YACHAI 31
“Sinchiyarishpa catichij, imapish cuyuchichunca ama saquichijchu”
“Chaimanta ñuca cꞌuyashca huauquicuna, sinchiyarishpa catichij, imapish cuyuchichunca ama saquichijchu” (1 CORINTIOS 15:58).
CANTO 122 ¡Tucuri punllacama amataj shaicurishunchij!
CAITAMI YACHASHUN a
1, 2. ¿Diosta sirvijcunaca imamantataj shuj jatun edificio shina canchij? (1 Corintios 15:58).
1978 HUATAPICA Japón llajtapica shuj jatun edificiotami rurarcacuna. Chai edificiota shayachicujta ricushpaca gentecunaca jatun terremoto tiyajpica urmangallami nishpami yuyarcacuna. Pero ingenierocunaca chai edificio ama urmachunmi sinchita shayachircacuna. Sinchita shayachijpipish terremotocuna tiyajpi caiman chaiman ashata cuyurichunmi rurarcacuna. Diosta sirvijcunaca chai jatun edificio shinami canchij. ¿Imamanta?
2 Ñucanchijca Jehová Diospaj mandashcacunata difindingapajmi sinchi, imapish mana cuyuchij edificio shina cana canchij (1 Corintios 15:58-ta liyipai). Shinallataj Jehová Diosta utca cazungapajmi esforzarina canchij. Pero ima shinami terremoto tiyajpi edificioca ashata cuyurin, ñucanchijpish huaquinpica ñucanchij yuyaitami ashata cambiana canchij. Chashnami alli yuyaiyuj, intindij cashcata ricuchishun (Santiago 3:17). Shinallataj alli yuyaita charishpaca nunca manataj pandarina cashcata o imatapish ruranalla cashcataca mana yuyashunchu. Cai yachaipica ima shina sinchi cana cashcatami yachashun. Shinallataj Diablo ñucanchijta urmachingapaj imallata ruraj cashcata, chaicunapi ama urmangapajpish imata rurana cashcatapishmi ricushun.
¿IMA SHINATAJ SINCHI CAI TUCUNCHIJ?
3. ¿Mandashcacunata cuj Jehová Diosca Hechos 15:28, 29-pica imallatataj mandarca?
3 Jehová Diosmi mandashcacunata cuj can. Paica alli, intindinalla mandashcacunatami cun (Isaías 33:22). Por ejemplo, punta siglopica cuerpo gobernante huauquicunaca espiritualmente sinchi cangapaj imallata rurana cashcatami nircacuna: 1) Yanga dioscunata adoranapaj randica, Jehová Diosllata adorana cashcatami nircacuna, 2) yahuar Jehová Diospaj valishca cashcatami yuyachircacuna, y 3) Diospaj Shimipi nishcacunata cazuna cashcatami nircacuna (Hechos 15:28, 29-ta liyipai). ¿Ñucanchijpish cai quimsa yuyaicunata pajtachicushcataca ima shinataj ricuchinchij?
4. ¿Jehová Diosllata adoracushcataca ima shinataj ricuchinchij? (Apocalipsis 4:11).
4 Yanga dioscunata adoranapaj randica, Jehová Diosllatami adorana canchij. Paica israelitacunamanca ñucallatami adorana canguichij nishpami mandarca (Deuteronomio 5:6-10). Shinallataj Jesusta Diablo urmachisha nijpica paica Jehová Diosllatami adorana canchij nircami (Mateo 4:8-10). Chaimantami ñucanchijpish yanga dioscunataca mana adorana canchij. Ashtahuanpish religionta pushajcunata, politicocunata, famoso gentecunatapish diosta shinaca mana ricunachu canchij. Paicunata adoranapaj randica tucuita ruraj Diosllatami adorana canchij (Apocalipsis 4:11-ta liyipai).
5. ¿Causaipish, yahuarpish imamantataj ñucanchijpajca valishca cana can?
5 Causaipish, yahuarpish Jehová Diospaj valishca cashcamantami ñucanchijpajpish valishca can. ¿Imamanta? Yayitu Jehová Diosmi causaita cun. Paica yahuarca causaitami ricuchin nircami (Levítico 17:14). Jehová Diosca gentecunaman animalcunata micuchun permisota cushpaca, ‘aichata micushpapish yahuartaca manataj micunachu canguichij’ nishpami mandarca (Génesis 9:4). Shinallataj israelitacunamanca chaillatatajmi yuyachirca (Levítico 17:10). Primer siglopi tiyaj cuerpo gobernante huauquicunapishmi Jehová Dios yuyaita cujpi ‘yahuartaca manataj micunachu canguichij’ nishpa mandarcacuna (Hechos 15:28, 29). Ñucanchijpish ima tratamientota agllacushpaca cai mandashcatami pajtachina canchij. b
6. ¿Jehová Dios mandashca shina causacushcataca ima shinataj ricuchinchij?
6 Jehová Diosta cazushcata ricuchingapajca mapa ruraicunamantami caruyana canchij (Hebreos 13:4). Apóstol Pabloca mana alli munaicunataca tucuita huañuchichij nircami. Chashna nishpami apóstol Pabloca mapa ruraicunapi ama urmangapaj sinchita esforzarina cashcata yachachisha nirca. Huainayanapi ama urmangapajca mapa cosascunataca mana rurana, mana ricunachu canchij (Colosenses 3:5; Job 31:1). Ñucanchijpajca Jehová Dioshuan alli apanacunami tucuimanta yalli valishca can. Chaimantami tentacioncuna, mapa yuyaicuna shamujpica chaicunamanta rato ladoyana canchij.
7. a) ¿Imatataj tucuicuna rurana canchij? b) ¿Jehová Diostaca imamantataj shungumanta cazuna canchij?
7 Jehová Diosca paita tucui shunguhuan cazuchunmi munan (Romanos 6:17). Paica ñucanchijcuna alli causachunmi mandashcacunata cun. Ñucanchijca paipaj mandashcacunataca mana cambiai tucunchijchu (Isaías 48:17, 18; 1 Corintios 6:9, 10). Salmota quillcaj runa shinami Jehová Diospaj ñaupajpi alli ricuringapaj sinchita esforzarina canchij. Paica: “Ñuca shungutaca quiquin chaitataj pajtachichun nishcata pajtachijtamari rurarcani. Chaica ñuca tucui causaipi cana cashcamantami chashna pajtachina tucurcani” nircami (Salmo 119:112). Shinapish ¿Diabloca juchapi urmachingapajca imallatataj ruran?
¿DIABLOCA JUCHAPI URMACHINGAPAJCA IMALLATATAJ RURAN?
8. ¿Diabloca imamantataj Diosta sirvijcunataca catirashpa llaquichin?
8 Diabloca catirashpami llaquichin. Paica llaquichishpa, llaquilla sintichishpami Diosmanta caruyachisha nin (1 Pedro 5:8). Punta siglopi causaj huauqui panicunataca Diosta sirvishcamantami macarcacuna, cꞌamircacuna, huañuchircacunapish (Hechos 5:27, 28, 40; 7:54-60). Cunan punllacunapipish Diabloca Diosta sirvijcunatami catirashpa llaquichicun. Por ejemplo, Rusiapi, shujtaj llajtacunapi caj huauqui panicunatami achcata llaquichishca. Ashtahuanpish tucui huauqui panicunatami ima layapish llaquichingapaj tucuita ruracun.
9. ¿Huauqui Robertmantaca imatataj yachanchij?
9 Diabloca mana yuyashca trampacunatami churan. Paica “ima shinapish umashpami urmachisha nin” (Efesios 6:11). Por ejemplo, doctorcunaca Robert shuti huauquitami operagrircacuna. Paica doctorcunamanca “yahuarta churachunca mana munanichu” nircami. Robertta operagrij doctorca paipaj decisionta respetagrishtami nirca. Shinapish paita operangapaj ashalla horascuna faltajpica anestesiata churaj doctormi paita ricunaman rirca. Chai doctorca: “Yahuartaca mana churashunchu. Pero por si acasollami yahuartaca caipi charigrinchij” nircami. Chai doctorca Robertpaj familia chaipi mana cashcamanta ari nigrishcatami yuyarca. Pero Robertca “yahuartaca manataj chasquishachu” nircami.
10. ¿Imamantataj Diosta mana sirvijcuna shina mana yuyana canchij? (1 Corintios 3:19, 20).
10 Diabloca Diosta mana sirvijcuna shina yuyachunmi pandachisha nin. Pero chaita rurashpaca Diosmanta caruyashpami paitaca ña mana cazunata munashun (1 Corintios 3:19, 20-ta liyipai). Diosta mana sirvijcunaca ñucanchij munashca shina causachunmi animan. Ñaupa Pérgamo y Tiatira congregacioncunapi ima tucushcata ricushun. Huaquin huauqui panicunaca huainayashpa causaj, yanga dioscunata adoraj gentecuna shinami yuyai callarircacuna. Paicuna huainayanapi urmana mana jatun jucha cashcata yuyashcamantami Jesusca sinchita cunarca (Apocalipsis 2:14, 20). Ñucanchijpish mana cuidadota charishpaca Diosta mana sirvijcuna shinami yuyai callarishun. Tal vez maijan familiacuna, rijsishcacunaca: “Bibliaca ñaupa librollami. Chaipi nishcacunata cazunapaj randica ñucanchij munashca shinami causanalla canchij. Chaita ruranaca mana juchachu can” nishpami pandachisha ningacuna.
11. ¿Imatataj mana rurana canchij?
11 Huaquinpica, ‘Jehová Dios cushca instruccioncunaca tucuitaca mana huillanchu’ nishpachari yuyashun. Chaimantachari Jehová Dios mandashcacunallata cazunapaj randica, ashtahuan mandashcacunata churanata munashun (1 Corintios 4:6). Jesuspaj punllacunapica panda religionta pushajcunami chaita rurarcacuna. Paicunaca Diospaj mandashcacunatami mirachircacuna. Pero chaita rurashcamantami gentecunaca llaquilla causarcacuna (Mateo 23:4). Diosca Bibliata, paipaj organizacionta utilizashpami jahualla mandashcacunata cun. Chaimantami imatapish mana mirachina canchij (Proverbios 3:5-7). Shinallataj cada uno imata ruranata, imata mana ruranata decidichunmi saquina canchij.
12. ¿Diabloca ima shinataj panda yuyaicunahuan pandachisha nin?
12 Diabloca cai pachapaj yuyaicunahuanmi pandachisha nin. Shinallataj huauqui panicunatami chꞌicanyachinata munan (Colosenses 2:8). Por ejemplo, primer siglopica Diosta mana sirvijcunapaj, judiocunapaj panda yachachishcacunahuanmi pandachisha nirca. Shinallataj Diosta sirvijcuna Moisesman cushca leycunata pajtachishpa catina cashcatami crichisha nirca. Cai panda yuyaicunata uyajcunaca Jehová Diosta cazunapaj randica gentecunatami cazujcuna carca. Cunan punllacunapica Diabloca ¿ima shinataj pandachisha nin? Por ejemplo, politicocunaca panda yuyaicunata, llullacunata ningapajmi redes socialesta, televisionta, radiota utilizancuna. COVID-19 pandemia punllacunapimi chashna tucurca. c Chai punllacunapica Diospaj organización cushca instruccioncunata cazuj huauqui panicunaca tranquilosmi carcacuna. Pero panda yuyaicunata uyajcunaca estresados, llaquillami carcacuna (Mateo 24:45).
13. ¿Yanga cosascunapica imamantataj mana ocuparina canchij?
13 Yanga cosascunapi ama ocuparishunchij. Chaipaj randica ‘ashtahuan valij cashcacunallatami’ rurana canchij (Filipenses 1:9, 10). Yanga cosascunapi ocuparishpaca ashtahuan importante cosascunata rurangapajca mana tiempota charishunchu. Chaimanta micunallapi, ubyanallapi, divirtirinallapi, trabajanallapica mana yuyanachu canchij (Lucas 21:34, 35). Shinallataj achca gentecunami politicocunata apoyanallapi, gentecunapaj derechocunata difindinallapi ocuparincuna. Pero ñucanchijcunaca chaicunapica mana ocuparinachu canchij. Chaita rurashpaca mana cuentata cushpami shungu ucupi politicocunata apoyai callarishun. Satanasca cunan yachashca pichca trampacunata churashpami urmachisha nin. Pero chai trampacunapi ama urmangapajca ¿imatataj rurana canchij?
¿ESPIRITUALMENTE SINCHI CANGAPAJCA IMATATAJ RURANA CANCHIJ?
Espiritualmente sinchi cangapajca Jehová Diosman mingarishpa imamanta bautizarishcatami yuyarina canchij. Bibliata estudiacushpaca chaipi nishcacunapipishmi yuyana canchij. Jehová Diospi shunguta churashpa, paipi confiashpami causana canchij. (Párrafos 14-18-ta ricui).
14. ¿Jehová Diosmanta ama caruyangapajca imatataj yuyarina canchij?
14 Jehová Diosman mingarishpa imamanta bautizarishcata yuyarishunchij. Jehová Diosta sirvingapajmi chaita rurarcanchij. Shinallataj verdadta yachacushcata seguro cangapaj imata rurashcatami yuyarina canchij. Jehová Diosmanta yachai callarishpaca shuj cꞌuyaj yaya cashcatami intindircanchij. Chaimantami paita cꞌuyai callarircanchij. Paipi tucui shunguhuan cri callarishpaca ñucanchij juchacunamantami arrepintirircanchij. Shinallataj pai millashca ruraicunata ruranata saquishpami pai munashca shina causai callarircanchij. Jehová Dios ñucanchij juchacunata perdonashcata ricushpaca cushilla, tranquilomi sintirircanchij (Salmo 32:1, 2). Shinallataj tandanacuicunamanmi ri callarircanchij, shujtaj gentecunamanpishmi paimanta huillai callarircanchij. Cunanca Jehová Diosman mingarishpa bautizarishcamantami huiñai causaita apaj ñanpi puricunchij. Chai ñanpimi purishpa catina canchij (Mateo 7:13, 14).
15. ¿Bibliataca imamantataj estudiana, chaipi nishcacunapi yuyana canchij?
15 Bibliata estudiana, chaipi nishcacunapimi yuyana canchij. Shuj yura ama urmachunca sinchi sapicunatami charina can. Ñucanchijpish Diablopaj trampacunapi ama urmangapajca sinchi fetami charina canchij. Shinallataj yura huiñashpa catijpica sapicunapishmi allpa ucujta huiñashpa catin. Chashna layallatajmi Bibliata estudiashpa catijpi, chaipi nishcacunapi yuyashpa catijpica ñucanchij feca huiñashpa catinga. Chashnami Jehová Dios yachachishcacuna valishca cashcata seguros cashun (Colosenses 2:6, 7). Shinallataj ñaupa tiempopi Diosta sirvijcuna paita cazushcamanta cushilla causashcatami yuyarina canchij. Por ejemplo, Ezequielca muscuipi shinami shuj ángel Diospaj huasita medicujta ricurca. Chai muscuipi shina imata ricushcata yuyashcamantami Ezequielca paipaj crishcacunata sinchiyachirca. ¿Ñucanchijpish Ezequielmantaca imatataj yachanchij? Jehová Diospaj mandashcacunatami tucui shunguhuan cazuna canchij (Ezequiel 40:1-4; 43:10-12). d Shinallataj Bibliapi tiyaj sinchi yachachishcacunata estudiangapaj, chaipi nishcacunapi yuyangapajmi tiempota surcuna canchij.
16. ¿Robertca Jehová Diospi shunguta churashcamantaca imatataj rurarca? (Salmo 112:7).
16 Jehová Diospi shunguta churashunchij. Rey Davidca: ‘Diospimi ñuca shunguta churashcani. Paita cꞌuyanataca manataj saquishachu’ nishpami cantarca (Salmo 57:7). Ñucanchijpish Jehová Diospimi ñucanchij shunguta churana canchij (Salmo 112:7-ta liyipai). Párrafo 9-pi parlashca huauqui Robertmanta yachashpa catishun. ¿Paica Jehová Diospi shunguta churashcataca ima shinataj ricuchirca? Anestesiata churaj doctor por si acasollami yahuarta charigrinchij nijpica, paica: “Yahuarta churanata yuyacujpica ñucaca cai ratomi hospitalmantaca risha” nircami. Robertca hospitalmanta rishpaca ima tucunataca mana mancharcachu. Imata ruranataca seguromi carca.
Sinchi feta charishpaca ima jarcaicuna ricurijpipish ahuantai tucushunmi. (Párrafo 17-ta ricui).
17. ¿Huauqui Robertmantaca imatataj yachanchij? (Fotomantapish parlapai).
17 Robertca hospitalman manaraj rishpallatajmi ima tucujpipish Jehová Diosta tucui shunguhuan cazunata ña decidishca carca. Paica Jehová Diospaj shunguta cushichingapajmi tucuita rurasha nirca. Shinallataj Bibliapi, publicacioncunapimi causaipish, yahuarpish Jehová Diospaj valishca cashcata estudiashca carca. Ashtahuanpish Jehová Diosta tucuipi cazushcamanta paillataj ayudanatami seguro carca. Ñucanchijpish ima jarcaicuna ricurijpipish Jehová Diosta tucui shunguhuan cazungapajmi esforzarina canchij.
Barac runaca Sisarata, paipaj soldadocunatapishmi caticun. (Párrafo 18-ta ricui).
18. ¿Baracmantaca imatataj yachanchij? (Página 1-pi tiyaj dibujota ricui).
18 Jehová Diospi confiashunchij. Barac runa Jehová Diosta tucuipi cazushcamanta ima tucushcata ricushun. Israelitacunaca macanacungapaj armacunata, escudocunata, shuj lanzallatapish mana charircacunachu. Chashnapish Jehová Diosca Baracmanca Sísara runahuan, cananeo soldadocunahuan macanacunaman richunmi mandarca. Pero chai soldadocunaca achca armacunatami charircacuna (Jueces 5:8). Jehová Dios yuyachijpimi Débora huarmica Baracmanca ‘Tabor urcumanta uriyashpa Sisarahuan, paipaj 900 carrocunahuan macanacugri’ nirca. Israelitacunapajca chai pambajllapi Sisarahuan macanacunaca ashtahuan sinchi layami ricurirca. Pero Baracca Jehová Diostami cazurca. Baracpaj soldadocuna Tabor urcumanta uriyacujpica Jehová Diosca sinchitami tamyachirca. Sisarapaj carrocuna lodopi trancarijpimi Baracca paicunataca mishai tucurca (Jueces 4:1-7, 10, 13-16). Jehová Dios ñucanchijtapish ayudachunca paita, paipaj organización cushca instruccioncunataca tucui shunguhuanmi cazuna canchij (Deuteronomio 31:6).
SINCHI CANGAPAJ ESFORZARISHUNCHIJ
19. ¿Espiritualmente sinchi cangapajca imamantataj esforzarisha ningui?
19 Cai millai mundopi causacushcamantami espiritualmente sinchi cangapaj esforzarishpa catina canchij (1 Timoteo 6:11, 12; 2 Pedro 3:17). Diospaj enemigocuna catirashpa llaquichijpipish, mana yuyashca trampacunata churajpipish, panda, llulla yuyaicunahuan pandachisha nijpipish, yanga cosascunapi ocuparichun obligasha nijpipish sinchita shayarishpami Jehová Diosta cazuna canchij (Efesios 4:14). Shinallataj alli yuyaiyujcuna, intindijcuna cashcatami ricuchina canchij. Catij yachaipimi Jehová Diospish, Jesuspish alli yuyaiyujcuna, intindijcuna cashcata yachashun. Paicunamanta imata yachai tucushcatapishmi ricushun.
CANTO 129 Llaquicunata ahuantashpa catishunchij
a Diabloca ñucanchijllataj ima alli cashcata, ima mana alli cashcata agllachunmi munan. Paica chai yuyaihuanmi Adanta, Evatapish pandachirca. Shinallataj Diabloca Jehová Diospaj mandashcacunata, paipaj organización cushca instruccioncunata mana cazuchunmi munan. Cai yachaipica panda yuyaicunahuan Diablo ñucanchijta ama pandachichun imata rurana cashcatami yachashun. Shinallataj Diosmanta manataj caruyana cashcatapishmi ricushun.
b Yahuar Jehová Diospaj valishca cashcata ashtahuan yachangapajca Cushilla causai libropi yachai 39-ta estudiai.
c JW.ORG paginapi “Cómo protegerse de la información falsa” nishca temata ricui.
d Ashtahuan yachangapajca La adoración pura de Jehová: ¡por fin restaurada! nishca libropi capítulos 13 y 14-ta ricui.