1. ¿Cunan punllacunapica la mayoría gentecunaca imatataj rurancuna?

 CUNAN punllacunapica la mayoría gentecunami paicunallapi yuyancuna. Por ejemplo, maijan gentecunaca importante cashcata ricuchingapajllami tucui paicuna imata rurashcata redes socialespi churancuna. Pero asha gentecunallami Jehová Diosta jatunyachincuna. Cai yachaipica Jehová Diosta jatunyachina ima nisha nishcata, paita imamanta jatunyachina cashcatami yachashun. Shinallataj Diosta jatunyachingapaj imata rurana cashcata, Jehová Dios ñalla paipaj shutita jatunyachinatapishmi yachashun.

¿JEHOVÁ DIOSTA JATUNYACHINACA IMATATAJ NISHA NIN?

2. ¿Jehová Diosca Sinaí urcupica Jatun Dios cashcataca ima shinataj ricuchirca? ( fotomantapish parlapai).

² Bibliapica Jehová Dios Jatun Dios cashcatami yachachin. Por ejemplo, israelitacunata Egiptomanta llujshichishca huashaca Jehová Diosca Jatun Dios cashcatami ricuchirca. Israelitacunaca Sinaí urcu chaquipimi Jehová Dios imata nigrishcata uyangapaj tandanacurcacuna. Chaipica shuj amsa pꞌuyumi urcu jahuapi tiyarirca. Shuj sinchi terremoto tiyajpimi urcumantaca cushnipish llujshi callarirca. Shinallataj cꞌulun nishcami uyarirca, achij nishcapishmi ricurirca. Ashtahuanpish gachupi sinchita tocashca shinami uyarirca (Éxodo 19:​16-18; 24:17; Salmo 68:8). Jehová Dios chaita rurashpa Jatun Dios cashcata ricuchijpimi israelitacunaca mancharishca saquirishcangacuna.

3. ¿Jehová Diostaca ima shinataj jatunyachinchij?

³ ¿Jehová Diostaca ima shinataj jatunyachinchij? Chaipajca shujtaj gentecunamanmi pai poderyuj cashcata, sumaj cualidadcunatapish charishcata huillana canchij. Shinallataj Jehová Dios imatapish rurachun ayudashcamantami paita jatunyachina canchij (Isaías 26:12). Rey Davidca Jehová Diostami alabarca. Chaimantami paica ñucanchijpajca alli ejemplo can.  Davidca israelitacunapaj ñaupajpi Jehová Diosta mañashpaca: “Jehová Dioslla jatun canapish, poderpish, sumaj canapish, achijnicuj canapish, yallitaj jatun canapish cambajmi can. Jahua pachapi imalla tiyajcunapish, cai pachapi imalla tiyajcunapish cambajmi can” nircami. David mañanata tucuchishca huashaca tucuicunami Jehová Diosta alabai callarircacuna (1 Crónicas 29:​11, 20).

4. ¿Jesusca Jehová Diostaca ima shinataj jatunyachirca?

⁴ Jesusca cai Allpapi cashpaca siempremi paipaj Yayata jatunyachij carca. Por ejemplo, paica Jehová Dios cushca poderhuan milagrocunata ruraj cashcatami nij carca (Marcos 5:​18-20). Shinallataj paipaj Yayamanta allicunata nishpa, shujtajcunata alli tratashpami Diosta jatunyachij carca. Shuj cutinca Jesusca sinagogapimi yachachicurca. Chaipica millai espíritu japishcamanta 18 huatacunata ungushca huarmimi carca. Chai millai espiritupaj culpamantami chai huarmica curcuyashpa mana recto shayari tucurca. Jesusca chai huarmi achcata sufricujta ricushpaca achcatami llaquirirca. Chaimantami paipajman cꞌuyaihuan cꞌuchuyashpaca: “Huarmi cambaj ungüimantaca alliyashcami cangui” nirca. Jesús chai huarmipaj jahuapi maquita churajpimi chai huarmica ñapish rectota shayarirca. Chai huarmica alliyashcamantami Jehová Diosta alabai callarirca (Lucas 13:​10-13). Ñucanchijpish chai huarmi shinami Jehová Diosta alabana canchij.

¿JEHOVÁ DIOSTACA IMAMANTATAJ JATUNYACHINA CANCHIJ?

5. ¿Jehová Diostaca imamantataj respetanchij?

⁵ Jehová Diosta achcata respetashcamantami paita jatunyachinchij. Jehová Diosca tucuicunamanta yallimi poderyuj can. Imata rurashpapish paica nunca mana shaicurinchu (Salmo 96:​4-7). Dios imalla rurashcacunata ricushpami pai yachaisapa cashcata intindinchij. Shinallataj Jehová Diosca causaitapish, causangapaj imalla minishtishcacunatapishmi cushca (Apocalipsis 4:11). Paita sirvijcunatapish manataj saquinchu (Apocalipsis 15:4). Pai imata rurashpapish tucuitami alli ruran. Pai nishcacunatapish siempremi pajtachin (Josué 23:14). Chaimantami Jeremiasca: “Tucui cai pacha llajtacunapi causaj jatun yachajcunapurapipish, tucui jatun mandajcunapurapipish can shina jatunca mana tiyanchu” nirca (Jeremías 10:​6, 7). Jehová Dios chashna cashcata ricushpami paitaca respetanchij. Shinallataj paita tucui shunguhuan cꞌuyashcatami ricuchishun ninchij.

6. ¿Imamantataj Jehová Diosta tucui shunguhuan cꞌuyanchij?

⁶ Jehová Diosta tucui shunguhuan cꞌuyashcamantami paita jatunyachinchij. Jehová Dios sumaj cualidadcunata charishcamantami paitaca cꞌuyanchij. Por ejemplo, paica cꞌuyaj, llaquij Diosmi can (Salmo 103:13; Isaías 49:15). Llaquicunata charishcamanta cada uno ima shina sintirishcataca paica allimi yachan (Zacarías 2:8). Shinallataj Yaya Diosca paipajman cꞌuchuyachunmi ayudan (Salmo 25:14; Hechos 17:27). Ashtahuanpish Jehová Diosca humilde cashcamantami ‘jahua pachatapish, cai pachatapish cumurishpa ricun. Humilde runatapish allpamantami jatarichin’ (Salmo 113:​6, 7). ¿Paitaca pitaj mana jatunyachisha ningayari? (Salmo 86:12).

7. ¿Imatataj tucuicuna rurana canchij?

⁷ Gentecuna Jehová Diosta rijsichun munashcamantami paitaca jatunyachinchij. Diabloca Jehová Diosmanta llullacunata nishpami gentecunataca pandachishca. Chaimantami paicunaca Diosmanta panda yuyaicunata charincuna (2 Corintios 4:4). Diabloca: “Jehová Diosca pꞌiñaj Diosmi can, ñucanchijmantaca mana  preocuparinchu. Paimi llaquicunataca churan” nishpami llullan. Pero ñucanchijca Diablo nishcacuna mana cierto cashcataca allimi yachanchij. Chaimantami Jehová Dios ima shina cashcata gentecunaman yachachinchij. Chaita rurashpami paitaca jatunyachinchij (Isaías 43:10). Cunanca Salmo 96-pimi huaquin versocunata yachashun. Chai versocunaca Jehová Diosta ima shina jatunyachi tucushcatami yachachin.

¿JEHOVÁ DIOSTACA IMA SHINATAJ JATUNYACHI TUCUNCHIJ?

8. ¿Jehová Diostaca ima shinataj jatunyachi tucunchij? (Salmo 96:​1-3).

⁸ (Salmo 96:1 al 3-ta liyipai). Ñucanchij shimicunahuanmi Jehová Diosta jatunyachi tucunchij. Cai versocunapi nishca shinaca Jehová Diosca paita sirvijcuna paita cantachun, paipaj shutita alli nichunpishmi munan. Shinallataj alli huillaicunata, pai jatun cashcata tucui llajtacunapi huillachunmi animan. Chaicunata rurashpami Yaya Jehová Diosta jatunyachishcata ricuchishun. Ñaupa tiempopi Jehová Diosta sirvijcunaca paipaj shutita difindingapajmi esforzarijcuna carca. Shinallataj maiman rishpapish Jehová Dios paicunata ima shina ayudashcatami huillajcuna carca (Daniel 3:​16-18; Hechos 4:29). ¿Paicuna shina ñucanchijcunapish imatataj rurana canchij?

9, 10. ¿Pani Angelinamantaca imatataj yachai tucunchij? (Fotomantapish parlapai).

⁹ Estados Unidos llajtapi causaj pani Angelinamanta parlashun. a Paica paipaj trabajopica mana manchashpami Jehová Diospaj shutita difindirca. Paitaca recienllami trabajopica contratashca carcacuna. Chaimi mushuj trabajadorcunapura rijsinacuchun shuj tandanacuiman invitarcacuna. Chaipica cada unomi paicunapaj causaimanta parlana oportunidadta charirca. Pani Angelinaca testigo de Jehová cashcamanta cushilla causashcata ricuchingapajmi huaquin fotocunata agllarca. Pero manaraj paipaj turno chayajpica shuj compañeromi parlai callarirca. Paipish testigo de Jehová shina huiñashcatami nirca. Shinapish paica Jehová Diosmanta, testigo de Jehovacunapaj crishcacunamantami burlarirca. Chaimantami pani Angelinaca sustarishca carca. Paica: “¿Chai compañero Jehová Diosmanta llullacunata nichunchu saquisha? O ¿Jehová Diostachu difindisha?” nishpami tapurirca.

¹⁰ Pani Angelinapaj turno chayajpica paica  shungupimi Jehová Diosta mañarca. Qꞌuipaca paipaj compañerotaca alaja shimicunahuanmi: “Ñucapishmi testigo de Jehová shina huiñarcani. Cunancamami paita sirvishpa catini” nirca. Chaita uyashpaca chai compañeroca ashatami pꞌiñarirca. Pero Angelinaca tranquilami parlashpa catirca. Paica Jehová Diosta cushilla sirvishcatami huaquin fotocunapi ricuchirca. Chai qꞌuipaca alaja shimicunahuanmi paipaj crishcacunata difindirca (1 Pedro 3:15). Parlanata tucuchijpica chai compañeroca tranquilomi carca. Paipish Jehová Diosta sirvicushpa cushilla causashcatami yuyarirca. Pani Angelinaca: “Jehová Diosca paipaj shutita difindichunmi munan. Chaita ruranaca shuj jatun privilegiomi can” nircami. Ñucanchijcunapish shujtajcuna Jehová Diosmanta mana allicunata nijpica paipaj shutitami difindina canchij.

11. ¿Diosta sirvijcunaca Salmo 96:​8-taca ima shinataj pajtachishcacuna?

¹¹ (Salmo 96:​8-ta liyipai). Ñucanchij charishca cosascunahuanmi Jehová Diosta jatunyachi tucunchij. Jehová Diosta sirvijcunaca valishca cosascunata cushpami paitaca jatunyachishcacuna (Proverbios 3:9). Por ejemplo, israelitacunaca Diospaj templota shayachingapaj, cuidangapajmi cullquita, shujtaj valishca cosascunatapish curcacuna (2 Reyes 12:​4, 5; 1 Crónicas 29:​3-9). Shinallataj huaquin discipulocunaca Jesusta, paipaj apostolcunatapish atindingapajmi paicuna imalla charishcacunata curcacuna (Lucas 8:​1-3). Cutin punta siglopica huauqui panicunaca yaricaihuan caj huauqui panicunatami ayudarcacuna (Hechos 11:​27-29). Cunan punllacunapipish ñucanchij imalla charishcacunata cushpami Jehová Diostaca jatunyachinchij.

12. ¿Contribucioncunahuanca Jehová Diostaca ima shinataj jatunyachinchij? (Fotomantapish parlapai).

¹² Cunan punllacunapi huauqui panicuna paicunapaj charishcacunahuan Jehová Diosta ima shina jatunyachishcata ricushun. 2020 huatapica Zimbabue llajtapica yallitaj usia punllacunami tiyarca. Chaimantami achca gentecunaca micungapajca imata mana charircacuna. Chashnapish pani Priscilaca tucui miercolescunata, viernescunatami huillanaman llujshij carca. Yapuna punllacuna chayamujpipish paica huillanataca manataj saquircachu. Chaita ricushpami paipaj vecinocunaca “yaricaihuanmi huañungui” nishpa burlarij carcacuna. Pero paica: “Jehová Diosca paita sirvijcunataca manataj saquinchu” nishpami cutichij carca. Shujtaj llajtacunamanta huauqui panicuna  contribucioncunata cushcamantami pani Priscilaca ayudata chasquirca. Chaita ricushpami huaquin vecinocunaca mancharishpa: “Yaya Diosca cantaca manataj saquishcachu. Paimantami ashtahuan yachasha ninchij” nircacuna. Paicunapuramantaca siete gentecunami tandanacuicunaman ri callarircacuna.

13. ¿Ñucanchij ruraicunahuanca Jehová Diostaca ima shinataj jatunyachi tucunchij? (Salmo 96:9).

¹³ (Salmo 96:​9-ta liyipai). Ñucanchij ruraicunahuanmi Jehová Diosta jatunyachi tucunchij. Jehová Diospaj sacerdotecunaca templopi sirvingapajca limpiomi cana carcacuna (Éxodo 40:​30-32). Ñucanchijpish tucuipi limpio cangapajmi esforzarina canchij. Pero ashtahuantajca Jehová Diospaj ñaupajpi alli, limpio causaita charingapajmi esforzarina canchij (Salmo 24:​3, 4; 1 Pedro 1:​15, 16). Chaipajca mauca causaita saquishpami mushuj causaita churarina canchij. Chaitaca ¿ima shinataj rurai tucunchij? Ñucanchij mapa ruraicunata, yuyaicunatami saquina canchij. Shinallataj Jehová Dios munashca shina tucuita rurangapaj, pai shina yuyangapajmi esforzarina canchij (Colosenses 3:​9, 10). Jehová Diospaj ayudahuanmi mapa causaita charijcuna, millaita rurashpa causajcunapish cambiai tucushcacuna.

14. ¿Huauqui Jackmantaca imatataj yachanchij? (Fotomantapish parlapai).

¹⁴ Jack runamanta parlashun. Paica yallitaj millai, peligroso runami carca. Chaimantami paitaca Demonio nishpa rijsijcuna carca. Yallitaj millai ruraicunata rurashcamantami paita huañuchichun sentenciarcacuna. Huañuna punlla chayangacamaca paica shuj huauquihuanmi Bibliata estudiai callarirca. Qꞌuipacarin bautizarircami. Jackca millai runa cashca cashpapish cambiarcami. Chaimantami pai huañuna punlla chayajpica carcelta cuidajcunaca huiquicuna muyurishpa huauqui Jackmanta despedirircacuna. Carcelpi trabajaj shuj sargentopish: “Jackca tucuicunamanta yalli millai runami carca. Pero qꞌuipaca tucuicunamanta yalli alli runami tucurca” nircami. Cayandij semanaca huauquicunaca carcelpi tandanacuita rurangapajmi rircacuna. Chaipica por primera vez shuj prezu tandanacuiman rishcatami cuentata curcacuna. Chai prezuca Jack cambiashcata ricushpami paipish Jehová Diosta adorangapaj imata rurana cashcata yachasha nirca. Ima shinami ricushcanchij ñucanchij ruraicunahuanmi Yayitu Jehová Diostaca jatunyachi tucunchij (1 Pedro 2:12).

 ¿JEHOVÁ DIOSCA PAIPAJ SHUTITACA IMA SHINATAJ JATUNYACHINGA?

15. ¿Jehová Diosca paipaj shutita jatunyachingapajca imatataj ruranga? (Salmo 96:​10-13).

¹⁵ (Salmo 96:10 al 13-ta liyipai). Salmo 96-paj tucuri versocunapica Jehová Dios cashcata ruraj cashcatami nin. ¿Jehová Diosca paipaj shutitaca ima shinataj jatunyachinga? Paica ñallami cashcata rurashpa gentecunata juzganga. Paipaj shutita mapayachishcamantami ñalla tucui panda religioncunatapish tucuchinga (Apocalipsis 17:​5, 16; 19:​1, 2). Huaquin gentecunaca Jehová Dios panda religioncunata tucuchijta ricushpaca tal vez Jehová Diosta adoranatami decidingacuna. Shinallataj Armagedonpica Jehová Diosca Diablopaj ruraicunatami tucuchinga. Paita pꞌiñajcunatapish, paipaj shutita mapayachijcunatapishmi tucuchinga. Pero paita cazujcunata, paipaj shutita jatunyachijcunatami quishpichinga (Marcos 8:38; 2 Tesalonicenses 1:​6-10). Chai qꞌuipaca Jesusca cai Allpataca mil huatacunatami mandanga. Chai mil huatacuna tucurijpica Diabloca cutinmi Diosta sirvijcunataca pandachisha ninga. Chai qꞌuipaca tucuicunami Jehová Diospaj shutita jatunyachina cashcata intindingacuna. Chashnami Jehová Diosca paipaj shutita jatunyachinga (Apocalipsis 20:​7-10). Chai tiempopica “ima shinami mama cuchaca yacuhuan junda tiyacun, chashnallatajmi cai pachapi causajcunaca Mandaj Dios jatun cashcata rijsina yuyaihuan junda cangacuna” (Habacuc 2:14).

16. ¿Canca imatataj rurasha ningui? (Fotomantapish parlapai).

¹⁶ Tucui gentecuna Jehová Diospaj shutita alabajpica sumajmi canga. Chai punlla chayangacamaca Jehová Diosta alabangapajmi tucui oportunidadcunata aprovechana canchij. Chaita rurana importante cashcata yuyachingapajmi Cuerpo Gobernante huauquicunaca huata 2025-pajca Salmo 96:​8-ta agllashcacuna. Chaipica: ‘Jehová Diospaj shutita alabaichijyari’ ninmi.