María y Juan a causan llajtamanca Filipinas llajtamanta achca gentecunami trabajanaman shamuncuna. Pandemia tiyai horasca Mariaca chai gentecunaman, shujtaj llajtacunapi causajcunamanpishmi Bibliamanta yachachi tucurca. ¿Chaitaca ima shinataj rurarca?

Bibliamanta yachacujcunaca paicuna imata yachacushcatami familiacunaman, amigocunamanpish compartinata munan. Chaimi Mariaca paihuan yachacujcunataca cashna nishpa tapuj carca: “¿Canca pi Bibliamanta yachasha nijta rijsinguichu?”. Paicuna ari nijpica paicunata rijsichichunmi mañaj carca. ¿María chashna tapushcamantaca imataj tucurca?

Mariahuan estudiaj Jasmin huarmica Cristinata, shujtaj quimsa personacunatami paimanca rijsichirca. Cristinaca Bibliamanta yachanataca achcatami munaj carca. Chaimantami pani Mariataca semanapi ishqui cutin estudiota cuchun mañarca. Mariaca Cristinatapish: “¿Bibliamanta pi ashtahuan yachasha nijta rijsinguichu?” nishpami tapurca. Chaimi Cristinaca Bibliamanta yachasha nij chuscu amigacunata Mariamanca rijsichirca. Chai qꞌuipaca Cristinaca shujtaj amigacunatapishmi paimanca rijsichirca. Chai amigacunapishmi Mariamanca shujtaj gentecunata rijsichirca.

Cristinaca Filipinaspi causaj paipaj familiapish Bibliamanta yachachunmi munarca. Chaimantami paipaj ushushi Andreata Bibliata estudiachun animarca. Andreaca: “Testigo de Jehovacunaca mushuj religionmi can. Paicunaca Jesuspica mana crincunachu. Ñaupa Testamentollatami utilizancuna” nishpami yuyaj carca. Pero punta cutin Bibliata estudiashpaca testigo de Jehovacunamanta pandata yuyashcatami cuentata curca. Shinallataj Bibliata estudiacushpa mushuj yuyaicunata yachashpaca Andreaca: “Bibliapi caita yachachijpica ciertotajmi canga” nijmi carca.

Andreaca pani Mariamanca ishqui amigacunata, trabajomanta shuj compañeratapishmi rijsichirca. Paicunapishmi Bibliata estudiai callarircacuna. Andrea Bibliata yachacujpica paipaj tía Angelapishmi upalla uyaj carca. Paica cieguitami carca. Angelaca: “Ñucapishmi Mariahuan Bibliamanta yachasha nini” nircami. Paica Bibliamanta yachanataca achcatami munaj carca. Chaimantami shuj quillallapi Bibliamanta achca versocunata de memoria ña yacharca. Shinallataj semanapi chuscu cutin Bibliamanta paiman yachachichunmi mañarca. Paipaj sobrina Andreapaj  ayudahuanmi Angelaca internetpi conectarishpa tandanacuicunata uyaj carca.

Cristina Bibliamanta yachacujpica paipaj cusa Josuepishmi imata yachacushcata uyaj carca. Chaita cuentata cushpaca pani Mariaca Josuetaca: “¿Manachu canpish Bibliata estudiasha ningui?” nishpami tapurca. Chaimi paica: “Ñucaca uyaillatami uyagrini. Pero ñucaman imata tapujpica caimantami risha” nirca. Josué shina nijpimi Mariaca Cristinaman yachachishpa catirca. Pero Josueca Cristinatapish yallimi tapuicunata rurai callarirca. Qꞌuipacarin: “Ñucapish Bibliamanta yachasha ninimi” nircami.

María shuj tapuillata rurashcamantami achca gentecuna Bibliata estudiai callarirca. Huaquincunaman estudiota cuchunca Mariaca shujtaj huauqui panicunamanmi mingarca. Totalca Mariaca 28 gentecunamanmi Bibliamanta yachachi callarirca. Paicunaca chuscu llajtacunapimi causajcuna carca.

Jasminca abril del 2021 huatapi, cutin Cristinaca mayo de 2022 huatapimi bautizarircacuna. Cristinaca paipaj familiahuan cangapajmi Filipinas llajtaman tigrarca. Shinallataj Mariaman Cristina rijsichishca ishqui huarmicunapishmi bautizarircacuna. Angelapish huaquin quillacuna qꞌuipallami bautizarirca. Cunanca paica precursora regularmi can. Cristinapaj cusa, paipaj ushushi Andrea, shujtaj yachacujcunapishmi Bibliata estudiashpa caticuncuna.

Punta siglopica gentecunaca Bibliamanta alli huillaicunatami paipaj familiacunaman, amigocunamanpish huillajcuna carca (Juan 1:​41, 42a; Hechos 10:​24, 27, 48; 16:​25-33). Canpish canhuan yachacujcunata, shujtaj gentecunatapish: “¿Pi Bibliamanta yachasha nijta rijsinguichu?” nishpa tapui. Cai tapuillata rurashpami Bibliata yachasha nijcunata taringui.