1, 2. ¿Diosta sirvijcunaca ima llaquicunallatataj charinchij?

 LLAQUICUNACA ñapishmi japi tucun. Por ejemplo, huauqui Luisca a doctorpajman rijpica paica: “Cáncer ungüitami charingui. Asha quillacunallatami causangui” nishpami huillarca. Cutin pani Monikaca cushillami paipaj cusahuan Jehová Diosta sirvicurca. Paipaj cusaca ancianomi carca. Shinapish shuj punllaca pani Monikaca paipaj cusa achca huatacunata juchata rurashpa causacushcatami yachaj chayarca. Shinallataj pani Oliviaca shuj jatun acapana shamucushcamantami paipaj huasita saquishpa shujtaj ladopi miticunaman rirca. Qꞌuipaca chai jatun acapana paipaj huasita urmachishcatami yachaj chayarca. ¿Llaquicunaca cantapishchu ñapish japishca?

² Llaquicuna, ungüicunaca Diosta sirvijcunatapishmi japin. Shinallataj huaquin huauqui panicunataca Diosta sirvishcamantami catirashpa llaquichincuna. Cunan punllacunapi tucui ñucanchij llaquicunata anchuchinataca Yayitu Diosca mana nishcachu. Pero tucuipi ñucanchijta ayudanatami nin (Isaías 41:10). Jehová Diospaj ayudahuanmi llaquicunata charishpapish tranquilo cai tucunchij, alli decisioncunatapish japi tucunchij. Jatun llaquicunata apana cashpapish paimantaca manataj caruyashunchu. Cai yachaipica llaquicuna japijpi Jehová Dios ima shina ayudaj cashcata, shinallataj chai ayudata chasquingapaj imata rurana cashcatami yachashun.

JEHOVAMI ÑUCANCHIJTA CUIDANGA

3. ¿Jatun llaquicunata apacushcamantaca ima shinataj sintiri tucunchij?

³ Llaquicunahuan chꞌimbapuracushpaca imata ruranata agllanaca sinchimi cai tucun. ¿Imamanta? Yallitaj llaquilla cashcamanta o sustarishca cashcamantami huaquinpica alli decisioncunata  japinaca sinchi can. Por ejemplo, pani Oliviaca jatun acapana paipaj huasita urmachishcata yachaj chayashpaca imata ruranataca mana yacharcachu. Pani Monikapishmi chashna sintirirca. Paica: “Ñuca cusa achca huatacunata juchapi urmacushcata yachaj chayashpaca shuj espadahuan shungupi chugrichishca shinami sintirircani. Punllapi shujtaj cosascunata rurangapaj fuerzata, animotapish mana charircanichu. Chai jatun llaquita apanataca mana yuyarcanillapishchu” nircami. Pero jatun llaquicunata mana ahuantai tucushcata yuyacujpica, Yayitu Diosca ¿ima shinataj ñucanchijtaca ayudanga?

4. Filipenses 4:6 y 7-pi nishca shinaca, ¿Diosca ima shinataj ñucanchijta ayudan?

⁴ ¿Diosca ima shinataj ayudasha nin? Paica ‘pi mana intindipaj sumaj causaitami’ cusha nin (Filipenses 4:​6, 7-ta liyipai). ¿Caica imatataj nisha nin? Jehová Dioshuan alli apanacushcamantami llaquicunata charishpapish tranquilo sintiri tucunchij. ¿Canca llaquilla o sustarishca cashpaca Jehová Diosta tucui shunguhuan mañashca qꞌuipaca, ima shinataj sintirishcangui? Seguramente tranquilomi sintirircangui. Chashna sintirinami ‘Diospaj sumaj causaica’ can.

5. ¿‘Diospaj sumaj causaica’ ima shinataj ñucanchij shunguta, yuyaita huaquichin?

⁵ Filipenses 4:​7-pi Diospaj sumaj causaimanta parlashpaca ‘chai sumaj causai ñucanchij shungutapish, yuyaitapish huaquichinatami’ nin. Griego rimaipi “huaquichinga” nishpaca shuj llajtata ama llaquichichun soldadocuna cuidacushcatami nin. Soldadocuna chai llajtapaj pungucunata cuidacushcamantami chaipi causajcunaca tranquilo dormi tucurcacuna. Chashna layallatajmi Diospaj sumaj causaica ñucanchijcuna tranquilo sintirichun ñucanchij shungutapish, yuyaitapish huaquichin (Salmo 4:8). Ñucanchij llaquicuna mana utca tucurijpipish Ana shinami asha tranquilo sintiri tucunchij (1 Samuel 1:​16-18). Chashna tranquilo sintirishcamantami alli yuyashpa imatapish alli agllashun.

6. ¿Diospaj sumaj causaita chasquingapajca imatataj rurana canchij? (Fotomantapish parlapai).

⁶ ¿Ñucanchijca imatataj rurana canchij? Ima shinami ñaupa llajtapi causajcuna paicunata cuidachun shuj soldadota mañaj carca, ñucanchijpish Jehová Dios ñucanchijta cuidachunmi mañana canchij. Paitaca tranquilo sintiringacamami mañana canchij (Lucas 11:9; 1 Tesalonicenses 5:17). Huauqui Luisca asha quillacunallata causagrishcata yachaj chayashpaca, paipaj huarmindijmi Jehová Diosta mañaj carca. Paica: “Ima tratamientocunata chasquinata, shujtaj cosascunata ima shina ruranata decidinaca chai ratoca sinchimi carca. Pero Jehová Diosta mañashcamantami tranquilo  sintirircanchij” nircami. Cai cusa huarmica tranquilo sintiringapaj, alli decisioncunata japingapajmi cutin cutin rogarishpa Yayitu Diosta mañajcuna carca. Paicunaca paicuna imalla mañashcata Jehová Dios cutichishcatami sintircacuna. Canpish jatun llaquicunahuan chꞌimbapuracushpaca Yayitu Diosta mañanataca amataj saquichu. Chashna mañajpimi paica cambaj shungutapish, yuyaitapish huaquichinga (Romanos 12:12).

JEHOVAMI PI MANA CUYUCHIPAJ LAYA CACHUN AYUDANGA

7. ¿Jatun llaquicunahuan chꞌimbapuracushpaca huaquinpica ima shinataj sintiri tucunchij?

⁷ Tucuicunami imatapish alli yuyashpa rurangapaj esforzarinchij. Pero jatun llaquicunahuan chꞌimbapuracushpaca imatapish alli yuyashpa ruranaca sinchimi canga. Tal vez mama cucha yacucuna barcota caiman chaiman cuyuchicuj shinami sintirishun. Huauqui Luis cancerhuan huañujpica pani Anaca chashnami sintirirca. Paica: “Ñuca cusata yuyarishca ratoca huaquinpica dimastij llaquillami sintirij carcani. Cutin maijan ratoca ñuca cusito ñucahuan ña mana cashcamantami coleraj carcani” nircami. Huauqui Luis causacushpaca alli decisioncunata japishpami familia ucupi cushilla causangapaj ayudaj carca. Pero cunanca pani Ana chai decisioncunata japina cashcamantami huaquinpica llaquilla, sustarishca sintirij carca. Paica mama cucha yacucuna barcota caiman chaiman cuyuchicuj shinami sintirij carca. ¿Ñucanchijpish chashna sintirijpica tranquilo sintirichunca Yayitu Diosca ima shinataj ayudan?

8. ¿Salmo 16:​8-pica imatataj yachachin?

⁸ ¿Diosca ima shinataj ayudasha nin? Paica ama yallitaj sustarichunmi ayudasha nin (Salmo 16:​8-ta liyipai). Mama cuchapi jatun tamya acapana jatarijpica barcoca caiman chaimanmi cuyuri tucun. Shinapish achca barcocunaca jatun acapanacuna caiman chaiman cuyuchisha nijpipish ama yallitaj cuyuringapajmi rurashca can. Chai barcocuna chashna rurashca cashcamantami barcopi cajcunaca tranquilo viajai tucuncuna. Pero chai barcocunaca ama caiman chaiman yallitaj cuyuringapajca mama cuchapi shayarishpa saquirinapaj randica ñaupajmanmi catina can. Caimantaca ¿imatataj yachanchij? Llaqui punllacunapi Jehová Dios sumaj causaita cuchun munashpaca paitami sirvishpa catina canchij.

9. ¿Dios cushca yachaicuna, videocunaca ima shinataj tranquilo sintirichun ayudan? (Fotomantapish parlapai).

⁹ ¿Ñucanchijca imatataj rurana canchij? Yallitaj llaquilla, sustarishca cashpapish Diospajta rurashpa catingapajmi esforzarina  canchij. Ñaupa shinaca ña manachari rurai tucushun. Pero Jehová Dios ñucanchij rurai pudishcallata rurachun mañashcatami yuyarina canchij (Lucas 21:​1-4-ta ricui). Bibliata, publicacioncunata estudiangapaj, chaipi nishcacunapi yuyangapajpishmi tiempota surcuna canchij. Jehová Diosca sumaj yachaicunata, videocunata cushpami tranquilo sintirichun ayudan. Chai ayudacunataca JW Library^®, Índice de las publicaciones Watch Tower, Guía de estudio para los testigos de Jehová nishcacunapimi mashcai tucunchij. Monikaca llaquilla sintiricushpaca chaitami ruraj carca. Paica “pꞌiñarina”, “traicionana”, “Diosta tucuipi cazuna” nishca shimicunata churashpami informacionta mashcaj carca. Paica: “Informaciontaca yallitaj sustarishca, llaquilla cashpami mashcai callarij carcani. Pero chai informacioncunata liyishca qꞌuipaca tranquilami sintirij carcani. Jehová Dios paipaj rigrapi ñucata charicushca shinami carca. Shinallataj chai informacioncunata liyicushpaca Yayitu Dios ñuca ima shina sintirishcata alli intindij cashcata, ñucata ayudacushcatami cuentata curcani” nircami. Jehová Diosca cantapishmi jatun llaquicunata apacujpi tranquilo sintirichun ayudai tucun (Salmo 119:​143, 144).

JEHOVAMI ÑUCANCHIJTA SINCHIYACHINGA

10. ¿Llaquicuna ñapish japijpica huaquinpica ima shinataj sintirishun?

¹⁰ Llaquicuna ñapish japijpica ñucanchij cuerpoca maipica shaicushcami sintiringa. Shungupipish, yuyaipipishmi shaicushca sintirishun.  Chaquita lisiarishcamanta ña mana utca callpaj runa shinami sintirishun. Llaquicuna manaraj japijpica huaquin cosascunataca alli, cushillachari ruraj carcanchij. Pero cunanca chai cosascunataca ña mana tanto ruranata munashunchu. Maipicarin Elías shinami dormishpalla cainanata munashun (1 Reyes 19:​5-7). ¿Chashna shaicushca cajpica Yayitu Diosca ima shinataj ayudasha nin?

11. ¿Jehová Diosca ima shinataj ayudan? (Salmo 94:18).

¹¹ ¿Jehová Diosca ima shinataj ayudasha nin? Paica ñucanchijta sinchiyachinata, chariranatami huillashca (Salmo 94:​18-ta liyipai). Carrerapi callpaj runaca chaquita lisiarishpaca purishpa catingapajca pi ayudachunmi minishtin. Ñucanchijpish ñaupajman catingapajca Jehová Dios ñucanchijta ayudachunmi minishtinchij. Paica: “Ñucamari cancunataca alli maquimanta pushacuj, cancunata Mandaj Dios cani. Ñucatajmi cancunataca: ‘Ama manchaichijchu. Ñuca ayudashallami’ nini” ninmi (Isaías 41:13). Rey Davidca paipaj  enemigocuna llaquichisha nicujpi, shujtaj llaquicuna japijpica Jehová Dios paipaj cꞌuchullapi cashcatami yacharca. Chaimi: “Canmari cambaj alli maquihuan allipi churashpa charihuangui” nirca (Salmo 18:35). Pero ¿Yayitu Diosca ñaupajman catichunca ima shinataj ñucanchijta ayudan?

12. ¿Ñucanchijcuna llaquilla cai horasca Jehová Diosca ima shinataj ayudai tucun?

¹² Huaquinpica Jehová Diosca shujtajcunata utilizashpami ñucanchijta ayudan. Por ejemplo, David llaquilla cajpica paipaj amigo Jonatanmi paita sinchiyachinaman rirca (1 Samuel 23:​16, 17). Cutin Eliasman imalla minishtishcacunata cuchunca Diosca Eliseotami agllarca (1 Reyes 19:​16, 21; 2 Reyes 2:2). Yayitu Diosca ñucanchij familiata, amigocunata, congregacionta pushaj ancianocunata utilizashpami ñucanchijta sinchiyachi tucun. Shinapish yallitaj llaquilla cashpaca ñucanchijlla canatachari munashun. Chashna sintirinaca normalmi can. Pero ¿Jehová Dios ñucanchijta ayudachun saquingapajca imatataj rurana canchij?

13. ¿Jehová Dios ñucanchijta ayudachun saquingapajca imatataj rurana canchij? (Fotomantapish parlapai).

¹³ ¿Ñucanchijca imatataj rurana canchij? Tucuicunamanta ama caruyangapaj esforzarishunchij. Shujtajcunamanta caruyashpaca ñucanchij llaquicunallapi, ñucanchij ima shina sintirishcallapimi yuyashpa pasashun. Pero chashna yuyai callarishpaca mana alli decisioncunatami japishun (Proverbios 18:1). Tucuicunami maipica ñucanchijlla canata munanchij. Llaquicuna ñapish japijpicarin maipica chaitami ruranata munashun. Pero ñucanchijlla siempre pasashpaca Jehová Dios shujtajcunata utilizashpa ñucanchijta ayudachunca mana saquishunchu. Chaimanta sinchi cajpipish ñucanchij familia, amigocuna, anciano huauquicuna ñucanchijta ayudachun saquishunchij. Jehová Dios paicunata utilizashpa ñucanchijta sinchiyachicushcata amataj cungarishunchij (Proverbios 17:17; Isaías 32:​1, 2).

JEHOVAMI ÑUCANCHIJTA ANIMACHINGA

14. ¿Huaquinpica imamantataj manchaita charinchij?

¹⁴ Maijan ratoca manchaitami charishun. Ñaupa tiempopi Diosta sirvijcunapishmi paicunapaj contracunamanta o llaquicunata charishcamanta maipica achca manchaita charircacuna (Salmo 18:4; 55:​1, 5). ¿Ñucanchijpish imamantataj huaquinpica manchaita charinchij? Escuelapi, trabajopi compañerocuna, familiacuna, autoridadcuna catirashpa llaquichishcamantami maipica manchaita charinchij.  Shinallataj millai ungüita charishcamantachari huañunata manchanchij. Jatun llaquicuna japijpica uchilla huahua manchaita charij shinami sintirishun. Jehová Dios ñucanchijta ima shina ayudasha nishcata ricushun.

15. Salmo 94:​19-pi nishca shinaca ¿Yayitu Diosca imatataj rurasha nin?

¹⁵ ¿Diosca ima shinataj ayudasha nin? Paica animota cushpami tranquilo sintirichun ayudan (Salmo 94:​19-ta liyipai). Caipi yuyashun. Jahua pacha amsayashpa, achcata cꞌulun nishpa, rayocuna achij nishpa tamyacushcamantami shuj huarmi huahuaca achcata mancharin. Chaimi mana dormi tucun. Pero paipaj yaya, paita ugllarishpami tranquila sintirichun ayudan. Chashnami chai huarmi huahuaca dormishca saquirin. Tamyanataca mana saquircachu. Pero paipaj yaya rigra ucupi charicushcamantami paica tranquila sintirin. Ñucanchijpish manchaihuan cashpaca Yayitu Jehová Dios paipaj rigra ucupi ñucanchijta charichunmi minishtishun. Chashnami tranquilo sintirishun. Pero ¿pai ñucanchijta chashna ayudachunca imatataj rurana canchij?

16. ¿Jehová Dios ñucanchijta cushichichun munashpaca imatataj rurana canchij? (Fotomantapish parlapai).

¹⁶ ¿Ñucanchijca imatataj rurana canchij? Diosta mañangapaj, Bibliata liyingapajmi siempre tiempota llujchina canchij (Salmo 77:​1, 12-14). Chashnami llaquicuna ñapish japijpica Diospaj ayudata utca mashcangapaj allichirishca cashun. Shinallataj Diosta mañacushpaca imamanta sustarishca cashcata, imamanta manchaihuan cashcata paiman tucuita huillashunchij. Paipaj Shimipi nishcacunahuan ñucanchijta cushichichunpish saquishunchij (Salmo 119:28). Llaquilla cai horasca Job, Salmos, Proverbios, Mateo 6-pi Jesús nishca shimicunatami liyi tucunchij. Chai versocunata liyishpami achcata animarishun.

17. ¿Llaquicuna japijpica imatataj yuyarina canchij?

¹⁷ Jatun llaquicuna japijpipish Jehová Diosca siempremi ñucanchij cꞌuchullapi canga. Paica ñucanchijtaca manataj saquingachu (Salmo 23:4; 94:14). Paica llaqui punllacunapi ñucanchijta huaquichinata, ayudanata, chariranata, cushichinatami huillashca. Chaimi Isaiasca Yayitu Diosmanca: “Quiquinpi yuyaita churashpa, chaitataj rurashpa catijtaca quiquinmi manataj pi cuyuchipaj sumaj causaipi huaquichingui. Quiquinpi shunguta churashcamantami chashna huaquichingui” nirca (Isaías 26:3). Shinashpaca Jehová Diospi cambaj shunguta churai. Pai cushca ayudacunata chasquingapajpish esforzari. Chaita rurashpami jatun llaquicunata ahuantangapaj fuerzata charingui.