1, 2. ¿Adanca ima herenciatataj ñucanchijcunamanca saquirca? Shuj ejemplota churashpa parlai.

 CULLQUIYUJ yaya mamata charij jovenpi yuyai. Shuj accidentepi paipaj yaya mama huañushcamantami paica achcata llaquirin. Pero qꞌuipaca paipaj yaya mama tucui paicuna charishca cullquita yangamanta gastashcatami yachaj chayan. Ashtahuanpish paicunaca achca dibicunatami charircacuna. Chaimantami chai jovenca achca cullquihuan saquirinapaj randica achca dibicunahuan saquirin. Ashtahuanpish gentecunaca dibicunata utca pagachunmi nin. Shinapish chai jovenca achca dibi cashcamantami mana pagai tucun.

² Ñucanchijpish chai joven shinallatajmi canchij. Ñucanchij punta yaya mamaca jucha illajcunami carca (Génesis 1:27; 2:​7-9). Paicunaca paraisopica huiñai huiñaita cushilla causana oportunidadtami charircacuna. Pero Jehová Diosta mana cazushcamantami juchayujcuna tucurcacuna. ¿Chaimanta paicunapaj huahua huahuacunamanca ima herenciatataj saquircacuna? Bibliapica: “Shuj runallamantami juchaca cai pachaman yaicurca. Chai juchamantami huañuipish yaicurca. Chashnami tucuicuna juchayuj cashcamanta huañuica tucuicunata japirca” ninmi (Romanos 5:12). Shinaca Adanca juchatami shuj herenciata shina tucuicunaman saquirca. Chaimantami tucuicuna huañunchij. Juchaca pi mana pagai tucuj jatun dibi shinami can (Salmo 49:8).

 3. ¿Bibliapica imamantataj juchacunaca dibicuna shina cashcata nin?

³ Jesusca juchacunaca ‘dibicuna’ shina cashcatami nirca (Mateo 18:​32-35). Chaimantami ima juchata rurashpaca Jehová Dioshuan dibiyashca shina can. Chai dibita perdonangapaj Jehová Dios imata mana rurashca cajpica huañuillahuanmi  chai dibitaca pagai tucunchijman (Romanos 6:​7, 23).

 4. a) ¿Jehová Dios ñucanchijta ayudachunca imamantataj minishtircanchij? (Salmo 49:​7-9). b) ¿Bibliapica juchamanta parlashpaca imallamantataj parlan? (“ ¿Juchaca imataj can?” nishca recuadrota ricui).

⁴ Adán y Eva imata chingachishcata cutin charingapaj ñucanchijllaca imata mana rurai tucunchijchu (Salmo 49:​7-9-ta liyipai). Jehová Dios ñucanchijta mana ayudashca cajpica huiñaita causana, cutin causarina esperanzatapish mana chari tucunchijmanchu carca. Ashtahuanpish animalitocuna shinami huañunchijman carca (Eclesiastés 3:19; 2 Pedro 2:12).

 5. ¿Jehová Diosca ñucanchij dibitaca ima shinataj pagarca? (fotomantapish parlapai).

⁵ Párrafo 1-pi parlashca jovenpi yuyashunchij. ¿Shuj charij runa tucui paipaj dibicunata pagasha nijpica chai jovenca ima shinataj sintirinman? Seguramente paica pagui nishpami tucui paipaj dibicunata pagachun saquinman. Yayitu Jehová Diosca chai charij runa shinami can. Paica Adán ñucanchijman saquishca dibitami pagasha nin. Chaimi Jesusca: “Diosca cai pachapi causajcunata yallitaj cꞌuyashpami paipaj shujlla Churita curca. Maijanpish paipi feta charijca ama chingarichun, ashtahuanpish huiñai causaita charichunmi curca” nirca (Juan 3:16). Jesús huañushcamantami ñucanchijcunaca Jehová Dioshuanca alli apanacui tucunchij.

 6. ¿Cai yachaipica imatataj yachashun?

⁶ Caipi ricushca shinaca Jehová Dios paipaj Churita cushcamantami ñucanchij juchacunamanta quishpichishca cai tucunchij. Pero ¿Jehová Dios ñucanchijta perdonachunca imatataj rurana canchij? Chaita yachangapajca cai yachaipica Jehová Dios ñucanchijta perdonangapaj tucui imallata rurashcatami yachashun. Chaita intindishpami Jehová Dios ñucanchijta perdonashcamanta ashtahuan agradicisha nishun.

JEHOVÁ DIOSCA CUTINMI ÑUCANCHIJHUAN ALLI APANACUSHA NIN

 7. a) ¿Adán y Evaca imatataj pirdircacuna? b) ¿Romanos 5:​10, 11-pica imatataj yachachin?

⁷ Ñajaman nishca shinaca Adán y Evaca huiñaita causana oportunidadtami pirdircacuna. Shinallataj Jehová Dioshuan alli apanacuna oportunidadtapishmi pirdircacuna. Juchata manaraj rurashpaca paicunaca Jehová Diospaj familia ucupimi carcacuna (Lucas 3:38). Pero Jehová Diosta mana cazushpaca paipaj familia canatami saquircacuna. Paicuna huahuacunata manaraj charijpimi chashna tucurca (Génesis 3:​23, 24; 4:1). Adanpaj huahuacuna cashcamantami ñucanchijca Jehová Dioshuan cutin alli tucuna canchij (Romanos 5:​10, 11-ta liyipai). Shuj libropi nishca shinaca griego rimaipi “Jehová Dioshuan  cutin alli apanacuna” nishpaca “shuj enemigohuan amigo tucunatami” nin. Pero Jehová Diosrajmi ñucanchijcunahuan cutin alli apanacunata mashcarca. ¿Chaitaca ima shinataj rurarca?

JEHOVÁ DIOSCA PAIHUAN CUTIN ALLI APANACUCHUNMI TUCUITA RURARCA

 8. ¿Jehová Diosca gentecuna cutin paihuan alli apanacuchunca imatataj rurarca?

⁸ Jehová Diosca juchayuj gentecuna cutin paihuan alli apanacuchunca tucuitami rurarca. Adán Jehová Diosmanta caruyashpaca valishca cosascunata chingachishca shinami carca. Chaimi Jehová Diosca ñucanchijcuna Adán chingachishcata cutin charichunca chai valorllatataj charij cosascunahuan pagarca. Mushuj Testamentopi chaimanta parlashpaca Jehová Dios ñucanchijcunahuan alli tucungapaj tucuita rurashcatami nin (Romanos 3:25).

 9. ¿Israelitacunapaj juchacunata perdonangapajca Jehová Diosca imatataj rurarca?

⁹ Israelitacunapaj punllacunapi Jehová Dios paicunapaj juchacunata perdonangapaj, paicuna paihuan alli apanacuchun ayudangapaj imata rurashcata ricushun. Israelitacunaca huatapica shuj cutinmi shuj fiestata rurajcuna carca. Chai fiestaca Juchacunata perdonana punllami carca. Chai punllapica sacerdotecunata jatun mandajca israelitacunapaj juchacuna perdonashca cachunmi animalcunataca sacrificiota shina cuj carca. Pero gentecunaca chai animalcunata yalli valishcami can. Chaimantami chai sacrificiocunaca israelitacunapaj tucui juchacunata por completo perdonangapajca mana valirca. Chashna cajpipish israelitacuna arrepintirishpa, pai munashca sacrificiocunata cujpica Jehová Diosca paicunata perdonangapajmi listo carca (Hebreos 10:​1-4). Juchacunata perdonana punllapi, shujtaj punllacunapipish israelitacuna sacrificiocunata cushpaca juchayujcuna cashcatami yuyarijcuna carca. Shinallataj paicunapaj juchacuna huiñai huiñaipaj perdonashca cachun shujtaj sacrificiota minishtishcatapishmi yuyarijcuna carca.

10. ¿Jehová Diosca gentecunapaj juchacunata perdonangapajca imatataj rurarca?

¹⁰ ¿Jehová Diosca gentecunapaj juchacunata perdonangapajca imatataj rurarca? Paica ‘achcacunapaj juchacunata apashpa shuj cutinlla curichunmi’ paipaj Churita cai Allpaman cacharca (Hebreos 9:28). Shinashpaca Jesusca paipaj causaita cushpa achcacunata randishpa quishpichingapajmi shamurca (Mateo 20:28). Chaita ima shina rurashcata ricushun.

JEHOVÁ DIOSCA ÑUCANCHIJTA RANDISHPAMI QUISHPICHIRCA

11. a) ¿Jehová Diosca ñucanchijta quishpichingapajca imatataj rurana carca? b) ¿Shuj runa ñucanchijmanta paipaj causaita cungapajca ima shinataj cana carca?

¹¹ Bibliapi nishca shinaca ñucanchij juchacuna perdonashca cachun, shinallataj Jehová Diospaj amigocuna cutin cai tucuchunmi paica shuj preciota paganata decidirca. ¿Pero Adán chingachishcata gentecuna cutin charichunca Jehová Diosca mashnatataj pagana carca? Adán y Evaca jucha illajcuna shina huiñai huiñaita causana oportunidadtami chingachircacuna. Gentecuna cutin chai oportunidadta charichunca Jehová Diosca mashna minishtirishcatami pagana carca (1 Timoteo 2:6). Shuj runa chai preciota pagangapajca jucha illajmi cana carca. Shinallataj cai Allpapi huiñai huiñaita causana oportunidadtami charina carca. Gentecunamanta paipaj causaita sacrificiota shina cuna munaitapishmi charina carca. Chashna causaita charij runallami sacrificiota shina curi tucurca.

12. ¿Jesusca imamantataj ñucanchijta randishpa quishpichi tucurca?

¹² ¿Jesusca imamantataj ñucanchijta randishpa quishpichi tucurca? 1) Paica jucha  illajmi carca, ‘ima juchatapish mana rurarcachu’. 2) Chaimantami paica cai Allpapi huiñai huiñaita causana oportunidadta charirca. 3) Ñucanchijmanta huañushpa paipaj causaita cunatapishmi munarca (1 Pedro 2:22; Hebreos 10:​9, 10). Jesusca Adán shina jucha illajmi carca (1 Corintios 15:45). Chaimantami Adán chingachishca oportunidadta gentecuna cutin charichun ayudai tucurca (Romanos 5:19). Chashnami “último Adán” tucurca. Paica gentecunata “huiñaicama” ayudangapajmi shuj cutinlla sacrificiota shina curirca (Hebreos 7:27; 10:12). Chaimantami shujtaj jucha illaj runa ñucanchij juchacunamanta huañuchunca ña mana minishtirin.

13. ¿Jehová Diosca paihuan alli apanacuchunca imatataj rurarca?

¹³ ¿Jehová Dioshuanca imamantataj alli apanacui tucunchij? Paica ñucanchij juchacuna perdonashca cachunmi imata ruranata alli yuyarca. Chaimantami paipaj Churipaj causaita curca. Jesusca mashnata pagana cashcata pagaj shinami paipaj jucha illaj causaita cushpa ñucanchijta randishpa quishpichirca (Efesios 1:7; Hebreos 9:14).

¿IMA BENDICIONCUNALLATATAJ CHASQUINCHIJ?

14. ¿Cunanca imatataj yachagrinchij? ¿Imamantataj chaita yachagrinchij?

¹⁴ ¿Jehová Dios paipaj Churita cushcamantaca ima bendicioncunallatataj chasquinchij? Bibliapi nishca shinaca ishqui bendicioncunatami chasquinchij. Cunanmi chaicunamanta yachashun. Chashnami Jehová Dios ñucanchijta perdonangapaj imallata rurashcata ashtahuan valorashun.

15, 16. a) ¿Jesús huañushcamantaca ima bendiciontataj chasquishcanchij? b) ¿Juchamanta, huañuimanta cacharichishca cashcata yachashpaca ima shinataj sintirinchij?

¹⁵ Bibliapi nishca shinaca Jesús paipaj causaita cushpa ñucanchijta randishcamantami juchamanta cacharichishca canchij. Apóstol Pedroca: “Cancunapaj ñaupa yayacuna saquishca yanga causaimantaca chingarijlla cullquihuan, chingarijlla orohuanca mana cacharichishca o randishca carcanguichijchu. Chaitaca yachanguichijmi. Ashtahuanpish achcata valij Cristopaj yahuarhuanmi cacharichishca carcanguichij. Cai yahuarca sano, ima mapa illajlla malta ovejapaj yahuar shinami can” nircami (1 Pedro 1:​18, 19; nota).

¹⁶ Juchamanta, huañuimantaca achcatami sufrinchij. Pero Jesús paipaj causaita cushcamantami chaicunamanta quishpichishca canchij (Romanos 5:21). Jesús paipaj sumaj yahuarhuan ñucanchijta quishpichishcamantami paitapish, Jehová Diostapish achcata agradicinchij (1 Corintios 15:22).

17, 18. a) ¿Bibliapi “Diospaj ñaupajpi cashcata rurajcuna shinami ricurishun” nishpaca imatataj nisha nin? b) ¿Diospaj ñaupajpi cashcata rurajcuna shina ricurishcamantaca ima bendicioncunatataj charinchij?

¹⁷ Bibliapi nishca shinaca Jehová Diosta sirvijcunaca cashcata rurajcuna shinami paipaj ñaupajpi ricurincuna. ¿Chaica imatataj nisha nin? Jehová Diosca ñucanchij juchacunamanta pagachunca ña mana mañanchu. Pero ¿Jehová Diosca paipaj mandashcacunata ladoman saquishpachu chaita ruran? Mana. Jehová Diosca juchataca manataj ricunachinchu. Shinallataj paica ñucanchijcuna allita rurashcallamantaca mana cashcata rurajcunata shinachu ricun. Ashtahuanpish paipish, Jesuspish ñucanchijta quishpichingapaj tucui imalla rurashcata crijpimi Jehová Diosca ñucanchij juchacunata perdonan (Romanos 3:24; Gálatas 2:16).

¹⁸ ¿Jehová Diospaj ñaupajpi cashcata rurajcuna shina ricurishcamantaca ima bendicioncunatataj charinchij? Maijancunaca jahua pachapi Jesushuan mandangapajmi agllashca  cashcacuna. Paicunaca Jehová Diospaj huahuacunami tucushcacuna (Tito 3:7; 1 Juan 3:1). Paicunapaj juchacunamanta perdonashca cashcamantami chai juchacunata nunca mana rurashca shina can. Chaimantami paicunaca Diospaj Gobiernopi mandai tucuncuna (Romanos 8:​1, 2, 30). Cutin shujtajcunaca cai Allpapi huiñaita causana esperanzatami charincuna. Paicunaca Jehová Diospaj amigocunami tucushcacuna. Paicunapaj juchacunamantapishmi perdonashca cashcacuna (Santiago 2:​21-23). ‘Mana yupai tucuipaj achca gentecunaca’ Armagedonpi mana huañushpa huiñaita causana esperanzatami charincuna (Juan 11:26). Shinallataj ‘cashcata rurajcunapish’, ‘cashcata mana rurajcunapishmi’ causaringacuna (Hechos 24:15; Juan 5:​28, 29). Chai huashaca cai Allpapi causaj Jehová Diosta tucui sirvijcunaca ‘Jehová Diospaj huahuacuna cashcamantami cacharichishca causangacuna’ (Romanos 8:21). Caipi ricushca shinaca Jehová Diospish, Jesuspish ñucanchijta ayudashcamantami Jehová Diospaj alli amigocuna cai tucunchij. ¡Chaica sumaj bendicionmi can!

19. ¿Jehová Diospish, Jesuspish ñucanchijta ayudashcamantaca ima shinataj beneficiarinchij? (“ ¿Jehová Diosca ñucanchijtaca ima shinataj perdonarca?” nishca recuadrota ricui).

¹⁹ Ñucanchijca achca dibita heredaj joven shinami llaquilla carcanchij. Chai dibitaca ñucanchijllaca mana pagai tucunchijmanchu carca. Pero Jehová Diosca ñucanchijta perdonangapaj imata ruranataca allimi yuyarca. Jesuspish paipaj causaita cushpami ñucanchijta randirca. Chaimantami cushilla sintirinchij. Shinallataj Jesuspi feta charishcamantami juchamanta, huañuimantapish quishpichishca canchij. Ñucanchij juchacunamantapish pagachunca Jehová Diosca mana mañanchu. Paipaj ñaupajpica ima juchata mana rurashca shinami ricurinchij. Ashtahuantajca Yayitu Jehová Dioshuanmi alli apanacui tucunchij.

20. ¿Catij yachaipica imatataj yachashun?

²⁰ Jehová Diospish, Jesuspish ñucanchijta ayudangapaj tucui imallata rurashcata yuyashpaca achca agradecidosmi sintirinchij (2 Corintios 5:15). Paicuna ñucanchijta mana ayudashca cajpica ima esperanzatapish mana charinchijmanchu carca. Catij yachaipica Bibliapi huaquin chꞌimbapuraicunatami ricushun. Chashnami Jehová Dios cada unota ima shina perdonaj cashcata alli intindishun.