1. ¿Bibliamanta yachai callarishpaca imallatataj yacharcangui?

 ¿BIBLIAMANTA yachai callarishpaca imallatataj yacharcangui? Diospaj shutita yachashpaca seguramente cushillami sintirircangui ¿nachu? Shinallataj Jehová Dios gentecunata ucu pachapi mana llaquichij cashcata yachashpaca tranquilochari sintirircangui. Ashtahuancarin huañushcacuna Paraisopi causarinata yachashpaca achcatachari contentarircangui.

2. ¿Bibliata estudiacushpaca ima cambiocunallatataj rurarcangui? (Efesios 5:1, 2).

² Shinallataj Bibliata estudiacushpaca Jehová Diostami ashtahuan cꞌuyai callarircangui. Chaimantami Bibliapi imalla yachashcacunataca cambaj causaipi pajtachi callarircangui. Shinallataj Bibliapi nishcacunata yuyarishpami alli decisioncunata japingapaj esforzarircangui. Jehová Diospaj shunguta cushichingapajpishmi pai munashca shina causai callarircangui. Ima shinami shuj huahua paipaj cꞌuyaj yaya laya cangapaj esforzarin, canpish Jehová Dios shina cꞌuyaj cangapajmi esforzari callarircangui (Efesios 5:1, 2-ta liyipai).

3. ¿Imapitaj tucuicuna yuyana canchij?

³ Cashna nishpa tapurishunchij: “¿Bautizarishca punllamantaca cunanca Jehová Diostaca ashtahuanchu cꞌuyani? ¿Jehová Dios shina huauqui panicunaman cꞌuyaita ricuchingapaj esforzaricunichu?”. Callaripi charishca cꞌuyai chiriyashca cajpica mana yallitaj llaquirinachu canchij. Punta siglopi causaj huauqui panicunapaj cꞌuyai chiriyajpica Jesusca paicunahuanca mana pꞌiñarircachu. Ashtahuanpish cutin cꞌuyaita charichunmi ayudarca (Apocalipsis 2:4, 7). Jesusca ñucanchijtapishmi callaripi charishca cꞌuyaita charichun ayudasha nin.

4. ¿Cai yachaipica imatataj yachashun?

⁴ Cai yachaipica Jehová Diosta, huauqui panicunata ashtahuan cꞌuyangapaj imata rurana cashcatami yachashun. Shinallataj cꞌuyaita ricuchishcamanta ñucanchijpish, shujtajcunapish  ima shina beneficiarishcatami yachashun.

5, 6. a) ¿Pabloca ima jarcaicunahuantaj chꞌimbapurarca? b) ¿Jehová Diosta sirvishpa catingapajca Pabloca imatataj rurarca?

⁵ Apóstol Pabloca cushillami Jehová Diosta sirvirca. Pero huaquin jarcaicunahuanmi chꞌimbapurarca. Paica Diosmanta huillangapajmi achcata viajana carca. Chai punllacunapica shujtaj ladocunaman viajanaca ashtahuan sinchimi carca. Chaimantami jatun yacucunapi cashcamanta, shuhuacunamanta, millai gentecunamanta llaquicunata charirca (2 Corintios 11:23-27). Shinallataj huaquin huauqui panicunaca apóstol Pablo paicunata ayudasha nijpipish mana alli chasquircacunachu (2 Corintios 10:10; Filipenses 4:15).

⁶ ¿Chashna jahuapish Jehová Diosta sirvishpa catingapajca Pabloca imatataj rurarca? Paica Diospaj Shimitami alli estudiaj carca. Jehová Dios paipaj causaipi ima shina ayudaj cashcata cuentata cungapajpishmi esforzarij carca. Chashnami Jehová Dios paita cꞌuyaj cashcata seguro carca (Romanos 8:38, 39; Efesios 2:4, 5). Pabloca Jehová Diosta tucui shunguhuan cꞌuyashcamantami ‘jucha illaj huauquicunata sirvishpa catirca’ (Hebreos 6:10).

7. ¿Jehová Diosta ashtahuan cꞌuyangapajca imatataj rurana canchij?

⁷ Ñucanchijpish Jehová Diosta ashtahuan cꞌuyangapajca Bibliatami alli estudiana canchij. Shuj versota liyicushpaca chai verso Jehová Diosmanta imata yachachishcatami yuyana canchij. Shinallataj: “Cai versoca ¿Jehová Dios ñucata cꞌuyashcataca ima shinataj ricuchin? ¿Ñucapish imamantataj Jehová Diosta cꞌuyana cani?” nishpami tapurina canchij.

8. ¿Jehová Diosta ashtahuan cꞌuyangapajca imamantataj paita mañana canchij?

⁸ Jehová Diosta ashtahuan cꞌuyangapajca paitami cutin cutin shungumanta mañana canchij (Salmo 25:4, 5). Chashna mañajpimi Yaya Diosca ñucanchij mañaicunataca cutichinga (1 Juan 3:21, 22). Asiapi causaj pani Kaylaca: “Jehová Diosmanta yachai callarishpaca paitami cꞌuyai callarircani. Pero ñuca mañashcacunata ima shina cutichijta ricushpaca ashtahuanmi cꞌuyai callarircani. Shinallataj chaita ricushpaca pai munashca shina causangapajmi ashtahuan esforzarircani” nircami. b

9. ¿Timoteoca ima shinataj carca?

⁹ Pabloca Jehová Diosta huaquin huatacunata sirvishca qꞌuipaca Timoteotami rijsirca. Timoteoca Jehová Diosta, huauqui panicunatami cꞌuyaj carca. Chaimantami Pabloca: “Pai shina allita rurajtaca pi shujtajta mana charinichu. Paimi tucui shunguhuan cancunamantaca sustarin” nirca (Filipenses 2:20). Pabloca Timoteo alli pusaj cashcata, sumaj conferenciacunata cuj cashcataca mana nircachu. Ashtahuanpish huauqui panicunata cꞌuyaj cashcatami nirca. Timoteo cꞌuyaj cashcamantami huauqui panicunaca paicunata visitachun cushilla shuyajcuna carca (1 Corintios 4:17).

10. ¿Annapish, paipaj cusapish huauqui panicunamanca ima shinataj cꞌuyaita ricuchircacuna?

¹⁰ Ñucanchijpish huauqui panicunata ima shina ayudanatami ricuna canchij (Hebreos 13:16). Yachai 29-pi ¿pani Annamanta parlashcata yuyaringuichu? Jatun acapana tiyashca qꞌuipaca Annaca paipaj cusahuanmi shuj familiata visitanaman rircacuna. Chai familiapaj  huasi techoca urmashcami carca. Chaimi chai familiaca cambiaringapajpish limpio ropataca mana charirca. Chaita ricushpami Annapish, paipaj cusapish chai familiapaj ropata tajshashpa, planchashpa, doblashpa ayudarcacuna. Annaca: “Chai familiataca chaisitullahuanpishmi ayudarcanchij. Pero chashna ayudashcamantaca alli amigocunami tucurcanchij” nircami. Annapish, paipaj cusapish cꞌuyajcuna cashcamantami chai familiataca ayudarcacuna (1 Juan 3:17, 18).

11. a) ¿Cꞌuyaita ricuchijpica huauqui panicunaca ima shinataj sintiringacuna? b) Proverbios 19:17-pi nishca shinaca ¿shujtajcunaman cꞌuyaita ricuchijpica Diosca ima shinataj sintirin?

¹¹ Huauqui panicunata cꞌuyaihuan tratashpaca Jehová Dios shina cꞌuyajcuna cashcatami ricuchinchij. Huauqui panicunaca paicunata ayudashcamanta, ima shina agradicinataca manachari yachangacuna. Pero paicunata ayudashcataca siempremi yuyaringacuna. Párrafo 8-pi parlashca pani Kaylaca huauqui panicuna paita ima shina ayudashcataca manataj cungarishcachu. Paica: “Ñañitacunataca predicacionman pushashcamantaca achcatami agradicini. Paicunaca ñucahuanca alajacunami carca. Ñucataca micunamanmi invitajcuna carca. Qꞌuipaca huasipimi saquinaman shamujcuna carca. Chaita ruranaca paicunapajca mana jahuallachu cashcanga. Pero ñucata cꞌuyashcamantami chashna ayudarcacuna” nircami. Shujtajcunata ayudajpica mana siempre agradicingacunachu. Pero Yayitu Jehová Diosmi tucuita ricucun. Shujtajcunata ayudashpaca paiman mañachishca shinami can (Proverbios 19:17-ta liyipai). Pani Kaylaca cashnapishmi nirca: “Ñucata ayudashca ñañitacunataca ñucapishmi ayudasha nini. Pero tucuicuna maipi causashcataca mana yachachinichu. Chaimantami  Yayitu Diosta ñucapaj randi paicunata ayudachun mañani”.

12. ¿Bautizarishca huauquicunaca ima shinataj congregacionpi cꞌuyaita ricuchi tucuncuna? (Fotocunamantapish parlapai).

¹² Huauquicuna, ¿congregacionpica ima shinataj cꞌuyaita ricuchi tucunguichij? Chaipajca huauqui panicunatami ayudana canguichij. Jordan shuti jovenca shuj anciano huauquitami: “¿Huauqui panicunataca ima shinataj ayudai tucuni?” nishpa tapurca. Chaita uyashpaca anciano huauquica Jordantami felicitarca. Shinallataj huaquin consejocunatapishmi curca. Por ejemplo, tandanacuicunaman utca chayachun, tucui huauqui panicunata saludachun, alaja comentariocunata cuchunmi animarca. Shinallataj paipaj grupopi caj huauqui panicunahuan predicachunmi animarca. Ashtahuanpish huauqui panicunata ima shina ayudanata mashcachunmi animarca. Cai consejocunata pajtachishpaca Jordanca congregacionpimi ashtahuan ayudai tucurca. Shinallataj tucui huauqui panicunatami ashtahuan cꞌuyai callarirca. Ashtahuancarin Jordanca manaraj siervo ministerial cashpapish huauqui panicunata ayudangapaj esforzarina cashcatami intindirca (1 Timoteo 3:8-10, 13).

13. ¿Huauqui Christianca imamantataj cutin anciano casha nirca?

¹³ ¿Canca anciano o siervo ministerialchu carcangui? Chai asignacioncunata tucui shunguhuan pajtachishcataca Jehová Diosca manataj cungarinchu (1 Corintios 15:58). Shinallataj Jehová Diosca cꞌuyaita ricuchishpa catingapaj esforzaricushcatami ricun. Huauqui Christianca congregacionpi anciano shina ña mana sirvichun decidijpica llaquillami sintirirca. Pero ñaupajman catingapajmi esforzarirca. Paica: “Ña mana anciano cashpapish Jehová Diosta cꞌuyashcamanta, paita tucui  shunguhuan sirvina cashcatami intindircani” nircami. Tiempohuanca cai huauquitaca cutinmi anciano cachun nombrarcacuna. Paica: “Chai privilegiota cutin chasquinataca mana seguro carcanichu. Pero Jehová Dios congregacionpi ayudachun shujtaj oportunidadta cucushcatami intindircani. Chaimantami Jehová Diosta cꞌuyashcamanta, huauqui panicunata cꞌuyashcamanta anciano shina sirvinata munarcani” nircami.

14. ¿Pani Elenamantaca imatataj yachanchij?

¹⁴ Diosta sirvijcunaca mana Testigo caj gentecunamanpishmi cꞌuyaita ricuchina canchij (Mateo 22:37-39). Por ejemplo, Georgia llajtapi causaj pani Elenaca cashnami nirca: “Jehová Diosta cꞌuyashcamantami predicacionman llujshij carcani. Pero Jehová Diosta ashtahuan cꞌuyai callarishpaca paimanta mana yachaj gentecunamanpishmi cꞌuyaita ricuchisha nircani. Chaimi Jehová Diosta rijsichun paicunataca ayudasha nircani. Paicunaman alli predicangapajca ima problemacunata charishcata, ima temacunamanta ashtahuan yachasha nishcatami investigai callarircani” (Romanos 10:13-15).

15, 16. ¿Fotocunapi ricushca shinaca imamantataj shujtajcunata cꞌuyaihuan ayudangapaj esforzarina canchij?

¹⁵ Huauqui panicunaman cꞌuyaita ricuchijpica shujtajcunapishmi beneficiarincuna. Por ejemplo, COVID-19 pandemia punllacunapica Paolo, paipaj huarmipish yuyaj panicunamanmi telefonota, tabletta utilizashpa  ima shina huillanata yachachircacuna. Chaita yachanaca shuj panipajca sinchimi carca. Chashnapish paica Jesús huañushcata yuyarina tandanacuimanmi achca familiacunata invitai tucurca. Totalca 60 familiacunami chai tandanacuiman conectarircacuna. Shinaca Paolo ayudashcamantami chai yuyaj panicitapish, paipaj familiacunapish beneficiarircacuna. Chai panica Paolomanca: “Yuyajcunata ayudashcamantaca diosolopagui. Jehová Dios ñucaman cꞌuyaita ricuchishcata, cancuna pacienciata ricuchishcataca manataj cungarishachu” nishpami quillcarca.

¹⁶ Shinallataj ¿Paoloca imatataj intindirca? Paica tucuimanta yalli cꞌuyaita ricuchina cashcatami intindirca. Cꞌuyaimi ima yachaitapish yalli can. Paoloca: “Huaquin huatacunatami superintendente shina sirvircani. Huauqui panicunaca ñuca cushca conferenciacunata manachari yuyarincuna. Pero paicunata ima shina ayudashcataca de seguromi yuyarincuna” nircami.

17. ¿Shujtajcunata cꞌuyashcamantaca picunallataj beneficiarincuna?

¹⁷ Shujtajcunata cꞌuyashpaca ñucanchijllatajmi beneficiarinchij. ¿Imamantataj chashna ninchij? Jonathanhuan ima tucushcata ricushun. Inti punllapi shuj huauqui pailla predicacujta ricushpaca Jonathanca sorprendidomi saquirca. Chaimi chai huauquihuan tucui sabadocunata predicangapaj arreglocunata rurarca. Paica cashnami nin: “Ñucaca predicanataca mana tanto munanichu. Pero chai huauqui gentecunata ima shina yachachijta ricushpaca ñucapishmi chaita rurasha nircami. Cunanca shuj alli amigotami charini. Paica espiritualmente alli cachun, alli predicachun Jehová Dioshuanpish alli apanacuchunmi ayudashca” nircami.

18. ¿Jehová Diosca imata rurachuntaj munan?

¹⁸ Jehová Diosca paita, shujtajcunatapish cꞌuyachunmi munan. Caipi yachashca shinaca Jehová Diosta ashtahuan cꞌuyangapajca paipaj Shimitami liyina canchij, chaipi nishcacunapipishmi yuyana canchij, punllanta mañangapajpishmi esforzarina canchij. Shinallataj huauqui panicunata cꞌuyashcata ricuchingapajca paicunatami imapi minishtishcapi ayudana canchij. Caicunata rurashpaca Jehová Diospajman, huauqui panicunapajmanmi ashtahuan cꞌuchuyashun. Chashnami paicunahuanca huiñai huiñaita alli apanacushun.