1. ¿Diospaj punlla shamujpi quishpiringapajca imatataj rurana canchij?

 JEHOVÁ DIOSCA ñaupa punllacunapica paipaj enemigocunata tucuchishpami israelitacunata quishpichirca. Chai punllamanta parlashpaca Bibliapica ‘Diospaj punlla’ ninmi (Isaías 13:1, 6; Ezequiel 13:5; Sofonías 1:8). ¿Cutin cunan punllacunapica Diospaj punllaca ima horataj callaringa? Jatun mandajcuna Babilonia jatun pueblota tucuchijpimi callaringa. Shinallataj chai punllaca Armagedón jatun macanacuipimi tucuringa. Chai punlla shamujpi quishpiringapajca cunanmantami allichirina canchij. Chaimantami Jesusca jatun llaqui punllapaj o gran tribulacionpaj “allichirishca shuyacuichij” nishpa mandarca (Mateo 24:21; Lucas 12:40).

2. ¿Imamantataj 1 Tesalonicenses libromanta yachana canchij?

² 1 Tesalonicenses libropica apóstol Pabloca Jesusta punta catijcunataca Jehová Diospaj punllapaj allichirishca cachunmi animarca. Paica Diospaj punlla chai tiempopi mana shamuna cashcataca allimi yacharca (2 Tesalonicenses 2:1-3). Chaita yachashpapish Pabloca Jesusta punta catijcunataca chai punlla ñalla shamugrij shina allichirishpa catichij nishpami animarca. Ñucanchijpishmi Pablo nishcacunata cazungapaj esforzarina canchij. ¿Jehová Diospaj punllaca ima shinataj shamunga? ¿Chai punlla shamujpica picunataj mana quishpiringacuna? ¿Allichirishca cangapajca imatataj rurana canchij? Cai tapuicunata cutichingapajca Pablo imalla quillcashcatami ricushun.

3. ¿Bibliapica imamantataj Diospaj punllaca tutapi shuj shuhua shamuj shinami shamunga nin? (Fotomantapish parlapai).

³ Pabloca: “Diospaj punllaca tutapi shuj shuhua shamuj shinami shamunga”nircami (1 Tesalonicenses 5:2). Shuhuacunaca tutapi mana shuyashcapimi shuhuanata yachancuna. Chashna layallatajmi  Jehovapaj punllaca gentecuna mana yuyashcapi, rato shamunga. Tal vez Diosta sirvijcunapishmi Bibliapi nishcacuna ña pajtaricushcata cuentata cushpaca sorprendidos saquirishun. Pero mana mancharishunchu. Chai punlla shamujpica millai gentecunallami tucuchishca canga.

4. ¿Diospaj punllaca imamantataj shuj chichu huarmita nanaicuna japij shina shamunga?

⁴ Jehovapaj punllaca “shuj chichu huarmita nanaicuna japij shinami ñapish japinga” (1 Tesalonicenses 5:3). Huahuata ungungapaj nanaicunaca ñapish mana yuyashcapimi japin. Chaimantami chichu huarmicunaca ungungapaj nanaicuna ima hora japigrishcataca mana yachancuna. Pero mana yachashpapish chai punlla chayamunatami seguras cancuna. Ñucanchijpish Diospaj punlla ima hora shamunata mana yachashpapish shamunataj cashcatami seguros canchij. Shinallataj chai punlla shamujpi Jehová Dios millai gentecunata rato tucuchina cashcatami seguros canchij.

5. ¿Jatun llaqui punllacunaca imamantataj punlla pacaricuj shina shamunga?

⁵ Pabloca Diospaj punllaca punlla pacaricuj shinami shamunga nircami. Pabloca cutinmi tutapi shuhuajcunamanta parlarca (1 Tesalonicenses 5:4). Paicunaca shuhuacushcamantami ña pacaricushcata, gentecunapish paicunata japi tucushcataca tal vez mana cuentata cungacuna. Jatun llaqui punllacuna shamujpica chashnallatajmi canga. Huaquin gentecunaca tutapi shuhuacuj shinami pacalla millaita rurashpa causancuna. Pero Diospaj punllapica tucui paicuna imalla rurashcacunaca ricuchishcami canga. Ñucanchijcunaca paicuna shinaca mana cashun ninchijchu. Chaipaj randica Diospaj punllapajca allichiridomi cana canchij. Chaipajca Jehová Dios millashca ruraicunamantami caruyana canchij. Ashtahuanpish ‘tucuipi alli shungu cangapaj, cashcata rurajcuna cangapaj, mana llullapi nishca shina puringapajmi’ esforzarina canchij (Efesios 5:8-12). Pero ¿Pablo nishca shinaca  Diospaj punllapica picunataj mana quishpiringacuna?

6. ¿Gentecunaca imamantataj dormicuj shina can? (1 Tesalonicenses 5:6, 7).

⁶ “Dormijcunaca” mana quishpiringacunachu (1 Tesalonicenses 5:6, 7-ta liyipai). Pablo nishca shinaca espiritualmente dormicujcunami mana quishpiringacuna. Dormicujcunaca ima tucucushcataca mana yachancunachu. Paicunapaj cꞌuchullapi ima tucucujpipish imata mana rurancunachu. Diosta mana sirvijcunapish paicuna shinallatajmi can (Romanos 11:8). Paicunaca “tucuri punllacunapi” causacushcata, jatun llaqui punllacuna ñalla chayamucushcatapish mana cuentata cuncunachu. Paicunaca cai mundopi jatun cambiocuna, llaquicuna tiyajpica dormimanta ashata rijcharij shinami Diosmanta yachanata munancuna. Pero rato Diosmanta yachanata saquishpami cutin dormirincuna. Cutin shujtajcunaca Diospaj punlla shamuchunca achca tiempomi faltanraj nishpami yuyancuna (2 Pedro 3:3, 4). Pero ñucanchijcunaca cai tucuri punllacunapi rijcharishca cana cashcatami alli yachanchij.

7. ¿Huaquin gentecunaca imamantataj machashca shina cancuna?

⁷ ‘Machajcunaca mana quishpiringachu’. Apóstol Pabloca machajcuna laya cajcunami tucuchishca canga nircami. Machajcunaca yuyaita chingachishpami mana alli decisioncunata japincuna. Diosta mana sirvijcunapishmi yuyaita chingachij shina Diosmanta caruyashpa mana alli decisioncunata japincuna. Chaimantami paicunaca tucuchishca cangacuna. Cutin Diosta sirvijcunaca machajcuna shinaca mana canachu canchij. Ashtahuancarin alli yuyaihuanmi causana canchij (1 Tesalonicenses 5:6). Bibliamanta yachaj shuj runaca: “Alli yuyaihuan purijcunaca alli yuyashpami imata ruranata agllancuna” nircami. Pero ¿imamantataj alli yuyashpa imatapish decidina canchij? Cai mundopaj ruraicunapi, politicacunapi chagrurinaca jahuallami can. Shamuj punllacunapicarin cai mundopaj ruraicunapi chagrurichunca gentecunaca ashtahuanmi obligasha ningacuna. Pero mana yallitaj sustarinachu canchij. Jehová Diosmi paipaj espíritu santota cushpa, alli yuyashpa imatapish decidichun ayudanga (Lucas 12:11, 12).

8. 1 Tesalonicenses 5:8-pi nishca shinaca ¿espiritualmente rijcharishca cangapajca imatataj rurana canchij? (Fotomantapish parlapai).

⁸ ‘Pechopi fierro churanata, cascotapish churarishunchij’. Apóstol Pabloca Diosta sirvijcunaca soldadocuna shina cashcatami nirca (1 Tesalonicenses 5:8-ta liyipai). Soldadocunaca siempremi macanacungapaj listos cana can. ¿Ñucanchijpish Jehová Diospaj punllapaj allichirishca cashcata ricuchingapajca imatataj rurana canchij? Fetapish, cꞌuyaitapish pechopi fierro churanata churarij shinami churarina canchij. Shinallataj quishpiringapaj esperanzatapish cascota shinami churarina canchij. Cai cualidadcunata charinaca valishcami can.

9. ¿Imamantataj sinchi feta charina canchij?

⁹ Soldadocunaca paicunapaj shunguta cuidangapajca pechopimi fierro churanata churarijcuna carca. Ñucanchijpish ñucanchij shunguta cuidangapajca feta, cꞌuyaita charingapajmi esforzarina canchij. Chashnami Jehová Diosta, Jesustapish cazushpa catishun. Shinallataj sinchi feta charishpaca Jehová Dios paita cazujcunata bendiciaj cashcatami seguros cashun (Hebreos 11:6). Ashtahuancarin llaquicuna ricurijpipish Jesustami apoyashpa catishun. Pero, ¿sinchi feta charingapaj, llaquicunatapish ahuantangapajca imatataj rurana canchij? Huauqui panicuna llaquicunata ima shina ahuantashcatami yachana canchij. Shinallataj ashtahuan charina yuyai ama japichun, minishtirishcallahuan  causangapaj imata rurashcatami yachana canchij. b

10. ¿Jehová Diosta, gentecunatapish cꞌuyashpaca imatataj rurashun?

¹⁰ Espiritualmente rijcharishca cangapaj, alli yuyaihuan causangapajca cꞌuyaitami charina canchij (Mateo 22:37-39). Por ejemplo, cꞌuyaita charishpaca jarcaicuna ricurijpipish predicashpa catingapajmi esforzarishun (2 Timoteo 1:7, 8). Shinallataj Jehová Diosta manaraj rijsijcunata cꞌuyashcata ricuchingapajca maipi cashpapish, telefonopi cayashpa, cartacunata quillcashpa predicangapajmi esforzarina canchij. Gentecuna mana cambiai tucushcataca mana yuyanachu canchij. Ashtahuanpish paicunapaj ñaupa causaita saquishpa Jehová Diosta sirvi tucushcatami mana dudana canchij (Ezequiel 18:27, 28).

11. ¿Huauqui panicunata cꞌuyashcataca ima shinataj ricuchinchij? (1 Tesalonicenses 5:11).

¹¹ Huauqui panicunahuanmi “caishuj chaishuj animanacushpa, sinchiyarinacushpa” catina canchij. Chashnami paicunata cꞌuyashcata ricuchishun (1 Tesalonicenses 5:11-ta liyipai). Soldadocunaca macanacuipi cashpaca caishuj chaishujmi ayudanacuncuna. Shuj soldadoca paipaj munaimanta paipaj compañerotaca mana llaquichinmanchu. Pero, tal vez mana munashpami paipaj compañerota llaquichi tucun. Ñucanchijpish huauqui panicunataca ñucanchij munaimantaca mana llaquichinchijmanchu. Ñucanchijta llaquichijpipish mana tigra llaquichinchijchu (1 Tesalonicenses 5:13, 15). Apóstol Pablo Tesalonicapi caj huauqui panicunaman punta cartata cachajpica chai congregacionca recienllami tiyai callarishcarca. Chai congregacionta pushaj ancianocunapishmi asha experienciallata charishcangacuna. Chaimi huaquinpica pandarishcangacuna. Pero paicuna pandarijpipish huauqui panicunaca respetashpami catina carcacuna. Gran tribulación ñalla callaricujpica central mundialpi, sucursalpi caj huauquicuna cushca instruccioncunataca manachari chasqui tucushun. Chai punllacunapica ñucanchij congregacionta pushaj ancianocunata cazunaca ashtahuan minishtirishcami canga. Pero chai punllacunapi paicunata tucuipi  cazungapajca cunanmantami cazunata, respetanata yachana canchij (1 Tesalonicenses 5:12). Paicuna pandarishcacunallataca mana ricunachu canchij. Ashtahuanpish Jehová Dios paipaj Churita utilizashpa ancianocunata pushacushcatami yuyarina canchij.

12. ¿Imamantataj Dios cusha nishcacunapica yuyana canchij?

¹² Ima shinami cascoca uma ama ima tucuchun ayudan, quishpichishca canata shuyanapishmi ñucanchij yuyaicunata cuidan. Chai esperanzata charishcamantami cai millai mundopi tucui imalla tiyashcacunataca imapaj mana valishcata shina ricunchij (Filipenses 3:8). Shinallataj chai esperanzami tranquilo, cushilla sintirichun ayudan. Africapi sirvij huauqui Wallace y pani Laurindamanta parlashun. Laurindapaj mama y Wallacepaj yayaca casi chai semanacunallapitajmi huañurcacuna. Chai llaqui punllacunapica paicunaca familiahuan cangapajmi paicunapaj llajtaman tigrasha nircacuna. Pero COVID-19 ungüimantami mana tigrai tucurcacuna. Huauquica: “Ñuca familia huañucushpa achcata sufricushcata yuyarinapaj randica Paraisopi causarishpa cushilla causanatami yuyani. Chai esperanzata charishcamantami tranquilo sintirini” nircami.

13. ¿Jehová Dios espíritu santota cuchunca imatataj rurana canchij?

¹³ “Cancunapi Diospaj espíritu imatapish rurachichun ama jarcaichijchu” (1 Tesalonicenses 5:19). Apóstol Pabloca Diospaj espíritu tucuipi ayudai tucushcatami nirca. Jehová Dios espíritu santota cujpimi tucui shunguhuan paipajta rurashpa catishun. Allita rurangapajpishmi esforzarishun. Ashtahuancarin Jehová Diosta sirvishpa catingapajmi fuerzasta charishun (Romanos 12:11). ¿Jehová Dios paipaj espíritu santota cuchunca imatataj rurana canchij? Paitami mañana canchij. Bibliatapishmi estudiana canchij. Paipaj organización nishcacunatapishmi cazuna canchij. Caicunata rurajpimi Diosca espíritu santota cushpa alli cualidadcunata charichun ayudanga (Gálatas 5:22, 23).

14. ¿Jehová Dios espíritu santota cushpa catichunca imatataj mana rurana canchij? (Fotomantapish parlapai).

¹⁴ Mana cuidadota charijpica Jehová Diosca  paipaj espíritu santotami quichui tucun. Chaimantami chuya causaita, chuya yuyaicunata charingapaj esforzarina canchij. Mapa yuyaicuna shungupi sapiyachun saquishpaca juchapimi urmai tucunchij. Chashnami espíritu santota ña mana charishcata ricuchishun (1 Tesalonicenses 4:7, 8). Shinallataj apóstol Pabloca: “Dios huillachishca shimicunata ama yangapi churaichijchu” nircami (1 Tesalonicenses 5:20). ¿Jehová Dios paipaj espíritu santota cushpa “huillachishca shimicunaca” imacunallataj can? Por ejemplo, paica paipaj punlla ñalla chayamugrishcatami huillashca. Chaimantami Diospaj punlla shamuchun achca tiempo illashcataca mana yuyana canchij. Chaipaj randica Diospaj punlla quichquiyamucushcatami yuyaipi charina canchij. Ashtahuancarin ‘Jehová Diosta tucui shunguhuan adoracushcatami ruraicunahuan ricuchina canchij’ (2 Pedro 3:11, 12).

15. ¿Demoniocuna ama pandachichunca imatataj rurana canchij? (1 Tesalonicenses 5:21).

¹⁵ Diospaj enemigocunaca ñallami: “¡Sumajta, mana manchashpami causacunchij!” ningacuna (1 Tesalonicenses 5:3). Chai punllacunapica demoniocunaca gentecunata pandachingapajmi llullacunata huillachingacuna (Apocalipsis 16:13, 14). ¿Demoniocuna ñucanchijtapish ama pandachichunca imatataj rurana canchij? Tucuitami alli ricurana canchij (1 Tesalonicenses 5:21-ta liyipai). Griego rimaipi “alli ricuraichij” nishpaca shuj joya alli o yanga metalhuan rurashca cashcata ricunatami nisha nin. ¿Caimantaca imatataj yachanchij? Ñucanchijpish ima uyashcacuna, liyishcacuna cierto cashcata o llulla cashcatami alli ricuna canchij. Tesalonicapi caj huauqui panicunaca chaitami rurana carcacuna. Ñucanchijpishmi jatun llaqui punllacuna quichquiyamucushcamantami chaita rurana canchij. Gentecuna nishcacunata rato crinapaj randica alli yuyashpa Bibliapi nishcacunahuan, Jehová Diospaj organización nishcacunahuan chꞌimbapurashpami cierto cashcata o mana cierto cashcata ricuna canchij. Chashna rurajpimi demoniocunaca llulla parlocunahuanca mana pandachi tucungacuna (Proverbios 14:15; 1 Timoteo 4:1).

16. a) ¿Jehová Diosta tucui shunguhuan sirvijpica ima bendicioncunatataj chasquishun? b) ¿Dios cusha nishca bendicioncunata chasquingapajca imatataj rurana canchij?

¹⁶ Jatun llaqui punllacuna shamujpi Jehová Dios paipaj pueblota quishpichinatami seguros canchij. Chai punlla chayamungacama cada unohuan ima tucunataca mana yachanchijchu (Santiago 4:14). Pero jatun llaqui punllacuna manaraj shamujpi huañujpipish o mana huañujpipish Jehová Diosta tucui shunguhuan sirvijpica paica huiñai causaita cushpami bendicianga. Ungidocunaca Jesushuanmi jahua pachapi mandangacuna. Cutin, shujtaj ovejacunaca cai Allpapimi huiñai huiñaita causangacuna. Chaimanta Jehová Diospaj punllapaj allichirishpa catishunchij. Ashtahuantajca Jehová Dios cusha nishcacunata japina yuyailla causashunchij.