1. ¿Tucuicunaca imatataj agllana canchij?

 TUCUI punllacunami decisioncunata agllana canchij. Maijan decisioncunata agllanaca jahuallami can. Por ejemplo, imata micunata, ima horas dorminatami agllana canchij. Pero maijan decisioncunata agllanaca sinchimi can. Maipica alli saludta charingapaj, cushilla causangapaj, ñucanchij familiata cuidangapaj, Jehová Diosta alli adorangapajmi decisioncunata agllana canchij. Ñucanchij agllashca decisioncunaca ñucanchijpaj, ñucanchij familiapajpishmi alli cana can. Ashtahuantajca Jehová Dios munashca shinami alli decisioncunata agllana canchij (Romanos 12:​1, 2).

2. ¿Alli decisioncunata agllangapajca imatataj rurana canchij?

² Cai yachaipica alli decisioncunata agllangapaj imata rurana cashcatami yachashun. Puntapica tucui informacionta yachana cashcatami ricushun. Ishquipica ñucanchij decisioncunamanta Jehová Dios imata yuyashcata yuyaipi charina cashcatami ricushun. Quimsapica imata ruranata alli yuyashpa agllana cashcatami yachashun. Shinallataj ima alli cashcata, ima mana alli cashcata yachangapaj imata rurana cashcatapishmi intindishun (Proverbios 2:11).

MANARAJ SHUJ DECISIONTA JAPISHPA INFORMACIONTA MASHCAI

3. ¿Shuj decisionta manaraj japishpaca imamantataj informacionta mashcana canchij? Shuj ejemplota churashpa parlai.

³ Shuj alli decisionta japingapajca puntapica tucui informaciontami yachana canchij. ¿Imamantataj chaita rurana canchij? Caipi yuyai. Shuj runaca ancha ungushca cashcamantami doctorpajman rin. Doctorca manaraj shuj tratamientota cushpaca paitaca allimi ricun, tapuicunatapishmi ruran. Ñucanchijpish chai doctor shinami manaraj shuj decisionta japishpaca chai temamanta tucui informacionta  mashcana canchij. ¿Chaitaca ima shinataj rurana canchij?

4. Proverbios 18:​13-pi nishca shinaca ¿shuj alli decisionta japingapajca imatataj rurana cangui? (Fotocunamantapish parlapai).

⁴ Imata rurana cashcata yachangapajca allimi yuyanaraj cangui. Por ejemplo, can mana tanto rijsishca huauqui o pani shuj fiestaman invitajpica ¿imatataj ruranguiman? Tal vez chai fiestapi imata ruragrishcatapish manachari tucuita yachangui. Chashna cajpica cashna nishpami tapurina cangui: “¿Chai fiestaca ima hora, maipitaj canga? ¿Mashna gentecunataj chaipi canga? ¿Chai fiesta alli llujshichunca pitaj ricuranga? ¿Picunallataj chaipi cangacuna? ¿Imacunallatataj rurangacuna? ¿Trago tiyangachu?”. Chashna tapurishpami alli decisionta agllangui (Proverbios 18:​13-ta liyipai).

5. ¿Tucuita ña yachashca huashaca imatataj rurana cangui?

⁵ Tucuita ña yachashca qꞌuipaca imata rurana cashcatami alli yuyana cangui. Por ejemplo, chai fiestapi cutin yuyashun. Chai fiestaman Diosta mana sirvijcunapish rigrishcatami yachaj chayangui. O invitadocuna mashna tragota ubyacushcata pi mana ricugrishcatachari yachaj chayangui. Chaicunata yachaj chayashpaca ¿imatataj ruranguiman? ¿Nachu chai fiestaca maipishcachun fiesta tucunga? (1 Pedro 4:3). Shinallataj ¿chai fiestaman rishcamanta tandanacuiman o huillanaman mana llujshi tucushpaca chai fiestaman ringuimanchu? Chaicunapi yuyashpami alli decisionta japi tucungui. Pero ¿alli decidingapajca chaillatachu rurana cangui? Mana. Jehová Dios imata yuyashcatapishmi yachana cangui (Proverbios 2:6).

 JEHOVÁ DIOS IMATA YUYASHCATA ALLI YACHAI

6. Santiago 1:​5-pi nishca shinaca ¿imamantataj Jehová Diospaj ayudata mañana canchij?

⁶ Can agllagrishca decisionmanta Jehová imata yuyashcata yachangapajmi paipaj ayudata mañana cangui. Diosca “mana mitsashpa, mana rimashpami tucuicunaman” alli yachaita cun (Santiago 1:​5-ta liyipai). Jehová Dios alli yachaita cushcamantami ñucanchij decisión alli cashcata o mana alli cashcata yachai tucunchij.

7. ¿Jehová Dios imata yuyashcata yachangapajca imatataj rurana cangui? Shuj ejemplota churashpa parlai.

⁷ Jehová Dios canta ayudachun mañashca qꞌuipaca can mañashcata ima shina cutichijta ricungapajmi atento cana cangui. Cai chꞌimbapuraipi yuyai. ¿Maita puricushpa chingarishpaca imatataj ruranguiman? Seguramente chai lugarpi causajcunatami maita rina cashcata tapunguiman ¿nachu? Pero ¿paicuna manaraj imata nijpichu chaimanta ringuiman? Mana. Ashtahuanpish paicunata alli uyashca qꞌuipami purishpa catinguiman. ¿Caimantaca imatataj yachanchij? Jehová Dios ñucanchijta ayudachun mañashca qꞌuipaca pai imata nishcata uyangapajmi atentos cana canchij. Chaipajca Jehová Diospaj mandashcacunatami Bibliapi mashcana canchij. Por ejemplo, ¿shuj fiestaman rinata o mana rinata decidingapajca imatataj rurana cangui? Bibliapimi maipishcachun fiestacunamanta, mana alli gentecunahuan apanacunamanta imata nishcata mashcana cangui. Shinallataj ñucanchij munashcata ruranapaj randica Jehová Diospaj Gobiernota punta lugarpi churana cashcatami yuyarina cangui (Mateo 6:33; Romanos 13:13; 1 Corintios 15:33).

8. ¿Can charishca tapuicunamanta informacionta ima shina mashcanata yachangapajca imatataj rurana cangui? (Fotomantapish parlapai).

 ⁸ ¿Can mashcacushca informacionta taringapaj pi ayudachun minishtishpaca imatataj rurana cangui? Diosta alli sirvij shuj huauqui o panimi chai informacionta ima shina mashcanata ricuchi tucun. Pero canllatajmi chaita alli investigangapaj esforzarina cangui. Informacionta mashcangapajca achca ayudacunatami charinchij. Por ejemplo, Guía de estudio para los testigos de Jehová y Diosta sirvijcunata ayudaj versocuna nishca publicacioncunatami charinchij. Chaipi investigashpami imatapish alli decidi tucungui. Chashnami Diospaj shunguta cushichingui.

9. ¿Jehová Dios imata munashcata, imata mana munashcata yachangapajca imatataj rurana canchij? (Efesios 5:17).

⁹ Maipica: “¿Cai decisionta japijpica Yayitu Diosca cushicungachu?” nishpami tapurishcanchij. Pero Yayitu Dios imata munashcata, imata mana munashcata yachangapajca paitami alli rijsina canchij. Chaimantami Proverbios 9:​10-pica: “Jucha illaj Diosta rijsinaca, alli yuyaimi” nin. Cai versopi nishca shinaca alli yuyaita charingapajca Jehová Diospaj cualidadcunatami alli rijsina canchij. Shinallataj paipaj munai maijan cashcata, ima ruraicunata munashcata, ima ruraicunata pꞌiñashcatapishmi alli rijsina canchij. Jehová Diosta alli rijsishpaca alli decisioncunata japishpami paita cushichishun (Efesios 5:​17-ta liyipai).

10. ¿Imamantataj Jehová Diospaj ñaupajpi alli ricurinaca ñucanchij costumbrecunata yalli valishca can?

¹⁰ Jehová Diosta tucui shunguhuan sirvingapaj esforzarijta ricushpaca maipica huaquin familiacuna, amigocunami ñucanchijtaca mana alli ricungacuna. Cai chꞌimbapuraipi yuyashun. Tal vez maijan yaya mamacunaca paicunapaj ushushi tucuita charichun munashpa o paicunapish tucui ima minishtishcata charisha nishpami achca cullquita charij huauquihuan cazarachun obligasha ningacuna. Shinapish chai huauquica manachari Diostaca alli sirvin. Huahuacuna alli causaita charichun sustarinaca allimi can. Pero ¿chai huauquihuan cazarajpica paicunapaj ushushica Jehová Diospajmanca ashtahuanchu cꞌuchuyanga? Shinallataj yaya mamacunaca Jehová Diospaj ima ashtahuan importante cashcatami yuyarina can. Chaitaca Mateo 6:​33-pimi yachai tucuncuna. Chaipi nishca shinaca Diosta sirvijcunaca Diospaj Gobiernotami punta lugarpi churana canchij. Ñucanchij yaya mamata cꞌuyana, ñucanchij comunapi causajcunata respetanaca valishcami can. Pero Jehová Diospaj shunguta cushichinami tucuimanta yalli valishca can.

IMATA RURANATA ALLI YUYASHPA AGLLAI

11. ¿Filipenses 1:​9, 10-pi nishca shinaca alli decidingapajca imatataj rurana cangui?

¹¹ Bibliapi ima nishcata estudiashca qꞌuipaca imata decidinatami alli yuyana cangui (Filipenses 1:​9, 10-ta liyipai). Chaipajca “¿Cai decisionta japishpaca ima shinashi causasha?” nishpami yuyarina cangui. Huaquin decisioncunata japinaca jahuallami can. Pero huaquinpica shuj decisionta japinaca sinchimi canga. Chashnapish alli decidingapajca allimi yuyanaraj cangui.

12, 13. ¿Manaraj shuj trabajota japishpaca imapitaj yuyana cangui?

¹² Caipi yuyai. Cambaj familiata mantiningapaj trabajota mashcacushpa ishqui trabajocunata tarishpaca ¿imatataj ruranguiman? Puntapica ima trabajocuna cashcata, ima horasmanta ima horascama trabajana cashcata, cꞌuchullapi o carupi saquirishcatami alli ricunguiman ¿nachu? Tal vez chai ishqui trabajocunapica Dios mandashcacunata ama cazuchunca manachari canta obligangacuna. Chaimi can ashtahuan munashca trabajota japinata yuyangui. O tal vez maipi ashtahuan cullquita gananata ricushpami decidisha ningui. Pero ¿manaraj shuj decisionta japishpaca imatataj rurana cangui?

¹³ Cada trabajo ima shina cashcatapishmi alli ricuna cangui. Por ejemplo, ¿shuj trabajota japishpaca tucui tandanacuicunamanchu ri tucungui? O ¿chaipi trabajanaman yaicushpaca cambaj  familiaman Diosmanta yachachishpa catingapaj, paicuna cushilla sintirichun ayudangapajchu tiempota charingui? Caicunapi yuyashpaca ima ashtahuan valishca cashcatami cuentata cungui. Jehová Diosta adorana, cambaj familiata ayudanami cullquitapish yalli valishca cana can. Alli yuyashpa decidijpica Yayitu Diosmi canta ayudanga.

14. ¿Imata churarinata agllacushpaca alli yuyaita charishcataca ima shinataj ricuchinchij?

¹⁴ Shinallataj ‘shujtajcunata ama pandachingapajmi’ cuidadota charina canchij (Filipenses 1:10). Chaimantami manaraj shuj decisionta japishpaca: “¿Caita rurajpica shujtajcunaca ima shinataj sintiringacuna?” nishpa tapurina canchij. Por ejemplo, ima shina churarinata, ima shina allichirinata agllacushpaca ¿imatataj rurana canchij? Tal vez ñucanchij agllashca churarina o allichirinaca ñucanchijpajca allimi ricuringa. Pero huaquin huauqui panicunapaj o Diosta mana sirvijcunapajca chashna churarina, allichirinaca manachari alli ricuringa. Alli yuyaita charishpaca  siempremi shujtajcuna ima shina sintirishcata yuyaipi charishun. Shinallataj cꞌuyajcuna cashpaca ñucanchijllapi yuyanapaj randica shujtajcunapimi yuyashun. Mana pinganayajta churarina cashcatapishmi yuyaipi charishun (1 Corintios 10:​23, 24, 32; 1 Timoteo 2:​9, 10).

15. ¿Manaraj shuj importante decisionta japishpaca imatataj rurana cangui?

¹⁵ Shuj importante decisionta agllacushpaca, “¿Ñuca decidishcata pajtachingapajca imallatataj minishtisha?” nishpami yuyana cangui. Jesusmi chaita rurachun yachachirca (Lucas 14:28). Por ejemplo can decidishcata pajtachingapaj mashna tiempota, mashna cullquita minishtishcatami alli yuyana cangui. Huaquinpica can imalla decidishcacuna alli llujshichunca cambaj familiahuanpishmi parlanacuna cangui. ¿Chaita ruranaca imamantataj alli can? Tal vez paicunaca cambaj decisión alli llujshichunmi huaquin cambiocunata rurana cashcata ningacuna. Shinallataj paicuna ima yuyashcata alli uyajpica can imalla decidishcacuna alli llujshichunmi ayudangacuna (Proverbios 15:22).

ALLI DECISIONTA AGLLAI

16. ¿Alli decidingapajca imatataj rurana cangui? (“ ¿Alli decisioncunata japingapajca imatataj rurana cangui?” nishca recuadrotapish ricui).

¹⁶ Cai yachaipi imalla yachashcacunata pajtachishpaca alli decisioncunatami japingui. Puntapica alli decidingapajmi tucuita alli investigana cangui. Shinallataj Jehová Diosta cushichingapajmi pai imata yuyashcata Bibliapi estudiana cangui. Chai qꞌuipaca Jehová Diostami “ñuca imalla decidishcacuna alli llujshichun ayudahuai” nishpa mañana cangui.

17. ¿Ima shinataj alli decisioncunata agllai tucunchij?

¹⁷ Ñaupa punllacunapi alli decisioncunata japishcamantachari cushilla cangui. Shinapish “yuyaisapa cashcamanta, achca experienciata charishcamantami imatapish alli agllai tucushcani” nishpaca mana yuyanachu cangui. Ashtahuanpish alli decisioncunata japingapajca Jehová Diospaj ayudata minishtishcatami yuyarina cangui. Paillami ñucanchijcunamanca alli yachaita, sabiduriata, entendimientota cui tucun. Paipaj ayudallahuanmi alli decisioncunata japi tucunchij (Proverbios 2:​1-5). Yayitu Jehová Diosca alli decisioncunata japichunmi cantaca ayudasha nin (Salmo 23:​2, 3).