpa parlai.

¹³ Huahuacuna Bibliapi nishcacunata pajtachichun ayudaichij. Por ejemplo, huaquinpica profesorcunaca shuj librota liyichunmi huahuacunata mandancuna. Chai librocunapica huaquinpica mapa cosascunata ruraj gentecunata o shujtajcunata llaquichijcunataca alli ejemplocunata shinami churancuna. Chaipimi yaya mamacunaca: “¿Ñucanchijpish chai gentecunapaj ejemplota catijpica Jehová Diosca ima shinashi sintirinman?” nishpa tapuna can (Proverbios 22:​24, 25; 1 Corintios 15:33; Filipenses 4:8). Chashna tapujpimi huahuacunaca chai libromanta paicunapaj profesorcunahuan, compañerocunahuan parlacushpaca Jehová  Diosmanta huillana oportunidadta charingacuna.

PAICUNAPAJ CRISHCACUNATA DIFINDICHUN AYUDAICHIJ

14. ¿Huaquin jovencunaca imamantataj paicunapaj crishcacunata difindinata manchancuna?

¹⁴ Huaquin jovencitocunapajca paicunapaj crishcacunata difindinaca huaquinpica sinchimi can. Por ejemplo, profesorcuna “gentecunaca evolucionmantami shamunchij” nijpica huaquin jovencitocunapajca chai nishcacuna mana cierto cashcata intindichinaca asha sinchimi can. Pero ¿paicunapaj crishcacunata mana manchashpa difindichunca yaya mamacunaca ima shinataj ayudai tucuncuna?

15. ¿Jovencunaca paicunapaj crishcacunapi confiangapajca imatataj rurana can?

¹⁵ Paicunapaj crishcacunapi confiachun ayudaichij. Huahuacunaca Jehová Dios tucuita rurashcata crishcamantaca mana pingarinachu can (2 Timoteo 1:8). Achca cientificocunapish cai Allpapi tucui imalla tiyashcacuna mana ñapish yangamanta ricurishcatami crincuna. Ashtahuanpish tucui imalla tiyashcacuna yallitaj sumaj cashcata ricushpaca shuj Ruraj chaita rurashcata cuentata cuncuna. Chaimantami chai cientificocunapish evolucionpi mana crincuna. Huahuacunaca paicunapaj crishcacunata sinchiyachingapajca shujtaj huauqui panicunapish Yaya Dios tucuita rurashcata seguros cangapaj imata rurashcatami investigana can. c

16. ¿Huahuacunaca Jehová Dios tucuita rurashcataca ima shinataj explicai tucuncuna? (1 Pedro 3:15; fotomantapish parlapai).

¹⁶ Paicunapaj crishcacunata ima shina difindinata yachachichij (1 Pedro 3:​15-ta liyipai). Chaipajca jw.org paginaman yaicushpa “Los jóvenes preguntan” nishca parteta mashcai. Chaipica “Creación o evolución” nishca temacunaman yaicui. Chai temacunata estudiashca qꞌuipaca huahuacunataca: “¿Cai temacunamantaca Jehová Dios tiyashcata ricuchingapajca maijantataj ashtahuan munangui?” nishpami tapuna canguichij. Pero siempre respetohuan parlana cashcatami nina canguichij. Huahuacunapaj compañerocuna uyanata munajpica jahualla shimicunahuanmi paicunapaj crishcacunata explicana can. Por ejemplo, tal vez shuj compañeroca: “Diostaca nunca mana ricushcanichu. Chaimi pai tiyashcataca mana crini” ningami. Chashna nijpica cancunapaj huahuacunaca: “Sacha ucupi puricushcata yuyai. Chaipica  shuj alaja yacu tanquetami taringui. Chaita ricushpaca, ¿manachu shuj runa chai tanqueta rurashcata seguro canguiman? Jahua pachapi, cai Allpapi imalla tiyashcacunaca chai yacu tanqueta yallimi sumaj can. Chaimantami alli yachaita charij Yaya Dios chaita rurashcata seguro cani” nishpami cutichi tucuncuna.

17. ¿Huahuacuna paicunapaj crishcacunamanta shujtajcunaman yachachichunca ima shinataj animai tucunchij? Shuj ejemplota churashpa parlai.

¹⁷ Huahuacuna Bibliamanta shujtajcunaman yachachichun animai (Romanos 10:10). Shuj instrumento musicalta ima shina tocanata yachangapajca puntapica jahualla tonocunatami tocana canchij. Pero tiempo pasajpica ashtahuan sinchi tonocunatami tocai tucushun. Ñucanchij crishcacunamanta parlanaca chashna layallatajmi can. Chaimantami huahuacuna jahualla temacunamanta predicai callarichun yachachina canguichij. Por ejemplo, shuj huahuaca shuj compañerotaca: “¿Achca ingenierocuna cai Allpapi tiyashcacuna ima shina cashcata alli ricushpa huaquin cosascunata rurashcata yacharcanguichu? Cai videopimi caimanta ashtahuan yachachin” nishpami predicai tucun. Shinallataj jw.org paginapi “¿Lo diseñó alguien?” nishca partepi tiyaj shuj videota ricuchishca qꞌuipaca: “Cientificocuna cai Allpapi imalla tiyashcacunata copiashpa huaquin cosascunata rurajpipish gentecunaca paicunatami felicitancuna. ¿Manachu cai Allpapi tucui imalla tiyashcacunata rurajtapish felicitana canchij?” nishpami predicai tucuncuna. Jovencitocuna chashna yachachijpimi paicunapaj compañerocunaca Diosmanta ashtahuan yachana munaita charingacuna.

PAICUNAPAJ CRISHCACUNATA SINCHIYACHISHPA CATICHUN ANIMAICHIJ

18. ¿Huahuacuna paicunapaj feta sinchiyachishpa catichunca ima shinataj ayudana cashcanchij?

¹⁸ Jehová Diospi mana crij gentecunapurapimi causacunchij (2 Pedro 3:3). Chaimantami yaya mamacunaca huahuacunahuan Bibliata estudiacushpaca paicunallataj Bibliapi nishcacuna cierto cashcata, Jehová Diosta cazuna alli cashcata cuentata cuchun animana can. Shinallataj Jehová Dios tucui imalla rurashcacunata ricushpa paicunapaj crishcacunata sinchiyachichunmi animana can. Bibliapi tiyaj profeciacuna ima shina pajtarishcatapishmi alli intindichina can. Pero tucuimanta yallica cancunapaj huahuacunahuan Diosta mañaichij. Chaita rurajpimi Yayitu Jehová Diosca cancunapaj esfuerzocunata bendicianga (2 Crónicas 15:7).