1. ¿Imamantataj Jehová Dios ñucanchijta ayudachun minishtinchij? Shuj ejemplota churashpa parlai.

 SACHAPI puricushpa chingarishcata yuyai. Chaipica pꞌiñaj animalcuna, venenota charij plantacuna, tucui laya chuspicunami tiyan. Shinallataj chaita puricushpaca hasta shuj jutcupimi huashicui tucungui. ¿Pero chai sachata alli rijsij runa maita purinata ricuchijpica ima shinataj sintiringuiman? Seguramente tranquilomi sintiringuiman ¿nachu? Cai millai mundoca chai jatun sacha shinami can ¿Imamanta? Cai mundopica Diosmanta caruyachij tucui laya trampacunami tiyan. Pero ama llaquipi urmachunca Jehová Diosmi maita purina cashcata ricuchin. Pai ayudajllapimi paraisopi huiñai huiñaita causai tucushun.

2. ¿Jehová Diosca mai ñanta purina cashcataca ima shinataj ricuchin?

² ¿Jehová Diosca mai ñanta purina cashcataca ima shinataj ricuchin? Paica Bibliapimi ima shina causana cashcata yachachin. Shinallataj ñucanchijta ñaupajman pushachunca huaquin cꞌaricunatapishmi agllashca. Por ejemplo, paimanta yachachishpa catichunca “alli cazuj, alli yuyaiyuj” sirvijtami agllashca. Chashnami ñucanchijcunaca alli decisioncunata japi tucunchij (Mateo 24:45). Pero Jehová Diosca shujtaj cꞌaricunatapishmi ñucanchijta ñaupajman pushachun agllashca. Por ejemplo, superintendente de circuito huauquicuna, congregacionta pushaj anciano huauquicunami animota cushpa, sumaj consejocunata cushpa llaquicunata ahuantachun ayudan. Jehová Dios chai huauquicunata utilizashpa cai llaqui punllacunapi ñucanchijta ayudacushcamantami achcata agradicinchij. Cai huauquicunapaj ayudahuanmi Jehová Diospajman ashtahuan cꞌuchuyai tucunchij. Huiñai causaiman apaj ñanpipishmi purishpa catinchij.

3. ¿Cai yachaipica imatataj yachashun?

³ Jehová Dios juchayuj runacunata utilizashpa ñucanchijman mandashcacunata cujpica chai mandashcacunata cazunaca sinchimi cai tucun. ¿Imamanta? Tal vez Jehová Dios churashca  pushajcunaca ñucanchij mana munashca mandashcacunatami cungacuna. Shinallataj pushaj huauquicunapaj consejocuna mana valishca cashcata yuyashpaca chai consejocuna Jehová Diosmanta mana shamushcatami yuyashun. Pero chashna yuyacushpaca Jehová Dios chai huauquicunata utilizashpa ñucanchijta ñaupajman pushacushcatami yuyarina canchij. Chashnami chai huauquicunapaj nishcacunataca mana pꞌiñarishpa cazushun. Pushaj huauquicunapi confiangapajca cai yachaipica quimsa tapuicunatami cutichishun: 1) ¿Jehová Diosca ñaupa punllacunapica paipaj pueblotaca ima shinataj pusharca? 2) ¿Jehová Diosca cunan punllacunapipish ima shinataj ñucanchijta pushacun? y 3) ¿Jehová Dios churashca pushajcunata cazushpaca ima shinataj causashun?

JEHOVÁ DIOSCA ISRAELITACUNATACA ¿IMA SHINATAJ PUSHARCA?

4, 5. ¿Jehová Diosca paipaj pueblota pushachun Moisesta agllashcataca ima shinataj ricuchirca? (Fotomantapish parlapai).

⁴ Jehová Diosca israelitacunata Egiptomanta llujshichichunca Moisestami agllarca. ¿Israelitacuna Jehová Dios Moiseshuan cashcata ricuchingapajca Jehová Diosca imatataj rurarca? Israelitacunaca punllapica shayacuj jatun pꞌuyuhuan, tutaca jatun lunyacuj ninahuan achijyachishpa Jehová Dios paicunata pushacushcatami ricurcacuna (Éxodo 13:21). Moisesca chaita catishpami Israelitacunahuan Puca cuchaman chayarca. Pero chaiman chayashpaca Egipto soldadocuna paicunata huañuchinata yuyashpami israelitacunaca yallitaj mancharircacuna. Paicunaca Moisés paicunata chaiman pushashpa pandarishcatami yuyarcacuna. Pero Moisesca mana pandarishcachu carca. Jehovami israelitacunata chaiman pushachun Moisesman nishca carca (Éxodo 14:2). Chai qꞌuipaca Jehová Diosca shuj milagrota rurashpami israelitacunata quishpichirca (Éxodo 14:​26-28).

⁵ Moisesca chaquishca pambapi israelitacunata pushangapajca 40 huatacunatami chai jatun pꞌuyuta catirca. a Huaquinpica Jehová Diosca jatun pꞌuyutaca Moisespaj carpa jahuapimi shayachij carca. Chashnami tucuicuna chai pꞌuyutaca ricui tucurcacuna (Éxodo 33:​7, 9, 10). Jehová Diosca chai pꞌuyumantami Moiseshuan parlanacuj carca. Chai qꞌuipaca Moisesca Jehová Dios imalla nishcacunatami israelitacunaman huillaj carca (Salmo 99:7). Shinashpaca israelitacunaca Moisés Jehová Dios churashca pushaj cashcataca segurosmi carcacuna.

6. ¿Israelitacunaca Jehová Dios churashca pushajtaca ima shinataj tratarcacuna? (Números 14:​2, 10, 11).

⁶ Casi tucui israelitacunami Jehová Dios paicunata pushachun Moisesta churashcataca mana crircacuna. Chaimi Moisestaca mana cazusha nircacuna (Números 14:​2, 10, 11-ta liyipai). Moisés Jehová Dios churashca pushaj cashcata mana crishcamantami Jehová Diosca pai cusha nishca allpaman yaicuchunca mana saquirca (Números 14:30).

7. ¿Picunataj Jehová Diostaca tucuipi cazurcacuna? (Números 14:24; fotomantapish parlapai).

⁷ Shinapish huaquin israelitacunaca Jehová Diostami tucuipi cazurcacuna. Por ejemplo, Jehová Diosca: ‘Calebca ñucataca tucui shunguhuanmi cazurca’ nircami (Números 14:​24-ta liyipai). Caleb cazushcamantami Jehová Diosca paitaca achcata bendiciarca. Shinallataj Canaán llajtapi maipi causanata paillataj agllachunmi saquirca (Josué 14:​12-14). Calebpish shujtaj israelitacunapish Jehová Diosta cazushcamantami pai cusha nishca allpaman yaicui tucurcacuna (Josué 21:​43, 44). Jehová Diosca Moisespaj randi israelitacunata pushachunca Josuetami agllarca (Josué 4:14). Calebpish shujtaj israelitacunapish Josuetaca ‘paipaj tucui causaipimi respetarcacuna’.

8. ¿Reycuna mandacui punllacunapica Jehová Diosca paipaj pueblotaca ima shinataj pusharca? (Fotomantapish parlapai).

 ⁸ Huaquin huatacuna qꞌuipaca Jehová Diosca israelitacunata pushachunca juezcunatami churarca. Cutin reycuna mandacui punllacunapica Jehová Diosca israelitacunata pushashpa catichunca profetacunatami churarca. Jehová Diosta cazuj reycunaca profetacunapaj consejocunataca allimi chasquircacuna. Por ejemplo, rey Davidca profeta Natán cunashcataca allimi chasquirca (2 Samuel 12:​7, 13; 1 Crónicas 17:​3, 4). Rey Jehosafatpishmi profeta Jahaziel nishcata cazurca. Judá llajtapi causajcunatapish Jehová Dios cachashca profetacunapi confiachunmi animarca (2 Crónicas 20:​14, 15, 20). Shinallataj llaqui punllacunapica rey Ezequiasca profeta Isaiaspaj ayudatami mashcarca (Isaías 37:​1-6). Reycuna Jehová Diospaj mandashcacunata cazujpica Jehová Diosca paicunatami bendiciarca, tucui israelitacunatapish cuidarca (2 Crónicas 20:​29, 30; 32:22). Shinashpaca israelitacunaca Jehová Dios profetacunata utilizashpa paicunata ñaupajman pushacushcatami alli yacharcacuna. Pero chaita alli intindishpapish casi tucui reycuna, israelitacunaca profetacuna nishcacunataca mana cazurcacunachu (Jeremías 35:​12-15).

¿JEHOVÁ DIOSCA JESUSTA PUNTA CATIJCUNATACA IMA SHINATAJ PUSHARCA?

9. ¿Jehová Diosca Jesusta punta catijcunataca ima shinataj pusharca? (Fotomantapish parlapai).

⁹ Huata 33-pica Jesusta catijcunaca Diospaj pueblomi tucurcacuna. Chai punllacunapica Jehová Diosca tucui congregacioncunapaj pushaj cachunca Jesustami churarca (Efesios 5:23). Pero Jesusca cada huauquiman cada paniman ima shina causana cashcataca mana nircachu. Chaipaj randica Jesusca apostolcunata, Jerusalenpi caj ancianocunata utilizashpami Diospaj pueblota ñaupajman pusharca (Hechos 15:​1, 2). Shinallataj cada congregacionpi caj huauqui panicunata ñaupajman pushachunca ancianocunatami nombrajcuna carca (1 Tesalonicenses 5:12; Tito 1:5).

10. a) ¿Primer siglopi causaj huauqui panicunaca pushaj huauquicunapaj mandashcacunataca ima shinataj chasquircacuna? (Hechos 15:​30, 31). b) ¿Ñaupa punllacunapica imamantataj maijancunaca Dios churashca pushajcunataca mana cazusha nircacuna? (“ Dios churashca pushajcunataca imamantataj maijancunaca mana cazusha nincuna” nishca recuadrota ricui).

¹⁰ ¿Primer siglopi Diosta sirvijcunaca congregacionta pushaj huauquicuna cushca mandashcacunataca ima shinataj chasquircacuna? Casi tucuicunami chai mandashcacunataca alli chasquircacuna. Pushaj huauquicuna sumaj shimicunahuan  animashcamantami paicunaca achcata cushicurcacuna (Hechos 15:​30, 31-ta liyipai). Pero ¿cunan punllacunapica Jehová Diosca paipaj pueblotaca ima shinataj ñaupajman pushacun?

¿DIOSCA CUNAN PUNLLACUNAPICA PAIPAJ PUEBLOTACA IMA SHINATAJ PUSHACUN?

11. ¿Cai tucuri punllacunapica Yaya Diosca paipaj pueblotaca ima shinataj pushacushca? (Shuj ejemplota churashpa parlai).

¹¹ Cunan punllacunapica Jehová Diosca paipaj Shimihuan, pai churashca pushajhuanmi ñucanchijtaca pushacun. Jesusmi tucui congregacioncunapaj pushaj can. Pero ¿Jehová Diosca ñucanchijta pushachunca runacunatapishchu churashca? Ari. Por ejemplo, más o menos 1870 huatapi ima tucushcata yuyarishun. Chai huatacunapica huauqui Charles Russellpish, paita apoyajcunapish 1914 huatapi Diospaj Reino mandai callarigrishcatami intindircacuna (Daniel 4:​25, 26). Chaita intindingapajca paicunaca Bibliapi tiyaj profeciacunatami alli estudiarcacuna. Chai profeciacuna ima shina pajtarinata intindichunca Jehovami paicunataca ayudarca. 1914 huatapi imalla tucushcacunaca Diospaj Reino mandai callarishcatami ricuchirca. Chai huatapica Primera Guerra Mundialmi callarirca. Shinallataj achca ungüicuna, terremotocuna, yaricaicunami tiyai callarirca (Lucas 21:​10, 11). Huauqui Russell, paita apoyajcuna intindishca shina Bibliapi tiyaj profeciacuna pajtarijpica Jehová Dios paipaj pueblota pushachun paicunata agllashcatami tucuicuna ricurcacuna.

12, 13. ¿Segunda Guerra Mundial punllacunapi pushaj huauquicunaca huillashpa catingapajca imatataj rurarcacuna?

¹² Segunda Guerra Mundialpi ima tucushcata yuyarishunchij. Central Mundialta pushaj huauquicunaca Apocalipsis 17:​8-pi nishcata intindishpaca Segunda Guerra Mundial qꞌuipalla Armagedón mana shamuna cashcatami cuentata curcacuna. Ashtahuanpish Armagedón manaraj shamujpi Diosmanta ashtahuan gentecunaman huillangapaj tiempo tiyagrishcatami intindircacuna. Chaimantami pushaj huauquicunaca maijancuna mana intindishca desicionta japircacuna. Paicunaca Colegio Superior Bíblico de la Watchtower de Galaad nishca escuelatami callarichircacuna. Cunanca chai escuelaca Escuela Bíblica de Galaad de la Watchtower nishcami can. Chai escuelaca achca huauqui panicuna misionerocuna tucushpa shujtaj llajtacunapi huillagrichunmi ayudarca. Chaimi Segunda Guerra Mundial manaraj tucurijpipish achca huauqui panicunataca misionerocuna  shina sirvichun shujtaj llajtacunaman cacharcacuna. Shinallataj pushaj huauquicunaca Curso en el Ministerio Teocrático nishca escuelatami callarichircacuna. b Chai escuelapimi huauqui panicunaca alli yachachijcuna canata yacharcacuna.

¹³ Jehová Diosca sinchi punllacunapipishmi paipaj pueblota ñaupajman pushashpa catirca. Segunda Guerra Mundial tucurishca qꞌuipaca huauqui panicunaca achca llajtacunapimi huillai callarircacuna. Chashnami achca gentecuna Jehová Diosmanta yachai pudircacuna. Cunancarin muyundij allpapimi Jehová Diosmanta yachachinchij.

14. ¿Jehová Dios churashca pushajcunapica imamantataj confiana canchij? (Apocalipsis 2:1; fotomantapish parlapai).

¹⁴ Cuerpo Gobernantepi caj huauquicunaca Jesuspaj ayudatami mashcashpa catincuna. Paicunaca Jehová Dios, Jesús munashca shina huauqui panicunaman instruccioncunata cungapajmi esforzarincuna. Paicuna cushca instruccioncunata huauqui panicunaman huillachunca superintendente de circuito huauquicunata, anciano huauquicunatami churashcacuna. c Ungido ancianocunapish, mana ungido ancianocunapish Jesuspaj “alli maquipimi can” (Apocalipsis 2:​1-ta liyipai). Anciano huauquicunaca Moisés shina, Josué shina, apostolcuna shinami juchayujcuna can. Chaimantami maipica pandari tucuncuna (Números 20:12; Josué 9:​14, 15; Romanos 3:23). Pero, Cuerpo Gobernantepi caj huauquicuna, anciano huauquicuna juchayujcuna cajpipish Jesusca alli pushajcuna cachunmi paicunataca ayudan. Paica ‘cai pachapaj ruraicuna tucuringacamami tucui punllacuna paicunahuan canga’ (Mateo 28:20). Chaimanta Jehová Dios churashca pushajcunapi confiashpa catishunchij.

JEHOVÁ DIOSTA CAZUSHPACA CUSHILLAMI CAUSASHUN

15, 16. ¿Jehová Diosta punta lugarpi churaj huauqui panicunamantaca imatataj yachanchij?

¹⁵ Jehová Diosta tucuipi cazushpaca cunan punllacunapica cushillami causashun. Por ejemplo, huauqui Andy y paipaj huarmi Robynca minishtirishcallahuan causanatami decidircacuna (Hebreos 13:5). Chaita rurashcamantami paicunaca tandanacuna huasicunata shayachishpa ayudai tucurcacuna. Pani Robynca: “Jehová Diosta ashtahuan sirvingapajmi huaquinpica uchilla huasicunapi causashcanchij. Chaipica yanungapaj shuj cocinallatapish mana charircanchijchu. Shinallataj ñucaca fotocunata llujchinatami achcata munani. Pero casi tucui ñuca charishca camaracunata, aparatocunatami cꞌaturcani. Chaita rurashcamantami huacarcani.  Pero Sarapaj ejemplotami catisha nircani. Paica huashaman imata saquishcata mana yuyarishpami ñaupajman catirca” nircami (Hebreos 11:15). Cai cusa huarmica achca sacrificiocunata rurashcamantami cushilla sintirincuna. Pani Robynca: “Jehová Diosta tucui shunguhuan sirvicushcamantami cushilla sintirinchij. Diospajta ruracushpaca Paraisopi causana ima shinata canatami yuyarinchij” nircami. Cutin, huauqui Andyca: “Diospaj Gobiernota apoyangapaj sinchita esforzaricushcamantami cushilla sintirinchij” nircami.

¹⁶ Jehová Diosta tucuipi cazushpaca shujtaj bendicioncunatapishmi chasquishun. Por ejemplo, pani Marciataca colegiota tucuchishca qꞌuipa precursora shina sirvichunmi animarcacuna (Mateo 6:33; Romanos 12:11). Paica: “Universidadpi chuscu huatacunata estudiachunmi shuj becata cusha nircacuna. Pero ñucaca Jehová Diospajta ruranapimi ocuparisha nircani. Chaimi shuj oficiota yachangapaj shuj cursota japircani. Chai decisionta japinaca ñucapajca allimi carca. Cunanca precursora regularmi cani. Shinallataj medio tiempo trabajacushcamantami Betelpi voluntaria shina ayudangapaj, shujtaj sumaj asignacioncunatapish pajtachingapaj tiempota charini” nircami.

17. ¿Jehová Diosta tucuipi cazushpaca ima shinataj causashun? (Isaías 48:​17, 18).

¹⁷ Diospaj organizacionta pushaj huauquicunaca cullqui yuyailla ama causachun, jatun llaquicunapi ama urmachunmi sumaj consejocunata cun. Chai consejocunata cazushpaca ñucanchij concienciapica tranquilomi sintirishun. Jatun llaquicunapipish mana urmashunchu (1 Timoteo 6:​9, 10). Shinallataj pushaj huauquicunata cazushpaca Diospajta ruranapimi ashtahuan ocupari tucushun. Yayitu Diosta sirvinami sumaj causaita cun (Isaías 48:​17, 18-ta liyipai).

18. ¿Canca imamantataj Jehová Diosta cazusha ningui?

¹⁸ Jatun llaqui punllacunapi, shinallataj Jesús cai Allpata mil huatacunata mandacujpipish Jehová Diosca ñucanchijta ñaupajman pushachunca pushaj huauquicunatami churanga (Salmo 45:16). Chai punllacunapi ñucanchij yuyashca shina imatapish ruranapaj randica ¿pushaj huauquicunatachu cazushun? Cunanmanta cazujcuna cangapaj esforzarishpaca shamuj punllacunapi pushaj huauquicunata cazunaca jahuallami canga. Chaimanta Jehová Diosta, pai churashca pushajcunata shungumanta cazushpa catishunchij (Isaías 32:​1, 2; Hebreos 13:17). Cunanca imamanta Jehová Diospi confiana cashcataca allimi intindinchij. Paica llaquicunapi urmachunca mana munanchu. Ashtahuanpish Paraisopi huiñai huiñaita cushilla causachunmi munan.