Ñuca yayaca Iglesia Unida de Canadapimi pushaj carca. Chaimantami ñucataca ñuca panihuan tucui domingocunata chai iglesiapi Bibliamanta yachachun cachaj carca. Qꞌuipaca las 11:00  tutamantataca chai iglesiapaj misamanmi rij carcanchij. Cutin chishicunataca ñuca mamitahuanmi testigo de Jehovacunapaj Tandanacuna Huasiman rij carcanchij. Ishquindij religioncunaca diferentecunami carca.

Ñuca mamitaca ima yachacushcatami Bobman y paipaj huarmiman yachachirca. Chaimi paicunapish testigo de Jehovacuna tucurca. 1958 huatapica ñucataca paipaj quimsa huahuacunandijmi Nueva York llajtaman pusharcacuna. Chaipica, ocho punllacunatami “Voluntad Divina” nishca jatun tandanacuiman rircanchij. Chaipica cushillami sintirircani. Paicunaca ñucata pushangapajca achcatami esforzarishcacuna carca.

Joven cashpaca campopimi achca animalcunata cuidashpa causaj carcani. Chaimantami veterinario casha nircani. Chaita munashcatami ñuca mamitaca shuj ancianoman parlashca carca. Chai huauquica cꞌuyaihuanmi: “Tucuri punllacunapimi causacunchij. Achca huatacunata universidadman rishpaca, ¿Jehová Diospaj amigo cashpachu catigringui?” nirca (2 Timoteo 3:1). Chaimantami universidadman mana rinata decidircani.

Huaquinpica “colegiota tucuchishpaca ¿imapitaj trabajasha?” nishpami preocuparij carcani. Tucui sábado y domingocunatami predicanaman llujshij carcani. Pero predicanata mana tanto munashcamantami precursor canataca mana yuyarcani. Ñuca yaya, ñuca tiopish mana testigocunachu carca. Chaimantami shuj jatun empresapi trabajachun munarcacuna. Ñuca tioca chaipica shuj alli puestotami  charirca. Chaimi ñucapish chaipi trabajai callarircani.

Chaipica mana testigo caj gentecunahuanmi achca horascunata trabajaj carcani. Chaimantami tandanacuicunaman, predicacionmanpish ña mana tanto rij carcani. Chai punllacunapica ñuca abuelohuanmi causaj carcani. Pero pai huañujpica shujtaj ladopimi causanaman rircani.

Bobpish paipaj huarmipish ñuca yaya mama shinami tucurcacuna. Paicunaca paicunahuan causachunmi pusharcacuna, espiritualmente ñaupajman catichunpishmi ayudarcacuna. Chaimi 1960 huatapi paicunapaj churi Johnhuan bautizarircani. Paica precursor regularmi tucurca. Chaita ricushpami ñucapish ashtahuan predicai callarircani. Pushaj huauquicunaca Jehová Diosta sirvingapaj esforzaricushcatami ricurcacuna. Chaimantami Escuela del Ministerio Teocrático nishcata pushachun churarcacuna.  a

1966-pimi Randi Berge panihuan cazararcani. Paica ashtahuan huillajcuna minishtirishca lugarpimi sirvinata munarca. Chaimi superintendenteca Orillia (Ontario) congregacionpi sirvichun animarca.

Ñuca huarmisitaca cushillami huillaj carca. Chaimantami ñucapish precursor tucurcani. Shinallataj Bibliamanta alli yachachingapajmi esforzarircani. Chaita rurashpami cushilla sintirircani. Orilliapi causan shuj cusa huarmitami cambiocunata rurashpa bautizarichun ayudai tucurcani. Chaica shuj jatun bendicionmi carca.

Torontopi cashpaca Arnold MacNamara huauquitami rijsircani. Paica betelpimi sirvij carca. Huauqui Arnoldca: “¿Cancunaca precursores especiales shina sirvisha ninguichijchu?” nishpami tapurca. Ñucaca: “Ari munanchijmi. Pero Quebec llajtaman ama cachanguichijchu” nircanimi. Chai llajtapica francestami parlancuna. Chai huatacunapica paicunaca Canadá llajtamanta separaringapajmi shuj grupo  politicota rurarcacuna. Inglesta parlaj gentecunaca francés shimita parlajcunahuanca mana apanacujcunachu carca. Chaimi ñucapish paicuna shina yuyaj carcani.

Huauqui Arnoldca ñucamanca: “Quebec llajtallamanmi precursores especialescunataca cachacunchij” nirca. Ñuca huarmisita chai llajtaman rinata munashcatami yacharcani. Chaimantami chai llajtaman rircanchij. Chaica shuj alli decisionmi carca.

Francés shimita yachangapajmi pichca semanacunata shuj cursopi carcanchij. Chai qꞌuipaca shujtaj huauqui panihuanmi Rimouski llajtaman cacharcacuna. Chaica Montreal llajtamantaca 540 kilometrocuna carupimi can. Pero francestaca mana tanto yacharcanchijchu. Chaimantami tandanacuipi shuj anunciota liyicushpaca pandata liyircani. “Ñucanchij jatun tandanacuimanca Austriamanta huauqui panicunami shamunga” ninapaj randica, “avestruz huauqui panicunami shamunga” nircanimi.

Rimouski llajtapica chai cusa huarmihuan, shujtaj chuscu soltera panicunahuan, Huberdeaus cusa huarmihuanpish, paipaj ishqui ushushicunahuanpishmi causarcanchij. Familia Huberdeausca 7 cuartocunata charij huasitami arrendashcacuna carca. Chaipica 12-puracuna, huaquinpica 14-puracunami causajcuna carcanchij. Chaimantami tucuicuna arriendota pagajcuna carcanchij. Chai huasica yurajtami pintashca carca. Chaimi chai huasitaca “Casa Blanca” nishpa shutichircanchij. Precursores especiales cashcamantami punlla entero predicashpa pasaj carcanchij. Pero siempremi chiri punlla cajpi o tutacuna cajpi huauqui panicunaca compañaj carcacuna. Chaitaca achcatami agradicij carcanchij.

Chai huasipi causaj precursorcunahuanca shuj familia shinami carcanchij. Tandalla pasangapajmi ninata japichij carcanchij. Shinallataj empanadacunata rurangapajmi tucuicuna tandanacujcuna carcanchij. Achca sábado tutacunataca shuj huauquimi musicata tocaj carca. Chaipica bailajcuna, cantajcunami carcanchij.

Rimouski llajtapica achcacunami Bibliata yachanata munarcacuna. Pichca huatacunallapimi achcacuna bautizarirca. Chaimantami congregacionpica 35 huauqui panicuna tiyarca. Chaita ricushpaca cushillami sintirircanchij.

Quebec llajtapica Bibliamanta alli yachachijcunami tucurcanchij. Gentecunaman Bibliamanta yachachingapaj, minishtishca cosascunata charingapaj Jehová Dios ima shina ayudajtami ricurcanchij. Francés shimita parlaj gentecunata ashtahuan rijsishpaca paicunatami cꞌuyai callarircanchij. Chashnami shujtaj ladomanta caj gentecunata cꞌuyanata yacharcanchij (2 Corintios 6:13).

Shuj punllaca sucursalmanta huauquimi: “¿Tracadie llajtapi causanaman ri tucunguichijchu?” nishpa tapurca. Chaita nichunca mana yuyarcanchijchu. Chai ratoca recienllami shuj huasita arrendarcanchij. Shinallataj ñucaca huaquin punllacunatami shuj escuelapi yachachij carcani. Ñucanchij estudiocunapishmi huillanaman llujshi callaricushcarca. Ashtahuancarin Tandanacuna Huasitami recienlla shayachi callaricushcarca. Chaimi shuj desicionta japinaca sinchi carca.

Shuj alli desicionta japingapajmi sábado y domingotaca Jehová Diosta mañashpa pasarcanchij. Shinallataj Tracadie llajta ima shina cashcatami ricunaman rircanchij. Chai llajtaca Rimouski llajta layaca mana carcachu. Pero Jehová Dios chai llajtapi sirvichun munajpica chaimanmi rina canchij nircanchijmi. Tucuitami Jehová Diospaj maquipi saquircanchij. Chaimi paica ñucanchijta ayudarca (Malaquías 3:10). Ñuca huarmisitaca espiritualmente sinchi cashcamantami ñucataca ayudaj, cꞌuyaj carca. Chaimantami chai llajtaman rinaca jahualla carca.

 Chaipica Robert Ross huauquillami anciano carca. Paica paipaj huarmihuanmi precursores shina sirvinaman rishca carcacuna. Qꞌuipaman shuj huahuata charishpapish chaipi saquirinatami decidircacuna. Paicunapaj huahuata huiñachishpa ocupados cashpapish ñucanchijtaca achcatami animarcacuna. Paicunaca huauqui panicunatami paicunapaj huasiman invitajcuna carca. Shinallataj predicanatami achcata munajcuna carca.

Tracadie llajtapica precursores especiales shinami ishqui huatacunata sirvircanchij. Chai qꞌuipaca superintendente shina sirvichunmi invitarcacuna. 7 huatacunatami inglesta parlaj congregacioncunata visitarcanchij. Qꞌuipaca Quebec llajtapi francés shimita parlaj congregacioncunata visitachunmi cacharcacuna. Léonce Crépeault superintendente huauquica, ñuca conferenciacunata alli cushcamantami felicitaj carca. Shinallataj paica: “Cambaj conferenciacunahuan huauqui panicunata ayudangapajca, ¿imatataj ashtahuan rurai tucungui?” nishpami siempre tapuj carca. b Chaita nishcamantami, ñucaca ashtahuan alli conferenciacunata cungapaj esforzarircani.

1940 y 1950 huatacunapica Montreal llajtapica testigocunataca achcatami llaquichircacuna. Pero 1978-pica “Fe Victoriosa” nishca jatun tandanacuimi tiyarca. Chai tandanacuiman 80.000 gentecuna shamuchunmi shuyarcanchij. Chai tucui gentecunapaj yanuchunmi ñucaman shujtaj huauqui panicunaman mingarcacuna. Micunacunataca shuj layami yanujcuna carca. Pero chai tiempopica shujtaj laya yanuchunmi nircacuna. Micunacunata huaquichingapajmi 20 jatun refrigeradoracuna tiyarca. Shinapish chai refrigeradoracunaca ñapishmi dañarijlla carca. Manaraj tandanacui callarijpica chai estadiopica shuj jatun pugllaimi tiyashca carca. Chaimantami yanungapajca mana utca yaicui pudircanchij. Chaupi tutami chaimanca yaicurcanchij. Desayunota rurangapajca manaraj pacarijpimi tucuita listo charina carcanchij. Huauqui panicunaca shaicushca cashpapish cushillami trabajarcacuna. Chaita ricushpami ñucapish cushilla sintirircani. Chaipi ayudaj huauqui panicunahuanca cunancamami alli apanacunchij.

Montreal llajtapica achca jatun tandanacuicunami tiyarca. Chai tandanacuicunata pushaj huaquicunamantami achcata yacharcani. Shuj cutinca huauqui David Splanemi jatun tandanacuipaj  pushaj carca. Pero shujtaj jatun tandanacuipica ñucami pushaj carcani. Chaipica huauqui Davidca ñucataca achcatami ayudarca. Paica cunanca Cuerpo Gobernantepimi sirvin.

36 huatacunatami superintendente shina sirvircanchij. Pero 2011 huatapica, Escuela para Ancianos de Congregación nishcapi yachachichunmi invitarcacuna. Chaimantami chꞌican chꞌican ladocunaman rina carcanchij. Chaita rurana sinchi cajpipish cushillami sintirircanchij. Cuerpo Gobernanteca ancianocuna espiritualmente sinchi cachunmi achcata preocuparircacuna. Ancianocunaca chaita ricushpaca achcatami agradicijcuna carca.

Qꞌuipaca, Escuela para Evangelizadores del Reinopi yachachichunmi invitarcacuna. Chaipi yachacuj huauqui panicunaca cada punllami 7 horascunata yachashpa pasana carcacuna. Shinallataj quimsa horascunatami chaipi ayudana carcacuna. Ashtahuancarin cada semanami chuscu o pichca asignacioncunata prepararina carcacuna. Chaimantami huaquincunaca preocuparijcuna carca. Ñucanchijcunaca, “Jehová Diospaj ayudallahuanmi tucui chaicunataca rurai tucunguichij” nishpami animaj carcanchij. Paicunaca Jehová Diospaj ayudahuan mana yuyashca cosascunata rurashpaca mancharishcacunami saquirijcuna carca.

Ñuca mamitaca Bibliamanta yachacujcunamanta achcata preocuparishcamantami paicunaca ñaupajman cati tucurcacuna. Chaita ricushpami ñuca yayapish Bibliata yachai callarirca. Shinallataj ñuca mamita huañushca qꞌuipaca tandanacuimanmi ri callarirca. Chaimantami ñucanchijcunaca cushilla carcanchij. Ñuca yayituca 26 huatacunatami tucui tandanacuiman rirca. Shinapish paica mana bautizarircachu. Pero ancianocunaca, paica tandanacuicunamanca siempremi punta chayaj carca nircacunami.

Ñuca mamitaca ñucanchijpajca shuj jatun ejemplomi carca. Chaimantami ñuca quimsa panicunapish paipaj cusacunahuan Jehová Diosta sirvishpa catishcacuna. Shujca Portugal Betelpi, cutin caishujca Haití Betelpimi sirvincuna.

Cunanca precursores especiales shinami Hamilton (Ontario) llajtapi sirvicunchij. Superintendentecuna shina sirvishpaca huauqui panicunapaj revisitacunaman, estudiocunaman compañashpaca cushillami sintirijcuna carcanchij. Pero cunanca ñucanchij yachacujcuna Jehová Diosta cꞌuyashcamanta cambiocunata rurajta ricushpaca cushillami sintirinchij. Shinallataj huauqui panicunata ashtahuan alli rijsingapajmi tiempota charinchij. Jehová Dios paicunata ayudajta ricushpaca achcatami animarinchij.

Huauqui panicuna ñucanchijmanta preocuparishcamantami achcata agradicinchij. Chaimantami ñucanchijcunapish shujtajcunamanta preocuparingapaj esforzarishcanchij. Shinallataj Jehová Diosta sirvichunmi animai tucushcanchij (2 Corintios 7:6, 7). Por ejemplo, shuj familiapica huarmipish, ushushipish, churipishmi precursores carcacuna. Pero cusaca mana precursor carcachu. Chaimantami paitaca: “¿Imamantataj canpish mana precursor cangui?” nishpa tapurcani. Paica: “Es que ñuca familia precursores cashpa catichunmi trabajana cani” nircami. Chaimi ñucaca: “¿Jehová Diosca manachu cantapish yalli paicunataca cuidanga?” nircani. Paica 6 quillacuna qꞌuipallami precursor tucurca.

Ñucapish ñuca huarmisitapish qꞌuipa huiñaicuna ñucanchij shina Jehová Diosta cushilla sirvichunmi munanchij. Chaimantami paicunamanca Jehová Dios imalla rurashcacunata huillashpa catinchij (Salmo 71:17, 18).