Ñuca yaya mamaca católico religiontami tucui shunguhuan catijcuna carca. Pero Bibliapi Diospaj shuti Jehová cashcata yachaj chayashpaca ishquindijmi testigo de Jehovacuna tucurcacuna. Ñuca yayaca carpinteromi carca. Chaimi maderacunahuan santocunata rurashpa trabajaj carca. Pero testigo de Jehová tucushpaca carpinteriata yachashcamantami ñucanchij causana huasillapitaj shuj Tandanacuna Huasita rurashpa ayudarca. Ñucanchijca segundo pisopimi causaj carcanchij.

Ñucaca 1952 huatapimi huacharircani. Ñuca yaya mamaca ñuca punta huauqui panicunaman yachachishca shinami ñucamanpish Diosmanta yachachircacuna. Ashtahuan huiñajpica ñuca yayaca Bibliamanta shuj capitulota tucui punllacunata liyichunmi animarca. Shinallataj paica huaquin publicacioncunatami ñucahuan estudiarca. Huaquinpica ñuca yaya mamaca superintendente huauquicunata, Betelpi sirvij huauquicunatami ñucanchij huasipi saquirichun invitajcuna carca. Cai huauquicunapaj experienciacunata uyashpaca cushillami sintirij carcanchij. Ashtahuanpish ñucanchij causaipi Jehová Diosta sirvinata punta lugarpi churangapajmi animarircanchij.

Ñuca yaya mamaca Jehová Diosta tucui shunguhuan sirvichunmi ñucata animarcacuna. Ñuca mamita huañushca qꞌuipaca 1971 huatapimi ñuca yayahuan precursores shina sirvi callarircanchij. Shinapish ñuca yayaca 1973 huatapimi huañurca. Ñucaca 20 huatacunallatami charircani. Ñuca yaya mama huañushcamantaca llaquillami sintirircani. Pero huañushcacuna ñalla causarina cashcata tucui shunguhuan crishcamantami tranquilo sintirircani. Ashtahuancarin Jehová Diosmantaca mana caruyarcanichu (Hebreos 6:19). Ñuca yaya huañushca qꞌuipallami Coron nishca islapi precursor especial shina sirvichun ñucataca nombrarcacuna.

Coron islaman chayashpaca 21 huatacunatami charircani. Jatun ciudadpi huiñashcamantami chai islapi luzpish, yacupish, carrocunapish mana tanto tiyashcata ricushpaca achcata mancharircani. Coronpica asha huauqui panicunami tiyarca. Chaimi huaquinpica ñucalla predicaj carcani. Punta quilla chaipi causacushpaca ñuca familiata, ñuca amigocunatapish achcatami extrañarcani. Tutacunaca jahua pachapi estrellacunata ricushpaca huiqui muyurishpami huacaj carcani. Chai asignacionta saquishpa ñuca huasiman tigranatami yuyarcani.

 Ñucalla cashpaca Jehová Diostami tucui shunguhuan mañaj carcani. Shinallataj animachij versocunata, huaquin publicacioncunapi ima nishcatapishmi yuyarij carcani. Salmo 19:​14-pi ima nishcata yuyarishpami animarij carcani. Jehová Dios ‘ñucata pacaj rumi’ shina cachun, ‘ñucata quishpichij’ cachunpish pai imalla rurashcacunata, pai ima shina cashcata yuyana cashcatami cuentata curcani. Shinallataj La Atalaya revistapi llujshishca “Usted nunca está solo” a nishca temata liyishpami animarij carcani. Chaitaca cutin cutinmi liyij carcani. Ñucalla cashpaca Jehová Dios ñuca ladopi cashcatami yuyaj carcani. Ashtahuanpish paita mañangapaj, Bibliata estudiangapaj, ima estudiashcapi yuyangapajmi aprovechaj carcani.

Coron islaman chayashca qꞌuipallami ñucataca anciano cachun nombrarcacuna. Ñucallami chai congregacionpi anciano carcani. Chaimi Escuela del Ministerio Teocrático, Reunión de Servicio, Estudio de Libro de Congregación, Estudio de La Atalaya nishca tandanacuicunata ñucalla pushaj carcani. Shinallataj tucui semanacunami conferenciacunata cuj carcani. Ocupado pasashcamantami llaquilla sintiringapajca ña mana tiempota charircani.

Coron islapi huillanaca sumajmi carca. Huaquin gentecunaca ñucahuan Bibliata estudiashca qꞌuipami bautizarircacuna. Pero jarcaicunahuanpishmi chꞌimbapurarcani. Huaquin lugarcunaman chayangapajca maipica chaupi punllatami purina carcani. Chai lugarcuna carupi cashcamantami ñuca huasimanca huaquinpica mana tigrai tucurcani, maipi dorminatapish mana charircanichu. Shinallataj shujtaj uchilla islacunapipishmi huillana carcani. Chai islacunaman chayangapajca lanchacunapimi viajana carcani. Yacucuna lanchata caiman chaiman cuyuchijpimi nadanata mana yachashcamanta ñucaca achcata mancharij carcani. Jehová Diosmi cashna jarcaicunata chꞌimbapurachun ayudarca. Chai jarcaicunata ahuantashcamantami shujtaj jarcaicunatapish ahuantangapaj listo carcani.

1978 huatapica Papúa Nueva Guinea llajtapi sirvichunmi cacharcacuna. Chai llajtaca casi España llajta shinallatajmi jatun can. Chaipica achca urcucuna, lomacunami tiyan. Shinallataj chai llajtapica más o menos tres millones gentecunami causancuna. Paicunaca 800 yalli shimicunapimi rimancuna. La mayoriaca pidgin de Nueva Guinea nishca shimitami rimancuna. Chai shimitaca tok pisin nishpapishmi rijsincuna.

Port Moresby llajtapi tiyaj inglés congregacionpi asha tiempota sirvichunmi nircacuna. Chai qꞌuipaca tok pisin shimita parlaj congregacionpi sirvinamanmi rircani. Chai shimita yachangapajca shuj clasemanmi rircani. Imalla yachacushcataca predicacionpimi practicaj carcani. Chashnami mushuj shimitaca rato yachai tucurcani. Asha tiempo pasashca qꞌuipallami tok pisin shimipi conferenciata cuchun nircacuna. Papúa Nueva Guineapi manaraj shuj huatata causacujpica superintendente shina tok pisinta parlaj congregacioncunata visitachunmi ñucata cacharcacuna.

Congregacioncuna carupi cashcamantami chꞌican chꞌican asambleacunata organizana carcani. Chai asambleacunaman ringapajca achcatami viajana carcani. Shujtaj llajtapi cashcamanta, shujtaj shimita yachacushcamanta, mushuj costumbrecunata yachana cashcamantami huaquinpica ñucalla sintirij carcani. Shinallataj carreteracuna mana tiyashcamantami casi tucui semanacuna avionetapi viajana carcani. Huaquinpica ñucallatami avionetapi apajcuna carca. Chai avionetacunaca yallitaj payacunami carca. Chaimi lanchapi viajacushca shina achcata mancharij carcani.

 Chai punllacunapica huaquin gentecunallami telefonocunata charijcuna carca. Chaimi cartacunallata congregacioncunaman cachaj carcani. Pero huaquinpica ñuca cartacuna manaraj chayajpimi ñucaraj chayaj carcani. Chaimi chaipi causajcunata huauqui panicuna maipi causashcata tapuna carcani. Huauqui panicunapaj huasiman chayajpica paicunaca allimi chasquijcuna carca. Paicuna chashna chasquijpimi huauqui panicunata cꞌuyashcamanta ñucaman mingashca asignacionta pajtachicushcata yuyarij carcani. Jehová Diosca tucuipimi ñucataca ayudarca. Chaimi ñuca cꞌuchullapi cashca shina sintirij carcani.

Bougainville nishca islapi punta tandanacuiman rijpica shuj cusa huarmimi ñucapajman cꞌuchuyashpa: “¿Ñucanchijta yuyaringuichu?” nishpa tapurcacuna. Ñucaca paicunamantaca mana cungarishcarcanichu. Port Moresby nishca ciudadpimi paicunamanca huillashca carcani. Chai qꞌuipaca paicunahuanmi Bibliata estudiai callarircani. Pero paicunaman yachachishpa catichunca shuj huauquimanmi mingashca carcani. Paicunaca ñami bautizarishcacuna carca. Papúa Nueva Guineapi quimsa huatacunata causacushpaca paicunata ayudashca shinami shujtaj gentecunatapish ayudarcani.

1978-pimi Coron islamanta rircani. Pero chaimanta manaraj rishpaca Adel shuti panitami rijsircani. Paica sumaj, sinchita trabajaj, Jehová Diosta tucui shunguhuan sirvij huarmimi carca. Shinallataj paillami paipaj ishqui huahuacunata huiñachicurca. Paicunaca Samuel y Shirley shuticunami carca. Shinallataj Adelca paipaj mamatapishmi cuidacurca. Precursora regularpishmi carca. 1981-pica Adelhuan cazarangapajmi Filipinasman tigrarcani. Chaimantami ishqui tucushpa precursores regulares shina sirvi callarircanchij.

Ñuca familiata charijpipish 1983 huatapimi precursor especial cachun ñucataca nombrarcacuna. Linapacan nishca islapi sirvichunmi cacharcacuna. Chaipica Testigocunaca mana tiyarcachu. Chaipi ña casi shuj huatata sirvicujpimi Adelpaj mamaca huañurca. Llaquillami sintirircanchij. Pero Jehová Diosta tucui shunguhuan sirvishpa ocupados cashcamantami chai llaquita ahuantai tucurcanchij. Achca gentecunamanmi Bibliamanta yachachircanchij. Paicuna progresashpa catijpimi shuj Tandanacuna Huasita shayachina cashcata cuentata curcanchij. Chaimi shuj uchilla Tandanacuna Huasita shayachircanchij. Chaipi ña quimsa huatacunata sirvicujpi Conmemoracionman 110 gentecuna shamujta ricushpaca achcatami cushicurcanchij. Ñucanchijcuna shujtaj ladopi sirvinaman rijpica chai 110 gentecunamantaca achcacunami bautizarircacuna.

1986-pica Culion nishca islapi huillachunmi ñucanchijta cacharcacuna. Chai qꞌuipaca ñuca huarmitapish precursora especial cachunmi nombrarcacuna. Culion islapi sirvinataca ratomi amañarircanchij. Chaipica leprata charij gentecunami causajcuna carca. Callaripica paicunaman huillanataca ashatami mancharcanchij. Pero huauqui panicuna chai gentecuna tratamientota chasquishcamanta ñucanchijta ña mana contagiai tucushcata nijpica tranquilomi sintirircanchij. Tandanacuicunataca shuj panipaj huasipimi ruraj carcanchij. Chaimanca lepra ungüita charij huaquin gentecunapishmi rijcuna carca. Paicunaca Jehová Diospaj, gentecunapajpish mana valishca cashcatami yuyajcuna carca. Pero shamuj punllacunapi ungüicuna ña mana tiyagrishcata paicunaman Bibliapi ricuchijpica cushillami sintirijcuna  carca. Ñucanchijpish paicunaman huillashpaca cushillami sintirircanchij (Lucas 5:​12, 13).

Ñucanchij huahuacuna cushilla huillashpa catichunmi munarcanchij. Chaimi Coron islamanta ishqui joven panicunata ñucanchij huahuacunahuan huillachun invitarcanchij. Samuelpish, Shirleypish cushillami paicunahuan huillajcuna carca. Paicunaca achca huahuacunamanmi Bibliamanta yachachircacuna. Cutin ñucapish, ñuca huarmipish chai huahuacunapaj yaya mamacunamanmi yachachijcuna carcanchij. Huaquin quillacunaca 11 familiacunamanmi Bibliamanta yachachircanchij. Achca gentecunami Diosmanta yachana munaita charircacuna. Chaimantami chai llajtapica rato shuj congregación tiyai callarirca.

Callaripica ñucallami anciano carcani. Chaimi sucursalmanta huauquicunaca Culionpi tiyaj tandanacuicunata pushachun mañarcacuna. Chaipica ocho publicadorcunallami tiyarca. Shinallataj Marily nishca pueblopipish tandanacuicunata pushachunmi nircacuna. Chaipica nueve publicadorcunami tiyarca. Chai puebloman chayangapajca barcopimi quimsa horacunata viajana carcanchij. Tandanacuicuna qꞌuipaca Halsey nishca pueblopi estudiocunata cunaman ringapajca achca horascunatami purij carcanchij.

Marily, Halsey pueblocunapica achca gentecunami testigo de Jehovacuna tucurcacuna. Chaimi chai pueblocunapi Tandanacuna Huasicunata rurarcanchij. Chai pueblocunapi causaj huauqui panicuna, yachacujcunapish Linapacanpi causaj huauqui panicuna shinami casi tucui materialcunata cushpa, chaipi trabajashpa apoyarcacuna. Marilypi tiyaj Tandanacuna Huasitaca 200 gentecuna chaipi tandanacuchunmi rurarcanchij. Pero asambleacuna tiyajpi ashtahuan gentecuna chaipi tandanacuchunca chai Tandanacuna Huasita jatunyachinaca jahuallami carca.

1993 huatapajca ñucanchij huahuacunaca ñami jatuncuna carca. Chaimi superintendente shina ñuca huarmisitahuan congregacioncunata visitai callarircani. Cutin 2000 huatapica Escuela de Entrenamiento Ministerialpi yachachichunmi ñucaman capacitacionta curcacuna. “Chai asignaciontaca mana pajtachi tucushachu” nishpami sustarij carcani. Pero ñuca huarmisitaca: “Jehová Diosmi chai asignacionta pajtachichun fuerzasta cunga” nishpami ñucata animaj carca (Filipenses 4:13). Ñuca huarmi Adelca ungushca cashpapish Jehová Diostami sirvishpa caticurca. Chaimi Jehová Dios ñuca asignacionta  pajtachichun ñucaman fuerzasta cunata segura carca.

2006 huatapi ñuca shuj escuelapi yachachicujpica ñuca huarmisita párkinson nishca ungüita charishcatami doctorcunaca huillarcacuna. Chaita yachaj chayashpaca achcatami preocuparircanchij. Chaimi Adelta cuidangapaj ñucanchij asignacionta saquina cashcata yuyarcani. Pero paica: “Shuj alli doctor ñucata ayudachun mashcashpa cuhuai. Jehová Dios cambaj asignacionta pajtachichun ayudanatami segura cani” nircami. Adelca seis huatacunatami Jehová Diosta sirvishpa catirca. Ña mana puri valishpaca silla de ruedaspimi predicaj carca. Ashtahuan anchayashpaca rimanatapish ña mana valircachu. Chashnapish tandanacuicunapica shuj o ishqui palabritacunallata nishpami comentaj carca. Chaitaca pai huañuna horascamami rurarca. Adelca 2013 huatapimi huañurca. Huauqui panicunaca paicunata ayudashcamanta pagui ningapajmi siempre cartitacunata paiman cachajcuna carca. Adelca ñucataca 30 huatacunatami apoyashca carca. Pai huañujpica cutinmi ñucalla cashcata yuyai callarircani. Sinchimi carca.

Ñuca huarmi Adel huañushca qꞌuipaca ñuca asignaciontami pajtachishpa catircani. Paica chaita rurachunmi munarca. Chaimi ama ñucalla sintiringapajca tucui shunguhuan Jehová Diosta sirvishpa catircani. 2014 huatamanta 2017 huatacamaca Diosmanta ama huillachun jarcaj llajtacunapimi tagalo congregacioncunata visitarcani. Chai qꞌuipaca Taiwán, Estados Unidos y Canadá llajtacunapi tiyaj tagalo congregacioncunatapishmi visitarcani. 2019 huatapica India y Tailandia llajtacunapica Escuela para Evangelizadores del Reinopimi yachachircani. Chai escuelacunaca inglés shimipimi carca. Jehová Diosta sirvinapi ocuparishcamantami tranquilo sintirircani.

Ñuca maipi sirvinaman rishpapish huauqui panicunahuanca allimi apanacuj carcani. Chaimanta shujtaj ladopi sirvinaman ringapaj paicunata saquinaca ñucapajca sinchimi carca. Pero siempre Jehová Diospi tucui shunguhuan confianatami yachashcani. Paica ñuca causaipi ima cambiocuna tiyajpipish cushicushpa paita sirvishpa catichunmi ñucataca ayudashca. Cunanca Filipinas llajtapimi precursor especial shina sirvicuni. Congregacionpi huauqui panicunaca ñucataca allimi tratancuna. Chaimantami cushilla cani. Ashtahuanpish Samuelpish, Shirleypish paicunapaj mamapaj ejemplota caticushcamantami cushilla sintirini (3 Juan 4).

Ñuca causaipica achca llaquicunahuanmi chꞌimbapurashcani. Por ejemplo, ñuca huarmisita ancha ungushca cashcamanta sufrijta ricunaca ñucapajca sinchimi carca. Shinallataj ñuca causaipica siempremi cambiocuna tiyashca. Pero Jehová Dios ñuca cꞌuchullapi cashcamantami tranquilo sintirishcani (Hechos 17:27). Jehová Diosca ñucata ayudanataca manataj saquishcachu. Ñucanchijcuna maipi cajpipish paica siempremi ñucanchij cꞌuchullapi can (Isaías 59:1). Jehová Dios ñucapajca shuj jatun Rumi shinami cashca. Paica tucui ñuca causaipimi ñucataca ayudashca. Nunca mana ñucallachu cashcani.