Ñuca yaya mamaca II Guerra Mundial qꞌuipaca Estoniamantaca Alemania llajtapimi causanaman rircacuna. Ñucaca chaipimi huacharircani. Qꞌuipaca Ottawa, Canadá llajtapimi causanaman rircanchij. Ñucanchijcunaca atillpacuna causan shuj esquinitapimi causajcuna carcanchij. Yallitaj pobrecuna cashpapish luluncitocunata micungapajmi charijcuna carcanchij.

Shuj punllaca testigo de Jehovacunaca ñuca mamitamanca Apocalipsis 21:3, 4-tami liyircacuna. Chai shimicunaca paipaj shungumanmi chayarca. Chaimantami huacai callarirca. Paicunaca Bibliatami yachai callarircacuna. Qꞌuipaca ñuca yayapish, ñuca mamitapishmi bautizarircacuna.

Ñuca yaya mamaca mana tanto inglesta yachashpapish Bibliatami yachashpa catircacuna. Ñuca yayaca tucui viernes tuta trabajashcamanta shaicushca cashpapish tucui sabadocunatami ñucata, ñuca panitapish predicanaman pushaj carca. Tucui semanacunami tucuicuna Huillaj revistata estudiaj carcanchij. Ñuca yaya mamaca Jehová Diosta cꞌuyachunmi yachachirca. Chaimantami 1956 huatapi bautizarircani. Chaipica 10 huatacunallatami charircani. Ñuca yaya mama Jehová Diosta achcata cꞌuyajcuna cashcata ricushpami ñucapish Jehová Diosta sirvinata munarcani.

Pero colegiota tucuchishca qꞌuipaca Jehová Diostaca ña mana tanto sirvircanichu. Precursor tucushpaca shujtaj llajtaman ringapajca cullquitaca mana charishachu nishpami yuyaj carcani. Chaimantami shuj emisorapi tutacama musicata churashpa trabajai callarircani. Pero tandanacuicunamanca ña mana rijchu carcani. Diosta mana sirvijcunahuanpishmi pasaj carcani. Chaimi chaipi trabajanata saquircani.

Oshawa nishca pueblopi causanaman rishpaca Ray Normanta, paipaj pani Leslita y shujtaj precursorescunatami rijsircani. Paicunaca ñucataca allimi tratarcacuna. Shinallataj precursor tucuchunpishmi animarcacuna. Chaimi 1966-pi precursor shina sirvi callarircani. Jehová Diosta chashna sirvinaca alajami carca. Shinapish qꞌuipaca ñuca causaipica cambiocunami tiyarca.

Colegiopi cashparaj Canadá Betelpi trabajangapajmi solicitudta cacharcani. Precursor  shina sirvicujpimi Betelpi chuscu huatacunata trabajachun invitarcacuna. Chai punllacunapajca Leslimantami enamoraricurcani. Chaimi chai invitacionta chasquishpaca Leslitaca ña mana ricushachu nishpa llaquirircani. Pero shuj alli decisionta japingapajmi Yaya Diosta mañarcani. Chai qꞌuipaca Betelpi sirvinatami decidircani.

Betelpica ropata tajshashpa, secretario shinami trabajaj carcani. Cutin Leslica Gatineau, Quebec llajtapimi precursora especial shina sirvicurca. Paipica siempremi yuyaj carcani. “¿Betelman shamunaca alli decisionchushi carca?” nishpami tapurij carcani. Qꞌuipaca Betelmanca Leslipaj turitami invitarcacuna. Chaimi cutin Leslihuan parlai callarircani. Betelpi chuscu huatata sirvishca qꞌuipami 27 de febrero de 1971-pi cazararcanchij.

Quebec llajtapimi francés congregacionpi sirvichun cacharcacuna. 28 huatacunata charijpi superintendente de circuito shina sirvichun nombrashcamantami manchaita charircani. Pero Jeremías 1:7, 8–pi ima nishcami ñucataca achcata ayudarca. Ñuca huarmisitaca carropi achca accidentecunata charishcamantami mana tranquila dormij carca. Chaimi ñucaca achca preocupado sintirircani. Pero paica: “Jehová caita rurachun mandajpica ruranallami canchij” nishpa animarca. 17 huatacunatami superintendente shina sirvircanchij.

Superintendente shina sirvicushpaca siempremi ocupado pasaj carcani. Pero qꞌuipaca ñuca huarmisitahuan tiempota pasana cashcatami cuentata curcani. Shuj lunes tutamantami ñucanchij pungupi shuj canastapi frutacunata, quesota, tandata, shuj vino botellata, copacunata saquishcacuna carca. Shinallataj shuj papelpimi, “cambaj huarmisitahuan paseanaman ri” nishpa quillcashcacuna carca. Chai punllaca inti punllami carca. Pero ñucaca huaquin conferenciacunatami repasana carcani. Chaimi ñuca huarmimanca: “Mana ri tucunchijchu” nircani. Paica asha llaquillami saquirirca. Ña ñuca conferenciacunata preparai callaricushpaca Efesios 5:25, 28-pi nishcatami yuyarircani. Chaipimi Jehová Dios ñuca huarmisitahuan tiempota pasachun munashcata cuentata curcani. Chaimantami ñuca huarmisitataca: “Paseanaman jacu” nircani. Paica cushillami carca. Shuj yacu cꞌuchullapi micushpa alajatami pasarcanchij. Y huasiman tigrashpaca ñuca discursocunata preparangapajmi tiempota charircaniraj.

Columbia Britanicamanta Newfoundlandcamami achca congregacioncunata visitarcanchij. Chaimantami cushilla sintirircanchij. Ñuca munashca shinami achca llajtacunata viajarcanchij. Escuela de Galaadman rinata munashpapish misionero shina África llajtaman cachachunmi manchaj carcani. Chaipica achca ungüicuna,  guerracunami tiyan. Maipi sirvicushcapimi ñucaca cushilla carcani.

1992-pimi Unión Sovieticapi saquirij huaquin llajtacunapi libremente predicachun saquircacuna. Chaimantami, “¿Estonia llajtapi misionerocuna shina sirvisha ninguichijchu?” nishpa tapurcacuna. Manaraj ari nishpaca Jehová Diostami mañarcanchij. Shinallataj, ‘Jehová Dios chaiman richun nijpica rinallami canchij’ nircanchijmi. Africaman mana cachashcamantami asha tranquilos sintirircanchij.

Estonio shimitami yachai callarircanchij. Huaquin quillacuna qꞌuipaca Rusia llajtapi saquirij congregacioncunata, shinallataj quimsa llajtacunapi grupocunata visitachunmi mingarcacuna. Chaimantami letón, lituano y ruso shimicunata yachai callarircanchij. Yachanaca sinchimi carca. Pero huauqui panicuna ñucanchij esforzarishcamantami achcata agradicijcuna carca. 1999 huatapica Estoniapimi shuj sucursal pascarirca. Chaipica Toomas Edur, Lembit Reile, Tommi Kauko huauquicunahuanmi Comité de sucursalpi sirvichun churarcacuna.

Achca huauqui panicunatami Jehová Diosta sirvishcamanta Siberiapi tiyaj carcelman cachashcacuna carca. Paicunaca carcelpi cashpapish, paicunapaj familiacunahuan mana cai tucushpapish cushillami Jehová Diosta sirvishpa catircacuna. Chaita ricushpami llaquicunahuan chꞌimbapuracushpapish Jehová Diosta cushilla sirvina cashcata yacharcani.

Mana tanto samajchu carcanchij. Chaimantami ñuca huarmisitaca achca shaicushca sintiri callarirca. Paica fibromialgia ungüita charishcamantami chashna sintirij cashcarca. Chaimantami Canadá llajtaman cutin tigranata yuyacurcanchij. Pero Escuela para miembros del Comitemanmi Pattersonpi invitarcacuna. Chaimanca mana ri tucunchijchu nishpami yuyarcanchij. Pero qꞌuipaca rircanchijmi. Chaita decidishcamantami Jehová Diosca ñucanchijtaca achcata bendiciarca. Chaipimi ñuca huarmica doctorpajman rina oportunidadta charirca. Chashnami Jehová Diosta cutin alli sirvi tucurcanchij.

2008 huatapica Estonia llajtapimi carcanchij. Chaipimi shuj tutaca Central Mundialmanta huauquicuna cayarcacuna. Paicunaca: “¿Congo llajtapi sirvisha ninguichijchu?” nishpami tapurcacuna. Cai huauquicunaca cayandij punlla risha nishcata o mana risha nishcata cutichichunmi munarcacuna. Ñuca huarmisita alli dormichunmi munarcani. Chaimantami imamanta cayashcata mana huillarcani. Pero ñucaca tucui tutami Jehová Diosta mañashpa pacarircani.

Cayandij punllaca ñuca huarmimanca imamanta cayashcatami huillarcani. Chaimi, “Jehová Diosmi África llajtaman richun nin. Chaipi ima laya cashcata yachangapajmi rina canchij” nircanchij. Estoniapi 16 huatacunata  causashca qꞌuipami Congo llajtaman rircanchij. Chaipi tiyaj Sucursalca shuj alaja jardintami charirca. Tranquilomi carca. Chaiman chayashpaca ñucanchij cuartopica ñuca huarmica shuj tarjetatami churarca. Chaipica: “Shuj planta shina canta maipi plantashcapi sisashpa cati” nishpami quillcashca carca. Chaita liyishpami achcata animarircanchij. Huauqui panicunata rijsishpa, Bibliamanta yachachishpami cushilla sintirircanchij. Qꞌuipaca 13 llajtacunata visitana privilegiotami charircanchij. Chaipi caj huauqui panicunata rijsishpami manchaitaca ña mana charircani. Ñucanchijta África llajtaman cachashcamantami Jehová Diostaca achcata agradicircanchij.

Congo llajtapi nunca mana micushca micunacunata carajpica ashatami mancharircanchij. Pero huauqui panicuna cushilla micujta ricushpaca ñucanchijpishmi cushilla micurcanchij. Chai micunacunaca mishquimi cashcarca.

Huaquin ladocunapica huarmicunata, huahuacunatapishmi llaquichicushcarca. Chaimantami paicunata ayudangapaj rircanchij. Achca huauqui panicunaca mana achca cosascunata charircacunachu. Chashna cashpapish paicunaca Jehová Diosta cꞌuyashpa, paipaj organizacionta cazushpami catircacuna. Chaita ricushpami ñucanchijca achcata animarircanchij. Shinallataj huaquin huauqui panicunaca paicunapaj huasicunata, cosechacunatapishmi chingachishcacuna carca. Pero paicunapajca Diosmanta yachanami tucuimanta yalli valishca carca. Paicuna llaquicunata charishpapish mana quejarijcuna cashcata ricushpami ñucanchijcunapish llaquicunata, ungüicunata cushilla ahuantai tucushcata yacharcanchij.

Hong Kong llajtapi tiyaj sucursalpi sirvichun nijpica sorprendidosmi saquirircanchij. Chai llajtapi causanataca mana yuyashcachu carcanchij. Pero Jehová Dios ñucanchijta ayudashpa catinatami seguros carcanchij. Chaimi 2013 huatapi Africapi caj huauqui panicunata saquishpa Hong Kongpi causanaman rircanchij. Huauqui panicunata saquinaca sinchimi carca. Shinallataj ‘¿Hong  Kongpi causanaca ima layashi canga?’ nishpami ashata sustarircanchij.

Hong Kongca jatun llajtami carca. Chaipica chino cantonés shimitami yachana carcanchij. Chaipi tiyaj huauqui panicunaca cushillami ñucanchijtaca chasquircacuna. Chaipi tiyaj micunaca mishquimi carca. Hong Kongpica huasicunata, allpacunata randinaca caromi carca. Chaimantami Cuerpo Gobernanteca Sucursalta, shujtaj allpacunatapish cꞌatunata dicidircacuna. 2015 huatapimi Corea del Surman rircanchij. Caipica cutinmi shujtaj shimita yachana cashcanchij. Cai shimita yachanaca sinchimi cashca. Pero huauqui panicuna felicitajpica yachashpa catingapajmi animarinchij.

Mana rijsishca huauqui panicunahuan alli apanacunaca sinchimi cai tucun. Pero paicunahuan alli apanacungapajmi esforzarina canchij. Huauqui panicunaca maimanta cashpapish tucuicunami Jehová Diosta cꞌuyancuna, paipajta rurashpa catingapajmi esforzarincuna. Jehová Diosca paicunaman cꞌuyaita ricuchichunmi munan. Chaimantami ñucanchij shungucunata pascashpa paicunahuan apanacunalla canchij (2 Corintios 6:11).

Jehová ricushca shina huauqui panicunata ricuna cashcatami yachashcanchij. Shinallataj Jehová Dios ñucanchijta cꞌuyashcata, ayudacushcatami ricushcanchij. Llaquilla cashpa o shujtaj huauqui panicunahuan apanacungapaj esforzaricushpaca ñucanchij amigocuna cachashca tarjetitacunatami liyijcuna carcanchij. Jehová Dios ñucanchij mañashcacunata uyashcata, minishtishca horaspi fuerzata cushcatami ricushcanchij.

Cai huatacunapica ñucapish, ñuca huarmisitapish achca ocupados cashpapish tandalla pasangapaj tiempota surcuna cashcatami yachashcanchij. Shinallataj mushuj shimipi rimacushpa pandarishpapish esforzarishpa catina cashcatami cuentata cushcanchij. Tucui tutacunami Jehová Diostaca chai punllapi allicunata cushcamanta pagui ninchij.

Jehová Diospaj ayudahuanmi misionerocuna shina sirvi tucushcanchij. Shinallataj shujtaj llajtacunapimi causai tucushcanchij. Chaimantami cushilla sintirinchij. Ñucaca profeta Jeremías shinami yuyani. Paica: “Mandaj Dioslla, ñucataca inquitashcanguimari” nircami (Jeremías 20:7). Jehová Diosca ñucanchijtaca achcatami bendiciashca. Ñuca munashca shinami achca llajtacunata viajai tucushcani. Huaquin llajtacunapimi sucursalcunata visitai tucushcanchij. Ñuca huarmisitaca ñucataca achcatami apoyashca. Chaimantami paitaca achcata agradicini.

Jehová Diosta cꞌuyashcamanta paita sirvicushcatami siempre yuyarinchij. Jehová Diosca ñucanchijtaca achcatami bendiciashca. Pero shamuj punllacunapica paica tucui paita sirvijcunamanmi ashtahuan allicunata cushpa bendicianga (Salmo 145:16).