Bibliapica Jehová Dios shamuj punllacunapi ima tucunata huillai tucushcatami nin (Isaías 45:21). Pero Jehová Dios chaita ima shina ruraj cashcata, ima hora huillaj cashcataca Bibliaca mana huillanchu. Shinallataj shamuj punllacunapi ima tucunamanta imata yachanata, imata mana yachanata Jehová Dios ima shina agllaj cashcataca Bibliaca mana huillanchu. Jehová Dios shamuj punllacunapi ima tucunata ima shina huillaj cashcata ñucanchijcuna mana tucuita intindishpapish ¿paimantaca imatataj yachanchij?

Jehová Diosca tucui poderta charishpapish huaquinpica huaquin cosascunata mana ruranatami agllan. Paica yallitaj yachaisapa cashcamantami shamuj punllacunapi ima tucunataca tucuita huillai tucun (Romanos 11:33). Pero jarcarij cashcamantami shamuj punllacunapi ima tucunamantaca imata yachanata, imata mana yachanata agllai tucun (Isaías 42:​14-ta ricui).

Jehová Diosca paipaj munaitami pajtachin. Paica paipaj munai pajtarichunca shamuj punllacunapi ima tucunatami huillai tucun. Isaías 46:​10-pica: “Ñucami qꞌuipa punlla imalla tucunataca, callarimantapacha tucuita huillani. Ñucaca ñaupa punllamantatajmi qꞌuipa punllapi ñuca imata ruragrishpaca manaraj chaita rurashpa huillani. Cashnami nini: Ñuca imalla rurana tucushcaca ruraricungallami. Ñuca imallatami rurasha nircani chaitaca rurashatajmi” ninmi.

Jehová Diosca pai rurasha nishcacuna pajtarichun poderta charishcamantami shamuj punllacunapi ima tucunata huillai tucun. Caipi yuyashun. Shuj película ima shina tucurinata yachasha nishpaca huaquinpica tucuri partellatami ricunchij. Pero Jehová Diosca shuj peliculapaj tucuri partellata ricucuj shina shamuj punllacunapi ima tucunataca mana huillanchu. Ashtahuanpish paica shuj punlla ima tucunata huillashca qꞌuipaca ¿imatataj ruran? Chai punlla chayajpica paipaj nishcacuna pajtarichunmi tucuita rurai tucun (Éxodo 9:​5, 6; Mateo 24:36; Hechos 17:31).

Jehová Diosca shamuj punllacunapi ima tucunata chashna huillaj cashcamantami “ñuca imalla yuyarishcataca chaitatajmi rurasha” nin (2 Rey 19:25; Isaías 46:11). Hebreo rimaipica Isaías 46:​11-pica, ‘allpa mangata ruraj shinami ñuca imalla yuyarishcataca rurasha’ ninmi (Jeremías 18:4). Ima shinami shuj runaca allpata japishpa pai munashca mangata rurai tucun, Jehová Diosca shamuj punllacunapi paipaj munai pajtarichunmi tucuita rurai tucun (Efesios 1:11).

Jehová Diosca ñucanchijllataj imata ruranata decidichunmi saquin. Paica cada unohuan ima tucunataca mana huillashcachu. Shinallataj alli gentecunataca millai ruraicunata rurachishpa llaquipica mana urmachinchu. Chaipaj randica cada uno ima shina causanata agllachunmi saquin. Ashtahuanpish alli yuyashpa imatapish decidichunmi animan.

Por ejemplo, Ninivepi causajcunahuan ima tucushcata ricushun. Chaipi causajcuna millaita rurashpa causajcuna cashcamantami Jehová Diosca tucuicuna tucuchishca canata huillarca. Pero paicuna arrepintirijpimi Yaya Diosca “paicunata llaquichisha nishca cashpapish mana llaquichirca” (Jonás 3:​1-10). ¿Yaya Diosca imamantataj paipaj yuyaita cambiarca? Ninivepi causajcuna arrepintirishcamantami Jehová Diosca paipaj yuyaita cambiarca.

Shinallataj Jehová Diosca Ciro shuti soldado israelitacunata quishpichishpa Diospaj huasita cutin shayachichun mandanatami huillarca (Isaías 44:26–45:4). Cai nishcaca Persia llajtata mandaj Ciropimi pajtarirca (Esdras 1:​1-4). Shinapish mandaj Ciroca Jehová Diostaca mana adorarcachu. Jehová Dios paipaj nishcacunata pajtachichun cai runata utilizashpapish paita sirvichunca mana obligarcachu (Proverbios 21:1).

Caipi ricushca shinaca Jehová Diosca shamuj punllacunapi ima tucunamanta imata yachanata, imata mana yachanataca alli yuyashpami agllan. Pero ñucanchijcunaca Jehová Dios ima shina yuyaj cashcata, huaquin cosascunata ima shina ruraj cashcataca mana tucuita intindi tucunchijchu. Shamuj punllacunapi imalla tucunata ima shina huillaj cashcatapish mana tucuita yachanchijchu (Isaías 55:​8, 9). Pero mana tucuita intindishpapish, Jehová Dios shamuj punllacunapi imalla tucunata huillajpi siempre allita ruraj cashcatami seguros canchij.