1, 2. ¿Sadocca pitaj carca? (1 Crónicas 12:​22, 26-28).

 ÑAUPA punllacunapi ima tucushcata yuyarishunchij. 340.000 yalli israelitacunami Israelta mandaj cachun Davidta churangapaj tandanacushcacuna carca. Paicunaca quimsa punllacunatami sumajta parlanacushpa, cantocunahuan Jehová Diosta alabashpa, asishpa Hebrón cꞌuchullapi pasarcacuna (1 Crónicas 12:39). Paicunapurapica Sadoc shuti jovenmi carca. Paica mana rijsishca jovenmi carca. Pero Jehová Diosca paitaca allimi rijsirca. Ashtahuanpish ñucanchijcunapish paimanta yachachunmi munarca (1 Crónicas 12:​22, 26-28-ta liyipai). ¿Sadocca pitaj carca?

² Sadocca sacerdotemi carca. Paica sacerdotecunata mandaj Abiatarhuanmi trabajaj carca. Shinallataj Jehová Diosca Sadocmanca achca sabiduriatami curca. Chaimi paica Jehová Diospaj munai maijan cashcata alli intindij carca (2 Samuel 15:27). Gentecunaca alli consejocunata cuchunpishmi Sadocpajman rijcuna carca. Ashtahuancarin Sadocca mana manchaj runami carca. Cunanmi chaimanta ashtahuan yachashun.

3. a) ¿Imamantataj mana manchajcuna cana canchij? b) ¿Cai yachaipica imatataj yachashun?

³ Cai tucuri punllacunapica Diabloca Diosta sirvijcunataca ashtahuan ashtahuanmi llaquichishpa caticun (1 Pedro 5:8). Jehová Dios Diablotapish, millai gentecunatapish tucuchingacamaca mana manchajcunami cana canchij (Salmo 31:24). Cai yachaipica Sadoc shina mana manchajcuna cashcata ima shina ricuchi tucushcatami yachashun.

DIOSPAJ GOBIERNOTA APOYASHUNCHIJ

4. ¿Diospaj Gobiernota apoyangapajca imamantataj mana manchajcuna cana canchij? (Fotomantapish parlapai).

⁴ Jehová Diosta sirvijcunaca tucui shunguhuanmi Diospaj Gobiernota apoyana canchij. Pero chaita rurangapajca mana manchaj  canami minishtirin (Mateo 6:33). Por ejemplo, cai millai mundopi Jehová Diospaj mandashcacunata cazungapaj, Diospaj Gobiernomanta alli huillaicunata huillashpa catingapajca mana manchajcunami cana canchij (1 Tesalonicenses 2:2). Politicapi ama chagruringapajpishmi mana manchajcuna cana canchij (Juan 18:36). Por ejemplo, politicapi mana chagrurisha nishcamanta o soldadocuna mana tucusha nishcamantami achca huauqui panicunataca dimastij llaquichishcacuna. Cutin shujtaj huauqui panicunaca trabajo illajmi saquirishcacuna.

5. ¿Sadocca Davidta apoyangapajca imamantataj mana manchaj cana carca?

⁵ Sadocca David rey tucushcamanta cushicungapajlla Hebronmanca mana rircachu. Ashtahuanpish enemigocunahuan macanacunaman ringapajpishmi allichirishca carca (1 Crónicas 12:38). Paica enemigocunamanta israelitacunata difindingapaj rey David maiman rijpipish paihuanmi risha nirca. Sadocca ima shina macanacunataca mana tanto yachashcangachu. Chashnapish paica mana manchajmi carca.

6. ¿Sadocca Davidmantaca imatataj yacharca? (Salmo 138:3).

⁶ ¿Sadocca manchaita ama charingapajca imatataj rurarca? Paica Jehová Diosta alli sirvijcunamantami mana manchaj canata yacharca. Paicunaca sinchi, mana manchajcunami carcacuna. Por ejemplo, Davidpi yuyashun. Paica macanacuicunapica mana manchashpami Israel soldadocunata alli pushaj carca. Chaimantami David rey tucujpica israelitacunaca cushilla carcacuna (1 Crónicas 11:​1, 2). Davidca Jehová Diospimi tucui shunguhuan confiaj carca. Enemigocuna paita llaquichisha nijpipish Davidca Jehová Diospaj ayudatami mashcaj carca (Salmo 28:7; Salmo 138:​3-ta liyipai). Shinallataj Sadocca Jehoiadá runamanta, paipaj churi Benayamanta, 22 jatun familiacunata pushaj  runacunamantapishmi mana manchaj canata yacharca (1 Crónicas 11:​22-25; 12:​26-28). Chai pushajcunaca Davidtaca tucuipimi apoyarcacuna.

7. a) ¿Cunan punllacunapica picunataj mana manchajcuna cashcata ricuchishcacuna? b) ¿Huauqui Nsilumantaca imatataj yachanchij?

⁷ Jehová Diosta sirvijcuna paipaj Gobiernota ima shina apoyashcata yachashpaca fuerza, animotami charishun. Por ejemplo, ñucanchijta mandaj Jesucristoca cai pachapaj ruraicunapica mana chagrurircachu (Mateo 4:​8-11; Juan 6:​14, 15). Paica Jehová Diospi confiashcamantami ahuantashpa catingapaj fuerzata charirca. Shinallataj cunan punllacunapica achca jovencunami Jehová Diosta cꞌuyashcamanta cuartelmanca mana rishcacuna, politicapipish mana chagrurishcacunachu. Cashna laya experienciacunata ricusha nishpaca jw.org paginapimi mashcai tucungui. a

HUAUQUI PANICUNATA AYUDASHUNCHIJ

8. ¿Anciano huauquicunaca mana manchajcuna cashcataca ima shinataj ricuchincuna?

⁸ Diosta sirvijcunaca ñucanchijpurami cushilla ayudanacunchij (2 Corintios 8:4). Pero caishuj chaishuj ayudanacungapajca huaquinpica mana manchaj canami minishtirin. Por ejemplo, shuj guerra tiyajpica ancianocunaca huauqui panicunata animangapaj, shinallataj espiritualmente, materialmentepish ayudangapajmi mana manchajcuna cana can. Ancianocunaca Diospaj ovejitacunataca achcatami cꞌuyancuna. Chaimantami huaquinpica paicunapaj causaita peligropi churashpa paicunata ayudangapaj listos cancuna (Juan 15:​12, 13). Chashnami paicunaca Sadoc shina mana manchajcuna cashcata ricuchincuna.

9. 2 Samuel 15:​27-29-pi nishca shinaca ¿Davidca Sadoctaca imata rurachuntaj mandarca? (Fotomantapish parlapai).

⁹ Davidpaj churi Absalonca mandanata quichungapajca paipaj yayatami huañuchisha nirca (2 Samuel 15:​12, 13). Chaimi Davidca Jerusalenmantaca  utca miticushpa rina carca. Paica paita sirvijcunataca: ‘¡Absalonpaj maquimantaca mana quishpiri tucushunchu! Jacuchij, jatarishpa miticugrishunchij’ nirca (2 Samuel 15:14). Shinapish Davidca Jerusalenpi Absalón imata ruracushcata yachangapaj pi chaipi saquirina cashcata cuentata curca. Chaimantami Sadoctapish, shujtaj sacerdotecunatapish Jerusalenman tigrachishpa cacharca (2 Samuel 15:​27-29-ta liyipai). Jerusalenman tigranaca peligrosomi carca. Chaimantami paicunaca cuidadohuan rina carcacuna. Absalonca paillapi yuyaj, yallitaj pꞌiñaj, paipaj nishcacunata mana pajtachij runami carca. Sadocpish, caishuj sacerdotecunapish Davidta ayudacushcata yachaj chayashpaca Absalonca paicunatami huañuchinman carca.

10. ¿Sadocpish, paihuan cajcunapish Davidtaca ima shinataj ayudarcacuna?

¹⁰ Davidca ama huañungapajca Sadoctapish, Husaitapish paita ayudachunmi mañarca. Husaica Davidpaj alli amigomi carca (2 Samuel 15:​32-37). David mandashca shinami Husaica Absalonpaj amigo tucurca. Chaimi paica Davidta japingapaj imallata rurana cashcata Absalonmanca nirca. Absalonca Husái nishcatami rurarca. Chaimi Davidca macanacungapaj allichiri tucurca. Husaica Absalón imata ruragrishcataca Sadocmanpish, Abiatarmanpishmi huillarca (2 Samuel 17:​8-16). Chai huashaca paicunaca Davidmanmi chaitaca huillarcacuna (2 Samuel 17:17). Jehová Diospaj ayudahuan, shinallataj Sadocpaj, caishuj sacerdotecunapaj ayudahuanpishmi Davidca quishpiri tucurca (2 Samuel 17:​21, 22).

11. ¿Llaquipi caj huauqui panicunata ayudachun mañajpica Sadoc shina mana manchajcuna cashcataca ima shinataj ricuchishun?

¹¹ ¿Huauqui panicunata jatun llaquicuna japijpi Sadoc shina mana manchashpa paicunata ayudangapajca imatataj rurana canchij? 1) Instruccioncunatami catina canchij. Sucursalmanta cachashca instruccioncunata cazushpaca tucuicuna tandalla cachunmi ayudashun (Hebreos 13:17). Jatun llaquicuna manaraj tiyajpi, shinallataj llaquicuna tiyai horas imata ruranata  yachangapajca ancianocunaca instruccioncunatami chasquincuna. Paicunaca chai instruccioncunatami alli yachana can (1 Corintios 14:​33, 40). 2) Mana manchashpa, alli yuyashpami imatapish rurana canchij (Proverbios 22:3). Mana alli yuyashpa imatapish rurashpaca llaquipimi urmashun. Chaimantami puntapica alli yuyanaraj canchij. 3) Jehová Diospimi confiana canchij. Paica tucuicunamanta sustarishcamantami tucuicuna alli cachun munan. Chaimi paica ñucanchij causaita cuidashpa huauqui panicunata ayudachun imata ruranata ricuchin.

12, 13. ¿Viktormanta, Vitalimantaca imatataj yachanchij? (Fotomantapish parlapai).

¹² Ishqui ancianocunapaj ejemplomanta yachashun. Ucrania llajtapi guerra tiyajpi huauqui Víktor y huauqui Vitalica huauqui panicunamanmi micunata, yacuta apajcuna carca. Huauqui Viktorca: “Tucui ladocunapimi huauqui panicunapajca micunata mashcajcuna carcanchij. Micunata mashcacushpaca huaquinpica ñucanchij cꞌuchullapimi disparocunata uyaj carcanchij. Shuj tiendata charij huauquimi huauqui panicuna suficiente micunata charichun paipaj tiendapi tiyaj micunacunata convidarca. Chai micunacunata carropi huaquichicujpimi ñapish ñucanchij cꞌuchullapi shuj bomba urmarca. Chaimi huauqui panicunata ayudashpa catingapaj valorta cuchun tucui punlla Yaya Diosta mañashpa pasarcani” nircami.

¹³ Huauqui Vitalica: “Chaita rurangapajca mana manchaj canami minishtirirca. Punta cutinca 12 horascunatami viajarcanchij. Ñucaca tucui ñanpimi Yaya Diosta mañashpa rircani” nircami. Huauqui Vitalica mana manchaj cashpapish tucuitami alli yuyashpa ruraj carca. Paica: “Alli yachaita, humildadta charingapajca Yaya Diostami mañaj carcani. Shinallataj autoridadcuna maita richun nishcallatami rij carcanchij. Huauqui panicuna tandalla trabajacujta ricushpapish achcatami animarircani. Paicunaca ñucanchijcuna carrohuan pasachunmi ñanta allichijcuna carca. Shinallataj huauqui panicuna imalla minishtishcata tandachishpa, chai cosascunata carroman llujchishpapishmi ayudajcuna carca. Ashtahuanpish Viktormanpish, ñucamanpish micunitata, pozadatapishmi cujcuna carca” nircami.

JEHOVÁ DIOSMANTA AMA CARUYAICHU

14. ¿Shuj amigo o shuj familia Jehová Diosmanta caruyajpica ima shinataj sintirinchij?

¹⁴ Shuj familia o amigo Jehová Diosmanta caruyajpica achcatami llaquirinchij (Salmo 78:40; Proverbios 24:10). Paicunahuan alli apanacushca cashpaca ashtahuanmi llaquirishun. ¿Canca chashnachu sintirishcangui? Sadocmanta yachashpami animaringui.

15. ¿Sadocca Jehová Diosmanta ama caruyangapajca imamantataj mana manchaj cana carca? (1 Reyes 1:​5-8).

¹⁵ Abiatar Diosmanta caruyajpipish Sadocca Diosmantaca mana caruyarcachu. Rey David yuyajlla cashpa ñalla huañugricujpimi Adoniasca paipaj mandanata quichusha nirca. Pero Jehová Diosca catij mandaj cachunca Salomontami agllashca carca (1 Crónicas 22:​9, 10). Abiatarca Adoniaspaj partemi tucurca (1 Reyes 1:​5-8-ta liyipai). Chaita rurashpami Abiatarca Davidmanta, Jehová Diosmantapish caruyashcata ricuchirca. Chaita ricushpaca seguramente Sadocca achcatami llaquirishcanga. Paica Abiatarhuanca 40 huatacuna yallitami sacerdotecuna shina trabajashca carca (2 Samuel 8:17). Ashtahuanpish paicunaca tandallami ‘Diospaj arcata’ cuidashcacuna carca (2 Samuel 15:29). Paicunaca ishquindijmi Davidtapish, Jehová Diostapish sirvishcacuna carca (2 Samuel 19:​11-14).

16. ¿Sadocca imamantataj Jehová Diosmanta mana caruyarca?

¹⁶ Abiatar Diosmanta caruyajpipish Sadocca Diosmantaca mana caruyarcachu. Chaimantami Davidca paipi confiashpa catirca. Adonías rey tucusha nishcata yachaj chayashpaca Davidca  Salomonta reyta rurangapajca Sadoc, Natán, Benayapaj ayudatami mashcarca (1 Reyes 1:​32-34). Sadocca Jehová Diosta, Davidtapish alli sirvijcunapaj ejemplota ricushpami animarirca. Por ejemplo, Natanmantami achcata yacharca (1 Reyes 1:​38, 39). Sadoc alli runa cashcamantami Salomón rey tucushpaca Abiatarpaj puestopi sirvichun paitaca churarca (1 Reyes 2:35).

17. ¿Shuj familia o shuj amigo Jehová Diosmanta caruyajpica ima shinataj Sadocpaj ejemplota cati tucunchij?

¹⁷ ¿Sadocpaj ejemplota catingapajca imatataj rurana canchij? Shuj familia o shuj amigo Jehová Diosmanta caruyajpipish Jehová Diosmantaca mana caruyanachu canchij (Josué 24:15). Yayitu Diosllatajmi chaita rurachunca fuerzasta, valorta cunga. Shinallataj paitami siempre mañana canchij. Huauqui panicunamantapish mana caruyanachu canchij. Chashna rurajpimi Jehová Diosca achcata bendicianga (2 Samuel 22:26).

18. ¿Huauqui Marcomanta y paipaj huarmimantaca imatataj yachanchij?

¹⁸ Ishqui ushushicunata charij huauqui Marco y pani Sidsemanta yachashun. Paicunapaj ushushicunaca ña huiñashpaca Diosmantami caruyarcacuna. Chaimi huauqui Marcoca: “Ñuca ushushicuna huacharishca punllamantami paicunataca achcata cꞌuyarcani. Paicunata cuidangapajca tucuitami rurarcani. Chaimantami Diosmanta caruyajpica shungu pꞌaquirishca saquirircani. Pero Yayitu Diosmi ñucanchij cꞌuchullapi cashca. Chaimantami ñuca llaquilla cajpica ñuca huarmisita ñucataca animan. Cutin pai llaquilla cajpica ñucami paitaca animani” nircami. Shinallataj pani Sidseca: “Jehová Dios ayudashcallamantami cai jatun llaquitaca ahuantai tucushcanchij. Ñuca culpamanta ñuca huahuacuna Diosta saquishcata yuyashpami huaquinpica dimastij llaquirij carcani. Chaimi ñuca ima shina sintirishcataca Jehová Diosman tucuita huillarcani. Chai qꞌuipallaca achca huatacunata mana ricushca ñañahuan tuparcani. Paica ñucapajman cꞌuchuyashpami ‘Sidse, mana cambaj culpachu can. Chaitaca ama cungarichu’ nishpa animarca. Jehová Dios ayudajpimi paitaca cushilla sirvishpa catishcanchij” nircami.

19. ¿Imatataj rurasha ningui?

¹⁹ Jehová Diosca paita sirvijcuna Sadoc shina mana manchajcuna cachunmi munan (2 Timoteo 1:7). Paica ñucanchijllapi confiachunca mana munanchu. Ashtahuanpish paipi confiachunmi munan. Chaimanta llaquicuna japijpipish ama manchangapajca Jehová Diospaj ayudata mañashunchij. Paica manchaita ama charichunmi cantaca ayudanga (1 Pedro 5:10).