1. ¿1 Pedro 5:2-pi nishca shinaca Diosca ancianocunamanca imatataj mingashca?

 JEHOVÁ DIOSCA ancianocunamanmi paipaj ovejitacunata cuidachun mingashca. Ancianocunaca chai mingashcataca achcatami valorancuna. Chaimantami huauqui panicunata cꞌuyaihuan ayudangapaj esforzarincuna (Jeremías 23:4; 1 Pedro 5:2-ta liyipai). ¿Cai huauquicunata congregacionpi charishcamantaca manachu cushilla sintirinchij?

2. ¿Huaquin ancianocunaca ima jarcaicunahuantaj chꞌimbapurana can?

² Anciano huauquicunaca chꞌican chꞌican jarcaicunahuanmi chꞌimbapurancuna. Por ejemplo, Estados Unidospi causaj huauqui Tonymanta parlashun. Paica cashnami nirca: “COVID-19 pandemia callarijpica huauqui panicuna tandanacushpa catichun, predicashpa catichunmi achca arreglocunata rurana carcanchij. Chaita rurangapajca achca tiempomi minishtirirca. Ñucalla tucuita rurasha nishpapish mana avanzarcanichu. Ashtahuancarin chaicunallapi ocupado pasashcamantami Bibliata liyingapaj, estudiangapaj, Diosta mañangapajpish ña mana tiempota charircani”. Cutin Ilir shuti huauquica guerra tiyan llajtapimi causan. Paipajca Jehová Diospaj organización cushca instruccioncunata cazunaca sinchimi carca. Paica: “Sucursalmanta huauquicunaca achca llaquicuna tiyan llajtapi causaj huauqui panicunata visitachun mingajpica ñucaca achcatami mancharircani” nircami. Asia llajtapi causaj shuj huauqui misioneropish achca mingashcacunata pajtachina cashcamantami estresado, shaicushca sintirij carca. ¿Ancianocunaca cashna jarcaicunahuan chꞌimbapurangapajca imatataj rurana can?

3. ¿Imamantataj tucuicuna Gedeonpaj ejemplomanta yachana canchij?

³ Ancianocunaca Gedeonmantami achcata yachai tucuncuna (Hebreos 6:12; 11:32). Paica Diospaj pueblotami ayudaj, cuidaj carca (Jueces 2:16; 1 Crónicas 17:6). Anciano huauquicunapishmi Gedeón shina cai tucuri punllacunapi huauqui panicunata  cuidangapaj esforzarincuna (Hechos 20:28; 2 Timoteo 3:1). Gedeonca humilde, Jehová Diosta cazujmi carca. Paica achca jarcaicunahuanmi chꞌimbapurarca. Tucuicunami Gedeonmantaca achcata yachai tucunchij. Chashnami anciano huauquicunataca achcata valorashun. Shinallataj paicunaman mingashcacunata alli pajtachichunca shungumantami apoyashun (Hebreos 13:17).

4. ¿Gedeonca humilde cashcataca ima shinataj ricuchirca?

⁴ Gedeonca humildemi carca. b Chaimantami shuj ángel israelitacunata madianitacunamanta quishpichichun Diosca cantami agllashca nijpica, Gedeonca: “Manasespaj aillupica ñucanchij familiamari tucuimanta yalli huajchacuna canchij. Ñuca yayapaj huasipipish ñucamari tucuicunapaj qꞌuipa cani” nirca (Jueces 6:15). Gedeonca Jehová Dios mingashcata mana pajtachi tucushcatami yuyarca. Pero Dios ayudajpimi chai mingashcataca alli pajtachi tucurca.

5. ¿Ancianocunapajca huaquinpica imamantataj humildadta ricuchinaca sinchi can?

⁵ Ancianocunaca tucuipi humildes cangapajmi esforzarina can (Miqueas 6:8; Hechos 20:18, 19). Shinallataj paicunaca imata alli rurashpapish mana jatun tucuncunachu. Imapi pandarishpapish imapaj mana valishcataca mana yuyancunachu. Pero ¿huaquinpica humildadta ricuchinaca imamantataj sinchi can? Por ejemplo, tal vez shuj ancianoca achca mingashcacunata chasquishca qꞌuipami tucuita mana pajtachi tucushcata cuentata cunga. Mana cashpaca ima asignacionta alli pajtachijpichari huauqui panicunaca yallitaj alabangacuna. O tal vez shujtajcuna pai rurashcacunahuan mana de acuerdo cajpichari criticai callaringacuna. ¿Cashna problemacuna ricurijpica ancianocunaca ima shinataj Gedeonpaj ejemplota cati tucuncuna?

6. ¿Ancianocuna Gedeón shina humildes cashcataca ima shinataj ricuchincuna? (Fotomantapish parlapai).

⁶ Shujtajcuna cancunata ayudachun mañaichij. Humildecuna cashpaca ñucanchijlla tucuita rurai tucushcataca mana yuyashunchu. Gedeonca humilde cashcamantami shujtajcuna paita ayudachun mañarca (Jueces 6:27, 35; 7:24). Ancianocunaca chashnallatajmi rurana can. Párrafo 2-pi parlashca huauqui Tonyca: “Ñucalla tucuita  rurana cashcata yuyashpami huiñarcani. Pero ama chashna yuyashpa catingapajca Bibliapimi humilde cana cashcata ñuca familiahuan estudiarcani. Ñuca huarmitapish shuj consejota cuchunmi mañarcani. Shinallataj jw.org paginapimi Jesús shina shujtajcunaman yachachishunchij nishca videota ricurcani” nircami. Cai huauquica humilde cana cashcata intindishpaca shujtajcunapaj ayudatami mañai callarirca. Paica: “Congregacionpi shujtaj huauquicunapish ayudashcamantami cunanca Jehová Diosmanta yachashpa catingapaj ashtahuan tiempota charini” nircami.

7. ¿Shujtajcuna sinchita rimajpica ancianocunaca imatataj rurana can? (Santiago 3:13).

⁷ Sinchita rimajpica pacienciata charichij. Pacienciata charinaca huaquinpica sinchimi can. Pero Efrainmanta cꞌaricuna Gedeonta sinchita rimajpipish paica mana pꞌiñarircachu (Jueces 8:1-3). Ashtahuanpish pꞌiñarinapaj randica pacienciahuanmi paicunataca uyarca. Gedeón respetota ricuchijpimi paicunaca calmarircacuna. Ancianocunapishmi shujtajcuna sinchita rimajpica respetohuan uyana can. Shinallataj alaja shimicunahuanmi cutichina can (Santiago 3:13-ta liyipai). Ancianocuna chaita rurajpimi congregación ucupica tucuicuna tandalla, tranquilos cangacuna.

8. ¿Huauqui panicuna achcata alabajpica ancianocunaca imatataj rurana can? Shuj ejemplomanta parlai.

⁸ Imata rurashpapish Diostaraj jatunyachichij. Madianitacunata mishashcamanta gentecuna Gedeonta jatunyachijpica, paica Jehová Diostaraj jatunyachichunmi animarca (Jueces 8:22, 23). Ancianocunapish chaillatatajmi rurana can (1 Corintios 4:6, 7). Por ejemplo, huauqui panicuna alli yachachij cashcamanta felicitajpica ancianocunaca: “Ñucaca Diospaj Shimipi ima nicushcallatami nircani. Diospaj organización alli yachachishcamantami tucuicuna achcata yachai tucunchij” nishpami cutichi tucun. Shinallataj ancianocunaca Bibliamanta yachachicushpa Jehová Diosta jatunyachicushcata o paicunallataj alabaricushcatami yuyana can. Por ejemplo, huauqui Timothyca conferenciata cunatami achcata munaj carca. Paica: “Ñuca conferenciacunataca achcata parlashpa, jatun ejemplocunata churashpami callarij carcani. Chaita ricushpaca huauqui panicunaca cambaj yachachishcacunaca sumajmari nishpami achcata felicitajcuna carca. Paicuna chashna felicitajpimi ñuca conferenciacunapi Jehová Diosta jatunyachinapaj randi, Bibliapi nishcacunata alli intindichinapaj randica ñucallataj alabaricushcata cuentata curcani” nircami. Cai huauquica conferenciacunata cucushpa Jehová Diosta ashtahuan jatunyachingapajmi huaquin cambiocunata rurarca (Proverbios 27:21). ¿Timothyca cambiocunata rurashcamantaca ima shinataj sintirin? Paica: “Shuj conferenciata cujpica huauqui panicunaca ña mana ñucallata yallitaj alabancunachu. Ashtahuanpish paicunaca, ‘cambaj conferenciapica llaquicunata ima shina ahuantanata, Jehová Diospajman ashtahuan cꞌuchuyangapaj imata ruranatami yacharcani’ nincunami. Chaita uyashpami ñucaca achcata contentarini” nircami.

9. ¿Jehová Diosca Gedeontaca imata rurachuntaj mandarca? (Página 1-pi tiyaj fotota ricui).

⁹ Jehová Dios Gedeonta juez cachun nombrajpica paica achca jarcaicunahuanmi chꞌimbapurarca. Por ejemplo, Jehová Diosca Gedeontaca, ‘Baal Diosta adorangapaj cambaj yaya rurashca altarta urmachigri’ nishpami mandarca (Jueces 6:25, 26). Shinallataj Gedeonca enemigocunahuan macanacungapajmi achca soldadocunata tandachirca. Shinapish Jehová Diosca ishqui cutintami ashalla soldadocunahuan macanacunaman richun mandarca (Jueces 7:2-7). Ashtahuancarin Diosca tutapi enemigocunahuan macanacunaman richunmi mandarca (Jueces 7:9-11).

10. ¿Jehová Diosta cazunaca ancianocunapajca imamantataj huaquinpica sinchi cai tucun?

 ¹⁰ Ancianocunaca Bibliapi nishcacunata, Jehová Dios cushca instruccioncunatami siempre cazuna can (Santiago 3:17). Chaita rurajpimi huauqui panicunapish Jehová Diostaca tucuipi cazungacuna. Shinapish huaquinpica cazujcuna canaca ancianocunapajca sinchimi cai tucun. Por ejemplo, Jehová Diospaj organización cunanlla cushca instruccioncunata cazunaca sinchichari canga. Cutin huaquinpica ancianocunaca: ‘¿Cai instruccioncunata cazunaca allichushi canga?’ nishpachari yuyangacuna. Huaquinpicarin cai instruccioncunata cazujpica autoridadcunaca prezupimi churangacuna nishpami sustaringacuna. ¿Cashna jarcaicunahuan chꞌimbapuracushpaca ancianocunaca ima shinataj Gedeonpaj ejemplota cati tucuncuna?

11. ¿Ancianocunaca ima shinataj Gedeonpaj ejemplota cati tucuncuna?

¹¹ Jehová nishcacunata shungumanta cazuichij. Jehová Diosca Gedeontaca paipaj yaya rurashca altarta ima shina tucuchinata, shinallataj paita adorangapaj shuj altarta ima shina shayachinata, chai altarpi ima animalcunata huañuchinatami nirca. Gedeonca ‘¿caita ruranaca allichu canga?’ nishpa yuyanapaj randica ratomi Jehová Diostaca cazurca. Cunan punllacunapica ancianocunaca cartacunapi, huillaicunapi, publicacioncunapimi instruccioncunata chasquincuna. Cai instruccioncunaca huauqui panicuna tucuipi alli cachunmi ayudan. Chaimantami ancianocuna Diospaj organización cushca instruccioncunata shungumanta cazujta ricushpaca tucuicuna cushilla sintirinchij. Paicuna chaita rurashcamantami congregacionpica tucuicuna tandalla cai tucunchij (Salmo 119:112).

12. ¿Diospaj organizacionpi cambiocuna tiyajpica ancianocunaca ima shinataj Hebreos 13:17-pi nishcata pajtachi tucun?

¹² Cambiocuna tiyajpica tucui shunguhuan cazuichij. ¿Jehová Dios ashalla soldadocunahuan saquirichun nijpica Gedeonca imatataj yuyashcanga? (Jueces 7:8). Tal vez, paica: “¿Chaita ruranaca allichu canga?” nishpami yuyashcanga. Chashna yuyashpapish Gedeonca Jehová Diostami cazurca. Ancianocunaca, ¿paimantaca imatataj yachai tucuncuna? Jehová Diospaj organización cambiocunata rurachun nijpica shungumantami cazuna can (Hebreos 13:17-ta liyipai). Por ejemplo, ñaupaca huauqui panicuna Tandanacuna Huasicunata shayachichunca sucursalmi cullquita mañachij carca. Qꞌuipaca huauqui panicunaca asha ashami chai cullquita tigrachijcuna carca. Pero 2014 huatapica shuj cambiomi tiyarca. Cunanca muyundij Allpapi tiyaj tucui congregacioncunami maipi minishtirishcapi Tandanacuna Huasicunata shayachingapaj cullquita cushpa ayudancuna (2 Corintios 8:12-14). Cai cambio tiyagrishcata yachaj chayashpaca José shuti ancianoca: “Shujtaj llajtacunapimi Tanadanacuna Huasicunata shayachingacuna. Pero cai llajtapica shujllatapish mana shayachingacunachu” nishpami preocuparirca. Pero chashna yuyashpapish  paica cazungapajmi esforzarirca. ¿Imamanta? Paica: “Proverbios 3:5, 6-pi nishcatami yuyarircani. Chaipi nishca shinaca Jehová Diospimi tucui shunguhuan confiana canchij. Chai cambio tiyashcamantami cunanca ashtahuan Tandanacuna Huasicunata shayachi tucushcanchij. Shinallataj Tandanacuna Huasicunata shayachishpa catichun tucuicuna cullquita cushpa ayudai tucushcatami intindircani” nircami.

13. a) ¿Gedeonca imamantataj tranquilo sintirirca? b) ¿Ancianocunaca Gedeón shinaca imatataj rurana can? (Fotomantapish parlapai).

¹³ Imata mana manchashpa Jehová Diosta sirvishpa catichij. Jehová Dios ‘ñuca pueblota cuidachun ñucami ayudasha’ nijpica Gedeonca tranquilomi sintirirca. Chaimi asha manchaita charishpapish Jehová Diosta tucuipi cazurca (Jueces 9:17). Cunan punllacunapica huaquin ancianocunaca Jehová Diosta libremente sirvichun jarcan llajtacunapimi causancuna. Paicunapishmi Gedeón shina can. Chaimantami autoridadcuna prezupi churanata, tapunaman cayanata, trabajomanta llujshichinata, llaquichinata yachashpapish tandanacuicunata organizashpa catincuna. Huauqui panicuna huillashpa catichunpishmi ayudancuna. c Gran tribulación o Jatun llaqui punllacuna callarijpica millaicuna llaquichisha nijpipish, ancianocunaca Jehová Diospaj mandashcacunata cazungapajmi esforzarina cangacuna. Por ejemplo, tal vez Diospaj organizacionca millai gentecuna ñalla tucurigrishcata huillachunmi ninga. Chai huillaica jatun runducuna shinami canga (Apocalipsis 16:21). Shinallataj Diospaj organizacionca mandaj Gogmanta quishpiringapaj imata rurana cashcatami ninga (Ezequiel 38:18).

14. ¿Gedeonca madianitacunata mishangapajca imallatataj rurarca?

¹⁴ Gedeonca juez cashpaca israelitacunata cuidangapajmi achcata esforzarirca. Por ejemplo, tutapi madianitacunahuan macanacucujpica paicunaca miticushpami rircacuna. Chaimi Gedeonca paicunataca Jezreelmanta Jordán yacucama catishpa rirca. Chai yacu manyacunapica  achca cashacunami tiyashcanga (Jueces 7:22). ¿Jordán yacuman chayashpaca Gedeonca imatataj rurarca? ¿Chaipi saquirircachu? Mana. Paipish, paipaj 300 soldadocunapish shaicushcachari carca. Chashnapish chai yacuta chꞌimbashpami madianitacunata catishpa rircacuna. Chashnami paicunataca misharcacuna (Jueces 8:4-12).

15. ¿Ancianocunaca imamantataj huaquinpica shaicushca sintirincuna?

¹⁵ Ancianocunaca paicunapaj familiata, huauqui panicunata cuidana cashcamantami huaquinpica shaicushca, estresado sintirincuna. ¿Chashna sintiricushpaca ima shinataj Gedeonpaj ejemplota cati tucun?

16, 17. a) ¿Gedeón shaicushca cajpica Jehová Diosca ima shinataj ayudarca? b) ¿Ancianocunaca imatataj tucui shunguhuan crina can? (Isaías 40:28-31) (Fotomantapish parlapai).

¹⁶ Jehová Dios fuerzasta cushpa ayudanata seguros caichij. Gedeonca chaitami rurarca (Jueces 6:14, 34). Shuj cutinca, ishqui mandaj madianitacuna camellocunapi miticushpa rijpica Gedeonca paipaj soldadocunandijmi chaquillahuan paicunata catishpa rircacuna (Jueces 8:12, 21). Jehová Dios paicunaman fuerzasta cujpimi chai ishqui mandajcunata japishpa huañuchircacuna. Ancianocunaca nunca mana shaicurij Jehová Diospimi shunguta churana can. Paimi shaicushca cajpi fuerzasta cushpa ayudanga (Isaías 40:28-31-ta liyipai).

¹⁷ Comité de Enlace con los Hospitales nishcapi ayudaj huauqui Matthewmanta parlashun. Paica cashnami nirca: “Filipenses 4:13-pi nishcacunaca ciertomi can. Shaicushca, estresado cashpaca Jehová Diostami ‘huauqui panicunata ayudangapaj fuerzasta cuhuai’ nishpa mañani. Chashna mañajpimi Jehová Diosca fuerzasta cushpa ayudashca”. Gedeón shinami ancianocunaca huauqui panicunata cꞌuyaihuan ayudangapaj sinchita esforzarincuna. Shinapish paicunalla mana tucuita rurai tucushcatami yuyarina can. Ancianocunaca Jehová Dios paicunaman fuerzasta cushpa ayudanataca tucui shunguhuanmi crina can (Salmo 116:1; Filipenses 2:13).

18. ¿Cai yachaipi yachashca shinaca ancianocunaca Gedeón shinaca imallatataj rurana can?

¹⁸ Caipi yachashca shinaca ancianocunaca Gedeonmantaca achcatami yachai tucuncuna. Por ejemplo, congregacionpi tucui trabajocunata paicunalla rurai tucushcataca mana yuyanachu can. Shinallataj huauqui panicuna yallitaj alabajpi o criticajpica humildadtami ricuchina can. Ashtahuancarin Jehová Diosta tucuipi cazujcuna, mana manchajcunami cana can. Cai tucuri punllacunapi causacushcamantami chaita ruranaca minishtirishca can. Shinallataj paicunaman mingashcacunata pajtachishpa catichun Jehová Dios fuerzasta cushpa ayudanatami tucui shunguhuan crina can. Anciano huauquicuna congregacionpi sinchita trabajacushcamantaca ¿manachu paicunataca achcata valorana canchij? (Filipenses 2:29).