1. ¿Jehová Diosta cushichingapajca imatataj rurana canchij?

 SHUJ cꞌuyashca amigoman pai minishtishca, alaja regalota cushcata yuyai. ¿Chai amigo chai regalota mana utilizajpica ima shinataj sintiringuiman? Seguramente achcatami llaquiringuiman. Pero chai amigo canta agradicijpi, chai regalotapish alli utilizajpica achcatami cushicunguiman ¿nachu? ¿Caimantaca imatataj yachanchij? Jehová Diosca ñucanchijcunamanta huañuchunmi paipaj Churita curca. Chai sumaj regalota cushcamanta agradecido cashcata ricuchijpica Yayitu Jehová Diosca cushillami sintiringa (Juan 3:16; Romanos 5:​7, 8).

2. ¿Cai yachaipica imatataj yachashun?

² Mana cuidadota charishpaca huatacuna pasajpica Jesús ñucanchijmanta huañushcamanta agradicinatami saquishun. Shuj regalota chasquishcamanta cushilla sintirishpapish chai regalota huaquichicushca shinami canga. Pero agradecido cashcata ricuchishpa catingapajca Jehová Dios, Jesús ñucanchijmanta imata rurashcatami yuyarina canchij. Cai yachaipica chaimantami yachashun. Jesús huañushcamanta cunan punllacunapi, shamuj punllacunapipish ima bendicioncunata chasquishcatami ricushun. Shinallataj Jehová Dios ñucanchijman cꞌuyaita ricuchishcamanta ima shina agradici tucushcatami yachashun. Conmemoración punlla manaraj chayajpi, chai tandanacui qꞌuipapish chaita ruranaca minishtirishcami can.

¿JESÚS HUAÑUSHCAMANTACA CUNAN PUNLLACUNAPICA IMA BENDICIONCUNATATAJ CHARINCHIJ?

3. ¿Jesús huañushcamantaca ima bendiciontataj ña chasquishcanchij?

³ Jesús huañushcamantaca ñami achca bendicioncunata chasquishcanchij. Por ejemplo, Jesús huañushcamantami Yaya Diosca  ñucanchij juchacunata perdonan. Paica mana obligado cashcallamantachu ñucanchijta perdonan. Ashtahuanpish ñucanchijta perdonasha nishcamantami chaitaca ruran. Chaimi Davidca: “Jatun Dios quiquinca allimari cangui, perdonajmari cangui” nishpa cantarca (Salmo 86:5; 103:​3, 10-13).

4. ¿Jehová Diosca picunamanta huañuchuntaj paipaj Churita curca? (Lucas 5:32; 1 Timoteo 1:15).

⁴ Maijancunaca: “Jehová Dios ñucata perdonachunca mana mericinichu” nishpami yuyancuna. Tucuicunami Jehová Dios ñucanchijta perdonachunca mana mericinchij. Apóstol Pablopish: “Apóstol nishcallapish mana caipajmi cani. Shinapish Dios yallitaj llaquij cashcata ricuchishcamantami ñucaca apóstol cani” nircami (1 Corintios 15:​9, 10). Ñucanchij juchacunamanta arrepintirijpica Jehová Diosca ñucanchijtami perdonan. Pero paica ñucanchijta perdonachun mericishcamantaca mana perdonanchu. Ashtahuanpish ñucanchijta cꞌuyashcamantami perdonan. Chaimantami Jehová Dios canta perdonachun mana mericishcata yuyashpaca Jehová Dios jucha illaj gentecunamanta huañuchun paipaj Churita mana cushcata yuyarina cangui. Paica juchayuj gentecunamanta huañuchunmi paipaj Churita curca. Juchayuj gentecuna paicunapaj juchacunamanta arrepintirishpaca Jehová Diospaj perdontami chasqui tucuncuna (Lucas 5:32; 1 Timoteo 1:​15-ta liyipai).

5. ¿“Jehová Diosca ñucataca perdonanatajmi can” nishpaca imamantataj mana yuyana canchij?

⁵ Jehová Diosca paimanta tucui imata rurashcatami yuyarin (Hebreos 6:10). Shinapish Jehová Diosta achca huatacunata sirvishcamanta ñucanchijta perdonana cashcataca mana yuyanachu canchij. Paica ñucanchijcuna paita sirvishcallamanta paipaj Churitaca mana curcachu. Ashtahuanpish shuj regalota shinami ñucanchijmanca curca. Chaimanta: “Ñucaca Jehová Diostaca achca huatacunatami sirvishcani. Chaimantami ñucataca perdonanataj can” nishpaca mana yuyanachu canchij. Chashna yuyashpaca Jesús ñucanchijmanta huañuchun mana minishtishcatami ricuchicunchijman (Gálatas 2:​21-tapish ricui).

6. ¿Pabloca imamantataj Jehová Diosta tucui shunguhuan sirvingapaj esforzarirca?

⁶ Pabloca pai ima allita rurashcallamanta Jehová Dios paita perdonana cashcataca mana yuyarcachu. Chashnapish ¿imamantataj Jehová Diosta sirvishpa catingapaj tucui shunguhuan esforzarirca? Paica Jehová Dios paita perdonashcamanta agradecido cashcata ricuchingapajmi chaitaca rurarca (Efesios 3:7). Jehová Diostaca mana ñucanchijta llaquichunllachu sirvinchij. Ashtahuanpish ñucanchijta perdonashcamanta agradicingapajmi paitaca tucui shunguhuan sirvinchij.

7. ¿Jesús huañushcamantaca ima bendiciontataj charinchij? (Romanos 5:1; Santiago 2:23).

⁷ Shinallataj Jesús huañushcamantami Jehová Dioshuan alli apanacui tucunchij. a Yachai 4-pi yachashca shinaca huacharishpaca Jehová Diospaj amigocunaca manaraj carcanchijchu. Pero Jesús huañushcamantami Jehová Diospajman cꞌuchuyashpa paihuan alli apanacui tucunchij (Romanos 5:1; Santiago 2:​23-ta liyipai).

8. ¿Jehová Diosta mañai tucushcamantaca imamantataj agradicina canchij?

⁸ Jehová Dioshuan alli apanacushcamantami paita mañai tucunchij. Jehová Diosca tandanacuicunapi paita mañashcacunallataca mana uyanchu. Ashtahuanpish cada uno ñucanchijlla cashpa paita mañashcacunatapishmi uyan. Jehová Diosta mañashpaca shungupica tranquilomi sintirinchij. Pero ashtahuanpish Jehová Diosta mañashpaca paipajmanmi ashtahuan cꞌuchuyai tucunchij (Salmo 65:2; Santiago 4:8; 1 Juan 5:14). Jesusca cai Allpapi cashpaca siempremi Yaya Diosta mañaj carca. Paica paipaj mañashcacunata Jehová Dios uyaj cashcataca  allimi yacharca. Shinallataj Jehová Diospajman ashtahuan cꞌuchuyangapajmi paita mañaj carca (Lucas 5:16). Jesús huañushcamantami ñucanchijpish Yaya Diosta mañai tucunchij, shinallataj Jehová Dioshuanmi alli apanacui tucunchij.

¿SHAMUJ PUNLLACUNAPICA IMA BENDICIONCUNATATAJ CHASQUISHUN?

9. ¿Shamuj punllacunapica Diosta sirvijcunaca ima bendiciontataj chasquingacuna?

⁹ ¿Jehová Diosta sirvijcunaca Jesús huañushcamantaca ima bendicioncunatataj chasquingacuna? Paicunaca huiñai huiñaitami causai tucungacuna. Maijancunaca: “Gentecunaca siempremi huañushcacuna. ¿Maitataj huiñai huiñaita causai tucushunri?” nishpami yuyancuna. Pero Jehová Diosca huiñai huiñaita causachunmi gentecunataca rurarca. Gentecuna huiñai huiñaita causai tucushcata crinaca maijancunapajca sinchimi can. Pero huiñai huiñaita causana oportunidadta charichunmi Jehová Diosca paipaj cꞌuyashca Churita curca (Romanos 8:32).

10. ¿Ungidocunapish, shujtaj ovejacunapish imatataj shuyacunchij?

¹⁰ Huiñai huiñaita causana bendiciontaca shamuj punllacunapimi chasquishun. Pero Jehová Diosca huiñai huiñaita causana yuyailla causachunmi munan. Ungidocunaca jahua pachaman rishpa Jesushuan cai Allpata mandanataca tucui shunguhuanmi shuyacuncuna (Apocalipsis 20:6). Cutin shujtaj ovejacunaca Paraisopi llaquicuna illaj causanatami tucui shunguhuan shuyacuncuna (Apocalipsis 21:​3, 4). ¿Canca Paraisopi huiñai huiñaita causanatachu shuyacungui? Jehová Diosca cai Allpapi causachunmi ñucanchijtaca rurarca. Chaimantami Paraisopi huiñai huiñaita causanaca sumaj canga.

11, 12. ¿Paraisopica ima bendicioncunatataj chasquishun? (Fotocunamantapish parlapai).

¹¹ Paraisopi causacushcata yuyai. Chaipica ungüicunapish, huañuipish ña mana tiyangachu. Chaimantami tranquilo causashun (Isaías 25:8; 33:24). Shinallataj Yayitu Diosca ñucanchij munashca cosascunatami cunga. Por ejemplo, ¿Paraisopica imatataj yachanata munanguiman? ¿Animalitocuna ima shina cashcatachu ashtahuan yachanata munanguiman? O ¿shuj instrumento musicalta ima shina tocanata, dibujanatachu yachanata munanguiman? Paraisopica  planocunata rurajcuna, huasicunata shayachijcunami minishtiringa. Shinallataj tarpujcuna, cosechajcuna, yanujcuna, herramientacunata rurajcuna, jardincunata cuidajcunami minishtiringa (Isaías 35:1; 65:21). Paraisopica ñucanchij ima munashcata yachangapajca achca tiempotami charishun.

¹² Huañushcacuna causarijpi paicunata cutin chasquinaca alajami canga (Hechos 24:15). Shinallataj Jehová Diosmanta, pai imalla rurashcacunamanta yachashpami catishun (Salmo 104:24; Isaías 11:9). Paraisopica ima juchataca ña mana rurashunchu. Chaimantami Jehová Dios ñucanchijta perdonachunca ña mana mañashun. Paraisopi causana oportunidadtaca mana chingachisha ninchijchu. Chaimantami juchata rurashpa ashacamalla cushicunataca mana agllana canchij (Hebreos 11:25). Jehová Diosta sirvingapajca huaquin cosascunatami huashaman saquishcanchij. Pero Paraisopi causacujpica Jehová Dios tucui imalla nishcacunami pajtaringa. Chaitaca manataj cungarinachu canchij. Jehová Dios ñucanchijcunamanta huañuchun paipaj Churita cushcamantami tucui chai bendicioncunata chasquishun.

ÑUCANCHIJTA QUISHPICHISHCAMANTA JEHOVÁ DIOSTA AGRADICISHUNCHIJ

13. ¿Jehová Dios ñucanchijta cꞌuyashcamanta agradicishcataca ima shinataj ricuchinchij? (2 Corintios 6:1).

¹³ ¿Ñucanchijta quishpichishcamanta Jehová Diosta agradicingapajca imatataj rurana canchij? Chaipajca ñucanchij causaipica paitami punta lugarpi churana canchij (Mateo 6:33). ‘Jesusca tucuicunamantami huañurca. Chaimantami causajcunaca ña mana paicunallataj cushicungapaj causana can. Ashtahuanpish paicunamanta huañushpa, causachishca cajta cushichingapajmi causana can’ (2 Corintios 5:15). Shinashpaca Jehová Dios ñucanchijman cꞌuyaita ricuchishcataca manataj cungarinachu canchij (2 Corintios 6:​1-ta liyipai).

14. ¿Jehová Dios mandashcacunata cazusha nishcataca ima shinataj ricuchinchij?

¹⁴ Jehová Diosta agradicishcata ricuchingapajca pai mandashcacunatami cazuna canchij. Por ejemplo, colegiota tucuchishca qꞌuipa estudianata o mana estudianata agllacushpa o ima trabajota japinata agllacushpaca Jehová Dios imata rurachun munashcatami yuyaipi charina canchij (1 Corintios 10:31; 2 Corintios 5:7). Ñucanchij ruraicunahuan feta charishcata ricuchishpaca Jehová Diospajmanmi ashtahuan cꞌuchuyashun, ñucanchij fepish sinchiyanga. Ashtahuanpish Dios cusha nishcacunata cushicushpami shuyashpa catishun (Romanos 5:​3-5; Santiago 2:​21, 22).

15. ¿Ñucanchijta quishpichishcamanta Jehová Diosta agradicishcata ricuchingapajca Conmemoración punllacunapica imatataj rurana canchij?

¹⁵ ¿Ñucanchijta quishpichishcamanta Jehová Diosta agradicishcata ricuchingapajca Conmemoración punllacunapica imatataj rurana canchij? Chai tandanacuipi cangapajmi allichirina canchij, shujtajcunatapish chaiman richun invitana canchij (1 Timoteo 2:4). Conmemoracionman invitacushpaca chai tandanacui ima shina canatami alli ricuchina canchij. Chaipajca ¿Jesusca imamantataj huañurca?, Jesús huañushcata yuyarishunchij  nishca videocunatami ricuchi tucunchij. Anciano huauquicunaca congregacionmanta caruyashcacunatapish invitangapajmi esforzarina can. Chai huauqui panicunaca Jehová Diospaj ñaupajpica chingarishca ovejitacuna layami ricurincuna. Chaimantami paicuna congregacionman tigrajpica ñucanchijpish, jahua pachapi angelcunapish cushilla sintirinchij (Lucas 15:​4-7). Conmemoracionman rishpaca tucui huauqui panicunata saludanaca allimi can. Pero mushujcunata, tandanacuiman unita mana shamujcunatapish saludangapajmi ashtahuan esforzarina canchij. Chashnami paicunaca cushilla sintiringacuna (Romanos 12:13).

16. ¿Conmemoración punllacunapica Diospajta rurangapajca imamantataj ashtahuan esforzarina canchij?

¹⁶ Conmemoración punllacunapica Jehová Diospajta ashtahuan rurangapajmi esforzarina canchij. Chashnami ñucanchijta quishpichishcamanta Jehová Diostapish, Jesustapish agradicishcata ricuchishun. Predicangapaj esforzarishpaca Jehová Dios ñucanchijta tucuipi ayudacushcatami cuentata cushun. Chashnami paipica ashtahuan confiashun (1 Corintios 3:9). Shinallataj Conmemoración punllacunapaj liyina versocunatapishmi liyina canchij. Liyina versocunaca Diospaj Shimita punllanta yachashunchij folletopi, Tandanacuipi yachana pꞌangapimi ricurin. Munashpaca chai versocunamantami ashtahuan investigai tucunchij.

17. ¿Jehová Diosta cushichingapajca imatataj rurana canchij? (“ Jehová Dios cꞌuyaj cashcamanta agradicishunchij” nishca recuadrotapish ricui).

¹⁷ Cai yachaipi tucui imalla yachashcacunata mana pajtachi tucushpaca mana llaquirinachu cangui. Jehová Diosca can rurai valishcataca shujtajcunapaj ruraicunahuanca mana comparanchu. Ashtahuanpish paipaj Churita cushcamanta shungupi can agradecido cashcata ricushpaca paica cushillami sintirin (1 Samuel 16:7; Marcos 12:​41-44).

18. ¿Jehová Diostapish, Jesustapish imamantataj agradicina canchij?

¹⁸ Jesús huañushcamantami Jehová Diosca ñucanchij juchacunata perdonai tucun. Shinallataj paipaj alli amigocunami cai tucunchij. Ashtahuancarin shamuj punllacunapi huiñai huiñaita causana oportunidadtami charishun. Jehová Diosca cꞌuyaj cashcamantami chai sumaj bendicioncunata ñucanchijman cushca. Chaimanta paita agradicinataca ama saquishunchij (1 Juan 4:19). Jesustapish ñucanchijta cꞌuyashcamanta paipaj causaita cushcamantaca agradicishpa catishunchij (Juan 15:13).