ÑAUPA punllapi Diosta sirvijcunaca ‘tucuipimi ñucanchij shinallataj carca’ (Santiago 5:17). Apóstol Pabloca: ‘Allita rurasha nicushpapish millaita ruranami ñucallapitaj tiyan. ¡Aij ñucalla imachari tucusha!’ nircami (Romanos 7:​21-24, QC, 1989). Apóstol Pablopish ñucanchij shinallataj sintirij cashcata yachashpami tranquilo sintirinchij.

Apóstol Pabloca Jesús paimanta huañushcatami tucui shunguhuan crirca. Chaimantami paica: ‘Diospaj Churimi ñucata cꞌuyashpa, paillataj curishpa ñucamanta huañurca’ nirca (Gálatas 2:20). ¿Jesús canmanta huañushcata cringuichu?

Pandarishcacunata yuyarishpami maipica imapaj mana valishca shina sintirinchij. Chaimantami huaquinpica ‘Diosca ñucataca manataj cꞌuyanchu, manataj perdonanchu. Jesuspish ñucamantaca mana huañurcachu’ nishpachari yuyanchij. Pero ama shina yuyangapajca ¿imatataj rurana canchij?

Jesús cada unomanta huañushcataca ¿ima shinataj yachanchij? Lucas 23:​39 al 43-pi nishcata yuyarishun. Jesús ña huañugrijpica paipaj ladopimi shuj millai runapish caspipi huarcushca carca. Paica millaita rurashcamantami chashna huañuna carca. Pero ña huañugrishpami paica arrepintirirca. Chaimantami: ‘Can mandacushpaca ñucata yuyaripangui’ nishpa Jesusta rogarirca.

Cai runa shina nijpica ¿Jesusca ima shinataj contestarca? Paica ‘ñuca causaita cushpa tucuicunata randishpa cacharichingapajmi shamurcani’ nishpaca mana contestarcachu (Mateo 20:28). Chaipaj randica caspipi achcata sufricushpapish, umata alzashpa, cushi ñahuihuanmi chai runataca: “Cunanmi nini. Canca ñucahuanmi paraisopi cangui” nishpa contestarca. “Ñucahuanmi paraisopi cangui” nishpaca Jesusca paimantapish huañuna cashcatami intindichisha nirca. Shinallataj paraíso Allpapi huiñaita causanatami yachachisha nirca.

Cai millai runaca Diosta sirvina oportunidadtaca mana charircachu. Pero Jesusca paimantapish huañugrishcatami intindichirca. Jesús chai millai runamanta huañushca cashpaca ¿manachu paita alli sirvijcunamantapish huañushcanga? Ñaupa punllapi pandarishca cashpapish ñucanchijmanta Jesús huañushcata cringapajca ¿imatataj rurana canchij?

Jesusca Pablotaca Diosmanta shujtajcunaman huillachunmi mingarca. Chaimantami Pabloca: “Ñaupaca ñucaca Diosta cꞌamij, catirashpa llaquichij, maipish cachun rimajmi carcani. Chashna ruracujpipish ñucata sinchiyachishpa, alli crij cashcata ricushpa paipajta rurachun churashcamantami Jesucristotaca pagui nini” nirca (1 Timoteo 1:​12-14). Pabloca cai mingashcata chasquishpaca Jesús paita cꞌuyashcata, paipi confiashcata, paimanta huañushcatami crirca. Jesusca Diosmanta huillachunca ñucanchijmanpishmi mingashca (Mateo 28:​19, 20). Chaimantami Jesús ñucanchijmantapish huañushcata, ñucanchijta cꞌuyashcata crina canchij.

Huauqui Albertca 34 huatacunatami expulsado cashcarca. Pero cunanllami Jehovapajman tigrarca. Paica: “Ñuca juchacunaca siempremi yuyaiman shamun. Pero huillanaman llujshishpaca tranquilomi sintirini. Apóstol Pablo shinami ñucapish Jesús mingashcata pajtachina cani. Chaimantami pandarishcacunallapi yuyanapaj randica shamuj punllacunapi huiñaita causanapi yuyani” nircami (Salmo 51:⁠3).

Cutin huauqui Allanca manaraj Diosta rijsishpaca mana allicunatami ruraj carca. Paica: “Shujtajcunata llaquichishcata yuyarishpaca huaquinpica llaquillami sintirini. Pero millaita rurashca cajpipish Jehová Diosca paimanta huillachunmi saquishca. Chaimantami paitaca achcata agradicini. Huaquin gentecunaca ñuca layallatajmi jatun juchacunata rurashca. Pero paicuna Bibliamanta yachai callarijta ricushpaca Yayitu Dios cꞌuyaj cashcatami intindini” ninmi.

Huillanaman llujshishpaca cushillami sintirinchij. Mana allicunapi yuyanapaj randica allicunapimi yuyanchij. Shinallataj Jesús ñucanchijta cꞌuyashcata, ñucanchijpi confiashcatami yuyarinchij.

Cai millai mundopi causacushcamantami mai ratoca ñucanchij pandarishcacunaca yuyaiman shamunga. Pero ama llaquilla sintiringapajca ¿imatataj rurana canchij?

Pani Jeanmanta parlashun. Paica Testigo cashpapish mana allicunata rurashpami causaj carca. Chai pandarishcacunata yuyarishpami Jeanca huaquinpica llaquilla sintirin. Paica: ‘Llaquilla cai horasca Yayitu Dios ñuca shungutapish yalli tucuita yachaj cashcatami yuyarini. Chaita yuyarishpami tranquila sintirini’ ninmi (1 Juan 3:​19, 20). Jesusca jucha illajcunamantaca mana huañurcachu. Paica juchayujcunamantami huañurca. Shungumanta arrepintirijpimi Diosca perdonanga. Caita yachashpaca ¿manachu tranquilo sintirinchij? (1 Timoteo 1:15).

Jesusca cada unomantami huañurca. Caita tucui shunguhuan cringapajca juchayujcunata pai ima shina tratashcatami yuyarina canchij. Shinallataj Diosmanta huillachun mingashcatapish manataj cungarinachu canchij. Chashnami Pablo shina: ‘Jesusmi ñucata cꞌuyashpa, paillataj curishpa ñucamanta huañurca’ nishun.