1. ¿Jesús huañushcata yuyarinaca imamantataj tucuimanta yalli valishca can? (Lucas 22:​19, 20).

 JEHOVÁ DIOSTA sirvijcunaca huatapica shuj cutinllami Jesús huañushcata yuyaringapaj tandanacuncuna. Chai punllaca shujtaj punllacunatapish yalli valishcami can. Jesusca pai huañushcallata yuyarichunmi mandarca (Lucas 22:​19, 20-ta liyipai). Jesús huañushcata yuyarina punlla chayachunca, ¿imamantataj cushilla shuyacunchij?

2. ¿Jesús huañushcata yuyaringapaj tandanacushpaca imamantataj cushilla sintirinchij?

² Jesús huañushcata yuyaringapaj tandanacushpaca pai ñucanchijmanta huañushcamanta ima shina beneficiarishcatami yuyarinchij. Shinallataj chai tandanacuipica Jesús huañushcamanta ima shina agradici tucushcatami yachanchij (2 Corintios 5:​14, 15). Chai tandanacuipi ñucanchij huauqui panicunahuan tandalla cashcamantapishmi cushilla sintirinchij (Romanos 1:12). Diosmanta caruyashcacunapishmi maijancunaca chai tandanacuipi huauqui panicuna cꞌuyaita ricuchishcamanta Jehová Diosman cutirinata decidishcacuna. Primera vez chai tandanacuiman rijcunapishmi chai tandanacuipi sumajta yachashcamanta Bibliamanta shuj estudiota chasquinata decidishcacuna. Caipi ricushca shinaca Jesús huañushcata yuyarina tandanacuica ñucanchijpajca achca valishcami can.

3. ¿Jesús huañushcata yuyarina tandanacuica imamantataj Diosta sirvijcuna tandalla cashcata ricuchin? (Fotomantapish parlapai).

³ Shinallataj Jesús huañushcata yuyarina tandanacuica muyundij Allpapi caj huauqui panicuna tandalla cashcatami yuyachin. Por ejemplo, cada llajtapi inti huashicujpimi Diosta sirvijcunaca Jesús huañushcata yuyaringapaj tandanacunchij. Chai tandanacuipica tucuicunami Jesuspaj huañuimanta parlaj conferenciata uyanchij. Ishqui cantocunatami cantanchij. Tandatapish,  vinotapishmi pasachinchij. Chuscu mañaicunatapishmi uyanchij. Chai mañaicunata uyashca qꞌuipaca tucuicunami “chashna cachun” ninchij. Muyundij Allpapi tiyaj tucui congregacioncunami shuj punllallapitaj chaita ruranchij. Jesuspish Jehová Diospish muyundij Allpapi paicunata adoracushcata ricushpaca cushillami sintirin.

4. ¿Cai yachaipica imatataj yachashun?

⁴ Cai yachaipica cai tapuicunatami cutichishun: ¿Jesús huañushcata yuyaringapajca ima shinataj ñucanchij shunguta allichi tucuchij? ¿Shujtajcunapish cai tandanacuimanta beneficiarichunca ima shinataj ayudai tucunchij? ¿Diosmanta caruyashcacunata ayudangapajca imatataj rurana canchij? Cai tapuicunata cutichishpami Jesús huañushcata yuyaringapaj allichirishca cashun.

¿JESÚS HUAÑUSHCATA YUYARINGAPAJCA IMA SHINATAJ ÑUCANCHIJ SHUNGUTA ALLICHISHUN?

5. a) ¿Jesús huañushcata yuyaringapajca ima shinataj ñucanchij shunguta allichi tucunchij? (Salmo 49:​7, 8). b) ¿¿Jesusca imamantataj huañurca? nishca videopica imatataj yacharcangui?

⁵ Jesús huañushcata yuyaringapajca ñucanchij shungutami allichina canchij. Chaipajca Jesuspaj huañui achca valishca cashcatami yuyarina canchij. Juchamanta, huañuimantaca ñucanchijllaca mana quishpiri tucunchijchu (Salmo 49:​7, 8-ta liyipai; ¿Jesusca imamantataj huañurca? nishca videotapish ricui). a Chaimantami Jehová Diosca ñucanchijmanta huañuchun paipaj cꞌuyashca Churita curca. Jehová Diospish, Jesuspish ñucanchijta quishpichingapajca achca sacrificiocunatami rurarcacuna (Romanos 6:23). Paicuna ñucanchijcunamanta tucui imata rurashcata yuyarishpaca paicunatami shungumanta agradicinata munashun. Cunanca Jehová Diospish, Jesuspish ñucanchijmanta imallata rurashcatami ricugrinchij. Pero chaita manaraj yachashpaca Jesús imamanta ñucanchijmanta huañuna cashcatami yuyarishun.

6. ¿Jesusca ñucanchijta quishpichingapajca imatataj rurarca?

⁶ Jehová Dios Adanta rurajpica paica jucha illajmi carca. Pero juchata rurashpaca Adanca juchayuj tucushpami ña mana huiñai huiñaita causai tucurca. Paipaj huahua huahuacunapishmi juchayujcuna huacharircacuna. Jesusca paipaj jucha illaj causaita cushpami shuj dibita pagaj shina ñucanchijta randirca. Paica cai Allpapi causacushpaca ima juchata mana rurarcachu. Umachij shimicunatapish mana nircachu (1 Pedro 2:22). Chaimantami jucha illaj cashpa huañurca. Adán manaraj juchata rurashpaca jucha illaj causaitami charirca. Jesuspish huañushpaca Adán shinami jucha illaj causaita charirca (1 Corintios 15:45; 1 Timoteo 2:6).

7. ¿Jesusca ima jarcaicunallahuantaj chꞌimbapurarca?

⁷ Jesusca cai Allpapi cashpaca jarcaicunahuan chꞌimbapurana cashpapish tucuipimi Yaya Diosta cazurca. Shinallataj José y María juchayujcuna cajpipish Jesusca siempremi paicunataca cazurca (Lucas 2:51). Ashtahuanpish pai huambraraj cajpica maijancunaca Yaya Diosta, paipaj yaya mamata ama cazuchunmi pandachisha nishcangacuna. Pero Jesusca paicunataca mana cazurcacunachu. Ña jatunyashpapish jarcaicunahuanmi chꞌimbapurashpa catirca. Por ejemplo, Jehová Diosta ama cazuchun Satanás pandachisha nijpipish Jesusca paitaca mana uyarcachu (Mateo 4:​1-11). Jesús paipaj causaita cushpa gentecunata ama quishpichichunmi Satanasca tucui laya jarcaicunata churarca.

8. ¿Jesusca ima shujtaj jarcaicunahuantaj chꞌimbapurarca?

⁸ Jesusca Diosmanta huillacushpapishmi jarcaicunahuan chꞌimbapurarca. Por ejemplo, paipaj enemigocunami paita huañuchisha nishpa catirashpa llaquichircacuna (Lucas 4: 28, 29; 13:31). Shinallataj paita catijcuna pandarijpipish pacienciatami ricuchina carca (Marcos 9:​33, 34). Paita huañuchingapaj juzgacujpipish maijancunaca sinchitami macarcacuna, burlarircacunapish. Shinallataj paitaca shuhuata shinami cꞌuyaillata huañuchircacuna (Hebreos 12:​1-3). Jesús ñalla huañugrijpipish Jehová Diosca paita cuidanatami saquirca. Chaimi pailla chai sinchi llaquita ahuantarca (Mateo 27:46). b

9. ¿Jesús ñucanchijmanta imalla rurashcata yuyarishpaca ima shinataj sintirinchij? (1 Pedro 1:8).

⁹ Jesusca ñucanchijta quishpichingapajca achcatami sufrirca. ¿Pai tucui imalla rurashcata yuyashpaca ima shinataj sintirinchij? Seguramente paitaca tucui shunguhuanmi cꞌuyashun ninchij (1 Pedro 1:​8-ta liyipai).

10. ¿Jehová Diosca ñucanchijta quishpichingapajca millai gentecuna paipaj churita ima shina tratachuntaj saquircacuna?

¹⁰ Jehová Diosca ñucanchijta quishpichingapajca millai gentecuna paipaj Churita mana alli tratachunmi saquirca. Yaya Diosca jahua pachapi huaranga huaranga huatacunata Jesushuan causashcamantami paitaca achcata cꞌuyan (Proverbios 8:30). Chaimanta Jesús cai Allpapi cajpi sinchi jarcaicunahuan chꞌimbapuracujta ricushpaca Yayitu Diosca ¿ima shinataj sintirishcanga? Millai gentecuna paipaj cꞌuyashca Churita macajta, cꞌamijta, llaquichijta ricushpaca seguramentemi paica dimastij llaquirishcanga.

11. ¿Jesús huañujpi Jehová Dios ima shina sintirishcata intindingapajca ima ejemplopitaj yuyai tucunchij?

¹¹ Shuj huahua huañujpica yaya mamacunaca dimastijmi sufrincuna. Paipaj huahua Paraisopi cutin causarinata yachashpapish achcatami llaquirincuna. Huata 33-pi Jesús cꞌuyaillata huañujpica, ¿Yayitu Diospish ima shinataj sintirirca? Paica dimastij llaquillami sintirirca (Mateo 3:17). c

12. ¿Jesús huañushcata yuyarina tandanacuipaj allichiringapajca imatataj rurana canchij?

¹² Jesús huañushcata yuyaringapajca ashalla punllacunami illan. ¿Chai punlla chayangacamaca canlla o cambaj familiahuan Jesús imamanta huañushcata estudiai tucunguichu? Chaipajca españolpi Guía de estudio para los testigos de Jehová nishcata o shujtaj publicacioncunatami estudiai tucungui. d Shinallataj Jesús shina causashunchij huillashunchij pꞌangapi llujshishca horariota catishpa Jesuspaj huañuimanta parlaj versocunatami liyi tucungui. Conmemoración punllapaj adoración matutina nishca videota  ricunatapish ama cungaringuichu. Caicunata rurashpami conmemoración punllapaj ñucanchij shunguta preparashun. Shujtajcunatapish chai tandanacuimanta beneficiarichunmi ayudai tucushun (Esdras 7:10).

SHUJTAJCUNAPISH BENEFICIARICHUN AYUDASHUNCHIJ

13. ¿Shujtaj gentecunapish Jesús huañushcata yuyarina tandanacuimanta beneficiarichunca imatataj rurana canchij?

¹³ ¿Jesús huañushcata yuyarina tandanacuimanta shujtajcunapish beneficiarichunca imatataj rurana canchij? Callaringapajca chai tandanacuiman shamuchunmi invitana canchij. Huasin huasin huillacushpa invitacioncunata cushpapish picunallata invitasha nishcatapishmi anotai tucunchij. Por ejemplo, ñucanchij familiacunata, ñucanchijhuan trabajajcunata, escuelapi compañerocunata, shujtaj rijsishcacunatami invitai tucunchij. Invitación pꞌanguitacunata mana charishpapish shuj enlacetapishmi cachai tucunchij. Tucui ñucanchij invitashcacunamantaca tal vez shuj o ashtahuanmi shamungacuna (Eclesiastés 11:6).

14. ¿Conmemoracionman shamuchun invitacionta cunaca imamantataj valishca can? Shuj ejemplota churashpa parlai.

¹⁴ Conmemoracionman shamuchun gentecunaman invitacioncunata cunaca valishcami can. Por ejemplo, Diosta mana sirvij cusata charij shuj panipi yuyashun. Paipaj cusa “ñucapish conmemoracionman rigrini” nijpica cai panica mancharishcami saquirirca. ¿Imamanta? Cai panica achca cutincunami paipaj cusata conmemoracionman richun invitashca carca. Pero paica nunca mana rishcachu carca. Pero pai rijsishca anciano shuj invitacionta cujpimi risha nirca. Chai runaca cunancamaca ña achca cutincunami chai valishca tandanacuiman rishca.

15. ¿Conmemoracionman pita invitajpica imatataj rurana canchij?

¹⁵ Pita conmemoracionman invitajpica seguramente paica achca tapuicunatami charinga. Ñucanchij tandanacuicunaman nunca mana rishca cashpaca ashtahuan tapuicunatami charinga. Chaimantami chai tapuicunata ima shina cutichinata yachana canchij (Colosenses 4:6). “¿Chai tandanacuipica imatataj rurancuna?  ¿Ima horacamataj canga? ¿Ima ropahuantaj rina cani? ¿Yaicungapajca paganachu cani? ¿Cullquita tandachincunachu?” nishpachari tapunga. Shinallataj pai imata mana tapujpipish “¿ima tapuita charinguichu?” nishpami tapuna canchij. Jesús huañushcata yuyarishunchij, ¿Ñucanchij tandanacuicunapica imatataj ruranchij? nishca videocunatapishmi ricuchi tucunchij. Ashtahuanpish Cushilla causai libropimi yachai 28-pica, imacunallamanta parlai tucushcata ricuchin.

16. ¿Conmemoracionman rijcunaca tal vez imacunatataj tapungacuna?

¹⁶ Jesús huañushcata yuyarina tandanacuiman primera vez shamujcunaca tal vez: “¿Imamantataj tandata pi mana micurcacuna, vinotapish mana ubyarcacuna? nishpachari tapungacuna. Shinallataj, ¿huatapica cai tandanacuitaca mashna cutintaj ruranguichij? ¿Tucui cancunapaj tandanacuicunaca chashnallatajchu can?” nishpachari tapunga. Conferenciapi chaita ña explicashca cajpipish maijancunaca ashtahuan intindichichunmi minishtincuna. Cai tapuicunata cutichingapajca jw.org paginapi llujshishca “¿Shujtaj religioncuna shinachu testigo de Jehovacunaca Jesús huañushcata yuyarincuna?” nishca temata utilizai tucunchij. Shinashpaca alli shunguta charij gentecuna cai valishca tandanacui manaraj callarijpi, chai tandanacuipi cashpa, ña tucurijpipish beneficiarichunmi munanchij (Hechos 13:48).

DIOSMANTA CARUYASHCACUNATA AYUDASHUNCHIJ

17. ¿Ancianocunaca Diosmanta caruyashcacunataca ima shinataj ayudai tucun? (Ezequiel 34:​12, 16).

¹⁷ Ancianocunaca conmemoración punlla manaraj shamujpi Diosmanta caruyashcacunata cꞌuyashcataca ¿ima shinataj ricuchi tucuncuna? (Ezequiel 34:​12, 16-ta liyipai). Shinallataj Diosmanta caruyashca tucui paicuna rijsishca huauqui panicunahuan parlangapajmi esforzarina can. Paicunahuan parlacushpaca paicunamanta sustarishcata, paicunata ayudasha nishcatami nina can. Conmemoracionman shamuchunpishmi invitana can. Paicuna shamujpica cꞌuyaihuanmi chasquina can. Chai tandanacui qꞌuipapish Jehová Diosman cutirichunmi ayudashpa catina can (1 Pedro 2:25).

18. ¿Diosmanta caruyashcacunataca ima shinataj ayudai tucunchij? (Romanos 12:10).

 ¹⁸ Espiritualmente chiriyashca huauqui panicuna conmemoracionman shamujpica ¿ima shinataj ayudai tucunchij? Paicunamanca cꞌuyaita, respetotami ricuchina canchij (Romanos 12:​10-ta liyipai). Conmemoracionman rinata decidinaca paicunapajca sinchichari canga. Tal vez “¿huauqui panicunaca, allichu chasquingacuna?” nishpachari sustaringacuna. e Chaimantami alli yuyashpa imatapish tapuna canchij. Paicunata ama mana alli sintichingapajpishmi esforzarina canchij (1 Tesalonicenses 5:11). Paicunaca ñucanchij cꞌuyashca huauqui panicunami can. Chaimantami paicunahuan Jehová Diosta tandalla adorai tucushcamanta cushilla sintirina canchij (Salmo 119:176; Hechos 20:35).

19. ¿Imamantataj Jesús huañushcata yuyarina canchij?

¹⁹ Jesús huañushcata yuyaringapaj cada huata tandanacuna imamanta valishca cashcatami cunanca alli intindinchij. Chaiman rishcamantami tucuicuna beneficiari tucunchij (Isaías 48:​17, 18). Shinallataj chai tandanacuiman rishpami Jehová Diosta, paipaj churi Jesustapish ashtahuan cꞌuyashun. Ashtahuanpish chaipi cashcamantami paicunata tucui shunguhuan agradicishcata ricuchishun. Ñucanchij cꞌuyashca huauqui panicunahuan tandalla cangapajpishmi oportunidadta charinchij. Shinallataj primera vez shamujcunata Jesús huañushcamanta paicunapish beneficiari tucushcatami yachachi tucushun. Chaimanta Jesús huañushcata yuyaringapaj allichirishpa catishunchij. Chai punllaca tucui punllacunata yalli valishcami can.