1, 2. a) ¿Jesusca paipaj discipulocunamanca imatataj nirca? b) ¿Imamantataj Jesuspaj discipulocunaca tentacionpi urmarcacuna? (Fotocunamantapish parlapai).

 JESUSCA: “Runaca allita ruranatami munan. Shinapish paipaj aichaca shaicurinllami” nircami (Mateo 26:41b). a Chaita nishpaca Jesusca gentecuna juchayujcuna cashcamanta pandarijllacuna cashcatami nicurca. Shinallataj Jesusca mana ñucanchijllapitaj confiarina cashcatapishmi yachachisha nirca. Jesús chai shimicunata manaraj nijpica paipaj discipulocunaca: “Cantaca manataj saquishunchu” nishcacunami carca (Mateo 26:35). Pero paicunaca tentacioncuna ricurijpi allita rurashpa catina mana jahualla cashcataca mana cuentata curcacunachu. Chaimi Jesusca paicunataca: “Rijcharishca caichij. Juchapi ama urmangapajpish Diosta mañaraichij” nirca (Mateo 26:41a).

² Jesusta prezu japijpica, ¿paipaj discipulocunaca imatataj rurarcacuna? Paicunaca mana rijcharishca cashcamantami tentacionpi urmarcacuna. Mana yuyashcapi tentación ricurijpica paicunaca mana rurasha nishcatami rurarcacuna. Chashnami Jesusta saquishpa rircacuna (Mateo 26:56).

3. a) ¿Jehová Diosmanta mana caruyasha nishpaca imamantataj mana ñucanchijllapitaj confiana canchij? b) ¿Cai yachaipica imatataj yachashun?

³ Mana ñucanchijllapi confianachu canchij. Ñucanchijca Diosmanta imapish caruyachichunca mana saquisha ninchijchu. Pero juchayujcuna cashcamantami maipica mana allita ruranata munashun (Romanos 5:12; 7:​21-23). Mana yuyashcapi tentacioncuna ricurijpica chaicunata mishanaca sinchi layami ricuringa. Pero Jehová Diosmanta, Jesusmanta mana caruyasha  nishpaca Jesús ima nishcatami yuyarina canchij. Shinami siempre rijcharishca cashun. Cai yachaipica tentacioncunapi ama urmangapaj ima ruraicunamanta caruyana cashcatami ricushun. Qꞌuipaca chaicunapi ama urmangapaj ima laya jarcarina cashcatami ricushun. Shinallataj espiritualmente rijcharishca catingapaj imata rurana cashcatami yachashun.

¿IMACUNAMANTATAJ CARUYANA CANCHIJ?

4, 5. ¿Huaquin mana alli ruraicuna mana jatun juchacuna shina ricurijpipish imamantataj chaicunamantapish cuidarina canchij?

⁴ Huaquin mana alli ruraicunaca mana jatun juchachu can. Pero chaicunata rurashpaca Jehová Diosmantami caruyai tucunchij. Ashtahuanpish chai mana alli ruraicunaca jatun juchacunapipishmi urmachi tucun.

⁵ Tucuicunami tentacioncunahuan chꞌimbapurana canchij. Pero cada unomi shujtaj shujtaj mana alli munaicunata charinchij. Por ejemplo, maijancunaca huainayana jatun juchapi ama urmangapajmi esforzaricuncuna. Shujtajcunaca paicunapaj charishcacunata japirishpa mapa cosascunata ama rurangapaj, pornografiata ama ricungapajpishmi esforzaricuncuna. Cutin maijancunaca ama jatun tucungapaj, ama ñapish pꞌiñaringapaj, runacunata ama manchangapajpishmi esforzaricuncuna. Chaimantami Santiagoca: “Cada unomi paipaj quiquin munaillataj umajpi, shuj trampata shina churajpi llaquipi urmai tucun” nirca (Santiago 1:14).

6. ¿Imatataj tucuicuna reconocina canchij?

⁶ ¿Can ima mana alli munaicunata charishcata yachanguichu? “Ñucaca mana alli munaicunataca mana charinichu. Chaimi juchapica nunca mana urmasha” nishpaca mana yuyanachu canchij (1 Juan 1:8). Apóstol Pablo nishca shinaca espiritualmente sinchi cashpapish tucuicunami mana alli ruraicunapi ama urmangapaj cuidarina canchij (Gálatas 6:1). Chaimantami imapi pandarijllacuna cashcata humildadhuan reconocina canchij (2 Corintios 13:5).

7. ¿Juchapi ama urmangapajca ima shinataj cuidarina canchij? (Shuj ejemplota churashpa parlai).

⁷ Ima mana alli munaicunata charishcata cuentata cushpaca, ¿imatataj rurana canchij? Chaicunapi ama urmangapajmi esforzarishpa catina canchij. Caipi yuyashun. Ñaupa ciudadcunata cuidangapajca tucui muyundijtami pircajcuna carca. Pero, tucui muyundijta pircashca cajpipish mana cuidadota charijpica enemigocunaca pungucunatami chaimanca yaicui tucurcacuna. Chaimantami gentecunaca tucuimanta yallica pungucunata cuidana carcacuna. Ñucanchijcunapish pungucunata  cuidaj shinami mana alli munaicunapi ama urmangapaj cuidarina canchij (1 Corintios 9:27).

¿IMA SHINATAJ CUIDARI TUCUNCHIJ?

8, 9. Proverbios 7-pi parlashca jovenca juchapi ama urmangapajca ¿imatataj mana rurana carca? (Proverbios 7:​8, 9, 13, 14, 21).

⁸ ¿Tentacioncunapi ama urmangapajca imatataj rurana canchij? Chaipajca Proverbios capítulo 7-pi nishcatami yachana canchij. Chaipi nishca shinaca shuj jovenca huainayaj huarmihuanmi juchapi urmarca. Verso 22-pi nishca shinaca chai jovenca “ari nishcahuanmi” chai huarmita catishpa rirca. Shinapish punta versocunapica chai joven asha asha juchapi urmashcatami intindichin.

⁹ ¿Chai jovenca ima shinataj juchapi urmarca? Puntapica paica tuta horasmi chai huarmipaj huasi cꞌuchullata pasarca. Chai qꞌuipaca ‘pai ricushca ñanmanta chꞌimbashpami’ chai huarmipaj huasiman rirca (Proverbios 7:​8, 9-ta liyipai). Huarmi ricurijpica mana chaimanta tigrashpa rircachu. Ashtahuanpish paita muchachunmi saquirca. Shinallataj chai huarmica alli huarmi cashcata crichingapajmi ‘Dioshuan alli cangapajmi sacrificiocunata cumuni’ nirca (Proverbios 7:​13, 14, 21-ta liyipai). Chai jovenca juchapi ama urmangapajca tucui chaicunataca mana ruranachu carca.

10. Proverbios libropi parlaj joven shinaca, ¿ima shinataj ñucanchijpish juchapi urmai tucunchij?

¹⁰ Mana cuidadota charishpaca tucuicunami juchapi urmai tucunchij. Maijan huauqui o panica jatun juchapi urmashca qꞌuipaca “juchapi urmagrishcataca mana cuentata curcanichu” nishpachari yuyanga. Pero alli yuyarishpaca asha asha juchapi urmashcatami cuentata cunga. Tal vez paica mana alli amigocunahuanmi tandanacurca. Mana cashpaca mana alli diversioncunatami agllashcanga. Internetpipish mana alli paginacunamanmi yaicushcanga. Mana rina lugarcunamanpishmi rishcanga. Shinallataj Yaya Diosta mañanata, Bibliata liyinata, tandanacuicunaman rinata, predicacionman llujshinatapishmi saquishcanga. Chaimi Proverbios libropi parlaj joven shina asha asha juchapi urmashcanga.

11. Juchapi ama urmangapajca, ¿imatataj rurana canchij?

¹¹ Caipi yachashca shinaca juchapi ama urmangapaj esforzarina cashpapish juchaman apaj ruraicunamantapishmi caruyana canchij. Salomonca chai jovenmanta y chai huainayaj huarmimanta parlashpaca chaitami yachachisha nirca. Chaimantami paica chai huarmimanta parlashpaca: “Paipajman rishpaca chingaringuimari” nirca (Proverbios 7:25). Shinallataj Salomonca: “Chai huarmipajmanca amataj ringuichu. Pai causacuj huasi pungullamanpish amataj cꞌuchuyanguichu” nircami (Proverbios 5:​3, 8). Shinashpaca juchaman apaj tucui ruraicunamantami caruyana canchij. b Por ejemplo, huaquin cosascunata ruranaca maijan huauqui panicunapajca alli layami ricuringa. Pero chai cosascuna juchaman apai tucushcata cuentata cushpaca chaicunataca mana ruranachu canchij (Mateo 5:​29, 30).

12. Jobca juchapi ama urmangapajca, ¿imatataj decidirca? (Job 31:1).

¹² Juchaman apaj ruraicunamanta caruyangapajca Jobpaj ejemplomantami yachana canchij. Paica shujtaj huarmicunata mapa munaicunahuan ama ricungapajmi esforzarirca. Chaimi paica: “Ñuca ñahuicunahuanca ima mana allita ama ricungapajmi ari ninacurcanchij” nirca (Job 31:​1-ta liyipai). Chaita ruranami Jobtaca huainayana juchapi ama urmachun ayudarca. Ñucanchijpish juchaman apaj ruraicunamanta caruyanatami ñucanchij shungupi decidina canchij.

13. ¿Ñucanchij yuyaicunataca imamantataj cuidana canchij? (Fotocunamantapish parlapai).

 ¹³ Shinallataj ñucanchij yuyaicunatapishmi cuidana canchij (Éxodo 20:17). Maijancunaca jatun juchapi urmana mana alli cashcataca allimi yachancuna. Shinapish paicunaca: “Ñucanchij yuyaillapi mana alli cosascunata ruracushcata yuyanaca mana juchachu can” nishpami yuyancuna. Pero chashna yuyanaca mana allichu can. Mana alli cosascunata rurana yuyailla causashpaca chai cosascunataca ashtahuanmi ruranata munashun. Shinaca mana alli yuyaicuna ñapish shamujpica, ¿imatataj rurana canchij? Chaipi yuyashpa saquirinapaj randica alli yuyaicunata charingapajmi esforzarina canchij. Mapa munaicunaca mapa yuyaicunamantami shamun. Chaimantami mapa yuyaicuna ñucanchij shungupi sapiyachunca mana saquina canchij. Mapa munaicunamanta jarcarinata mana yachashpaca jatun juchapimi urmai tucushun (Filipenses 4:8; Colosenses 3:2; Santiago 1:​13-15).

14. ¿Tentacioncunapi ama urmangapajca imatataj ashtahuan rurana canchij?

¹⁴ ¿Tentacioncunapi ama urmangapajca imatataj ashtahuan rurana canchij? Jehová Dios mandashcacunata cazuna ñucanchij allipajllataj cashcatami tucui shunguhuan crina canchij. Mana alli yuyaicunamanta, mana alli munaicunamanta jarcarinaca sinchimi cai tucun. Pero jarcarinata yachashpaca cushillami causashun.

15. ¿Imamantataj alli munaicunata, alli yuyaicunatapish charingapaj esforzarina canchij?

¹⁵ Tucuicunami alli munaicunata, alli yuyaicunata charingapaj esforzarina canchij. Shinallataj millai ruraicunata millanachishpa alli ruraicunata ruranatami yachana canchij (Amós 5:15). Chaita rurashpaca siempremi allita ruranata munashun. Shinallataj juchaman apaj ruraicunamantapishmi caruyashun. Ashtahuancarin tentacioncuna mana yuyashcapi ricurijpipish chaicunapica mana urmashunchu.

16. Tentacioncunapi ama urmangapajca, ¿imamantataj Diospajta ruranapi ocuparina canchij? (Fotocunamantapish parlapai).

¹⁶ Alli yuyaicunata, alli munaicunata charingapajca ¿imatataj rurana canchij? Diospajta ruranapimi ocuparina canchij. Reunioncunaman  ringapaj, predicacionmanpish llujshingapaj esforzarishpaca Diospaj ñaupajpi alli ricurinata munashun. Chashnami tentacioncuna ricurijpica chaicunapica mana jahualla urmashun (Mateo 28:​19, 20; Hebreos 10:​24, 25). Bibliatapishmi estudiana canchij. Imalla liyishcapipishmi yuyana canchij. Chaita rurashpami allicunata ruranata munashun, millai ruraicunatapishmi pꞌiñashun (Josué 1:8; Salmo 1:​2, 3; 119:​97, 101). Jesús nishcatapishmi yuyarina canchij. Paica: “Juchapi ama urmangapajca Diosta mañaraichij” nircami (Mateo 26:41). Shinashpaca Yayitu Diosta mañangapaj tiempota surcushunchij. Chashnami paipaj ayudata chasquishun. Paipaj shunguta cushichingapajpishmi esforzarishun (Santiago 4:8).

CUIDARISHPA CATISHUNCHIJ

17. ¿Apóstol Pedropajca imataj sinchi ricurirca?

¹⁷ Huaquin mana alli munaicunata, mana alli yuyaicunataca mishai tucushunmi. Shinapish huaquin mana alli munaicunamanta, mana alli yuyaicunamanta jarcarinaca ashtahuan sinchichari canga. Apóstol Pedropi yuyashun. Paica runacunata manchashcamantami quimsa cutin: ‘Jesustaca mana rijsinichu’ nirca (Mateo 26:​69-75). Shinapish chai qꞌuipaca Pedroca mana manchashpami Sanedrinpaj ñaupajpi Jesusmanta huillarca. Pedroca runacunata ña mana manchaj cashcatami yuyashcanga (Hechos 5:​27-29). Shinapish huaquin huatacuna qꞌuipaca circuncisionta rurachishca judiocunata manchashcamantami Pedroca mana judío caj huauqui panicunahuan micunata saquirca (Gálatas 2:​11, 12). Shinaca runacunata manchana yuyaica cutinmi tigrashca carca. Pedro runacunata manchanata saquishcataca mana yachanchijchu.

18. Mapa ruraicunapi ama urmangapajca, ¿imamantataj cuidarishpa catina canchij?

¹⁸ Ñucanchijpish huaquin mapa munaicunata ña mishashcatachari yuyashun. Shinapish chai mapa munaicunaca cutinmi ricuri tucun. Shuj huauquica: “Ñucaca 10 huatacunatami pornografiataca mana ricurcani. Chaimi chai mapa munaita ña mishashcata yuyarcani. Shinapish chai mapa munaica millai animal ñucata japingapaj pacalla chapacuj shinami carca” nircami. Paica paraíso shamungacama chai mapa munaita mishangapaj punllata esforzarishpa catina cashcatami cuentata curca. Shinallataj chai mapa munaita mishashpa catichunca paipaj  huarmipish, congregacionpi caj ancianocunapishmi ayudarcacuna.

19. Shuj mapa munaita mana mishai valishpaca ¿imatataj rurana canchij?

¹⁹ Mana alli munaicunata mana mishai valishpaca, ¿juchapi ama urmangapajca imatataj rurana canchij? Jesús ima nishcatami rurana canchij. Paica: “Rijcharishca caichij” nircami. Shuj mana alli munaita ña mishashcata yuyashpapish juchaman apaj ruraicunamanta caruyangapajmi esforzarishpa catina canchij (1 Corintios 10:12). Chai mapa munaita ama charingapaj imata ruranataca ñachari yachangui. Shinashpaca chaita rurashpami catina cangui. Proverbios 28:​14-pi nishca shinaca juchapi ama urmangapaj punllanta cuidarishpaca cushillami causashun (2 Pedro 3:14).

¿IMAMANTATAJ RIJCHARISHCA CATINA CANCHIJ?

20, 21. a) ¿Imamantataj rijcharishca catingapaj esforzarina canchij? b) Tentacioncunapi ama urmangapaj esforzarijpica ¿Jehová Diosca ima shinataj ñucanchijtaca ayudanga? (2 Corintios 4:7).

²⁰ ¿Juchapi ama urmangapaj esforzarishpa catinaca valishcachu can? Ari. Juchata rurashpaca ashacamallami cushilla causashun. Pero Jehová Diospaj mandashcacunata cazushpaca huiñai huiñaitami cushilla causashun (Hebreos 11:25; Salmo 19:8). Jehová Diosca pai munashcata rurashpa cushilla causachunmi ñucanchijcunataca rurashca (Génesis 1:27). Chaita rurashpallami shuj limpio concienciata charishun. Ashtahuanpish huiñai causaitapishmi charishun (1 Timoteo 6:12; 2 Timoteo 1:3; Judas 20, 21).

²¹ Ñucanchijca imapipish pandarijllacunami canchij. Pero, Jehová Diosmi ñucanchijta ayudangapaj listo can (2 Corintios 4:​7-ta liyipai). Bibliapi nishca shinaca Jehová Diosca paipaj poderta cushpami ñucanchijta ayudasha nin. Pero tentacioncunapi ama urmangapajca ñucanchijpish esforzarishpami catina canchij. Chaita rurajpimi Jehová Diosca fuerzata cushpa ñucanchij mañashcacunata cutichinga (1 Corintios 10:13). Jehová Diospaj ayudallahuanmi tentacioncunapi ama urmangapaj rijcharishca catishun.