1. ¿Achca llaquicunata charishpapish Jehová Diosta sirvishpa catingapajca imatataj yuyarina canchij?

 BIBLIAPICA ‘sinchi, llaqui punllacunapi’ causacushcatami nin (2 Timoteo 3:1). Cunan punllacunapica tucuicunami achca llaquicunata chꞌimbapurana canchij. Jehová Diosta sirvijcunatacarin catirashpami llaquichincuna. Shinapish ¿Jehová Diosta sirvishpa catingapajca imatataj yuyarina canchij? Puntapica Yaya Dios ‘causaj Dios cashcatami’ yuyarina canchij (Jeremías 10:10; 2 Timoteo 1:12).

2. ¿Jehová Diosca causaj Dios cashcataca ima shinataj ricuchin?

² Jehová Diosca causaj Diosmi can. Chaimantami ñucanchijcuna llaquicunata charijpica ñucanchijta ima shina ayudanata ricun (2 Crónicas 16:9; Salmo 23:4). Jehová Dios ñucanchijta ayudaj cashcata yuyarishpami ima llaquicunatapish ahuantai tucushun. Rey Davidca chaitaca allimi yacharca. Imamanta chashna nishcata ricushun.

3. ¿Davidca “Mandaj Diosca huiñaita causacuchunlla” nishpaca imatataj nisha nirca?

³ Davidca Jehová Diosta alli rijsishcamantami paipi tucui shunguhuan confiarca. Por ejemplo, rey Saúl paipaj soldadocunahuan paita huañuchingapaj catiracujpimi Davidca Jehová Diospaj ayudata mashcarca (Salmo 18:6). Jehová Dios paipaj mañashcata cutichijta ricushpaca Davidca “Mandaj Diosca huiñaita causacuchunlla” nishpami Jehová Diosta jatunyachirca (Salmo 18:46). Pero chaita nishpaca Davidca Jehová Dios tiyaj cashcallataca mana nicurcachu. Ashtahuanpish shuj libropi nishca shinaca Davidca Jehová Dios cutin cutin paipaj pueblota ayudashcamantami tucui shunguhuan paipi confiaj carca. Shinallataj Davidca Jehová Dios paita tucuipi ayudashcata ricushcamantami Jehová Dios causaj Dios cashcata seguro carca y seguro cashcamantami Jehová Diosta sirvishpa, jatunyachishpa catingapaj fuerzasta charirca (Salmo 18:​28, 29, 49).

4. ¿Jehová Dios causaj Dios cashcataca imamantataj seguros cana canchij?

 ⁴ Yaya Dios causaj Dios cashcata seguros cashpami paitaca cushicuihuan sirvishpa cati tucushun. Ashtahuanpish tucui llaquicunatami chꞌimbapurai tucushun. Paipajta ruranatapish manataj saquishunchu. Chashnami paimantaca mana caruyashun.

CAUSAJ DIOSMI FUERZASTA CUNGA

5. ¿Llaquicunata ahuantangapajca imatataj yuyarina canchij? (Filipenses 4:13).

⁵ ¿Llaquicunata ahuantangapajca imatataj yuyarina canchij? Jehová Dios causaj Dios cashcata, llaquicunata ahuantangapaj ayudaj cashcatapishmi yuyarina canchij. Pai tucui poderta charishcamantami ima llaquicunata ahuantachun fuerzasta cui tucun (Filipenses 4:​13-ta liyipai). Llaquicunata charishpaca chaitami yuyarina canchij. Shinallataj Jehová Dios uchilla problemacunata ahuantangapaj ima shina ayudashcata ricushpami jatun problemacunatapish ahuantangapaj Jehová Dios ayudanata seguros cashun.

6. ¿Davidca jovenraj cajpica Jehová Diosca paitaca ima shinataj ayudarca?

⁶ Davidca jovenraj cajpi ishqui cutin Jehová Dios paita ima shina ayudashcata yuyarishpami paipi confianata yacharca. Shuj cutinca shuj leonmi paipaj yayapaj ovejata apashpa rirca. Shujtaj punllaca shuj osomi shujtaj ovejata apashpa rirca. Pero Davidca chai ovejitacunata salvangapajca mana manchashpami leontapish, osotapish catishpa rirca. Davidca Jehová Dios chaita rurachun fuerzata cushcatami yacharca. Chaimantami paillataj alabarinapaj randica Jehová Diosta alabarca (1 Samuel 17:​34-37). Davidca Jehová Dios paita ayudashcataca siempremi yuyarij carca. Chaimantami Jehová Dios shamuj punllacunapi paita ayudanata seguro carca.

7. ¿Davidca ama manchangapajca imatataj yuyaipi charirca?

⁷ Davidca huambraraj cashpaca israelitacunapaj soldadocunatami ricunaman rirca. Paica tucui israelitacuna Goliatpaj nishcacunata uyashpa manchaihuan cashcatami ricurca. Goliatca: ‘Ñucahuan macanacuchun israelitacunapaj soldadocunata cachaichij’ nircami (1 Samuel 17:​10, 11). Israelita soldadocunaca Goliat yallitaj jatun cashcata ricushpa, paipaj nishcacunata uyashpami achcata mancharircacuna (1 Samuel 17:​24, 25). Shinapish Davidca mana mancharcachu. Paica Goliat israelita soldadocunallata mana cꞌamicushcata, ashtahuanpish “causaj Diospaj soldadocunata” cꞌamicushcatami cuentata curca (1 Samuel 17:26). Davidca Jehová Dios paita ima shina ayudashcatami yuyarirca. Por ejemplo, ima shinami ovejacunata cuidangapaj ayudarca, Goliattapish mishangapaj ayudanatami seguro carca. Chaimantami Jehová Diospaj ayudahuan Goliattaca huañuchirca (1 Samuel 17:​45-51).

8. ¿Llaqui horaspi Jehová Dios ayudaj cashcata confiangapajca imatataj rurana canchij? (Fotomantapish parlapai).

⁸ Llaquicunata ahuantangapajca Davidpaj ejemplotami catina canchij. Paica Jehová Dios paita ayudangapaj listo cashcatami yuyarij carca (Salmo 118:6). David shina confiangapajca ñaupa tiempopi Jehová Dios imata rurashcatami yuyarina canchij. Por ejemplo, Jehová Dios paita sirvijcunata ima shina ayudashcata yachangapajca Bibliatami liyina canchij (Isaías 37:​17, 33-37). Shinallataj cunan punllacunapi huauqui panicunata Jehová Dios ima shina ayudashcata yachangapajca jw.org paginapi llujshishca informaciontami liyina canchij. Ashtahuancarin cada unota Jehová Dios ima shina ayudashcatami yuyarina canchij. Tal vez ñucanchijtaca shuj osomanta o shuj leonmantaca manachari quishpichishca. Pero de seguro achca llaquicunamantami quishpichishcanga. Shinallataj Jehová Dios paipaj amigocuna cachun oportunidadta cushcatami yuyarina canchij (Juan 6:44). Canca Jehová Diospaj ayudallahuanmi paitaca sirvi tucushcangui. Chaimanta cambaj mañaicunata ima shina cutichishcata,  minishtishca horaspi ima shina ayudashcata yuyaringapaj Jehová Diosta mañai. Chaita rurashpaca canta siempre ayudaj cashcatami seguro cangui.

9. ¿Llaquicunata charishpaca imatataj yuyarina canchij? (Proverbios 27:11).

⁹ Jehová Dios causaj Dios cashcata yuyaipi charishpaca llaquicuna ricurijpipish paitami jatunyachishpa catishun. Satanás Diabloca “Jehová Diosta sirvijcunata llaquicuna japijpica paita sirvinatami saquingacuna” ninmi (Job 1:​10, 11; Proverbios 27:​11-ta liyipai). Pero Jehová Diosta sirvinata mana saquishpaca Satanaspaj nishcacuna llulla cashcata, ashtahuanpish Jehová Diosta cꞌuyashcatami ricuchishun. Gobiernocuna catirashpa llaquichijpi, gentecuna mana uyasha nijpi, cullqui illajpi, o shujtaj llaquicuna japijpica ¿imatataj yuyarina cangui? Chai llaquicunata ahuantashpa Jehová Diosta jatunyachingapaj shuj oportunidadta charishcatami yuyarina cangui. Jehová Diosca ñucanchij apai pudishca llaquicunallata apachunmi saquinga (1 Corintios 10:13). Paimi llaquicunata ahuantachun ayudanga.

CAUSAJ DIOSMI CANTACA BENDICIANGA

10. ¿Jehová Diosca paita sirvijcunataca ima shinataj bendicianga?

¹⁰ Jehová Diosca paita adorajcunatami bendician (Hebreos 11:6). Cunan punllacunapica tranquilo, cushilla causachunmi ayudan. Shamuj punllacunapicarin huiñai causaita cushpami bendicianga. Jehová Dios ñucanchijta bendiciasha nishcata, chaita rurangapaj poderta charishcataca segurosmi canchij. Chaimantami ñaupa punllacunapi Diosta sirvijcuna rurashca shina ñucanchijpish paita tucui shunguhuan sirvingapaj esforzarinchij. Cunanca Timoteo Jehová Diosta ima shina sirvishcatami ricushun (Hebreos 6:​10-12).

11. ¿Timoteoca Jehová Diosta sirvingapajca imamantataj sinchita esforzarirca? (1 Timoteo 4:10).

¹¹ (1 Timoteo 4:​10-ta liyipai). Timoteoca causaj Jehová Diospimi paipaj shunguta churarca. Paica Jehová Diospaj bendicionta chasquinatami seguro carca. Chaimantami Jehová Diospajta rurangapaj, shujtajcunata ayudangapajpish sinchita esforzarirca. Por ejemplo, apóstol Pabloca Timoteotaca alli yachachij cachun, conferenciacunata  alli cuj cachun, jovencunaman, mayorllacunaman alli ejemplota cuchunmi animarca. Shinallataj Timoteoca huaquin sinchi mingashcacunatami pajtachina carca. Por ejemplo, maijan huauqui panicuna paicunapaj yuyaita cambiachunmi cꞌuyaihuan paicunataca cunana carca (1 Timoteo 4:​11-16; 2 Timoteo 4:​1-5). Timoteo Diospajta rurangapaj sinchita esforzaricushcataca maijancunaca manachari cuentata curcacuna. Shujtajcunacarin Timoteotaca mana valorarcacunachu. Shinapish Timoteoca Jehová Dios paita bendicianatami tucui shunguhuan crirca (Romanos 2:​6, 7).

12. ¿Congregacionta pushaj ancianocunaca imamantataj huauqui panicunata ayudangapaj esforzarincuna? (Fotomantapish parlapai).

¹² Cunan punllacunapica congregacionta pushaj ancianocunaca Timoteo shinami Jehová Diosta tucui shunguhuan sirvingapaj esforzarincuna. Paicunaca Jehová Dios paicunapaj esfuerzota valorashcatami yuyarina can. Maijan ancianocunaca congregacionpi alli yachachingapaj, predicacionman llujshingapaj esforzarishpapish shujtaj trabajocunatapish rurangapajmi esforzarincuna. Por ejemplo, maijan ancianocunaca construccionpi, llaquipi caj huauqui panicunatapishmi ayudancuna. Shujtajcunaca Grupo de Visita a Pacientes, Comité de Enlace con los Hospitales nishcacunapimi ayudancuna. Anciano huauquicunaca congregacionpi caj huauqui panicuna mana paicunapaj cashcata, ashtahuanpish Jehová Diospaj cashcatami yachancuna. Chaimantami paicunaman mingashcacunata tucui shunguhuan pajtachingapaj esforzarincuna. Ashtahuanpish paicunaca chaita rurashcamanta Jehová Dios bendicianatami seguros cancuna (Colosenses 3:​23, 24).

13. ¿Jehová Diosca ñucanchijcuna paita sirvingapaj sinchita esforzarijta ricushpaca ima shinataj sintirin?

¹³ Mana tucuicunachu ancianocuna cai tucunchij. Pero tucuicunami Jehová Diosta sirvingapaj esforzari tucunchij. Ñucanchij esfuerzocunata ricushpaca Jehová Diosca cushillami sintirin. Por ejemplo, Diospaj obra ñaupajman catichun ashalla cullquihuan ayudajpipish Jehová Diospajca achca valishcami can.  Shinallataj manchaihuan cashpapish tandanacuicunapi comentangapaj esforzarijpica Jehová Diosca cushillami sintirin. Ashtahuancarin Jehová Diospaj shunguta cushichingapajca ñucanchijta llaquichijcunatami perdonana canchij. Caipi ricushca shinaca Jehová Diosta sirvingapaj pꞌichillata rurai tucujpipish Jehová Diosca ñucanchij esforzarishcataca achcatami valoran. Paica ñucanchijta cꞌuyashcamantami sumaj bendicioncunata cunga (Lucas 21:​1-4).

CAUSAJ DIOSMANTACA AMATAJ CARUYASHUNCHIJ

14. ¿Jehová Diosta tucuipi cazungapajca imamantataj paipaj alli amigocuna cana canchij? (Fotomantapish parlapai).

¹⁴ Jehová Dios causaj cashcata yuyarishpaca paita tucuipi cazunaca jahuallami canga. Josepi yuyashun. Paica Jehová Dios causaj Dios cashcatami seguro carca. Chaimantami paita juchapi urmachisha nijpipish paica mana urmarca (Génesis 39:9). Ñucanchijpish Jehová Dios causaj Dios cashcata seguros cangapajca paita mañangapaj, paipaj Shimita liyingapajmi tiempota surcuna canchij. Chashnami paimanca ashtahuan cꞌuchuyashpa catishun. José shina Jehová Diospaj alli amigocuna cashpaca tentacioncuna ricurijpipish chaicunapica mana urmashunchu (Santiago 4:8).

15. ¿Israelitacunamantaca imatataj yachai tucunchij? (Hebreos 3:12).

¹⁵ Jehová Dios causaj cashcata cungarijcunaca ratitomi paimanta caruyancuna. Israelitacunaca chaquishca pambapi puricushpaca chaitami rurarcacuna. Paicunaca Jehová Dios tiyashcatami yacharcacuna. Shinapish paicuna imalla minishtishcata Jehová Dios cui tucushcatami dudai callarircacuna. Chaimi: “¿Jehová Diosca ñucanchijpurapichu o mana?” nishpa tapurcacuna (Éxodo 17:​2, 7). Chai qꞌuipaca paicunaca Jehová Diospaj contrami tucurcacuna. Ñucanchijcunaca paicuna shinaca mana cashun ninchijchu (Hebreos 3:​12-ta liyipai).

16. ¿Jehová Diosta mana sirvijcunata ricushpaca maipica ima shinataj sintiri tucunchij?

¹⁶ Cai millai mundopi causacushcamantami Jehová Diospaj cꞌuchullapi canaca maipica sinchi can. Achca gentecunaca Jehová Dios tiyashcata mana crishcamantami paicuna munashca shina causancuna. Chai gentecunaca sumaj causaita  charishca shinami ricurincuna. Paicunata ricushpaca ñucanchijpish tal vez paicuna shinami yuyai callarishun. Jehová Dios tiyashcataca manachari crinata saquishun. Pero ñucanchijta ayudai tucushcata o mana ayudai tucushcatami dudai callarishun. Salmo 73-ta quillcaj runami chashna sintirirca. Paica achca gentecuna Jehová Diospaj mandashcacunata ladoman saquishpa cushilla causacushcatami ricurca. Chaimi paica “¿Jehová Diosta sirvinaca valishcachu canga?” nishpa dudai callarirca (Salmo 73:​11-13).

17. ¿Jehová Diosmanta ama caruyangapajca imatataj rurana canchij?

¹⁷ ¿Salmota quillcaj runaca ama dudangapajca imatataj rurarca? Paica Jehová Diosta cungarijcunahuan ima tucugrishcatami yuyarca (Salmo 73:​18, 19, 27). Shinallataj Jehová Diosta sirvishcamanta ima bendicioncunata chasquishcatami yuyarirca (Salmo 73:24). Ñucanchijpish Jehová Diosta sirvishcamanta ima bendicioncunallata chasquishcatami yuyarina canchij. Ashtahuanpish “¿Jehová Diosta mana rijsishca cashpaca ñuca causaica ima shinataj canman carca?” nishpami yuyana canchij. Chaita rurashpaca Jehová Diosta tucuipi cazunatami munashun. Ashtahuanpish Salmota quillcaj runa shinami sintirishun. Paica: “Ñucapajca, Taita Diospaj cꞌuchupi canami alli” nircami (Salmo 73:28).

18. ¿Shamuj punllacunapi ima tucunataca imamantataj mana manchana canchij?

¹⁸ Ñucanchijca “causaj, mana llulla Diosta sirvijcunami” canchij (1 Tesalonicenses 1:9). Chaimantami ima llaquicuna ricurijpipish ahuantai tucushun. Jehová Diosca causaj cashcamantami ñucanchijmantaca achcata preocuparin. Shinallataj tucuipimi ñucanchijcunataca ayudasha nin. Ima shinami ñaupa punllacunapi paita sirvijcunata ayudarca, chashnallatajmi cunan punllacunapica ñucanchijta ayudashpa catinga. Ñallami mana nunca tiyashca llaquicuna tiyanga. Pero mana ñucanchijllachu cashun (Isaías 41:10). Chaimanta ‘Jehová Diosmi ñucata ayudajca. Mana manchashachu nishunchij’ (Hebreos 13:​5, 6).