Nazaretman imamanta mana cutin tigrashcataca Bibliaca mana huillanchu. Pero Belenpi imamanta saquirishcata yachangapajmi huaquin yuyaicunamanta parlan.

Shuj ángel Mariata ‘canca chichu saquirishpami shuj huahuata huachangui’ nijpica, paica Galilea llajtapi saquirij Nazaretpimi causaj carca. Josepishmi chaipi causaj carca. Chai llajtamantami José carca (Lucas 1:26-31; 2:4). Qꞌuipa Egipto llajtamanta llujshishpaca cutinmi Nazaret llajtaman tigrarcacuna. Jesusca Nazaret llajtapimi huiñarca. Chaimantami paitaca nazareno nishpa rijsij carca (Mateo 2:19-23). Bibliapi Nazaret llajtamanta parlajpica José, María y Jesusmantami yuyarinchij.

Mariaca Judá llajtataca allimi rijsij carca. ¿Chaitaca ima shinataj yachanchij? Paica chaipica familiatami charirca. Por ejemplo, sacerdote Zacariaspaj huarmi Elisabetmi chaipica causaj carca. Paica bautizaj Juanpaj mamami carca (Lucas 1:5, 9, 13, 36). Shuj cutinca Mariaca Elisabettami visitanaman rirca. Chaipica quimsa quillacunata saquirishpami cutin Nazaretman tigrarca (Lucas 1:39, 40, 56).

Qꞌuipa punllacunapica Belenpi causajcuna registrarichunmi shuj ley llujshirca. Chaita pajtachingapajmi Joseca Nazaretmanta Belenman rina carca. Belén llajtaca Davidpaj llajta nishcami carca. Chaipimi Jesusca huacharina carca (Lucas 2:3, 4; 1 Samuel 17:15; 20:6; Miqueas 5:2). Jesusca Belén llajtapimi huacharirca. Jesús chairaj llullu cashcamantami chaipi saquirircacuna. Belenca Jerusalenmanta 9 kilómetros cꞌuchullapimi carca. Chaimantami Jerusalenpi tiyaj temploman ri tucurcacuna. Chaipimi Ley nishca shina Jesushuan ofrendata cunaman rircacuna (Levítico 12:2, 6-8; Lucas 2:22-24).

Mariaman ricurij angelca paimanca: ‘Cambaj churica Davidpaj mandanatami japinga. Jatun mandajmi tucunga’ nircami. José y Mariaca Davidpaj llajtapi Jesús huacharina cashcatami intindishcangacuna (Lucas 1:32, 33; 2:11, 17). Chaimantami Jehová Dios ashtahuan instruccioncunata cungacama Belenpi saquirishcangacuna.

Jesús Belén llajtapi mashna tiempota causashcataca mana yachanchijchu. Pero huaquin astrologocuna paita visitanaman rijpica paica ña mana llullu huahuachu carca. Shinallataj chaipi causangapajmi José y Mariaca ña shuj huasita charircacuna (Mateo 2:11). Chaimantami Nazaretman rinapaj randica Belenpi causashpa saquirircacuna.

Shuj angelca Herodesca Belenpi causaj ‘ishqui huatamanta uriman callarishpa tucui cꞌari huahuacunata huañuchichunmi mandashca’ nishpami Joseman huillarca (Mateo 2:16). Chaimantami Joseca Mariahuan, Jesushuanpish Egipto llajtaman rircacuna. Chaipimi Herodes huañungacama saquirircacuna. Pero qꞌuipaca Nazaretmanmi rircacuna. ¿Imamantataj mana Belenman cutin rircacuna? Cunanca Judea llajtataca Herodespaj churi Arquelaomi mandacurca. Paica millaimi carca. Chaimantami shuj angelca paicunapaj causai peligropi cashcata huillarca. Chaimi Joseca, María y Jesushuan Nazaretman rirca. Chaipimi paicunaca tranquilo causashpa Jehová Diosmanta yachachi tucurcacuna (Mateo 2:19-22; 13:55; Lucas 2:39, 52).

Jesús huañushca qꞌuipaca huaquin gentecuna jahua pachapi causana oportunidadtami chasquircacuna. Pero Joseca Jesús manaraj huañujpimi ña huañushcanga. Chashna cashca cajpica paica cai Allpallapitajmi causaringa. Cai Allpapi causarijpica Jesús huacharishca qꞌuipa imamanta Belén llajtapi saquirishcatami yachashun.