1. ¿Jesús huañushcata yuyaringapajca imamantataj cada huata tandanacunchij?

 JEHOVÁ DIOS ñucanchijmanta huañuchun paipaj Churita cushpaca shuj valishca regalota cushca shinami carca (2 Corintios 9:15). Jesús ñucanchijmanta huañushcamantami Jehová Dioshuan alli apanacuna, huiñaita causana oportunidadta charinchij. Yayitu Diosca ñucanchijta achcata cꞌuyashcamantami paipaj shujlla Churita curca. Chaimantami paitaca agradicina canchij (Romanos 5:8). Paipaj shujlla Churita cushcamanta tucui shunguhuan agradicishcata ricuchingapajca cada huatami Jesús huañushcata yuyaringapaj tandanacunchij (Lucas 22:​19, 20).

2. ¿Cai yachaipica imatataj yachashun?

² Jesús huañushcataca sábado 12 de abril de 2025-tami yuyarishun. Tucuicunami chaiman ringapaj allichirina canchij. Conmemoración manaraj chayajpica Jehová Diospish, Jesuspish ñucanchijta ima shina quishpichishcatami yuyarina canchij. Cai yachaipica Jehová Diospish, Jesuspish ñucanchijmanta imata rurashcatami yachashun. Cutin catij yachaipica Jesús huañushcamanta ima bendicioncunata chasquishcata, agradecido cashcata ricuchingapajpish imata rurana cashcatami yachashun.

¿JEHOVÁ DIOSCA IMAMANTATAJ ÑUCANCHIJTA QUISHPICHIRCA?

3. ¿Huaranga huaranga gentecunataca imamantataj shujlla runa quishpichi tucurca? (Fotocunamantapish parlapai).

³ Jehová Diosca cashcata ruraj cashcamantami ñucanchijtaca quishpichirca (Deuteronomio 32:4). Adán Jehová Diosta mana cazushcamantami tucui paipaj huahuacunaca juchayujcuna tucurcacuna. Chaimantami huañuna can (Romanos 5:12). Jehová Diosca juchamanta, huañuimanta ñucanchijta quishpichingapajmi paipaj Churita cacharca. Pero ¿huaranga huaranga gentecunataca ima shinataj shujlla runa quishpichi tucurca?  Apóstol Pabloca: “Ima shinami shuj runa mana cazushcamanta achca gentecuna juchayuj tucurca. Chashnallatajmi shuj runa cazushcamantaca achca gentecuna cashcata ruraj tucungacuna” nircami (Romanos 5:19; 1 Timoteo 2:6). Cai versopi nishca shinaca, shujlla jucha illaj runa Jehová Diosta mana cazushcamantami tucuicuna juchayujcuna tucurcanchij. Chaimantami ñucanchijta quishpichingapaj shujlla jucha illaj runa huañuna carca.

4. ¿Adán mana cazujpipish imamantataj Jehová Diosca paipaj huahuacuna huiñai huiñaita causashpa catichunllaca mana saquirca?

⁴ Tal vez maijancunaca: “¿Jesusca ñucanchijta quishpichingapajca huañunatajchu carca? ¿Adán mana cazujpipish imamantataj Jehová Diosca paipaj huahuacuna huiñai huiñaita causashpa catichun mana saquirca?” nishpami yuyancuna. Juchayujcuna cashcamantami ñucanchijcunaca chashna yuyanchij. Pero Jehová Diosca ñucanchijta yallimi cashcata ruraj can. Adanca jatun juchatami rurarca. Chaimantami Yaya Diosca mana maqui cruzashca saquiri tucurca.

5. ¿Jehová Dios siempre cashcata ruranataca imamantataj seguros canchij?

⁵ Jehová Dios Adanpaj huahuacuna huiñai huiñaita causashpa catichun saquishca cashpaca mana justo cashcatami ricuchinman carca. Chaita ricushpaca gentecunaca: “Jehová Diosca shujtaj ruraicunapipishmi chashnallataj ruranga” nishpami yuyanman carcacuna. Shinallataj: “Jehová Diosca pai imalla nishcacunataca mana pajtachingachu” nishpami yuyanman carcacuna. Pero ñucanchijca chaimantaca mana sustarinachu canchij. Mana jahualla cajpipish Jehová Diosca paipaj cꞌuyashca Churita ñucanchijmanta huañuchunmi cacharca. Chaimantami Jehová Dios siempre allita ruranataca seguros canchij.

6. ¿Jehová Dios ñucanchijta cꞌuyashcamanta paipaj Churita cushcataca imamantataj seguros canchij? (1 Juan 4:​9, 10).

⁶ Jehová Diosca ñucanchijmanta huañuchun paipaj Churita cachashpami cashcata ruraj cashcata ricuchirca. Pero ashtahuantajca Jehová Diosca ñucanchijta yallitaj cꞌuyashcamantami paipaj Churita curca (Juan 3:16; 1 Juan 4:​9, 10-ta liyipai). Shinallataj Jehová Diosca ñucanchijcuna huiñai causaita charichunllaca paipaj Churitaca mana curcachu. Ashtahuanpish paipaj familia parte tucuchunpishmi paipaj Churita curca. Caipi yuyai. Adán juchata rurajpica Jehová Diospaj familia canatami saquircanchij. Chaimantami ñucanchijcuna huacharishcamantapacha Diospaj familia mana cai tucunchij. Pero Jesús huañushcamantami shuj punlla Diospaj familia parte tucushun. Chaipajca Jehová Diospi feta charina, paita tucuipi cazunami canchij. Chai punlla manaraj chayajpipish Jehová Diosca ñucanchij juchacunatami perdonai tucun. Ashtahuanpish Jehová Dioshuan, huauqui panicunahuanpishmi alli amigocuna cai tucunchij. Shinashpaca Yayitu Jehová Diosca ñucanchijtaca achcatami cꞌuyan (Romanos 5:​10, 11).

7. ¿Jehová Diosca paipaj Churi cꞌuyaillata huañuchunca imamantataj saquirca?

 ⁷ Jehová Diospajca ñucanchijmanta huañuchun paipaj Churita cunaca sinchimi carca. Pero ñucanchijta cꞌuyashcamantami chaitaca rurarca. Satanasca: “Llaquicuna japijpica Diostaca ni pi mana sirvishpa catingachu” ninmi. Pero chai nishcacuna mana cierto cashcata ricuchingapajmi Yaya Diosca Jesús manaraj huañujpi achcata sufrichun saquirca (Job 2:​1-5; 1 Pedro 2:21). Jesuspaj enemigocuna paimanta burlarijpi, paita azotijpi, jatun caspipi huarcucujpipish Yayitu Diosca jahua pachamantami tucuita ricucurca. Shinallataj Jehová Diosca paipaj cꞌuyashca Churi cꞌuyaillata huañushcatami ricurca (Mateo 27:​28-31, 39). Jehová Diosca Jesuspaj enemigocuna paita ama llaquichichunmi jarcai tucurca. Por ejemplo, gentecuna “Dios ayudasha nishpaca paita quishpichichunyari” nicujpica Diosca Jesustaca chai ratomi ayudanman carca (Mateo 27:​42, 43). Pero Jehová Dios chaita rurashca cajpica Jesusca gentecunamantaca mana huañunmanchu carca. Chaimantami gentecunaca ima esperanzata mana charinman carca. Pero Jehová Diosca gentecunata yallitaj cꞌuyashcamantami Jesús cꞌuyaillata huañuchun saquirca.

8. ¿Jehová Diosca paipaj Churi huañucujta ricushpaca ima shinataj sintirirca? (Fotomantapish parlapai).

⁸ Jehová Diosca tucui poderta charishpapish paipaj Churi llaquinaita huañuchunca mana jarcarcachu. Pero ¿paipaj Churi huañujta ricushpaca ima shinataj sintirirca? Caipi yuyashun. Ñucanchijcunaca Jehová Diosman rijchaj rurashcami canchij. Chaimantami shujtajcuna sufricujta ricushpaca achcata llaquirinchij. Bibliapi nishca shinaca huaquin gentecuna Jehová Dios mandashcata mana cazujpica paica achcatami llaquirirca (Salmo 78:​40, 41). Abrahán ima shina sintirishcata yuyashun. Jehová Diosca Isaacta sacrificiota shina cuchunmi paita mañarca (Génesis 22:​9-12; Hebreos 11:​17-19). Abrahanca Jehová Diosta tucuipi cazusha nishpapish paipaj churita huañuchina cashcata yachashcamantaca achcatami llaquirishcanga. Cutin ¿Jehová Diosca paipaj Churita achcata llaquichicujta, huañuchicujta ricushpaca ima shinataj sintirirca? Paica achcatami llaquirirca (Abrahán shina sinchi feta charishunchij [parte 2] nishca videota ricui).

9. ¿Romanos 8:​32, 38, 39-pica imatataj yachachin?

⁹ Ñucanchij familiacuna, amigocunaca ñucanchijtaca achcatami cꞌuyancuna. Pero Jehová Diosca paicunatapish yallimi ñucanchijtaca cꞌuyan (Romanos 8:​32, 38, 39-ta liyipai). Shinallataj ñucanchijca achcatami cꞌuyarinchij. Pero Yayitu Jehová Diosca chaitapish yallimi ñucanchijtaca cꞌuyan. Caipi yuyai. ¿Canca huiñai huiñaita causanata munanguichu? Jehová Diosca can huiñai huiñaita causachunca ashtahuanmi munan. Shinallataj ¿cambaj juchacuna perdonashca cachunchu munangui? Yayitu Jehová Diosca chaitaca ashtahuanmi munan. Paica tucuipi paita cazuchun, paipi feta charichunmi munan. Chaita rurashpami paipaj Churita cushcamanta agradicishcata ricuchishun. Caipi ricushca  shinaca Jehová Diosca paipaj Churi ñucanchijmanta huañuchun cushpaca ñucanchijta achcata cꞌuyashcatami ricuchirca. Paraisopica Diospaj cꞌuyaimantaca ashtahuanmi yachashun (Eclesiastés 3:11).

¿JESUSCA IMAMANTATAJ PAIPAJ CAUSAITA CURCA?

10. a) ¿Jesusca ñalla huañugrishpaca imamantataj sustarishca carca? b) ¿Jesusca Diospaj shutitaca ima shinataj jatunyachirca? (“ Jesusca Yaya Diosta tucuipi cazushpami paipaj shutita jatunyachirca” nishca recuadrota ricui).

¹⁰ Jehová Dios mana alli cashcata gentecuna yuyachunca Jesusca mana munanchu (Juan 14:31). Millai gentecunaca: “Jesusca Jehová Diostami cꞌamicun” nishpami paitaca huañuchigrircacuna. Chaimantami Jesusca: “Diospaj shutica mapayachishcami canga” nishpa sustarishca carca. Paica Yaya Diostaca: “Ñuca Yayitu, cai copamanta ñuca mana ubyana cajpica ñucamanta anchuchihuai” nishpami mañarca (Mateo 26:39). Pero Jesusca huañungacamami Yaya Diostaca tucuipi cazurca. Chashnami Yaya Diosmanta Diablo imalla nishcacuna llulla cashcata ricuchirca.

11. ¿Jesusca gentecunata cꞌuyashcataca ima shinataj ricuchirca? (Juan 13:1).

¹¹ Jesusca paipaj causaita cushpami gentecunamanta sustarij cashcata ricuchirca. Pero ashtahuantajca Jesusca paita catijcunamantami sustarij carca (Proverbios 8:31; Juan 13:​1-ta liyipai). Jesusca cai Allpapi achca llaquicunata apana cashcata, llaquinaita huañuna cashcatami yacharca. Shinapish paiman mingashcataca mana pajtachina cashcallamantachu pajtachirca. Ashtahuanpish tucui shunguhuanmi Diosmanta huillangapaj, yachachingapaj, gentecunata ayudangapaj esforzarirca. Ñalla huañugrishpapish paita catijcunapaj chaquicunatami maillarca, paicunatami sinchiyachirca, sumaj yuyaicunatapishmi yachachirca (Juan 13:​12-15). Jatun caspipi huañucushpapish paipaj cꞌuchullapi caj shuhuaj runatami: “Paraisopimi cangui”  nishpa animarca. Shinallataj paipaj mamata cuidachunmi Juanman mingarca (Lucas 23:​42, 43; Juan 19:​26, 27). Caipi ricushca shinaca Jesusca gentecunata ayudashpa, paipaj causaita cushpami cꞌuyaj cashcata ricuchirca.

12. ¿Jesusca ñucanchijcunataca ima shinataj ayudashpa caticushca?

¹² Jesusca ‘shuj cutinllami huañurca’. Cutinca ña mana huañungachu. Pero ñucanchijta ayudanataca manataj saquishcachu (Romanos 6:10). Paica pai huañushcamanta ñucanchijcunaman allicunata cungapajmi sinchita trabajashpa caticun. Por ejemplo, Mandaj cashcamanta, Rey cashcamanta, sacerdotecunata Jatun Mandaj cashcamanta, congregacionpaj uma cashcamanta imallata rurashcata yuyashun (1 Corintios 15:25; Efesios 5:23; Hebreos 2:17). Paica tucui ungidocunata, Paraisopi causagrijcunatapishmi tandachina can. Chaitaca jatun llaqui punllacuna manaraj tucurijpimi ruranata saquinga (Mateo 25:32; Marcos 13:27). a Shinallataj cai tucuri punllacunapi paita sirvijcuna espiritualmente sinchi cachunmi ayudashpa caticun (Mateo 24:45). Mil huatacunata mandacushpapish Jesusca ñucanchijta ayudanataca manataj saquingachu. Caipi ricushca shinaca Jehová Diosca ñucanchijmanta huañuchunllaca Jesustaca mana curcachu. Ashtahuanpish ñucanchijta ayudachunpishmi curca.

YACHASHPA CATISHUNCHIJ

13. ¿Jehovamanta, Jesusmanta ashtahuan yachangapajca imatataj rurana canchij?

¹³ Jehová Diospish, Jesuspish cꞌuyajcuna cashcamantami ñucanchijta quishpichirca. Chaipi yuyashpaca paicunamantaca ashtahuanmi yachashun. Jesuspaj causaimantaca Mateo, Marcos, Lucas y Juan librocunapimi parlan. Conmemoración punllacunapica chai chuscu librocunata o huaquin librocunallatami liyi tucunchij. Pero de una tucuita liyinapaj randica asha ashami liyishpa catina canchij. Chashnami Jehová Diostapish, Jesustapish imamanta cꞌuyana cashcata intindishun. Shinallataj ñucanchijcuna imalla yachashcataca shujtajcunamanpishmi parlana canchij.

14. Salmo 119:​97-pi nishca shinaca ¿Jehová Diosmanta, Jesusmanta yachashpa catingapajca imatataj rurana canchij? (Fotomantapish parlapai).

¹⁴ Tal vez canca achca huatacunatachari Jehová Diosta sirvicungui. Chaimi: “¿Jehová Dios cashcata ruraj cashcata, cꞌuyaj cashcata, ñucanchijta ima shina quishpichishcata ashtahuanchu yachai tucuni?” nishpa tapuringui. Pero Jehová Diosta achca huatacunata sirvicushpapish caicunamantaca ashtahuanmi yachai tucunchij. Chaipajca ñucanchij publicacioncunatami alli  estudiana canchij. Shinallataj shuj versopi ima nishcata mana intindishpaca ashtahuan informaciontami mashcana canchij. Chai huashaca chai versopi Jehová Diosmanta, Jesusmanta imata yachashcatami punllanta yuyarina canchij. Paicuna ñucanchijman ima shina cꞌuyaita ricuchishcatapishmi yuyana canchij (Salmo 119:​97-ta liyipai).

15. ¿Bibliataca imamantataj orota mashcacushca shina estudiana canchij?

¹⁵ Bibliata liyishpa o estudiacushpa mushuj yuyaicunata mana tarishpaca mana desanimarinachu cangui. Bibliata estudianaca orota mashcacushca shinami can. Orota mashcajcunaca orota japingacamaca achca horascunata, achca punllacunatami trabajancuna. Paicunapajca shuj uchilla oro pepitapish achca valishcami can. Chaimantami mana shaicushpa sinchita trabajashpa catincuna. Bibliapi tiyaj valishca yuyaicunaca orotapish yallimi valishca can (Salmo 119:127; Proverbios 8:10). Chaimantami Bibliataca mana shaicushpa, cushilla estudiashpa catina canchij (Salmo 1:2).

16. ¿Jehová Dios shina, Jesús shinaca imatataj rurana canchij?

¹⁶ Bibliata estudiacushpaca imalla yachashcacunata cambaj causaipi ima shina pajtachinatami yuyana cangui. Por ejemplo, Jehová Dios shina cashcata ruraj cashcata ricuchingapajca mana ñahuita ricushpallami tucuicunata alli tratana cangui. Shinallataj ¿Jesús shina Jehová Diosta cꞌuyashcata ricuchingapajca imatataj rurana cangui? Jehová Diosta sirvishcamanta llaquicunata apana cashpaca chaicunataca apanallami cangui. Shinallataj huauqui panicunatami tucui shunguhuan ayudana cangui. Shujtaj gentecunapish Jesús huañushcamanta quishpirichunca tucui shunguhuanmi huillashpa catina cangui.

17. ¿Catij yachaipica imatataj yachashun?

¹⁷ Jehová Diospish, Jesuspish ñucanchijta quishpichingapaj imallata rurashcata alli intindishpaca paicunatami ashtahuan cꞌuyashun. Paicunapish ñucanchijtaca ashtahuanmi cꞌuyangacuna (Juan 14:21; Santiago 4:8). Jehová Diosca ñucanchijta ima shina quishpichishcata alli intindichunca chꞌican chꞌican ayudacunatami cushca. Chaicunata yachashpa catishunchij. Catij yachaipica Jesús huañushcamanta ima bendicioncunata chasquishcata, shinallataj ñucanchijta quishpichishcamanta Jehová Diosta ima shina agradici tucushcatami yachashun.