1, 2. Salmo 25:14-pi nishca shinaca ¿Jehová Dioshuan alli apanacushpa catingapajca imatataj rurana canchij?

 ¿ALLI amigocunaca ima shinataj can? Alli amigocunaca cꞌuyaitami ricuchincuna, paicunapurami apoyanacuncuna ¿nachu? Pero alli amigocuna manchaitapish ricuchina cashcataca manachari yuyashcanchij. Shinapish, Salmo libropi nishca shinaca Jehová Diospaj alli amigocuna casha nishpaca paitami manchana canchij (Salmo 25:14-ta liyipai).

² Jehová Diosta mashna huatacunata sirvicushpapish paita tucui shunguhuan cazungapaj, manchangapajmi esforzarina canchij. Pero ¿Diosta manchanaca imataj can? ¿Paita shungumanta cazungapaj, manchangapajca imatataj rurana canchij? ¿Abdías runamanta, Jehoiadá sacerdotemanta, mandaj Jehoasmantaca imatataj yachai tucunchij?

3. ¿Manchaita charinaca imacunapitaj ayudan?

³ Gentecunaca imata rurashpa, llaquipi urmai tucushcata cuentata cushpaca manchaitami charinchij. Manchaita charinaca imatapish alli yuyashpa rurachunmi ayudan. Por ejemplo, huashicunata manchashpami ñan filopica mana purinchijman ¿nachu? Shinallataj llaqui tucunata manchashcamantami cuidadota charinchij. Ashtahuancarin amigocuna illaj saquirinata manchashcamantami imatapish alli yuyashpa ningapaj esforzarinchij.

4. ¿Diabloca ima shinataj pandachisha nin?

⁴ Huaquin gentecunaca Jehová Dios castiganata manchashcamantami paitaca mana sirvisha nincuna. Diablomi chashna yuyaicunahuan gentecunataca pandachin. Paica Elifaz Jobman nishcata crichunmi munan. Elifazca: ‘Diosca yallitaj pꞌiñajmi, llaquichijmi. Gentecunapipish manataj confianchu’  nircami (Job 4:18, 19). Ñucanchijpish mana cuidadota charishpaca Jehová Diosta yallitaj manchashcamantami paita sirvinata saquishun. Pero Jehová Diosca paita yallitaj manchaihuan, chujchuihuan sirvichunca mana munanchu. Ashtahuanpish paica millai ruraicunata rurashpa, paita llaquichinata manchachunmi munan.

5. ¿Jehová Diosta manchanaca imataj can?

⁵ Jehová Diosta manchajcunaca paitami tucui shunguhuan cꞌuyancuna. Shinallataj paicunapaj ruraicunahuan paita cushichi tucushcata o llaquichi tucushcatami yachancuna (Salmo 78:41; Proverbios 27:11). Paimanta ama caruyangapajpishmi esforzarincuna. Bibliapi nishca shinaca Jesusca Yaya Diostami tucui shunguhuan cazuj, manchaj carca (Hebreos 5:7). Pero Bibliapi chashna nishpaca, mana nisha ninchu Jesús Jehová Diosta manchaihuan, chujchuihuan sirvij cashcata (Isaías 11:2, 3). Ashtahuancarin Jesusca Jehová Diosta tucui shunguhuan cꞌuyashcamantami paita tucuipi cazungapaj esforzarirca (Juan 14:21, 31). Ñucanchijpish Jehová Diosta tucui shunguhuan cꞌuyashcamantami paitaca sirvinchij. Shinallataj Jehová Dios cꞌuyaj, tucuita yachaj, cashcata ruraj, tucui poderyuj cashcataca allimi yachanchij. Chaimantami paita sirvisha ninchij.

6. ¿Jehová Diosta manchangapajca imatataj rurana canchij? (Salmo 34:11).

⁶ Tucuicunami Yaya Diosta manchanata yachana canchij (Salmo 34:11-ta liyipai). Chaipajca Jehová Dios imalla rurashcacunatami ricuna canchij. Chaicunata ricushpami Jehová Dios tucuita yachaj, poderyuj, cꞌuyaj cashcata cuentata cushun. Chaita cuentata cushpami paitaca shungumanta respetanata, cꞌuyanata munashun (Romanos 1:20). Adrienne shuti panica cashnami nirca: “Jehová Dios imalla rurashcacunata ricushpaca mancharishcami saquirini. Shinallataj chaita rurashcamantami Jehová Dios ñuca alli causachun munashcata cuentata cuni. Chaimantami mana allicunata rurashcamanta causaita cuj Yayitu Diosmanta ama caruyangapaj esforzarini” nircami. ¿Canpish cai semanapi Jehová Dios rurashcacunata ricushpa, paipi yuyangapaj tiempota surcui tucunguichu? Chaita rurashpaca Jehová Diostami ashtahuan cꞌuyangui, ashtahuanmi respetangui (Salmo 111:2, 3).

7. ¿Jehová Diostaca imamantataj mañana canchij?

⁷ Shinallataj Yaya Diosta manchanata yachangapajca paitami shungumanta mañana canchij. Jehová Diosta cutin cutin mañashpaca pai ñucanchij mañaicunata uyaj cashcatami seguros cashun. Mana alli ruraicunamanta caruyangapajpishmi fuerzasta charishun. Shinallataj jarcaicunata, llaquicunata ahuantangapaj fuerzasta, alli yuyaita cuchun mañashpaca Jehová Dios tucuita yachaj, tucui poderta charij cashcatapishmi yuyarishun. Cutin, ñucanchijta quishpichingapaj paipaj Churita cachashcamanta pagui nishpa mañashpaca Jehová Dios yallitaj cꞌuyaj cashcatapishmi yuyarishun.

8. ¿Jehová Diosta manchanata yachangapajca imatataj rurana canchij?

⁸ Jehová Diosta manchanata, cazunata yachangapajca Bibliapimi paita sirvijcunamanta yachana canchij. Callaringapajca Jehová Diosta alli sirvijcunamantami yachagrinchij. Puntapica mandaj Acabpaj huasita cuidaj Abdiasmanta, sumo sacerdote Jehoiadamantami yachashun. Chai huashaca Judata mandaj Jehoasmantami yachashun. Paica Jehová Diosta alli sirvij cashpapish qꞌuipaca paimantami caruyarca.

9. ¿Abdiasca Jehová Diosta tucui shunguhuan manchaj cashcamantaca imatataj rurarca? (1 Reyes 18:3, 12).

⁹ Bibliapica Abdiasmanta b parlashpaca: “Abdiasca, Mandaj Diosta tucui shunguhuan manchajmi carca” ninmi (1 Reyes 18:3, 12-ta liyipai). Abdiasca Jehová Diosta tucui shunguhuan manchaj cashcamantami allita rurashpa causarca. Chaimi mandaj Acabca paipaj huasita cuidachun mingarca (Nehemías 7:2-ta ricui). Acabca “paipaj ñaupa jatun mandajcuna millaita rurashcatapish yalli millaitami rurarca” (1 Reyes 16:30). Chashnapish Abdiasca Jehová Diosta tucui shunguhuan manchaj cashcamantami paipajta mana manchashpa rurashpa catirca. Acabca Jezabel huarmihuanmi cazarashca carca. Chai huarmica Baal diostami adoraj carca. Pero Jehová Diostaca tucui shunguhuanmi millaj carca. Chaimantami Israelpi Jehová Diosta ni pi ama sirvichun jarcasha nirca. Jehová Diospaj achca profetacunatapishmi huañuchirca (1 Reyes 18:4). Chai punllacunapi Jehová Diosta sirvinaca Abdiaspajca sinchimi cashcanga.

10. ¿Abdiasca mana manchaj cashcataca ima shinataj ricuchirca?

¹⁰ ¿Abdiasca mana manchaj cashcataca ima shinataj ricuchirca? Jezabel huarmi huañuchingapaj catiracujpica Abdiasca 50 profetacunataca shuj jutcupi, caishuj 50 profetacunataca shujtaj jutcupimi pacarca. Micunatapish, yacutapishmi curca (1 Reyes 18:13, 14). Jezabel chaita yachaj chayashpaca Abdiastami huañuchinman carca. Abdiasca chaitami manchashcanga. Pero Jehová Diosta, paita sirvijcunatapish, paipaj causaitapish yallimi cꞌuyarca. Chaimantami mana manchashpa profetacunataca ayudarca.

11. ¿Huauqui panicunaca ima shinataj Abdiaspaj ejemplota catishcacuna? (Fotomantapish parlapai).

¹¹ Cunan punllacunapica achca huauqui panicunami Diosmanta ama huillachun jarcan llajtacunapi causancuna. Paicunaca autoridadcunatami respetancuna. Pero Abdías shinami Jehová Diosllata adorangapaj esforzarincuna (Mateo 22:21). Cai huauqui panicunaca gentecunata cazunapaj randica tucuimanta  yallica Jehová Diostami cazuncuna (Hechos 5:29). Chaimantami paicunaca autoridadcuna jarcasha nijpipish pacalla predicashpa, tandanacushpa catincuna (Mateo 10:16, 28). Ashtahuancarin huauqui panicuna Diosmanta yachashpa catichunmi ayudancuna. Por ejemplo, huauqui Henrica Diosmanta ama huillachun jarcan llajtapimi causaj carca. Chaimantami paica huauqui panicunamanca publicacioncunataca pacalla saquinaman rij carca. Cai huauquica: “Ñucaca imamantapish mancharijllami cani. Pero Jehová Diosta cꞌuyashcamantami mana manchashpa publicacioncunata saquinaman rij carcani” nircami. Canpish Jehová Diosta tucui shunguhuan manchashpaca mana manchashpami paipajta rurai tucungui.

12. ¿Jehoiadapish, paipaj huarmipish mana manchajcuna cashcataca ima shinataj ricuchircacuna?

¹² Sumo sacerdote Jehoiadá shuti runaca shungumantami Jehová Diosta manchaj carca. Chaimantami paita sirvingapaj esforzarirca. Jezabelpaj ushushi Atalía nishca huarmi mandanata quichushpa mandai callarijpica, Jehoiadaca Jehová Diosta tucui shunguhuan cꞌuyashcatami ricuchirca. Ataliaca millai huarmimi carca. Chaimantami pailla mandasha nishpa tucui paipaj duñu nietocunata huañuchisha nirca (2 Crónicas 22:10, 11). Pero Jehosabeat shuti huarmica reypaj shuj huahuatami salvarca. Cai huarmica Jehoiadapaj huarmimi carca. Paicunaca huahuataca pacallami cuidarcacuna. Chashnami Davidmanta shamuj mandajta cuidarca. Jehoiadaca Jehová Diosta tucui shunguhuan manchashcamanta, cꞌuyashcamantami Ataliata mana manchashpa chai huahuata ayudarca (Proverbios 29:25).

13. ¿Jehoiadaca Jehová Diosta tucui shunguhuan cꞌuyashcata ricuchingapajca ima ashtahuantaj rurarca?

¹³ Jehoás siete huatacunata charijpica Jehoiadaca cutinmi Jehová Diosta tucui shunguhuan cꞌuyashcata ricuchirca. Paica Ataliapaj randi Davidmanta shamuj Jehoastami rey cachun churasha nirca. Atalia chaita yachaj chayashpaca paitami huañuchinman carca. Pero Jehová Diosmi Jehoiadataca ayudarca. Chaimantami familiacunata mandajcunapaj, levitacunata mandajcunapaj ayudahuan Jehoasta rey cachun churarca. Shinallataj Ataliata huañuchichunmi mandarca (2 Crónicas 23:1-5, 11, 12, 15; 24:1). Chai qꞌuipami Jehoiadaca reytapish, tucui gentecunatapish Jehová Dios nishcata pajtachishpa causachun ari nichirca (2 Reyes 11:17). Shinallataj ‘Diospaj huasiman yaicuna pungucunapipishmi cuidajcunata churarca. Ima mana allita rurajcunata ama chai ucuman yaicuchunmi paicunataca chaipi churarca’ (2 Crónicas 23:19).

14. ¿Jehová Diosca Jehoiadata valorashcataca ima shinataj ricuchirca?

¹⁴ Jehová Diosca: “Ñucata allipi churajcunallatami allipi churasha” nircami (1 Samuel 2:30). Paica chai nishcacunataca Jehoiadapimi pajtachirca. Por ejemplo, Jehoiadá allita rurashcataca Bibliapimi quillcachirca (Romanos 15:4). Shinallataj Jehoiadá huañujpica ‘Davidpaj pueblopimi, jatun mandajcunata pambashca cꞌuchupi pambarcacuna. Paica israelitacunapajpish, Jehovapajpish, paipaj huasipajpishmi allita rurashcarca. Chaimantami paitaca chaipi pambarcacuna’ (2 Crónicas 24:15, 16).

15. ¿Jehoiadamantaca imatataj yachanchij? (Fotomantapish parlapai).

¹⁵ ¿Jehoiadamantaca imatataj yachai tucunchij? Ancianocunaca Jehová Diospaj ovejitacunatami imata mana manchashpa cuidana can (Hechos 20:28). Cutin, mayorlla huauqui  panicunaca ña mayorllacuna cajpipish Jehová Dios paicunata utilizai tucushcatami yuyarina can. Pero paicunata utilizachunca Jehová Diostami tucui shunguhuan manchana, cꞌuyana can. Shinallataj jovencunaca Jehová Dios Jehoiadata cꞌuyaihuan tratashcatami yuyarina can. Chashnami mayorlla huauqui panicunataca cꞌuyaihuan, respetohuan tratangacuna. Ashtahuantajca Jehová Diosta achca huatacunata sirvij mayorlla huauqui panicunamanmi respetota ricuchina can (Proverbios 16:31). Shinallataj tucuicunami familiacunata mandajcunamanta, levitacunata mandajcunamanta achcata yachai tucunchij. Paicuna rurashca shinami ñucanchijpish Jehová Diospaj pueblota pushajcunata tucui shunguhuan apoyana canchij (Hebreos 13:17).

16. ¿Jehoasca Jehová Diosta mana manchaj cashcataca ima shinataj ricuchirca?

¹⁶ Jehoiadaca Jehoastaca achcatami ayudarca. Chaimantami Jehoasca jovenraj cashpaca Jehová Diospaj ñaupajpi alli ricuringapaj esforzarirca (2 Reyes 12:2). Pero Jehoiadá huañujpica Jehoasca Judata mandajcunahuanmi apanacui callarirca. Paicunaca Jehová Diosmantami caruyashcacuna carca. Chaimantami Jehoaspish, israelitacunapish yanga dioscunata adorai callarircacuna (2 Crónicas 24:4, 17, 18). Chaita ricushpaca Jehová Diosca achcatami llaquirirca. Chaimantami profetacunata cachashpa arrepintirichun ayudasha nirca. Diosca Jehoiadapaj churi profeta Zacariastapishmi Jehoaspajman cacharca. Pero Jehoasca Zacariasta  uyanapaj randica paita huañuchichunmi cacharca. Chashnami Jehoasca Jehoiadá paita ayudashcata mana valorashcata ricuchirca (2 Crónicas 22:11; 24:19-22).

17. ¿Jehoashuanca imataj tucurca?

¹⁷ Jehová Diosca: ‘Ñucata pꞌiñajcunataca mana alli nishca canapimi churasha’ ninmi (1 Samuel 2:30). Jehoasca Jehová Diosta manchanata saquishcamantami achca llaquicunata charirca. Por ejemplo, ‘Siria llajta soldadocunaca shuj mirgallami Jehoaspaj soldadocunata misharca. Chai Sirio soldadocunaca Jehoastaca achcata chugrichishpa anchatami saquircacuna. Chashna saquijpica pai churashca mandajcunallatajmi Jehoasta huañuchircacuna. Paicunaca Zacariasta huañuchishcamantami, chashna huañuchircacuna. Chai qꞌuipaca mana jatun mandajcunata pambana jutcupimi pambarcacuna’ (2 Crónicas 24:23-25). c

18. Jeremías 17:7, 8-pi nishca shinaca ¿Jehoás shina ama cangapajca imatataj rurana canchij?

¹⁸ Mana jatun sapicunata charij yurata shuj caspihuan mana huatajpica chai yuraca urmanllami ¿nachu? Jehoasca chai yura layami carca. Chaimantami Jehoiadá huañujpica yura urmaj shina rato Diosmanta caruyarca. Ñucanchijpish huauqui panicuna, ñucanchij familiacuna Jehová Diosta sirvij cashcallamantaca mana sirvinachu canchij. Ashtahuanpish espiritualmente sinchi cangapaj, Jehová Diosta tucui shunguhuan manchangapajca Bibliata estudiana, chaipi nishcacunapimi yuyana canchij. Cada punlla Jehová Diosta mañangapajpishmi esforzarina canchij (Jeremías 17:7, 8-ta liyipai; Colosenses 2:6, 7).

19. ¿Jehová Diosca imatataj rurachun munan?

¹⁹ Jehová Diosca ñucanchij rurai pudishcallata rurachunmi munan. Chaimantami Eclesiastés 12:13-pica: “Diostaca manchashpa cazungui, pai mandashcacunatapish pajtachingui” nin. Jehová Diosta tucui shunguhuan manchashpaca Abdías shina, Jehoiadá shinami llaquicunataca ahuantashun. Ashtahuancarin Jehová Diosmantaca manataj caruyashunchu.