Maijan huauquicunaca huarmicunata mana tanto valoraj llajtacunapimi huiñashcacuna. Por ejemplo, Bolivia llajtapi sirvij shuj superintendente de circuito huauquica: “Maijan cꞌaricunaca cꞌaricuna huarmicunata yalli cashcata yuyashpami huiñashcacuna. Chaimantami paicunaca huarmicunataca mana valichincuna” nircami. Taiwán llajtapi causaj shuj ancianoca: “Cai llajtapica achca cꞌaricunaca huarmicuna ima yuyashcata, ima nishcataca mana valichinchu” nircami. Cutin maijan cꞌaricunaca huarmicunamanta mana alli chistecunata nishpami paicunata mana respetashcata ricuchincuna.

Ñucanchij llajtapi causaj gentecuna huarmicunata mana valichijpipish ñucanchijca huarmicunata valoranatami yachai tucunchij. Chashnami cꞌaricuna huarmicunata yalli cashcataca mana yuyashun (Efesios 4:​22-24). Huarmicunata alli tratangapajca Jehová Diospaj ejemplotami catina canchij. Cai yachaipica Jehová Dios huarmicunata ima shina trataj cashcata, cꞌaricunapish Jehová Dios shina huarmicunata alli tratangapaj imata rurana cashcatami yachashun. Shinallataj congregacioncunata pushaj ancianocuna panicunata alli tratashpa alli ejemplota churai tucushcatapishmi ricushun.

¿JEHOVÁ DIOSCA HUARMICUNATACA IMA SHINATAJ TRATAN?

Jehová Diosca ñucanchij Yaya cashcamantami cꞌaricuna cajpipish, huarmicuna cajpipish cꞌuyaihuan tratan (Juan 3:16). Shinallataj Diosca congregacionpi caj panicunataca paipaj cꞌuyashca ushushicunata shinami ricun. Cunanca Jehová Dios huarmicunata cꞌuyashcata ima shina ricuchishcatami yachashun.

Jehová Diosca tucuicunatami por igual tratan. Paica cꞌaricunatapish, huarmicunatapish paiman  rijchajtami rurarca (Génesis 1:27). Paica cꞌaricunataca huarmicunata yalli yachaisapa cachunca mana rurarcachu. Jehová Diosca huarmicuna cꞌaricunata menos cashcatapish mana yuyanchu (2 Crónicas 19:7). Shinallataj cꞌaricunatapish, huarmicunatapish paimanta yachachun, paipaj sumaj cualidadcunata ricuchichunmi rurarca. Cꞌaricunapaj, huarmicunapaj fetapish achcatami valoran. Ashtahuanpish cꞌaricunamanpish, huarmicunamanpish jahua pachaman rishpa mandajcuna, sacerdotecuna cachun, mana cashpaca cai allpapi huiñai huiñaita causachunmi oportunidadta cushca (2 Pedro 1:1).

Yaya Diosca huarmicunatami uyan. Paica huarmicuna ima shina sintirishcata, imamanta sustarishcatami yachanata munan. Por ejemplo, Raquelpish, Anapish sustarishca cashcamanta paita mañajpica Diosca paicunatami uyarca (Génesis 30:22; 1 Samuel 1:​10, 11, 19, 20). Shinallataj Jehová Dios yuyaita cujpimi Bibliata quillcajcunaca huaquin cꞌaricuna huarmicuna nishcacunata uyashcata quillcarcacuna. Por ejemplo, Abrahanca Jehová Dios mandashcata cazushpami paipaj huarmi Sara ima nishcata uyarca (Génesis 21:​12-14). Rey Davidpish Abigail huarmi ima nishcatami uyarca. Paica Jehová Diosmi ñucahuan parlachun Abigailta cachashca nircami (1 Samuel 25:​32-35). Jesuspish paipaj mama nishcatami uyarca. Chashnami Yaya Dios shina cꞌuyaj, llaquij cashcata ricuchirca (Juan 2:​3-10). Caipi ricushca shinaca Jehová Diosca huarmicuna ima nishcata uyashpami paicunata respetashcata ricuchin.

Diosca huarmicunapimi confian. Por ejemplo, paica Eva huarmi cai Allpata alli cuidanatami confiarca (Génesis 1:28). Evapi confiashcamantami Jehová Diosca Adanta ayudachun churarca. Shinallataj Jehová Diosca Débora, Huldá huarmicunamanmi israelitacunata, shuj reyta, shuj sacerdotetapish aconsejachun mingarca. Chai huarmicunaca profetacunami carca (Jueces 4:​4-9; 2 Reyes 22:​14-20). Cunan punllacunapipish Jehová Diosca huarmicunapica achcatami confian. Por ejemplo, maijan panicunaca precursoracuna shina, misioneracuna shinami Diosmanta huillancuna. Shujtaj huarmicunaca Tandanacuna Huasicunata, sucursal huasicunata shayachingapajmi planocunata rurashpa, chaicunata shayachishpa ayudancuna. Cutin shujtaj huarmicunaca Betelpi, traducina huasicunapimi ayudancuna. Cai huarmicunaca achca soldadocuna shinami Jehová Diospajta rurangapaj sinchita trabajancuna (Salmo 68:11). Shinashpaca Jehová Diosca huarmicuna cꞌaricunata menos cashcataca mana yuyanchu.

¿JEHOVÁ DIOS SHINA HUARMICUNATA TRATANGAPAJCA CꞌARICUNACA IMATATAJ RURANA CAN?

Huauquicuna, ¿panicunataca Jehová Dios munashca shinachu tratacunguichij? Chaita yachangapajca cancunapaj yuyaicuna, cancunapaj ruraicuna ima shina cashcatami ricuna canguichij. Chaipajca pi ñucanchijta ayudachunmi minishtinchij. Por ejemplo, doctorcunaca ñucanchij shungu ima shina cashcata yachangapajca huaquin examencunatami rurancuna. Chashna layallatajmi shuj alli amigoca panicunata alli tratacushcata o mana alli tratacushcata cuentata cuchun ñucanchijta ayudai tucun. Shinallataj huarmicunata ima shina tratana cashcata yachangapajca Bibliatami estudiana canchij. Pero huauquicuna, ¿ayudata chasquisha nishpaca imatataj rurana canguichij?

Shuj amigota tapui (Proverbios 18:17). Panicunata ima shina tratacushcata yachangapajca huauqui panicunata alli trataj shuj amigotami tapui tucungui. Paitaca: “¿Panicunataca ima shinataj tratani? ¿Paicunataca respetohuanchu tratani? ¿Imapi mejorai tucunichu?” nishpami tapui tucungui. Cambaj amigo imapi mejorana cashcata nijpica mana pꞌiñarinachu cangui. Ashtahuanpish pai cushca consejocunata pajtachingapajmi esforzarina cangui.

Bibliatami estudiana cangui. Bibliata estudiashpami huarmicunata alli tratacushcata o mana alli tratacushcata cuentata cungui (Hebreos 4:12). Bibliapica huaquin cꞌaricuna huarmicunata alli tratajcuna cashcata, cutin shujtaj cꞌaricuna huarmicunata mana alli tratajcuna cashcatami nin. Bibliata estudiacushpaca huarmicunata alli tratajcuna shina o mana alli tratajcuna shina cashcatami ricuna cangui. Shinallataj huarmicunata ima shina tratana cashcata, Bibliapi imata yachachishcata alli intindingapajca mana shuj versollatachu liyina cangui.  Ashtahuanpish huarmicunata ima shina tratana cashcata alli intindingapajca Bibliapi huarmicunamanta tucui imata yachachishcatami liyina cangui. Por ejemplo, 1 Pedro 3:​7-pica: ‘Huarmicunata pꞌaquirinalla vasota shina’ tratana cashcatami nin. b ¿Chaica huarmicuna cꞌaricunata menos cashcatachu nisha nin? Mana. Chai versopi nishcacunata alli intindingapajca Gálatas 3:​26-29-pi nishcatami intindina canchij. Chaipi nishca shinaca Jehová Diosca cꞌaricunatapish, huarmicunatapish jahua pachapi Jesushuan mandachunmi agllashca.

¿ANCIANOCUNACA PANICUNATA RESPETASHCATACA IMA SHINATAJ RICUCHINCUNA?

Ancianocuna panicunata respetohuan tratajpica caishuj huauquicunapishmi panicunataca respetohuan tratangacuna. Chaimi ancianocunaca alli ejemplota churangapaj esforzarina can. Cunanca panicunata valorashcata, respetashcata ancianocuna ima shina ricuchi tucushcatami ricushun.

Paicunatami felicitancuna. Apóstol Pabloca ancianocunapajca shuj alli ejemplomi can. Paica Romapi caj huauqui panicunaman escribishpaca tucuicuna uyachunmi achca panicunata felicitarca (Romanos 16:12). Chai cartata uyashpaca panicunaca cushillami sintirishcangacuna. Cunan punllacunapica achca ancianocunaca Jehová Diosta sirvishcamanta, alli cualidadcunata charishcamantami panicunataca felicitan. Chaita rurashcamantami panicunaca paicunata cꞌuyashcata, achca valijcuna cashcata sintincuna. Chashnami panicunaca Jehová Diosta sirvishpa catincuna (Proverbios 15:23).

Ancianocunaca panicunataca shungumantami felicitana can. Pani Jessicaca caitami nin: “Ñucanchijcunaca imamanta felicitacushcata nichunmi  munanchij. Por ejemplo, tandanacuipi huahuacunata alli comportarichun yachachishcamanta, shuj yachacujta tandanacuiman pushamushcamanta felicitachunmi munanchij”. Ancianocuna panicunata chaicunamanta felicitajpica paicunaca congregacionpi valishca cashcatami sintincuna.

Paicunatami uyancuna. Ancianocunaca shujtajcunata uyashpaca humildes cashcatami ricuchincuna. Chaimantami panicunata shuj consejota cuchun mañashpaca paicunata alli uyancuna. Chashnami paicunaca achcata animaringacuna. ¿Caita ruranaca ima shinataj ancianocunata ayudai tucun? Betelpi sirvij Gerardo ancianoca: “Huaquin panicunaca achca huatacunatami shuj trabajota ruracushcacuna. Paicunapaj consejocunata uyashcamantami ñuca trabajotaca alli pajtachi tucushcani.” ninmi. Cutin Bryan ancianoca: “Congregacionpica achca panicunami precursora shina sirvicuncuna. Chaimantami maipi huillai tucushcataca alli rijsincuna. Panicunaca Jehovapaj organizacionpica achcatami ayudai tucuncuna. Chaimantami paicunamantaca achcata yachana canchij” ninmi.

Panicuna ima nishcatami ancianocunaca tucuita alli uyana can. Chaita rurashpami yachaj cashcata ricuchincuna. ¿Imamantataj shina ninchij? Edward shuti shuj ancianoca: “Shuj huauqui shuj llaquita chꞌimbapuracujpica panicunapaj consejocuna, experienciacunami ayudai tucun” ninmi (Proverbios 1:5). Maipica ancianocunaca shuj panipaj consejotaca manachari pajtachi tucunga. Shinapish chai panipaj consejocunamantami agradicina can.

Paicunatami yachachincuna. Ancianocunaca panicunata yachachingapaj esforzarishpaca yachajcuna cashcatami ricuchincuna. Por ejemplo, shuj huauqui predicacionman mana llujshi tucujpi chai tandanacuita ima shina pushai tucushcatami yachachi tucun. Shinallataj Tandanacuna Huasicunata shayachingapaj o allichingapaj maquinacunata, herramientacunata ima shina utilizai tucushcatapishmi yachachi tucuncuna. Betelpipish superintendentecunaca panicunapish ima rurai tucushcapi ayudachunmi yachachishca. Por ejemplo, mantenimientota rurachun, comprascunata rurachun, contabilidadta apachun, computadorapi programacunata alli utilizachunmi yachachishcacuna. Ancianocuna panicunata yachachishpaca paicunapi confiashcatami ricuchincuna.

Achca panicunaca ancianocuna yachachishcamantami shujtajcunata ayudai tucushcacuna. Maijan panicunaca Tandanacuna Huasicunata shayachinata yachashcamantami jatun acapanacuna tiyajpica huauqui panicunapaj huasicunata allichinaman rishcacuna. Shujtaj panicunatapish ashtahuan alli huillachunmi yachachishcacuna. ¿Ancianocuna paicunata yachachishcamantaca panicunaca ima shinataj sintirincuna? Jennifer panica cashnami nin: “Shuj Tandanacuna Huasita shayachingapaj ayudanaman rijpica shuj turica ñucata yachachingapajmi tiempota surcurca. Cai turica ñuca ima ruragrishcamantami felicitaj carca. Pai ñucapi confiashcamanta, ñucata valorashcamantami paihuan trabajanataca achcata munarcani”.

¿PANICUNATA ALLI TRATASHCAMANTACA IMA SHINATAJ BENEFICIARINCHIJ?

Jehová shinami, panicunataca ñucanchijpish achcata cꞌuyanchij. Chaimantami ñucanchij propio familia shina cashcata paicunataca ricunchij (1 Timoteo 5:​1, 2). Paicunahuan Jehová Diosta sirvinaca shuj jatun privilegiomi can. Paicuna cushilla causajta ricushpami ñucanchijpish achcata cushicunchij. Pani Vanessaca: “Jehovapaj organizacionpi achca turi ñañacunahuan sirvi tucushcamantami Jehová Diostaca achcata agradicini” ninmi. Taiwanpi causaj shuj panipish: “Jehová y paipaj organización huarmicunata achcata respetashcamanta, valorashcamantami achcata agradicini. Chaita ricushpami ñuca crishcapish sinchiyashca” ninmi.

Huauquicuna, huarmicunata cꞌuyaihuan tratajpica Jehová Diosca achcatami cushicun (Proverbios 27:11). Escociapi causaj shuj ancianoca: “Diosta mana sirvij cꞌaricunaca huarmicunataca mana imapaj respetancunachu. Chaimantami huarmicuna tandanacuiman shamujpica paicunata cꞌuyashcata, respetashcata ricuchina canchij” ninmi. Shinashpaca huauquicuna, Jehová shina huarmicunata cꞌuyaihuan, respetohuan tratangapaj esforzarishpa catichij (Romanos 12:10).