1. ¿Canca Jehová Dios ima laya cashcatataj yuyangui?

 ¿JEHOVÁ DIOS ima laya cashcata yuyashcanguichu? ¿Paita mañacushpaca pai ima laya cashcatataj yuyashcangui? Yaya Diostaca mana ricui tucunchijchu. Shinapish Bibliapica Yaya Dios achijyachij inti shina, huaquichij escudo shina, rupachishpa tucuchij nina shina cashcatami nin (Salmo 84:11; Hebreos 12:29). Cutin profeta Ezequielca muscuipi shinami Jehová Dios zafiro rumi shina, achijnicuj fierro shina, achijnicuj cuichi shina cashcata ricurca (Ezequiel 1:​26-28). Jehová Dios chashna cashcata yuyashpaca mancharishcami saquirinchij ¿nachu?

2. ¿Huaquincunapajca Jehová Diospajman cꞌuchuyanaca imamantataj sinchi can?

² Jehová Diosta mana ricui tucushcamantami pai ñucanchijta cꞌuyaj cashcata crinaca huaquinpica sinchi can. Shinallataj huahuacunaraj cajpi ñucanchij yaya cꞌuyaita mana ricuchishcamantachari Yaya Diospish ñucanchijta mana cꞌuyashcata yuyai tucunchij. Shinapish Jehová Diosca ñucanchijcuna ima shina sintirishcata, ima llaquicunata apacushcataca allimi intindin. Ashtahuanpish pai cꞌuyaj cashcata crichunca Bibliapimi pai ima shina cashcata huillan.

3. ¿Cai yachaipica imamantataj Jehová Dios cꞌuyaj cashcata yachashun?

³ Yaya Diosca cꞌuyaimi (1 Juan 4:8). Paica tucuitami cꞌuyaimanta ruran. Shinallataj paica yallitaj cꞌuyaj cashcamantami paita mana cꞌuyajcunatapish cꞌuyan (Mateo 5:​44, 45). Cai yachaipica Jehová Dios cꞌuyaita ima shina ricuchij cashcatami yachashun. Jehová Diosta ashtahuan rijsishpami paitaca ashtahuan cꞌuyanata munashun.

JEHOVÁ DIOSCA ÑUCANCHIJTACA ACHCATAMI CꞌUYAN

4. ¿Jehová Dios ñucanchijta cꞌuyaihuan trataj cashcata yachashpaca ima shinataj sintiringui? (Fotomantapish parlapai).

⁴ Jehová Diosca ñucanchijtaca cꞌuyaihuanmi tratan (Santiago 5:11). Chaimi Bibliapica Jehová Dios shuj cꞌuyaj mama shina  cashcata nin (Isaías 66:​12, 13). Shuj cꞌuyaj mama paipaj huahuata ima shina cuidajta yuyai. Paica huahuitotaca cꞌuyaihuanmi paipaj changacunapi tiyachishpa sumaj shimicunahuan cushichin. Huahua huacacujpi o ungushca cajpica mamaca ratomi paitaca ayudan. Chashna layallatajmi Jehová Diosca ñucanchijcuna llaquilla cai horasca ñucanchij cꞌuchullapi can. Chaimantami Salmota quillcaj runaca: “Yallitaj yuyaicunahuan ñuca yuyaipi cajpica, quiquinpaj cushicuimari ñuca almataca cushichirca” nishpa quillcarca (Salmo 94:19).

5. ¿Jehová Dios canmanta mana caruyashcata yachashpaca ima shinataj sintiringui?

⁵ Jehová Diosca ñucanchijtaca manataj saquingachu (Salmo 103:8). Paica ñucanchijcuna pandarijpipish cꞌuyashpami catin. Israelitacunaca cutin cutinmi pandarircacuna. Pero paicuna arrepintirijpica Jehová Diosca cꞌuyaitami ricuchishpa catirca. Shuj cutinca Jehová Diosca israelitacunataca: ‘Cancunaca ñucapajmanca tucuita yalli valijmari canguichij. Ñuca alli nishcacuna cajpimari cancunata cꞌuyani’ nircami (Isaías 43:​4, 5). Yayitu Diosca mana cambiashcachu. Paica ñucanchijtapishmi shungumanta cꞌuyan. Chaimantami ñucanchijcuna pandarijpipish ñucanchijtaca mana saquin. Shungumanta arrepintirishpa paiman cutirijpica paica ñucanchijtaca cꞌuyashpami catinga. Yayitu Diosca cancuna arrepintirijpica ‘shungumantami perdonasha’ ninmi (Isaías 55:7). Shinallataj Bibliapica: “Diosca cancunapaj juchacunatami perdonanga, sumaj causaitapishmi cancunapaj apamunga” ninmi (Hechos 3:19).

6. ¿Zacarías 2:​8-pica Jehová Diosmantaca imatataj yachachin?

⁶ (Zacarías 2:​8-ta liyipai). Ñucanchijcunaca Jehová Diospajca paipaj ñahui ángel shinami canchij. ¿Imamanta? Ñahuicuna valishca cashcamantami achcata cuidanchij ¿nachu? Chashna layallatajmi ñucanchijcunaca Jehová Diospajca achca valishca canchij. Chaimantami Yayitu Diosca ‘maijanpish cancunata llaquichishpaca ñuca ñahuita tujsicuj shinami llaquichin’ nin. Ñucanchijcuna llaquilla cajpica, Jehová Diospish llaquilla sintirishcamantami ñucanchijta ayudasha nin. Chaimanta ‘cambaj ñahui angelta shina cuidahuayari’ nishpa paita mañashunchij (Salmo 17:8).

7. ¿Jehová Dios ñucanchijta cꞌuyashcata cringapajca imamantataj esforzarina canchij?

⁷ Jehová Diosca pai canta tucui shunguhuan cꞌuyashcata crichunmi munan. Pero ima shina huiñashcamanta o problemacunata  apacushcamantami huaquinpica Jehová Dios ñucanchijta cꞌuyashcata crinaca sinchi can. Jehová Diosca ñucanchijcuna ima shina sintirishcataca allimi intindin. Pero ¿can Jehová Diospaj valishca cashcata seguro cangapajca imatataj rurana cangui? Jehová Dios paipaj Churi Jesusta, ungidocunata, tucuicunata cꞌuyaita ima shina ricuchij cashcatami intindina cangui. Cunanmi chaita yachagrinchij.

JEHOVÁ DIOSCA CꞌUYAITAMI RICUCHIN

8. ¿Jesusca Yaya Dios paita cꞌuyashcataca imamantataj seguro carca?

⁸ Jehová Diosca shujtaj gentecuna, shujtaj angelcuna manaraj tiyai horasmantami Jesushuanca tandalla causashca. Chaimantami paica Jesustaca achcata cꞌuyan. Jesuspish Yaya Diostaca achcatami cꞌuyan. Mateo 17:​5-pi nishca shinaca Jehová Diosca tucuicunapaj ñaupajpimi Jesusta achcata cꞌuyashcata nirca. Paica Jesús paipaj ñaupajpi alli ricurishcallataca mana nircachu. Ashtahuanpish Jesusta achcata cꞌuyashcata, paita cazushcamanta cushilla cashcata tucuicuna yachachunmi munarca. Chaimantami “caimi ñuca cꞌuyashca Churi” nirca (Efesios 1:7). Jesusca Jehová Diospaj achca valishca cashcataca allimi yacharca. Chaimantami cutin cutin Yaya Diosca ñucataca achcatami cꞌuyan nirca (Juan 3:35; 10:17; 17:24).

9. Romanos 5:​5-pi nishca shinaca ¿Jehová Diosca ungidocunataca mashnataj cꞌuyan?

⁹ Jehová Diosca ungidocunamanpishmi cꞌuyaita ricuchin (Romanos 5:​5-ta liyipai). Hebreo rimaipica Romanos 5:​5-pica Jehová Dios ungidocunaman cꞌuyaita ricuchishcata ningapajca Jehová Diospaj cꞌuyaica shuj jatun yacu shina cashcatami nin. Shinashpaca Jehová Diosca ungidocunataca achcatami cꞌuyan. Paicunaca chaitaca allimi yachancuna (Judas 1). Ungido huauqui panicunaca apóstol Juan shinami sintirincuna. Paica: “¡Ricuichij, Diospaj huahuacunami canguichij nishpami Yayaca ñucanchijmanca achca cꞌuyaita ricuchishca!” nircami (1 Juan 3:1). Shinapish ¿Jehová Diosca ungidocunallatachu cꞌuyan? Mana. Paica tucui paita sirvijcunatami cꞌuyan. Cunanmi chaita yachashun.

10. ¿Jehová Diosca ñucanchijta yallitaj cꞌuyashcamantaca imatataj rurashca?

¹⁰ Jehová Diosca chꞌican chꞌican ruraicunata rurashpami ñucanchijta cꞌuyashcata ricuchishca. Pero tucuimanta yallica paipaj Churita cushpami ñucanchijta achcata cꞌuyashcata ricuchishca (Juan 3:16; Romanos 5:8). Shinallataj ñucanchij juchacunamanta perdonashca cachun, paipaj amigocuna tucuchunmi paipaj Churipaj causaita curca (1 Juan 4:10). Jehová Diospish, Jesuspish ñucanchijta quishpichingapaj imallata rurashcata yachashpaca paicunapaj achca valishca cashcatami intindinchij (Gálatas 2:20). Jehová Diosca shuj mandashcata pajtachingapajllaca paipaj Churipaj causaitaca mana curcachu. Ashtahuanpish ñucanchijta cꞌuyashcamantami paipaj Churita cꞌuyaillata huañuchichun saquirca.

11. ¿Jeremías 31:​3-pica imatataj yachachin?

¹¹ Caicama yachashca shinaca Jehová Diosca ñucanchijta cꞌuyashcataca ruraicunahuanmi ricuchin (Jeremías 31:​3-ta liyipai). Paica ñucanchijta cꞌuyashcamantami paipajman pushamushca (Deuteronomio 7:​7, 8-ta ricui). Jehová Diospaj cꞌuyaimantaca pipish, imapish mana caruyachi tucunchu (Romanos 8:​38, 39). Caita intindishpaca ¿canca ima shinataj sintirircangui? Cunanca Salmo 23-pi imata yachachishcatami yachashun. Chaita yachacushpaca Jehová Dios cꞌuyaita ricuchishcamanta Davidpish, canpish ima shina sintirishcata yuyai.

¿JEHOVÁ DIOS CANTA CꞌUYASHCATA INTINDISHPACA IMA SHINATAJ SINTIRINGUI?

12. ¿Salmo 23-pica imatataj yachachin?

¹² (Salmo 23:​1-6-ta liyipai). Salmo 23-pica Davidca Jehová Dios paita cꞌuyashcata, llaquishcata seguro cashcatami nirca. Paica Jehová Dios  paipaj Michij cashcamanta paihuan alli apanacushcatapishmi nirca. Shinallataj Davidca Jehová Dios paita ñaupajman pushacushcamantami tranquilo sintirirca. Paica tucui shunguhuanmi Yaya Diospi confiaj carca. Ashtahuancarin tucui vida Jehová Dios paita cꞌuyashpa catinatami seguro carca. Cunanca imamanta seguro cashcatami ricushun.

13. ¿Davidca Jehová Dios paita cuidaj cashcataca imamantataj seguro carca?

¹³ Davidca: “Ñucapajca ima mana illangachu” nircami. Jehová Diosca Davidmanca tucui imalla minishtishcatami curca. Chaimantami Davidca Jehová Dios paita cuidaj cashcata seguro carca. Shinallataj Davidca Jehová Diospaj alli amigo cashcata, paipaj ñaupajpi alli ricurij cashcatami seguro carca. Chaimantami ima tucujpipish Yaya Dios imalla minishtishcata paiman cushpa catinata tucui shunguhuan crirca. Shinallataj llaquilla cai horas Jehová Dios paipaj ladopi canata yachashpami tranquilo sintirirca (Salmo 16:11).

14. ¿Jehová Diosca ñucanchijta cꞌuyashcataca ima shinataj ricuchin?

¹⁴ Llaquicunata apacujpica Jehová Diosca cꞌuyaihuanmi cuidan. Betelpi 20 huatacunata yalli sirvicuj pani Clairemanta a yachashun. Paica llaquicuna jahuanpi jahuanpi paipaj familiata japijpica imata ruranataca mana yacharcachu. Paipaj yayataca umapimi ataque cerebral nishca ungüi japirca. Shinallataj paipaj ñañataca congregacionmantami llujshichircacuna. Chai tucui jahuapish paipaj familiaca cullqui illaj, huasi illajmi saquirircacuna. ¿Jehová Diosca cai panicitata cuidacushcataca ima shinataj ricuchirca? Claireca: “Yayitu Diosmi ñuca familia tucui imalla minishtishcata charichun ayudarca.  Huaquinpicarin ñuca mana yuyashca shinami paicunataca achcata ayudarca. Jehová Dios ñucata cꞌuyashcata ima shina ricuchishcataca siempremi yuyarini. Chashnami llaquicuna shamujpica ahuantashpa catingapaj fuerzasta charini” nircami.

15. ¿David llaquilla cajpica Jehová Diosca paitaca ima shinataj ayudarca? (Fotomantapish parlapai).

¹⁵ Shinallataj Davidca: ‘Diosca ñucataca sinchiyachinmi’ nircami. Davidca achca llaquicunata charishcamantami huaquinpica yallitaj sustarij carca (Salmo 18:​4-6). Pero Jehová Dios cꞌuyaihuan paita cuidajpimi ñaupajman catingapaj fuerzata japirca. Jehová Dios ayudajpimi Davidca: ‘Yaya Diosca llullujlla qꞌuihuacuna tiyancunapi, casijlla yacucuna tiyan cꞌuchupimi ñucataca samachin’ nirca. Chashna sintirishcamantami Davidca cushilla Jehová Diosta sirvishpa catirca (Salmo 18:​28-32).

16. ¿Jehová Diosca cantaca ima shinataj sinchiyachishca?

¹⁶ ‘Jehová Dios llaquijllapimari ñucanchijca mana tucuicuna chingarishcanchij’ (Lamentaciones 3:22; Colosenses 1:11). ¿Imamantataj shina ninchij? Pani Raquelhuan ima tucushcata ricushun. Pandemia punllacunapimi paipaj cusaca Jehová Diosta sirvinata saquirca. Shinallataj paitami saquishpa rirca. ¿Jehová Diosca cai panicitataca ima shinataj ayudarca? Paica: “Yayitu Diosca paipajca achca valishca cashcatami yuyachirca. Turi ñañacunami micunitata cushpa, alaja mensajecunata cachashpa, sumaj versocunata yuyachishpa, ñucata alli tratashpa, Jehová Dios ñucata cuidacushcata yuyachishpa animarcacuna. Paicuna cꞌuyaita ricuchishcamantami Yayitu Diostaca achcata agradicini” nircami.

17. ¿Davidca imamantataj “ima llaqui japinata mana manchashachu” nirca?

¹⁷ Davidca: ‘Ima llaqui japinata mana manchashachu. Quiquinca ñucahuanmi cangui’ nircami. Davidpaj contracunaca paitaca achca cutincunami huañuchisha nircacuna. Shinapish paica Jehová Dios paita cꞌuyashcamantami tranquilo sintirirca. Davidca Jehová Dios paipaj ladopi cashcatami seguro carca. Chaimantami “Diosca tucui ñuca manchaimantami ñucataca quishpichirca” nirca (Salmo 34:4). Caipi ricushca shinaca Davidca achca llaquicunahuan chꞌimbapurana cashpapish Jehová Dios paita tucui shunguhuan cꞌuyashcata yuyarishcamantami ahuantai tucurca.

18. ¿Llaquicunata charishcamanta manchaihuan cashpaca Jehová Dios ñucanchijta cꞌuyashcataca imamantataj yuyarina canchij?

¹⁸ ¿Jatun llaquicunahuan chꞌimbapuracushpaca Jehová Dios ñucanchijta cꞌuyashcataca imamantataj yuyarina canchij? Pani Susimanta parlashun. Paipish, paipaj cusapish paipaj churi paillataj huañujpi paicuna ima shina sintirishcata parlashpaca caitami nirca: “Chai jatun llaqui japijpica shungu pꞌaquirishca, yallitaj llaquillami sintirircanchij. Imata ruranataca mana yacharcanchijchu. Pero Jehová Dios cꞌuyaihuan cuidajpi,  ayudajpimi tranquilos sintirircanchij” nircami. Párrafo 16-pi parlashca pani Raquelpish: “Shuj tutaca yallitaj llaquilla, manchaihuanmi carcani. Ñuca llaquicunata ña mana ahuantacushcamantami Yayitu Diostaca caparishpa mañarcani. Chashna mañancami yallitaj tranquila sintirircani. Jehová Dios shuj mama shina paipaj huahuata rigrapi charicushca shinami sintirircani. Tranquila sintirishpaca dorminatapishmi valircani. Chai tuta ima shina sintirishcataca manataj cungarishachu” nircami. Shinallataj Tasos shuti huauquica soldado mana tucusha nishcamantami chuscu huatacunata prezupi carca. Paica: “Carcelpi cajpica Yayitu Diosca tucui ñuca imalla minishtishcatami curca. Chaita ricushpami paipi ñuca shunguta churarcani. Carcelpi cajpipish tranquilo, cushilla sintirichunpishmi ayudarca. Jehová Dios ñucata cꞌuyashcata cuentata cungapaj paipi tucui shunguhuan confiana cashcatami intindircani. Chaimantami carcelpi cashpapish precursorado regularta japinata decidircani” nircami.

ÑUCANCHIJTA CꞌUYAJ YAYITU DIOSMAN CꞌUCHUYASHUNCHIJ

19. a) ¿Jehová Dios cꞌuyaj cashcata seguros cashpaca paitaca ima shinataj mañashun? b) ¿Jehová Dios cꞌuyaj cashcata parlaj versocunamantaca maijantataj ashtahuan munangui? (“ ¿Jehová Dios cꞌuyaj cashcataca ima shinataj yachanchij?” nishca recuadrotapish ricui).

¹⁹ Jehová Dios huauqui panicunata ima shina ayudashcata ricushpaca pai cꞌuyaj cashcatami cuentata cunchij (2 Corintios 13:11). Paica cada unomantami preocuparin. Pai cꞌuyaj, llaquij cashcamanta ñucanchij cꞌuchullapi cashcatami seguros canchij (Salmo 32:10). Chaimanta Jehová Dios ñucanchijta cꞌuyashcata ima shina ricuchishcata yuyangapaj tiempota surcushunchij. Chashnami pai ñucanchijta ayudaj cashcata, ñucanchij cꞌuchullapi cashcata seguros cashun. Shinallataj ñucanchij shunguta pascashpa, cꞌuyaita ricuchihuayari nishpa Diosta mañashunchij. Paimanca ima shina sintirishcata, ima llaquicunata apacushcatami tucuita huillana canchij. Yayitu Dios ñucanchijcuna ima shina sintirishcata intindishpa ayudanatami seguros cana canchij (Salmo 145:​18, 19).

20. ¿Jehová Dios cꞌuyaj cashcata yachashpaca ima shinataj sintirinchij?

²⁰ Diospaj cꞌuyaica chiri tutapi jatun nina cunuchicuj shinami can. Chaimantami Jehová Diosmanta mana caruyana canchij. Pai yallitaj cꞌuyaj cashpami ñucanchijtaca alli tratan. ¿Jehová Dios ñucanchijta achcata cꞌuyaj cashcata yachashpaca manachu cushilla sintirinchij? Chaimanta Salmota quillcaj runa shina ‘Jehová Diosta cꞌuyanimi’ nishunchij (Salmo 116:1).