1. ¿Cunan punllacunapica imamantataj Jesús nishcata cazuna canchij?

CUNAN punllacunaca shujtaj gentecuna shinallatajmi ñucanchijpish achca llaquicunata charinchij. Shinapish mana yallitaj sustarinachu canchij. Ashtahuanpish Jesús nishcacunatami cazuna canchij. Paica: “Cai causaipaj llaquicunallapi ama yallitaj sustaringuichij” nircami (Lucas 21:34, NM).

2. ¿Ñucanchij huauqui panicunaca ima llaquicunatataj chꞌimbapuracuncuna?

² Huaquinpica llaquicunaca jahuanpi jahuanpimi shamun. Huauqui Johnmanta * parlashun. Paica esclerosis múltiple * nishca ungüitami charin. 19 huatacunata cazarashca cajpimi paipaj huarmica shitashpa rirca. Shinallataj paipaj ishqui ushushicunapish Diosta sirvinatami saquirca. Chaimi huauqui Johnca llaquilla sintirirca. Huauqui Bob paipaj huarmi Lindapish achca llaquicunatami charircacuna. Paicunaca trabajo illaj, huasi illajmi saquirircacuna. Qꞌuipaca pani Linda shungupi millai ungüita charishcatami doctorcunaca huillarcacuna. Shinallataj artritis nishca ungüi paipaj tucui cuerpopi regarishcatami huillarcacuna.

3. Filipenses 4:6, 7-pica ¿imatataj Jehová Diosmanta yachachin?

³ Tucuita ruraj Yayitu Diosca llaquicunahuan cajtaca  allimi yachan. Chaimantami paica llaquicunata chꞌimbapurachunca ayudasha nin (Filipenses 4:6, 7-ta liyipai). Bibliapica ñaupa punllacunapi paita sirvijcuna ima shina llaquicunata ahuantashcatami ricuchin. Jehová Dios paicunata ima shina ayudashcatapishmi Bibliapica huillan. Ñaupa punllacunapi Diosta sirvijcunamanta yachashun.

4. a) ¿Eliasca ima llaquicunatataj chꞌimbapurarca? b) ¿Diosca ima shinataj Eliastaca ayudarca?

⁴ Eliasca sinchi punllacunapi causacushpapish Yaya Diostami sirvishpa catirca. Acab runaca millai reymi carca. Paica Baal diosta adoraj Jezabel huarmihuanmi cazararca. Acabpish Jezabelpish tucui israelitacuna Baal diosta adorachunmi mandarcacuna. Jehová Diosta sirvij achca profetacunatapishmi huañuchircacuna. Eliasca chai llaquicunata ricushpami shujtaj llajtaman miticunaman rirca. Chai llajtapi mana tanto micuna tiyajpipish Yaya Diosmi yaricaihuan ama huañuchun ayudarca (1 Reyes 17:2-4, 14-16). Shinallataj Dios ayudajpimi Baal diosta sirvijcuna imata mana rurai tucushcata Eliasca ricuchirca. Israelitacunatapish Diosta sirvichunmi animarca (1 Reyes 18:21-24, 36-38).

5, 6. a) 1 Reyes 19:1 al 4-pi nishca shinaca ¿ima shinataj Eliasca sintirirca? b) ¿Diosca Eliasta cꞌuyashcata ricuchingapajca imatataj rurarca?

⁵ (1 Reyes 19:1-4-ta liyipai). Jezabel huarmica Eliastami huañuchisha nirca. Chaita yachaj chayashpami Eliasca achcata mancharirca. Chaimantami Beerseba ladoman  miticushpa rirca. Chaiman chayashpami Eliasca, cunanca huañushatajmi nini nirca. ¿Imamantataj chashna llaquilla sintirirca? “Eliasca tucuipi ñucanchij shinallatajmi carca” (Santiago 5:17). Paica yallitaj shaicushca cashcamanta, achca llaquicunata charishcamantami huañunata munashcanga. Eliasca: Cai tucui huatacunata Jehovapaj imalla rurashcapish imapaj mana valinchu, israelitacunapish mana cambiasha nincunachu, ñucallami Diosta sirvicuni nishpami yuyashcanga (1 Reyes 18:3, 4, 13; 19:10, 14). Diosta alli sirvishpapish ¿imamantataj Eliasca llaquilla sintirirca? nishpachari yuyanchij. Pero Jehovami pai ima shina sintirishcataca alli yacharca.

⁶ Elías ima shina sintirishcata huillajpica Diosca mana rimarcachu. Chaipaj randica pacienciahuanmi animarca (1 Reyes 19:5-7). Shinallataj cꞌuyaihuanmi imapi mejorana cashcata consejarca. 7 mil israelitacuna Baal diosta mana adorashcatapishmi huillarca (1 Reyes 19:11-18). Chashnami Jehová Diosca Eliasta cꞌuyashcata ricuchirca.

7. ¿Eliasta Jehová Dios ayudashcata yachashpaca ima shinataj sintirinchij?

⁷ ¿Ñucanchijpish cashna shina llaquicunatachu charinchij? Chashna sintirishpapish Eliasta Jehová Dios ayudajta yachashpaca cushillami sintirinchij. Diosca ñucanchij imata munashcata, imata yuyashcataca allimi yachan (Salmo 103:14; 139:3, 4). Llaquicunata charishpaca Elías shina Diosta mashcajpica paica de seguromi ayudanga (Salmo 55:22).

8. ¿Problemacunata chꞌimbapurachunca Diosca ima shinataj ayudanga?

⁸ Achca llaquicunahuan cashpaca imapaj mana valishca shinachari sintirishun. Chashna sintirishpapish Jehová Dios ayudanataca mana cungarinachu canchij. Paica llaquicunahuan cashpa ima shina sintirishcata huillachunmi munan. Tucuita paiman huillajpica paica cutichingami (Salmo 5:3; 1 Pedro 5:7). Chaimantami problemacunata charishpaca Diosmanca tucuita huillana canchij. Paica Eliashuan shinaca ñucanchijhuanca mana parlangachu. Pero cunanpica ñucanchijta ayudangapajca Bibliata, paipaj organizaciontami cushca. Bibliata liyishpami tranquilo sintirishun. Shinallataj huauqui panicuna animajpimi cushilla sintirishun (Romanos 15:4; Hebreos 10:24, 25).

9. ¿Alli amigocunaca ima shinataj ñucanchijta ayudai tucun?

⁹ Yaya Diosca Eliastaca cashnami nirca, canta ayudachun Eliseota agllai. Chashnami Diosca Elías llaquilla cai horas shuj amigota curca. Ñucanchijpish alli amigocunata charijpica paicunaca llaquilla cai horasmi ayudangacuna (2 Reyes 2:2; Proverbios 17:17). Ñucanchij llaquicunata mana piman parlai tucushpaca, alli amigocunata cuchunmi Jehová Diosta mañana canchij. Paicunami llaquicunahuan cai horas ñucanchijtaca animashpa ayudanga.

10. a) Eliasta Yayitu Dios ayudashcamantaca ¿imatataj yachanchij? b) Isaías 40:28, 29-pi tiyaj yuyaicunaca ¿ima shinataj ñucanchijta animan?

¹⁰ Eliasca achca huatacunatami llaquicunata ahuantarca. Pero Yayitu Dios ayudajpimi paitaca cushilla sirvirca. Profeta Eliasta Dios ima shina ayudashcata yachashpami cushilla sintirinchij. Ñucanchijpish achca llaquicunata charishpaca huaquinpica shaicushca shinami sintirinchij. Pero Yaya Diospimi tucui shunguhuan confiana canchij. Chaita rurajpica paita alli sirvichunmi fuerzasta cushpa ayudanga (Isaías 40:28, 29-ta liyipai).

11-13. ¿Ñaupa tiempopi Diosta sirvijcunaca ima jarcaicunatataj chꞌimbapurarcacuna?

¹¹ Ñaupa tiempopi Diosta sirvijcunapish achca llaquicunatami charircacuna. Por ejemplo, Anaca huahuacunataca mana chari tucurcachu. Chai punllacunapi huahuacunata mana charinaca achca pingaimi carca. Anapaj cusaca Elcanami carca. Elcanapaj caishuj huarmica huahuacunata Ana mana chari tucushcamantami burlarij carca (1 Samuel 1:2, 6). Anaca dimastij llaquilla sintirishcamantami huacaj carca. Micunatapish mana munaj carca (1 Samuel 1:7, 10).

¹² Rey Davidpish sinchi llaquicunatami chꞌimbapurarca. Paica ñaupa punllacunapi jatun juchacunata rurashcamantami llaquilla sintirirca (Salmo 40:12). Shinallataj paipaj churi Absalonmi paipaj contra tucurca. Qꞌuipaca Absalontami huañuchircacuna (2 Samuel 15:13, 14; 18:33). Paipaj cꞌuyashca amigopishmi paita saquishpa rirca (2 Samuel 16:23–17:2; Salmo 55:12-14). Davidca dimastij llaquilla sintirishcamantami achca salmocunata quillcarca. Pero chai salmocunallapitajmi Davidca tucui shunguhuan Diospi confiashcata ricuchirca (Salmo 38:5-10; 94:17-19).

¹³ Diospaj huasipi sirvij salmista runapishmi desanimado sintirirca. Paica Asaf runapaj familiami cashcanga. Salmistaca millai gentecuna causashca shinami causanata munai callarirca. Shinallataj Diosca paita sirvijcunataca mana bendicianchu nishpami yuyai callarica. Chaimantami achcata llaquirirca (Salmo 73:2-5, 7, 12-14, 16, 17, 21).

14, 15. ¿Ñaupa punllapi Diosta sirvijcunamantaca imatataj yachanchij?

 ¹⁴ Ana, David, Salmista runapish Diostami mashcarcacuna. Paicunaca siempremi Diosta mañajcuna carca. Ima shina sintirishcatapish paimanmi huillajcuna carca. Diosta adorana huasiman rinatapish manataj saquircacunachu (1 Samuel 1:9, 10; Salmo 55:22; 73:17; 122:1).

¹⁵ Cꞌuyaj Yaya Diosca paicuna mañashcacunatami cutichirca. Chaimantami Anaca tranquila sintirirca (1 Samuel 1:18). Davidpish salmota escribishpaca: “Cashcata rurajcunapajca achca llaquicunami tiyan. Ashtahuanpish chai llaquicunamantaca Mandaj Diosmi quishpichin” nircami (Salmo 34:19). Salmista runapish Jehová Dios paita tucuipi cꞌuyaihuan ayudashcatami cuenta japirca. Paica: ‘Ñucapajca, Taita Diospaj cꞌuchupi canami alli. Mandaj Jatun Diospimi ñuca shunguta churarcani’ nircami (Salmo 73:23, 24, 28). Maipica achca llaquicunahuan cashpaca ñucanchijpish paicuna shinami sintirishun. Pero Yaya Dios paita sirvijcunata ima shina ayudashcatami yuyarina canchij. Shinallataj siempremi Diosta mañana, paipaj mandashcacunatapish cazuna canchij. Chashnami cushilla causashun (Salmo 143:1, 4-8).

16, 17. a) ¿Shujtajcunamantaca imamantataj mana caruyana canchij? b) ¿Animota chasquingapajca imatataj rurana canchij?

¹⁶ Jehová Diosmanta, paita sirvijcunamanta manataj caruyana cashcatami yachashcanchij (Proverbios 18:1). Pani Nancyca paipaj cusa shitajpimi dimastij llaquilla sintirirca. Paica: “Ñucaca achca punllacunatami llaquilla sintirircani. Chaimantami pihuan mana parlasha nircani. Pero shujtajcunamanta caruyashpaca ashtahuanmi llaquilla sintirircani. Punllacuna pasajpica ñuca problemacunallapi yuyanapaj randica shujtaj gentecunapimi yuyai callarircani. Paicunapaj problemacunata huillajpica allimi uyarcani. Chashnami ñuca problemacunata mana tanto yuyarircani” ninmi.

¹⁷ Tandanacuicunaman rinataca manataj saquinachu canchij. Chashna rurashpaca Jehová Dios ayudachunmi saquishun (Salmo 86:17). Tandanacuicunapica Diosca paipaj espíritu santohuan, Bibliahuan, paita alli sirvijcunahuanmi animota cushpa ayudan. Shinallataj shujtajcunatami animai tucunchij o paicunapish ñucanchijta animai tucuncuna (Romanos 1:11, 12). Pani Sofiaca: “Ñucataca Yaya Dios, turi ñañacunami ñaupajman catichun ayudan. Ñucapajca tandanacuicunaman rinami ashtahuan importante can. Shinallataj turi ñañacunahuan huillanata mana saquishpaca llaquicunataca jahuallami chꞌimbapurani” ninmi.

18. ¿Llaquicunahuan cajpica Diosca ima shinataj ayudasha nin?

¹⁸ Llaquilla cashpaca Jehová Dios ñalla tucui llaquicunata tucuchinatami yuyarina canchij. Paica cunan punllacunapish llaquicunata ahuantachunmi ayudashataj nin (Filipenses 2:13).

19. ¿Romanos 8:37 al 39-pica imatataj yachachin?

¹⁹ (Romanos 8:37-39-ta liyipai). Apóstol Pabloca Diospaj cꞌuyaimantaca mana pi caruyachi tucushcatami huillarca. Pero cunan punllacunapi llaquicunata chꞌimbapuracuj huauqui panicunataca ¿ima shinataj ayudai tucunchij? Catij yachaipimi Jehová Dios shina ñucanchijpish paicunata ima shina ayudanata yachashun.