1. ¿Imamantataj huaquinpica manchaita charinchij?

 TUCUICUNAMI mai ratoca manchaita charinchij. Bibliapica huañushcacunata, demoniocunata, shamui punllacunapi ima tucunata mana manchana cashcatami yachashcanchij. Shinapish achca guerracuna, shuhuacuna, ungüicuna tiyashcamantami huaquinpica manchaita charinchij (Lucas 21:11). Shinallataj gobiernocuna o ñucanchij propio familiacuna Diosta ama sirvichun jarcasha nishcamantami huaquinpica manchaita charishcanchij. Cutin maijancunaca cai rato o shamuj punllacunapi llaquicunata mana ahuantai tucushcata yuyashpami manchaita charincuna.

2. ¿David Gat llajtapi miticugrijpica imataj tucurca?

² Davidpishmi huaquinpica manchaita charirca. Por ejemplo, mandaj Saúl paita huañuchingapaj caticujpimi Davidca Gat llajtata mandaj Akispajman rirca. Mandaj Akís David alli soldado cashcata, huaranga huaranga filisteocunata huañuchishcata yachaj chayajpica Davidca Akís paita llaquichinata yuyashpami achcata mancharirca (1 Samuel 21:​10-12). Pero ¿manchaita mishangapajca Davidca imatataj rurarca?

3. Salmo 56:​1-3 y 11-pi nishca shinaca ¿Davidca manchaita ama charingapajca imatataj rurarca?

³ Salmo 56-pica Davidca Gat llajtapi cashpa ima shina sintirishcatami quillcarca. Chai capitulopica Davidca imamanta manchaita charishcatami nirca. Shinallataj manchaita ama charingapaj Jehová Diospi confiashcatami quillcarca (Salmo 56: 1-3, 11-ta liyipai). Davidca Diospaj ayudahuanmi mandaj Akís paita ama huañuchichun imata ruranata yuyarca. Chaimi paica loco cashcata Akista crichirca. Akisca David loco cashcata crishpami paita ama molestachun chaimanta richun saquirca. Chashnami Davidca quishpirirca (1 Samuel 21:13–22:1).

4. ¿Jehová Diospi ashtahuan confiangapaj imatataj rurana canchij? Shuj ejemplota churashpa parlai.

 ⁴ Ñucanchijpish manchaita mishangapajca Jehová Diospimi yuyana canchij. Pero ¿manchaita charishpaca Jehová Diospi confiangapajca imatataj rurana canchij? Cai ejemplopi yuyashun. Can rijsishca doctor millai ungüitami charingui nijpica, achcatami mancharinguiman ¿nachu? Pero canca chai doctorta alli rijsishcamantami canta ayudai pudishcata alli yachangui. Shinallataj chai doctor can charishca ungüita charijcunata ña jambishcata yachashpami ashtahuan tranquilo sintiringui. Shinallataj chai doctor can ima shina sintirishcata atencionhuan uyashcamantami canta alli intindishcata seguro cangui. Canta uyashca qꞌuipa shujtaj gentecunata ayudashca tratamientotami cugrini nijpica tranquilomi sintiringui. Jehová Diosca chai doctor layami can. Chaimantami manchaita charishpaca ñaupa punllacunapi, cunan punllacunapi, shamuj punllacunapipish ñucanchijta ima shina ayudanata yuyana canchij. Chashnami paipica ashtahuan confiashun. Salmos 56-pi nishca shinaca Davidca chaitami rurarca. Cunanca chai Salmopi tiyaj huaquin versocunamantami yachashun. Chai versocunamanta yachacushpaca ñucanchijpish Jehová Diospi ashtahuan confiangapaj, manchaita ama charingapaj imata rurana cashcata yuyashunchij.

ÑAUPA PUNLLACUNAPI JEHOVÁ DIOS CANTA IMA SHINA AYUDASHCATA YUYAI

5. ¿Davidca manchaita mishangapajca imatataj rurarca? (Salmo 56:​12, 13).

⁵ Davidpaj causai peligropi cajpipish paica ñaupa punllacunapi Jehová Dios ima shina ayudashcatami yuyarirca. Chashnami tranquilo sintirirca (Salmo 56:​12, 13-ta liyipai). Paica Jehová Dios paita ima shina ayudashcataca siempremi yuyarij carca. Por ejemplo, paica Jehová Dios imalla rurashcacunata ricushpami Jehová Dios tucui poderta charishcata, gentecuna paipaj valishca cashcata yuyarij carca (Salmo 65:​6-9). Shinallataj paica Jehová Dios shujtajcunata ima shina ayudashcatami yuyaj carca (Salmo 31:19; 37:​25, 26). Ashtahuanpish Davidca Jehová Dios paita ima shina ayudashcata yuyangapajmi tiempota llujchij carca. Jehová Diosca paitaca huahuamantapachami ayudaj carca (Salmo 22:​9, 10). Tucui chaicunapi yuyashcamantami Davidca Jehová Diospi tucui shunguhuan confiarca.

6. ¿Manchaita charishpaca Jehová Diospi confiangapajca imatataj rurana canchij?

 ⁶ Manchaita charishpaca “¿Jehová Diosca ñaupa punllacunapica imallatataj rurashca?” nishpa yuyai. Por ejemplo, Jehová Dios imalla rurashcacunapimi yuyai tucungui. Paica pajaritocuna, sisacuna paiman rijchaj mana rurashca cajpipish, paita mana adorai tucujpipish allimi cuidan. Chaicunapi yuyashpami Jehová Dios canta ayudai tucushcata seguro cangui (Mateo 6:​25-32). Shinallataj Jehová Dios paita sirvijcunata ima shina ayudashcatami yuyai tucungui. Ñaupa punllacunapi o cunan punllacunapi Jehová Dios paita sirvijcunata ima shina ayudashcatapishmi yuyai tucungui. Chaitaca Bibliapi o ñucanchij publicacioncunapimi ricui tucungui. a Ashtahuanpish Jehová Dios canta ima shina ayudashcata yuyai. Por ejemplo, ¿Jehová Diosca paita rijsichunca cantaca ima shinataj ayudarca? (Juan 6:44). ¿Cambaj mañashcacunataca ima shinataj cutichishca? (1 Juan 5:14). ¿Paipaj Churita cushcamanta canca cada punlla ima shinataj beneficiarishcangui? (Efesios 1:7; Hebreos 4:​14-16).

7. ¿ Vanessaca profeta Danielmantaca imatataj yacharca?

⁷ Haití llajtapi causaj pani Vanessa ima tucushcata ricushun. b Paipaj cꞌuchullapi causaj shuj runaca tucui punllacunami mensajecunata cachaj carca. Shinallataj paipaj novia cachunmi obligasha nirca. Vanessa canhuanca manataj llujshishachu nijpica, chai runaca achcata pꞌiñarishpami amenazarca. ¿Vanessaca manchaita mishangapajca imatataj rurarca? Paica chai runa paita ama llaquichichun imata ruranatami alli yuyarirca. Shinallataj shuj ancianomi autoridadcunahuan parlachun paitaca ayudarca. Ashtahuanpish Vanessaca ñaupa punllacunapi Jehová Dios paita sirvijcunata ima shina ayudashcata yuyangapajmi esforzarirca. Paica: “Profeta Daniel ima tucushcatami yuyarircani. Paitaca ima mana allita mana rurashca cajpipish leoncuna tiyan ucumanmi shitarcacuna. Pero Jehová Diosmi paitaca ayudarca. Chaimi ñucapish Jehová Diosmanca, ‘chai runa ñucata ama llaquichichun tucuitami rurashcani. Por favor ayudahuai’ nishpa mañarcani. Mañashca qꞌuipaca tranquilami sintirircani” nircami (Daniel 6:​12-22).

CUNAN PUNLLACUNAPI JEHOVÁ DIOS CANTA IMA SHINA AYUDACUSHCATA YUYAI

8. ¿Davidca imatataj alli yacharca? (Salmo 56:8).

⁸ Davidca paipaj causai peligropi cajpica ama manchaita charingapajmi esforzarirca. Chaipajca Jehová Dios chai punllacunapi paita ima shina ayudacushcatami yuyarirca. Paica Jehová Dios paita ayudacushcata, ñaupajman pushacushcata, ima shina sintirishcata alli intindishcatami cuentata curca (Salmo 56:​8-ta liyipai). Shinallataj paipaj amigocunami animota cushpa ayudarcacuna. Por ejemplo, Jonatán, Ahimelecpishmi paitaca ayudarcacuna (1 Samuel 20:​41, 42; 21:​6, 8, 9). Saulca Davidta huañuchisha nishpapish mana huañuchi tucurcachu. Chaimi Davidca Jehová Dios pai ima shina sintirishcata, ima llaquicunata apacushcata alli intindishcata cuentata curca.

9. ¿Ñucanchijcuna llaquicunata apacujpica Jehová Diosca ima shinataj sintirin?

⁹ Llaquicunata charishcamanta manchaihuan cashpaca ¿imatataj rurana cangui? Jehová Dios can ima llaquicunata apacushcata, can ima shina sintirishcata alli intindishcatami yuyarina cangui. Por ejemplo, israelitacuna Egipto llajtapi esclavocuna cashcamanta achcata sufricujpica Jehová Diosca paicuna ima shina sintirishcataca allimi yacharca (Éxodo 3:7). Shinallataj Davidca Jehová Diostaca ‘quiquinca ñuca llaquihuan cajtami ricushcangui. Ñuca llaquihuan huañucujtami rijsingui’ nishpami cantarca (Salmo 31:7). Israelitacuna paicunapaj culpallamantataj llaquicunata apacujpica Jehová Diosca achcatami llaquirirca  (Isaías 63:9). Shinashpaca manchaita charijpica Jehová Diosca ñucanchijcuna ima shina sintirishcataca allimi intindin. Ashtahuanpish manchaita ama charichunmi ayudasha nin. ¿Chaita yachashpaca manachu tranquilo sintirinchij?

10. ¿Jehová Dios tucui horas canta ayudacushcataca imamantataj seguro cangui?

¹⁰ Llaquicunata apacushpaca manchaita charishcamantami Jehová Dios ñucanchijta ayudacushcata cuentata cunaca huaquinpica sinchi canga. Pero Jehová Dios ñucanchijta ayudacushcata cuentata cungapajca paitami ayudachun mañana canchij (2 Reyes 6:​15-17). Jehová Diosta mañashca qꞌuipaca cashna nishpa tapurishunchij: ¿Tandanacuipi shuj conferenciata, shuj comentariota uyashpaca animarishcanichu? ¿Mana cashpaca publicacioncunata liyishpa, shuj videota ricushpa o shuj cantota uyashpachu animarishcani? ¿O tal vez maijan huauqui o pani shuj animachij versota yuyachishpachu ñucata animashca? Publicacioncunapi imalla yachashcacunaca Jehová Diosmantami shamun. Shinallataj Jehová Dios yuyaita cujpimi huauqui panicunaca ñucanchijta animancuna. Pero huaquinpica chai ayudacuna Jehová Diosmanta shamushcata cuentata cunaca sinchimi can (Isaías 65:13; Marcos 10:​29, 30). Jehová Diosca publicacioncunahuan, huauqui panicunahuanmi ñucanchijmanta sustarishcata ricuchin. Chaimantami paipica tucui shunguhuan confiana canchij (Isaías 49:​14-16).

11. ¿Pani Aidaca manchaita mishangapajca imatataj rurarca?

¹¹ Senegal llajtapi causaj pani Aidaca llaquicunata apacushpaca Jehová Dios paita ayudacushcatami cuentata curca. Paica punta ushushi cashcamantami paipaj yaya mamaca paicunata mantinichun, suficiente cullquita ganachun, paicunata cuidachun munarcacuna. Shinapish Aidaca precursora cangapajmi minishtirishcallahuan causanata decidirca. Chaimi paica ashalla cullquita ganaj carca. Chaita ricushpaca paipaj familiaca achcatami pꞌiñarirca. Shinallataj paimantaca mana allicunatami nijcuna carca. Aidaca, “ñuca familiata mana ayudai tucushcata, tucuicuna ñucamanta caruyasha nishcata yuyashpami achcata mancharircani. Chai problemacunata charishcamantami Jehová Diosta culparcani” nircami. Shinapish Aidaca tandanacuipi shuj conferenciata uyashpami animarirca. Paica, “conferenciata cuj turica cada uno ima llaquita apacushcata Jehová Dios alli intindishcatami yuyachirca. Shinallataj turi ancianocuna, shujtaj turi ñañacunami Jehová  Dios ñucata achcata cꞌuyashcata yuyachishpa animarcacuna. Chaimi Jehová Diosta tucui shunguhuan mañangapaj esforzarircani. Jehová Dios ñuca mañashcacunata ima shina cutichishcata ricushpaca tranquilami sintirircani” nircami. Pani Aidaca tiempohuanca shuj trabajotami japirca. Chaipi trabajashpapish precursora cangapajmi tiempota charirca. Paipaj yaya mamata, shujtajcunatapish ayudangapajmi suficiente cullquita charirca. Paica, “Jehová Diospi ñuca shunguta churanatami yachashcani. Paita mañashpami manchaita mishai tucushcani” nircami.

¿DIOSCA SHAMUJ PUNLLACUNAPICA IMATATAJ RURANGA?

12. ¿Salmo 56:​9-pi nishca shinaca Davidca imatataj seguro carca?

¹² (Salmo 56:​9-ta liyipai). Cai versopi ricushca shinaca, ¿Davidca jatun llaquicunata apacushpaca manchaita ama charingapajca imatataj rurarca? Paica Jehová Dios shamuj punllacunapi imata ruranatami yuyarca. Shinallataj Jehová Dios pai agllashca tiempopi paita ayudanatami seguro carca. Diosca Davidmanca Israel llajtata mandaj tucunatami huillashca carca (1 Samuel 16:​1, 13). Davidca Jehová Dios paipaj nishcacunata pajtachij cashcatami seguro carca.

13. ¿Jehová Diosca shamuj punllacunapica imallatataj ruranga?

¹³ ¿Jehová Diosca paita sirvijcuna cunan punllacunapi llaquicuna illaj causana cashcatachu huillashca? Mana. Paica chaitaca mana huillashcachu. c Pero cunan punllacunapi llaquicunata apana cajpipish Jehová Diosca paraisopi tucui llaquicunata anchuchinatami huillashca (Isaías 25:​7-9). Paica huañushcacunata cutin causachingapaj, ñucanchijta jambingapaj, tucui ñucanchij contracunata tucuchingapajmi poderta charin (1 Juan 4:4).

14. ¿Manchaita charishpaca imapitaj yuyana canchij?

¹⁴ Manchaita charishpaca Jehová Dios shamuj punllacunapi imallata ruranata yuyai. Shinallataj Satanás cai mundota mana mandacujpi, millai gentecuna mana tiyajpi, alli gentecunalla cai Allpapi causacujpica causaica ima shina canata yuyai. Shamuj punllacunapi alli gentecunaca asha asha jucha illajcuna tucugrishcatapish yuyai. 2014 huatapi tiyashca jatun tandanacuipica shuj familia shamuj punllacunamanta parlacushcatami shuj escenificacionpi ricurcanchij. Yayaca, ‘2 Timoteo 3:​1-5-pi nishcacuna tucuri punllacunapi ima laya gentecuna tiyana cashcata parlanapaj randica shamuj punllacunapi paraisopi gentecuna ima laya canata parlashca cashpaca ¿imatataj ninman?’ nircami. Chai versocunapica caitami ninman carca: ‘Paraisopica sumaj punllacunami shamunga. Gentecunaca shujtajcunata cꞌuyajcuna, Diospaj yachachishcacunata valorajcuna, mana jatun tucushcacuna, mana valishca tucushcacuna, Diostapish gentecunatapish respetajcuna, yaya mamata cazujcuna, pagui nijcuna, shujtajcunamanta mana caruyajcuna, familiata cꞌuyajcuna, shujtajcunahuan mana pꞌiñanacujcuna, shujtajcunamanta allicunallata rimajcuna, jarcarijcuna, manso shungucuna, alli ruranata cꞌuyajcuna, confianalla, intindijcuna, shujtajcunata yalli canata mana mashcajcuna, paicunapaj quiquin munaillata ruranata munajcuna canapaj randica Jehová Diosta cꞌuyajcuna, paillata tucui shunguhuan sirvijcunami cangacuna. Paicunamantaca amataj caruyaichu’. Ñucanchijpish ñucanchij familiahuan, huauqui panicunahuanmi shamuj punllacunapi causaica ima shina canata parlanacuna canchij.

15. ¿Pani Taniaca manchaita mishangapajca imatataj rurarca?

¹⁵ Macedonia del Norte llajtapi causaj pani Taniaca manchaita mishangapajca Jehová Dios cusha nishcacunapimi yuyan. Paica: “Bibliamanta yachai callarijpica ñuca yaya mamaca achcatami pꞌiñarircacuna. Tandanacuimanta tigramujpica ñuca mamaca siempremi macaj carca. Shinallataj ñuca yayapish ñuca mamapish ‘testigo de Jehová tucujpica cantaca huañuchishunmi’  nircacunami” ninmi. Cai panitaca huasimantami llujchishpa cacharcacuna. Paica: “Jehová Diosta tucuipi cazushpaca huiñai huiñaita cushilla causai tucushcatami yuyarij carcani. Shinallataj cunan punllacunapi tucui ñuca imalla charishcacunata chingachijpipish paraisopi Jehová Dios sumaj bendicioncunata cunatami yuyarij carcani. Yayitu Dios llaquicunata apacushcata ama yuyarichun ayudanatapishmi yuyaj carcani” nircami. Taniaca Jehová Diospaj ayudahuanmi maipi causanata japirca. Cunanca paipaj cusandijmi tiempo completota Jehová Diosta cushilla sirvincuna.

CUNANMANTA JEHOVÁ DIOSPI CONFIASHUNCHIJ

16. ¿Lucas 21:​26-28-pi nishcacuna pajtarijpica ama manchangapajca imatataj rurana canchij?

¹⁶ Jatun llaqui punllacuna shamujpica ‘gentecunaca yallitaj sustarishpami chahuata huañungacuna’. Pero Diosta sirvijcunaca sinchita shayarishpami imata mana manchashun (Lucas 21:​26-28-ta liyipai). ¿Imamantataj mana manchashun? Jehová Diospi siempre confiashcamanta. Pani Taniaca ñaupa punllacunapi llaquicunata ahuantashcamantami cunan punllacunapi llaquicunata ahuantangapaj allichirishca can. Paica, “jatun llaquicunata apacujpipish Yayitu Diosca siempremi ñucataca ayudashca, bendiciashcapish. Maijan gentecunaca ñucanchijta llaquichingapaj achca poderta charishcatami yuyancuna. Pero Jehová Diosca paicunata yallimi poderta charin. Llaquicunaca mana huiñaipajchu canga” nircami.

17. ¿2024 huatapaj versoca imamantataj valishca can? (Página 1-pi tiyaj fotomantapish parlapai).

¹⁷ Cunan punllacunapi achca llaquicuna tiyashcamantami huaquinpica manchaita chari tucunchij. Pero Davidpaj ejemplota catishpaca manchaitami mishashun. 2024 huatapaj versoca Salmo 56:​3-mi can. Chaipica Davidca Jehová Diostaca: “Manchaihuan cai punllapica quiquinpimi shunguta churani” nircami. Cai versomanta parlashpaca shuj libropica: “Davidca paipaj llaquicunallapica mana yuyajchu carca. Ashtahuanpish Jehová Dioslla paita ayudana cashcatami seguro carca. Chashnami manchaita misharca” ninmi. Cai huatapi llaquicunata apacushpaca Salmo 56:​3-pi nishcata yuyaipi charishunchij. Shinallataj Jehová Dios ñaupa punllacunapi, cunan punllacunapi, shamuj punllacunapi imata ruranata yuyangapaj tiempota surcushunchij. Chashnami David shina sintirishun. Paica: “Imata mana manchashachu. Taita Diospimi shunguta churani” nircami (Salmo 56:4).