1. a) ¿Jesusca paipaj discipulocunamanca cai pacha tucurinamantaca imatataj nirca? b) ¿Paicunamanca ima consejocunatataj curca?

 JESÚS huañungapaj ashalla punllacuna illajpimi paipaj chuscu discipulocunaca: “¿Cai pachapaj ruraicuna tucurinatapish ima señalta ricushpataj yachashunyari?” nishpa Jesusta tapurcacuna (Mateo 24:3). Paicunaca Jerusalenpish, Diospaj templopish ima shina tucurinatami yachasha nishcanga. Shinapish Jesusca Jerusalenpish, Diospaj templopish tucurinallamantaca mana parlasha nircachu. Ashtahuanpish cai millai punllacuna ima shina tucurinatapishmi nicurca. Chaimantami paica: “Ima punlla, ima hora shamunataca ni pi mana yachanchu. Jahua pacha angelcunapish, Churipish mana yachanchu. Chaitaca Yayallami yachan” nishpa cutichirca. Shinallataj paicunataca ‘Chaparacuichij, rijcharishca caichij’ nishpami consejarca (Marcos 13:32-37).

2. ¿Jesusta punta catijcunaca Jerusalén manaraj tucurijpica imamantataj rijcharishca cana carcacuna?

² Jesusta punta catijcunaca causashpa catingapajca rijcharishcami cana carcacuna. Jesusca paipaj catijcunamanca Jerusalén llajta tucurigrishcata yachangapajca imalla tucuna cashcatami huillarca. Chaimi paica: “Jerusalén llajta muyundijpi soldadocuna shayacujta ricushpaca, chai llajtata tucuchina ñalla chayamucushcatami yachanguichij” nishpa huillarca. Jesús ima nishcata cazushpami paicunaca urcucunapi miticunaman rina carcacuna. Jesuspaj nishcacunata cazujcunaca romanocuna Jerusalenta manaraj tucuchijpimi miticushpa rircacuna. Chashnami paicunapaj causaitaca quishpichi tucurcacuna (Lucas 21:20, 21).

3. ¿Cai yachaipica imacunallamantataj yachashun?

³ Ñucanchijpishmi cai pachapaj ruraicuna tucurina punllacunapi causacunchij. Chaimantami Jesusta punta catijcuna shinallataj alli yuyaiyujcuna, chaparajcuna cana canchij.  Cai yachaipica cai mundohuan ima tucucushcata ricushpapish alli yuyaiyujcuna cana cashcatami yachashun. Ñucanchijcunallataj Diosmanta ama caruyangapaj alli ricurana cashcatapish, tiempotapish ima shina alli aprovechashpa catina cashcatami yachashun.

4. ¿Cai mundopi ima tucucushcataca imamantataj yachana canchij?

⁴ Cai mundopi ima tucucushcata ricushpaca Bibliapaj profeciacuna ima shina pajtaricushcatami cuentata cunchij. Chaimantami maipica noticiacunata, cai mundopi ima tucucushcata yachasha ninchij. Por ejemplo, Jesusca cai millai mundo tucurinapaj ashalla tiempo faltashcata yachachunca cai mundopi ima tucuna cashcatami huillarca (Mateo 24:3-14). Apóstol Pedropish profeciacuna ima shina pajtaricushcata ricuchunmi consejarca. Chashnami ñucanchij feta sinchiyachishun (2 Pedro 1:19-21). Bibliapaj tucuri libropipish caimantami parlan. Chaipica: “Jesucristoca paipaj angelta cachashpami shamuj punllacunapi ima tucunata paita sirvij Juanman señalcunahuan ricuchirca” ninmi (Apocalipsis 1:1). Caicunata intindishpaca ñucanchijpish cai mundopi ima tucucushcata ricushpa Bibliapaj profeciacuna ima shina pajtaricujtami yachasha ninchij. Caimantami hasta huauqui panicunahuanpish parlanata munanchij.

5. ¿Profeciacunamanta parlacui horasca imamantataj cuidadota charina canchij? (Fotomantapish parlapai).

⁵ ¿Profeciacuna pajtaricushcata parlacui horasca imamantataj achca cuidadota charina canchij? Ñucanchijcunaca congregacionpi cajcunata chꞌicanyachinataca mana munanchijchu. Chaimantami ñucanchij ima yuyashcallataca mana nina canchij. Por ejemplo, achca poderta charij gobiernocunaca seguro, tranquilo causaita charingapaj shuj problemata allichinatachari huillan. Pero 1 Tesalonicenses 5:3-pi ima nishca pajtaricushcata yuyanapaj randica cunanlla llujshishca publicacioncunatami alli estudiana canchij. Ñucanchij organización cushca publicacioncunamanta parlashpaca tucuicunami tandalla, shuj yuyailla cashun (1 Corintios 1:10; 4:6).

6. ¿2 Pedro 3:11-13-mantaca imatataj yachanchij?

⁶ (2 Pedro 3:11-13-ta liyipai). Apóstol Pedro quillcashca cartapica profeciacunata alli estudiachunmi yachachin. Shinallataj Jehová Diospaj punlla shamunata shuyashpa chai yuyailla catichunmi animan. ¿Imamantataj Jehová Diospaj punlla shamuna yuyailla cana canchij? Ñucanchijcunaca Jehová Dios Armagedonta ima hora, ima punlla apamugrishcata yachanallataca mana munanchijchu. Ashtahuanpish Diosta tucui shunguhuan adoracushcatapish ruraicunahuan ricuchingapajmi ñucanchij tiempota aprovechasha ninchij (Mateo 24:36; Lucas 12:40). Chaimantami ñucanchijcunaca alli comportarinata mashcanchij. Diosta cꞌuyashcamantapish tucuipi allita rurangapajmi esforzarinchij. Shinapish chaipajca ñucanchijllatajmi imata ruracushcata alli ricurana canchij.

7. ¿Diosmanta ama caruyangapajca imatataj rurana canchij? (Lucas 21:34).

⁷ Jesucristoca cai mundopi ima tucushcata ricuchunllaca mana yachachircachu. Ashtahuanpish paica: “Cancunallataj alli yuyaihuan causaichij” nircami (Lucas 21:34-ta liyipai). ¿Cashna nishpaca Jesusca imatataj yachachisha nirca? Paica alli chaparacuj shina imacunalla Diosmanta caruyachi tucushcata ricurachunmi nirca. Chaicunamanta caruyana  cashcatapishmi yachachisha nirca. Caicunata pajtachishpaca Yayitu Diosmantaca manataj caruyashunchu (Proverbios 22:3; Judas 20, 21).

8. ¿Apóstol Pabloca Diosta sirvijcunamanca imatataj consejarca?

⁸ Apóstol Pabloca Diosta sirvijcunataca: ‘Imata ruracushcamanta cancunallataj ricuraichij’ nircami. Por ejemplo, Efesopi caj huauqui panicunataca: “Yuyai illajcuna shina ama puringapaj alli cuidarichij. Ashtahuanpish alli yuyaiyujcuna shina purichij” nishpami quillcarca (Efesios 5:15, 16). Diabloca tucui laya rurashpami ñucanchijtaca Yayitu Diosmanta caruyachisha nin. Chaimantami Bibliapaj consejocunaca Diospaj munai maijan cashcata alli intindichun animan. Caicunata alli intindishpaca Diablopaj trampacunapica mana urmashunchu (Efesios 5:17).

9. ¿Diospaj munai maijan cashcata yachangapajca imatataj rurana canchij?

⁹ Bibliapica imacunalla Jehová Diosmanta caruyachi tucushcataca mana tucuita callarishpa huillanchu. Chaimantami imacunalla Jehová Diosmanta caruyachi tucushcataca maipica mana jahualla cuentata cunchij. Shinapish chai mana allicunamanta caruyangapajca Diospaj munai maijan cashcatami alli intindina canchij. ¿Diospaj munai maijan cashcata yachangapajca imatataj rurana canchij? Punllantami Bibliata estudiana canchij, imata estudiashcapipish cutin cutinmi yuyana canchij. Chashna Diospaj munaita intindishpaca Jesucristo shinami yuyai callarishun. Bibliapi caita o chaita rurachun nishca ima ley mana tiyajpipish mana allicunamantapishmi caruyashun (1 Corintios 2:14-16).

10. ¿Imacunallataj Yayitu Diosmanta ñucanchijta caruyachi tucun?

¹⁰ Diosta sirvijcunaca caishujhuan chaishujhuan vacilashpa, yallitaj ubyashpa, yallitaj micushpa, llaquichij shimicunata nishpa, mana alli amigocunahuan apanacushpa, macanacuj peliculacunata ricushpa, pornografiata ricushpapish mana purinachu canchij (Salmo 101:3). Diabloca caicunahuanmi Jehová Diosmanta caruyachinata munan (1 Pedro 5:8). Cai mana allicunamanta mana caruyajpica Diabloca shujtajcunata envidiachun, mana honrados cachun, ashtahuan charinata munachun, shujtajcunata pꞌiñachun, jatun tucuchun, resentirishca saquirichunpishmi pandachinga (Gálatas 5:19-21). Cai mana alli yuyaicuna, munaicunaca ñucanchij shungupica venenota charij shuj planta shinami asha asha huiñashpa catinga. Chaimantami caicuna ñucanchij shungupi manaraj huiñajpiraj sapimanta aisaj shina ñucanchij shungumanta caicunata anchuchina canchij (Santiago 1:14, 15).

11. a) ¿Mana urmaipaj laya trampaca maijantaj can? b) ¿Chai trampapi ama urmangapajca imatataj rurana cangui?

¹¹ Mana urmaipaj laya shujtaj trampapi yuyashunchij. Canca mana Testigo caj compañerohuanchari trabajangui. Testigocunamanta allita yuyachunmi paitaca alli, respetohuan tratangui. Huaquinpicarin paihuan micunamanmi ringui. Chai compañeroca mana allicunatami parlai callaringa. Callaripica mana alli sintirishpami chaicunata uyanataca mana munangui. Pero qꞌuipaca ña amañarishpami mana alli cashcata yachashpapish chaicunataca uyanguilla. Qꞌuipacunaca trabajomanta llujshishca huashami imallatapish ubyangapaj canta invitanga. Paihuan rinata decidishpami canca ‘ari’ ningui. Chashna puricushcamantami canca ña pai laya yuyai callaringui. Pero ¿mashna tiempopishi ña pai laya comportari callaringui? Testigocunaca tucuicunatami cꞌuyaihuan, respetohuan tratanchij. Shinapish pihuan yalli apanacushpaca  paicuna layami yuyai callarishun (1 Corintios 15:33). Chaimantami Jesús nishca shinaca alli yuyaihuan causana canchij. Chashna causashpaca Diosta mana sirvijcunahuanca mana achca tiempota pasashunchu (2 Corintios 6:15). Ashtahuanpish llaquipi urmagrijta ricushpaca paicunamantami caruyashun.

12. ¿Jesuspaj discipulocunaca imata rurashpataj tiempota alli aprovecharcacuna?

¹² Jesuspaj discipulocunaca Jerusalén tucuringacamaca mana maqui cruzashca saquirircacunachu. Ashtahuanpish paicunaca Jesús ima mandashcatami pajtachircacuna. Jesusca paicunataca: “Jerusalenpi, tucui Judeapi, Samariapi, cai allpapi tiyaj caru llajtacunapipish ñucamanta huillanguichij” nishpami mandarca (Hechos 1:6-8). Tiempota alli aprovechangapajca paicunaca alli huillaicunata huillanallapimi empeñarina carcacuna.

13. ¿Ñucanchij tiempotaca imamantataj alli aprovechana canchij? (Colosenses 4:5).

¹³ (Colosenses 4:5-ta liyipai). Eclesiastés 9:11-pica: ‘Mana yuyashcapimi ima llaquipish japi tucunlla’ ninmi. Ñucanchijcunaca ima horas ungunata, ima horas huañunataca mana yachanchijchu. Caicunata mana yachashcamantami alli yuyashpa ñucanchij tiempotaca alli aprovechana canchij.

14, 15. ¿Ñucanchij tiempota alli aprovechangapajca imacunallatataj rurana canchij? (Hebreos 6:11, 12) (Fotomantapish parlapai).

 ¹⁴ Cai tucuri punllacuna manaraj tucurijpiraj, huañui manaraj japijpiraj tiempota alli aprovechashunchij. Tiempota alli aprovechangapajca Jehová Diospaj munaitami pajtachina canchij. Paihuan alli apanacungapajpishmi esforzarina canchij (Juan 14:21). Ñucanchijcunaca 1 Corintios 15:58-pi ima nishcatami pajtachina canchij. Chaipica: “Sinchiyarishpa catichij, imapish cuyuchichunca ama saquichijchu. Amitopajta ruranapi siempre ocupado caichij” ninmi. Caicunata pajtachishpaca “Jehová Diospajtaca imata mana rurai tucushcanichu” nishpaca mana llaquirishunchu (Mateo 24:13; Romanos 14:8).

¹⁵ Jesusca pai ari nishcata pajtachicushcamantami Diospaj Gobiernomanta cai tucui Allpapi huillachun ayudacushca. Chaipajca Yayitu Diospaj organizacionhuanmi ima shina predicanata yachachicushca. Predicangapajpish achca herramientacunatami cucushca (Mateo 28:18-20). Chaimantami ñucanchijcunaca cai millai mundo manaraj tucurijpiraj gentecunata predicashpa, predicangapajpish alli prepararishpa, tucuita alli yuyashpa causana canchij. Hebreos 6:11, 12-pi ima nishcata pajtachishpacarin ñucanchij shuyacushca pajtarinataca tucuringacama tucui shunguhuanmi shuyashun (Hebreos 6:11, 12-ta liyipai).

16. ¿Ñucanchijcunaca imata pajtachina munaitataj charina canchij?

¹⁶ Jehová Diosca cai millai mundota ima punlla tucuchinataca ñami agllashcata charin. Chai punlla chayajpica Bibliapi tucui ima nishcatami pajtachinga. Ñucanchijpajca Diospaj punllaca dimastij demoracuj layachari ricurin (Habacuc 2:3). Shinapish chai punllaca manataj uniyangachu. Chaimantami ñucanchijca Miqueas 7:7-pi ima nishcata pajtachina munaihuan cana canchij. Chaipica: “Ñucaca Mandaj Diostami chapasha. Ñucata quishpichij Taita Diostami shuyasha” ninmi.