1. ¿Dios yachachishcacunataca imamantataj valoranchij?

 ÑUCANCHIJCA Diospaj Shimipi tiyaj yachachishcacunataca achcatami valoranchij. Chai yachachishcacunapica tucui shunguhuanmi crinchij (Romanos 10:17). Shinallataj congregacionta Jehová Dios huiñachishcatapishmi crinchij. “Congregacionmi pilar shina mana llullataca sinchita chariracun, cuidacunpish” (1 Timoteo 3:15). Ashtahuanpish congregacionta pushajcunataca tucui shunguhuanmi cazunchij. Paicunami Bibliapi nishcacunataca alli intindichincuna. Diospaj munaita rurashpa catichunpishmi alli instruccioncunata cushpa ayudancuna (Hebreos 13:17).

2. Santiago 5:​19-pi nishca shinaca ¿imamantataj cuidadota charina canchij?

² Ñucanchijca Diospaj yachachishcacunataca ñami chasquishcanchij. Shinallataj Diospaj organización cushca instruccioncunata cazungapajmi esforzarinchij. Pero mana cuidadota charishpaca llullacunapimi cri callarishun (Santiago 5:​19-ta liyipai). Diabloca Bibliapi nishcacunapi mana crichun, shinallataj Diospaj organización cushca instruccioncunata mana cazuchunmi munan (Efesios 4:14).

3. ¿Diabloca imatataj ñalla ruranga? (Efesios 6:​13, 14).

³ (Efesios 6:​13, 14-ta liyipai). Diabloca achca llajtacuna Diospaj contra tucuchunmi ñalla llullacunata nishpa paicunataca pandachinga (Apocalipsis 16:​13, 14). Paica Diosta sirvijcunatapishmi pandachisha ninga (Apocalipsis 12:9). Chaimantami ima verdad cashcata, ima llulla cashcata alli yachana canchij. Ashtahuanpish Diospaj yachachishcacunata tucuipi cazunatami yachana canchij (Romanos 6:17; 1 Pedro 1:22). Jatun llaqui punllacunapi ama huañungapajmi chaitaca rurana canchij.

4. ¿Cai yachaipica imatataj yachashun?

⁴ Bibliamanta shamuj yachachishcacuna verdad cashcata seguro  cangapaj, shinallataj Diospaj organización cushca instruccioncunata cazungapajca ishqui cualidadcunatami ricuchina canchij. Cunanmi chai cualidadcunamanta yachashun. Shinallataj cai yachaipica verdadmanta ama caruyangapaj quimsa yuyaicunata pajtachina cashcatapishmi ricushun.

¿IMA VERDAD CASHCATA YACHANGAPAJCA IMATATAJ RURANA CANCHIJ?

5. ¿Jehová Diostaca imamantataj manchana canchij?

⁵ Jehová Diostami manchana canchij. ¿Chaica imatataj nisha nin? Jehová Diosta cꞌuyashcamanta pai mana munashca ruraicunata mana rurana cashcatami nisha nin. Shinallataj Diospaj ñaupajpi alli ricuringapajca ima alli cashcata, ima mana alli cashcata, ima verdad cashcata, ima llulla cashcatapishmi yachana canchij (Proverbios 2:​3-6; Hebreos 5:14). Achca gentecunami Jehová Dios mana munashcata rurashpa causancuna. Jehová Diosta yalli paicunata manchashpaca ñucanchijpish mana allicunatami rurai callarishun. Pero chaita rurashpaca Diospaj ñaupajpica mana allimi ricurishun.

6. ¿10 runacuna manchaita charishcamantaca imatataj mana rurasha nircacuna?

⁶ Gentecunata Jehová Diosta yalli manchashpaca paicuna nishca llullacunatami cri callarishun. Jehová Dios cusha nishca allpa ima shina cashcata 12 runacuna ricunaman rijpi ima tucushcata ricushun. 10 runacunaca Jehová Diosta yallimi cananeocunataca mancharcacuna. Chaimantami paicunaca: “Chai llajtapi causajcunamari ñucanchijta yalli cꞌari cꞌaricuna. Chashna cashcamanta chai llajtaman huichiyashpapish, manataj mishai tucushunchu” nircacuna (Números 13:​27-31). Cananeocunaca israelitacunata yallimi sinchicuna carca. Pero “paicunataca mana mishai tucushunchu” nishpaca chai 10 runacunaca Jehová Diospi mana confiashcatami ricuchircacuna. Paicunaca Jehová Dios imata rurachun munashcatami yuyarina carca. Shinallataj Jehová Dios ñajalla  paicunata ima shina ayudashcatapishmi yuyarina carcacuna. Chaita yuyarishca cashpaca cananeocuna Jehová Diosta mana mishai tucushcatami cuentata cunman carcacuna. Pero Josué, Calebca chai 10 runacuna shinaca mana carcachu. Paicunaca Jehová Diospimi tucui shunguhuan crircacuna. Ashtahuanpish paipaj ñaupajpimi alli ricurinata munarcacuna. Chaimantami paicunaca israelitacunamanca: “Mandaj Dios ñucanchijta munashpaca, paimari ñucanchijtaca chai llajtaman pushanga” nircacuna (Números 14:​6-9).

7. ¿Jehová Diosta shungumanta manchangapajca imatataj rurana canchij? (Fotomantapish parlapai).

⁷ Manaraj ima decisionta japishpaca Jehová Diospaj munai maijan cashcatami yuyarina canchij. Chashnami paita shungumanta manchashcata ricuchishun (Salmo 16:8). Shinallataj Bibliata liyicushpaca: “Ñucapish chaipi cashca cashpaca, ¿imatataj ruraiman carcani?” nishpami tapurina cangui. Por ejemplo, Canaanman rij 10 runacunata canpish uyacushca cashpaca, ¿imatataj ruranguiman carca? ¿Paicuna nishcacunata crishpa canpishchu mancharinguiman carca? ¿O Jehová Diosta cꞌuyashcamanta paipaj ñaupajpi alli ricurinata mashcanguimanchu carca? Tucui israelitacunami Josué y Caleb verdadta nicushcataca mana crircacuna. Chaimantami paicunaca Jehová Dios cusha nishca allpamanca mana yaicui tucurcacuna (Números 14:​10, 22, 23).

8. ¿Ima cualidadtataj ricuchina canchij?

⁸ Humildadtami ricuchina canchij. Jehová Diosca ima verdad cashcataca humildecunamanmi yachachin (Mateo 11:25). Diosmanta yachai callarishpaca mana jatun tucushpami shujtajcuna ñucanchijta ayudachun saquircanchij (Hechos 8:​30, 31). Shinapish mana cuidadota charishpaca jatunmi tucushun. Pero jatun tucushpaca ñucanchij yuyashcacuna Bibliapi nishcacunahuan, Diospaj organización cushca instruccioncunahuan igual cashcatami yuyai callarishun.

9. ¿Humildecuna cashpa catingapajca imatataj rurana canchij?

⁹ ¿Humildecuna cashpa catingapajca imatataj rurana canchij? Jehová Diospaj ñaupajpi uchillacuna shina ricurishcatami yuyarina canchij (Salmo 8:​3, 4). Shinallataj Jehová Diostami humilde shunguhuan paimanta yachashpa catingapaj ayudachun mañana canchij. Chaita rurajpimi Jehová Diosca ñucanchij yuyaicuna paipaj yuyaicunata yalli cashcata ama yuyachun ayudanga. Shinallataj Bibliata liyicushpaca Jehová Dios imamanta mana jatun tucushca cachun munashcata, ashtahuanpish imamanta humildecuna cachun munashcatami ricuna canchij. Jatun asignacioncunata chasquishpapish ama jatun tucungapajmi esforzarishpa catina canchij.

¿VERDADMANTA AMA CARUYANGAPAJCA IMATATAJ RURANA CANCHIJ?

10. ¿Jehová Diosca paipaj pueblota pushachunca picunallatataj utilizashca?

¹⁰ Jehová Diospaj organizacionpimi siempre confiana canchij. Jehová Diosca israelitacunata pushachunca Moisestapish, Josuetapishmi churarca (Josué 1:​16, 17). Israelitacuna Jehová Dios churashca pushajcunata cazushpaca tranquilo, cushillami causarcacuna. Shinallataj punta siglopi tiyaj congregacioncunataca 12 apostolcunami pushajcuna carca (Hechos 8:​14, 15). Chai qꞌuipaca Jerusalenpi caj ancianocunapishmi paicunataca ayudai callarircacuna. Huauqui panicuna cai pushajcunata cazushcamantami “crishcapi sinchiyarishpa, punllanta mirarishpa catircacuna” (Hechos 16:​4, 5). Cunan punllacunapipish Diospaj organización cushca instruccioncunata cazujpica Yaya Diosca achcatami bendicianga. Pero ¿Jehová Dios churashca pushajcunata mana cazujpica Jehová Diosca ima  shinataj sintiringa? Chaita yachangapajca israelitacuna Jehová Dios cusha nishca allpaman ricushpa ima tucushcata ricushun.

11. ¿Israelitacuna Jehová Dios churashca pushajta mana cazushcamantaca imataj tucurcacuna? (Fotomantapish parlapai).

¹¹ Israelitacunaca Jehová Dios cusha nishca allpaman ricushpaca pai churashca pushaj Moisestami criticai callarircacuna. Paicunaca: ‘Mana Moisesllachu jucha illaj can. Tucui israelitacunami jucha illajcuna can. Mandaj Diosca paicunapaj chaupipimi can’ nircacunami (Números 16:​1-3). Chaica ciertomi carca. Jehová Diospajca ‘tucui israelitacunami’ jucha illajcuna carca. Pero Jehová Diosca Moisesllatami israelitacunata pushachun churashca carca (Números 16:28). Chaimantami Moisesta criticashpaca Jehová Diosta criticacushca shina carca. Paicunaca Jehová Diospaj munai maijan cashcataca mana intindircacunachu. Ashtahuanpish jatun tucushcamantami paicunapish autoridadta charisha nircacuna. Jehová Diosca chai jatun tucushcacunatapish, paicunata apoyajcunatapishmi tucuchirca (Números 16:​30-35, 41, 49). Cunan punllacunapipish Jehová Dios churashca pushajcunata mana cazujcunaca Diospaj ñaupajpica mana alli ricurincunachu.

12. ¿Jehová Diospaj organizacionpica imamantataj confiana canchij?

¹² ¿Jehová Diospaj organizacionpica imamantataj confiana canchij? Diospaj organizacionta pushajcuna Bibliapi nishcacunata ashtahuan alli intindina cashcata o Diospaj organizacionpi huaquin cambiocunata rurana cashcata cuentata cushpaca, paicunaca ratomi chai cambiocunata rurancuna (Proverbios 4:18). Cai huauquicunaca Jehová Diospaj ñaupajpi alli ricurisha nishcamantami chai cambiocunata rurancuna. Ashtahuanpish paicunaca Bibliapi nishcacunata ricushpami decisioncunata agllancuna. Ñucanchijpish imata decidingapajca chaitami rurana canchij.

13. a) ¿‘Alli yachaica’ imataj can? b) ¿‘Alli yachaica’ ima shinataj ñucanchijta ayudan?

¹³ “Alli yachaita catirai” (2 Timoteo 1:13).  ¿‘Alli yachaica’ imataj can? Bibliapi yachachishcacunami can. Jesús imalla yachachishcacunapishmi ‘alli yachaica’ can (Juan 17:17). Ñucanchijca tucui shunguhuanmi Biblia nishcacunapi crinchij. Ashtahuanpish Jehová Diospaj organizacionca chai yachachishcacunata catichunmi yachachishca. Chaita rurashpaca cushillami causashun.

14. ¿Maijan huauqui panicunaca ‘alli yachaicunamantaca’ ima shinataj caruyarcacuna?

¹⁴ ¿‘Alli yachaicunamanta’ caruyashpaca imataj tucushun? Punta siglopi ima tucushcata ricushun. Maijan huauqui panicunaca apóstol Pabloca “Diospaj punllaca ñami chayamurca” nishpa shuj cartata cachashcatami cri callarircacuna. Paicunaca apóstol Pablo chai cartata quillcashcata mana seguros cashpapish chaipi nishcacunapimi crircacuna. Ashtahuanpish shujtajcunamanpish chaipi nishcacunatami parlai callarircacuna. Pero chai panda yuyaicunapi ama cringapajca apóstol Pablo paicunahuan cashpa imata yachachishcatami yuyarina carcacuna (2 Tesalonicenses 2:​1-5). Pabloca tucui ima uyarishcata ama crichunmi aconsejashca carca. Shinallataj cutin ama panda yuyaicunapi crichunmi paicunaman cachashca tucuri cartapica: “Ñucaca Pablomi cani. Cai saludotaca cancunapajmi ñuca propio maquihuan quillcani. Ñuca quillcashca cashcata yachachunmi ñuca cartacunapica siempre chashna quillcani” nishpa quillcarca (2 Tesalonicenses 3:17).

15. ¿Huaquin noticiacuna verdad laya uyarijpica imatataj rurana canchij? (Shuj ejemplota churashpa parlai; fotocunamantapish parlapai).

¹⁵ ¿Tesalonicapi caj huauqui panicunaman Pablo quillcashca cartamantaca imatataj yachanchij? Ñucanchijpish huaquin noticiacunata uyashpaca mancharishcachari saquirishun. Pero chai noticiacuna Bibliapi nishcacunahuan mana de acuerdo cajpica cuidadotami charina canchij. Ñaupa Unión Soviética llajtapi ima tucushcata ricushun. Millai gentecunami central mundialmanta huauquicuna shuj cartata cachashcata crichisha nircacuna. Chai cartapica huaquin huauquicunataca Diospaj organizacionta saquishpa shujtaj organizacionta callarichichunmi animacurca. Pero chai carta Central Mundialmanta huauquicuna cachashca laya uyarijpipish Jehová Diosta alli sirvij  huauqui panicunaca chaipi nishcacunapica mana crircacunachu. ¿Imamanta? Paicunaca chai cartapi nishcacuna Bibliapi nishcacunahuan mana de acuerdo cashcatami cuentata curcacuna. Cunan punllacunapipish millai gentecunaca ñucanchijta pandachingapaj, huauqui panicunamantapish caruyachingapajmi tecnologiata utilizancuna. Pero ñucanchij yuyaita maijanpish cambiachunca mana saquinachu canchij. Chaipajca imalla uyashcacuna, imalla liyishcacuna Bibliapi nishcacunahuan de acuerdo cachunmi ricuna canchij (2 Tesalonicenses 2:2; 1 Juan 4:1).

16. Romanos 16:​17, 18-pi nishca shinaca ¿maijan huauqui o pani Diospaj yachachishcacunamanta caruyajpica imatataj rurana canchij?

¹⁶ Jehová Diosta cazujcunamantaca mana caruyanachu canchij. Jehová Diosca tucui huauqui panicuna shuj shinalla paita adorachunmi munan. Paita chashna adorangapajca paipaj yachachishcacunamantaca mana caruyanachu canchij. Jehová Diospaj yachachishcacunamanta caruyajcunaca huauqui panicunatami chꞌicanyachincuna. Ñucanchijpish Diospaj ñanmanta mana caruyasha nishpaca paicunahuanca mana tandanacunachu canchij (Romanos 16:​17, 18-ta liyipai).

17. ¿Diospaj yachachishcacunamantaca imamantataj mana caruyana canchij?

¹⁷ Ima verdad cashcata seguros cashpa, shinallataj chai verdadmanta mana caruyashpaca Yayitu Jehová Dioshuanca allimi apanacushun (Efesios 4:​15, 16). Shinallataj Diabloca llullacunahuanca mana pandachi tucungachu. Jatun llaqui punllacuna shamujpipish Jehová Diosmi ñucanchijta quishpichinga. Chaimanta Diospaj yachachishcacunamanta ama caruyashunchij. Chaita rurajpimi “sumaj causaita cuj Diosca” siempre ñucanchijhuan canga (Filipenses 4:​8, 9).