¿Huillaj revistacunapi imalla yachachishcacunata yuyaringuichu?

¿Jehová Diosca huarmicunataca ima shinataj tratan?

Jehová Diosca tucuicunatami igual tratan. Paica huarmicuna cꞌaricunamanta menos cashcataca mana yuyanchu. Ashtahuanpish paica huarmicunataca allimi uyan. Paicuna ima shina sintirishcata, ima llaquicunata charishcatapish allimi yachan. Shinallataj pai ima mingashcata paicuna alli pajtachinatami confian (w24.01, págs. 15 y 16).

Efesios 5:​7-pica: “Paicuna rurashca shinallataj cancunapish ama ruraichijchu” ninmi. ¿Chai consejotaca ima shinataj pajtachi tucunchij?

Apóstol Pabloca Jehová Diosta mana cazujcunahuan ama tandanacuchun nishpami advirtirca. Paicunahuan tandanacushpaca Jehová Diospaj mandashcacunata cazunaca ashtahuan sinchimi tucunga. Chaimantami paicunahuan en persona o redes socialescunapi mana pasana canchij (w24.03, págs. 22 y 23).

¿Ima llulla parlocunamantataj cuidarina canchij?

Shuj amigo mana cuentata cushpa llulla informacionta cachajpi o mana rijsishca correo electronicomanta testigo de Jehovacunamanta alli laya experienciacunata cachajpica cuidadotami charina canchij. Shinallataj apostatacunamantami cuidarina canchij (w24.04, pág. 12).

¿Sodoma y Gomorra tucuchishca cajpi huañushca gentecunata, Diluviopi huañushca gentecunata, Salomontapish Jehová Diosca causachingachu?

Jehová Dios paicunata huiñaipaj tucuchishcataca mana yachanchijchu. Pero Jehová Diosca cada unota alli rijsi cashcata, cꞌuyaj cashcatami seguros canchij (w24.05, págs. 3 y 4).

¿Imamantataj Jehová Diosca “Jatun Rumi” shina can? (Deuteronomio 32:4).

Jehová Diosca ñucanchij miticuna rumi shinami can. Shinallataj confianalla Diosmi can. Pai nishcacunatapish siempre pajtachijmi can. Y shinallataj pai ima shina cashcata, pai nishcacunatapish nunca mana cambianchu (w24.06, págs. 26 a 28).

¿Mushuj congregacionpi amañaringapajca imatataj rurana canchij?

Jehová Dios paita sirvijcunata ayudashca shina ñucanchijtapish ayudanatami confiana canchij. Mushuj congregaciontaca ñaupa congregacionhuanca mana chꞌimbapuranachu canchij. Shinallataj mushuj congregacionpi ayudangapajmi esforzarina canchij. Huauqui panicunahuan amigaringapajpishmi esforzarina canchij (w24.07, págs. 26 a 28).

¿Mateo capítulo 25-pi tiyaj chꞌimbapuraicunamantaca imatataj yachanchij?

Ovejacunamanta, chivocunamanta chꞌimbapuraipica Jehová Diosta tucui shunguhuan cazuna cashcatami yachanchij. Cutin chunga solteracunamanta parlaj chꞌimbapuraipica allichirishca shuyana cashcatami yachanchij. Shinallataj talento cullquimanta chꞌimbapuraica alli trabajadorcuna cana cashcatami yachanchij (w24.09, págs. 20 a 24).

¿Salomón rurashca temploman yaicuna corredorca mashnatataj medirca?

Huaquin ñaupa quillcashcacunapica 2 Crónicas 3:​4-pica chai yaicuna corredor “120 codosta” midishcatami nin. Chaica 53 metros altomi can. Pero yaicuna corredor 120 codos altota charishca cajpica templopaj patacunaca chai corredortaca mana ahuantai tucunmanchu carca. Cutin shujtaj ñaupa quillcashcacunapica chai yaicuna corredorca “20 codoscunallata” midishcatami nin. Chaica nueve metrosmi can (w24.10, pág. 31).

¿Bibliapica imamantataj “siervo ministerialcunaca shujlla huarmipaj cusami” cana can nin? (1 Timoteo 3:12).

Cazarashca siervo ministerialcunaca shujlla huarmitami charina can. Shinallataj mana nunca huainayanachu can. Mapa munaicunahuanpish shujtaj huarmicunataca mana ricunachu can (w24.11, pág. 19).

¿Juan 6:​53-pica Jesús amitopaj micuita ima shina callarishcatachu parlan?

Mana. Juan 6:​53-pica Jesusca paipaj aichata micuna, shinallataj paipaj yahuarta ubyana cashcatami nirca. Jesusca chai shimicunataca huata 32-pimi nirca. Paica paipi feta mana churaj judiocunahuan parlanacushpami chaita nirca. Shinapish Jesusca shuj huata qꞌuipami Jerusalenpi cashpa Amitopaj micuita callarichirca. Paica chai micuitaca jahua pachapi paihuan mandagrijcunahuanmi callarichirca (w24.12, págs. 10 y 11).