Ñucaca 22 de diciembre de 1929-tami Belgicapi saquirij Noville nishca comunapi huacharircani. Chai comunapica nueve haciendacunami tiyarca. Uchillaraj cashpaca ñuca yaya mamahuanmi comunapi sumajta pasaj carcanchij. Ñucapaj qꞌuipa huauquihuanmi punllanta lecheta llujchinaman rij carcanchij. Cozichana punllacuna chayamujpipish ishquindijmi ayudaj carcanchij. Cai comunapica tucuicunami ayudanacujcuna carcanchij.

Ñuca yaya mamaca catolicocunami carca. Chaimantami paicunaca tucui domingocunata misata uyanaman rijcuna carca. Pero qꞌuipamanca misaman rinatami saquircacuna. ¿Imamanta? 1939 huatapica Inglaterramantami huaquin precursorcuna ñucanchij huasiman shamurcacuna. Paicunaca cada quillami Consolación nishca revistata ñuca yayaman saqui callarirca (Chai revistaca cunanca Rijchari nishca revistami can). Ñuca yayaca enseguidami chaipi nishcacuna verdad cashcata cuentata curca. Chaimantami Bibliata estudiai callarirca. Ñucanchij vecinocunaca ñucanchijcunataca allitami tratajcuna carca. Pero cunanca ñuca yaya misaman mana rishcamantami mana alli tratai callarircacuna. Shinallataj iglesiaman rinata ama saquichunmi obligasha nircacuna. Chaimantami paicunaca achcata colerajcuna carca.

Vecinocuna ñuca yayata mana alli tratashcata ricushpami achcata llaquirircani. Chaimantami tucui shunguhuan Yaya Diosta mañarcani. Vecinocuna cutin alli tratai callarijpimi tranquilo sintirircani. Chashnami Jehová Dios ñuca mañaicunata uyaj cashcata cuentata curcani.

10 de Mayo de 1940 huatapimi Alemania soldadocunaca Bélgica llajtaman chayarcacuna. Chaimi cai llajtapi causajcunaca shujtaj llajtacunaman miticushpa rina carcanchij. Ñucanchijcunaca Francia llajtapimi causanaman rircanchij. Shinapish Francia llajtaman chayangapajca huaquin macanacuicuna chaupitami pasana carcanchij.

Cutin haciendaman tigrashpaca casi tucui ñucanchij imalla charishcata shuhuashcatami ricurcanchij.  Chaipica ñucanchij ashquitullami shuyacushcarca. Paica Bobbie shutimi carca. Tucui chaicunata ricushpami ‘¿imamantataj achca guerracuna, achca llaquicuna tiyan?’ nishpa tapurircani.

Chai punllacunapica Emile shuti huauquimi a ñucataca achcata ayudarca. Paica congregacionpica precursor shina, anciano shinami sirvij carca. Paica llaquicuna imamanta tiyashcata, shinallataj shujtaj tapuicunatapishmi Bibliahuan cutichirca. Chaita yachashcamantami Jehová Diospajman ashtahuan cꞌuchuyarcani. Chashnami Jehová Dios cꞌuyaj cashcata seguro carcani.

Guerra manaraj tucurijpimi huauqui panicunahuan tandanacurcanchij. Huauqui José-Nicolas Minetmi agosto de 1943-pi ñucanchijta visitanaman shamurca. Shuj conferenciata cushca qꞌuipaca paica: “Bautizarisha nijcunaca maquita alzaichij” nircami. Ñucapish, ñuca yayapish, ñuca tiopishmi maquita alzarcanchij. Quimsandijtaca ñucanchij hacienda cꞌuchullapi tiyaj yacupimi bautizarcacuna.

Diciembre de 1944-pica alemán soldadocunaca ñucanchij causan ladollapimi cutin macanacui callarircacuna. Chai macanacuitaca Batalla de las Ardenas nishpami rijsincuna. Ñucanchijcuna chai ladollapi causashcamantami pamba ucupi tiyan cuartopi shuj quillata miticurcanchij. Shuj punllaca chai ucumanta llujshishpami animalcunaman caranaman rircani. Chai ratomi hacienda jahuapi shuj bombata shitarcacuna. Chaimantami haciendapaj techoca volashpa rirca. Shuj soldadoca: “¡Cumurichij!” nishpami caparirca. Chaimi paipaj ladoman callpashpa rircani. Paica ñucata cuidangapajmi paipaj cascota churachirca.

Guerra tucurishca qꞌuipami Lieja congregacionpi sirvij huauqui panicunahuan tandanacui callarircanchij. Cai congregacionca ñucanchij causashcamantaca 90 kilómetros carupimi saquirij carca. Tiempohuanca Bastoña llajtapimi shuj uchilla grupito tiyai callarirca. Ñucaca impuestota cobrashpami trabajai callarircani. Shinallataj abogado cangapajmi estudiai callarircani. Chai huashaca shuj notariapimi secretario shina trabajai callarircani. 1951 huatapimi Bastoña llajtapi shuj asambleata rurarcanchij. Cai asambleapica 100 huauqui panicunami tandanacurcanchij. Pani Elly Reuterpishmi chaipi cashcarca. Paica precursorami carca. Asambleaman shamungapajca paica 50 kilometrostami bicicletapi shamushcarca. Ishquindijcuna enamorarishcamantami novios tucurcanchij.  Pero Ellytaca Estados Unidospi Escuela de Galaadman richunmi invitashcacuna carca. Chaimi paica: “Escuelamanca ña mana ri pudishachu” nishpa central mundialman shuj cartata quillcarca. Chai punllacunapica huauqui Knorrmi muyundij allpapi predicacionta pushacushcarca. Paica: “Shuj punllami cambaj cusahuan escuelaman ringui” nircami. Chaimi febrero de 1953 huatapi cazararcanchij.

Chai huatallapitajmi ñucanchijcunaca Nueva York llajtapi “Sociedad del Nuevo Mundo” nishca jatun tandanacuiman rircanchij. Chaipica shuj huauquitami rijsircanchij. Paica: “Caipi saquirichij. Ñucami canman shuj alli trabajota cusha” nircami. Alli decidingapajmi Jehová Diosta mañarcanchij. Chaimantami Estados Unidospi saquirinapaj randica Belgicaman tigrarcanchij. Chaipica Bastoñapi tiyaj grupopimi chunga huauqui panicunahuan sirvircanchij. 1954 huatapica ñuca huahua Serge huacharishcamantami cushilla carcanchij. Pero paitaca shuj ungüimi japirca. Chaimantami siete quillacunallata charishpa huañurca. Ñucanchij ima shina sintirishcatami Jehová Diosman huillarcanchij. Paica huañushcacuna cutin causarinata yuyachishpami animarca.

Octubre de 1961 huatapimi precursor shina sirvishpa catingapaj trabajo de medio tiempota japircani. Pero chai punllallapitajmi Bélgica sucursalta pushaj huauquica ñucata cayarca. Paica: “¿Superintendente de circuito shina sirvinata munanguichu?” nishpami tapurca. Ñucaca: “¿Manachu puntapica precursores shina sirvi tucunchij?” nishpami tapurcani. Paica: “Ari” nircami. Chaimi ocho quillacunata precursor shina sirvircanchij. Qꞌuipaca septiembre de 1962 huatapica superintendente de circuito shinami sirvi callarircanchij.

1964 huatapica Brucelaspi tiyaj Betelpi sirvichunmi invitarcacuna. Chaipi sirvishcamantami achca bendicioncunata charircanchij. 1965-pica huauqui Knorrca Belgicapi tiyaj Beteltami visitarca. Chai qꞌuipallami ñucataca sucursalta pushachun nombrarcacuna. Shina sirvinataca mana yuyarcanichu. Asha tiempo qꞌuipaca ñucanchijtaca Escuela de Galaadman richunmi invitarcacuna. Chaimi clase 41-man rircanchij. Chaipimi 13 huatacuna huashaman huauqui Knorr nishca shimicuna pajtarirca. Escuelapi graduarishca qꞌuipaca Bélgica Betelman cutin tigrarcanchij.

Abogado cashcamantami achca huatacunata Europa llajtapi, shujtaj llajtacunapipish huauqui panicuna libremente huillashpa catichun ayudashcani (Filipenses 1:7). Chaita rurashpami 55 llajtacunata mandajcunata rijsina oportunidadta charishcani. Chai llajtacunapica autoridadcunaca testigo de Jehovacuna libremente ama huillachunmi jarcajcuna carca. Paicunahuan parlanaman rishpaca, “ñucaca abogadomi cani” nishpa presentarinapaj randica “ñucaca Diosta sirvijmi cani” nishpami presentarij carcani. ‘Jatun mandajcunapaj, juezcunapaj shungucunataca Jehová Diosmi paipaj maquipi charicun. Paica uchilla larcacunapi yacuta chaupij shinami, pai munashcata rurachin’. Chaimantami Jehová Dios ñucata ayudachun siempre mañaj carcani (Proverbios 21:1).

Shuj punlla ima tucushcatami yuyarini. Chaipica Parlamento Europeopi trabajaj autoridadhuanmi parlanaman rircani. Paihuan parlangapajca achca  cutincunami solicitudta jundachina carcani. Paihuan parlana oportunidadta ña charijpica paica: “Ñucahuan parlangapajca cinco minutocunallatami charingui” nircami. Chaimi ñucaca cumurishpa Yaya Diosta mañarcani. Paica mancharishpami: “¿Imatataj ruracungui?” nishpa tapurca. Ñucaca umata alzashpami: “Can Diospajta ruraj cashcamantami Yaya Diosta agradicingapaj mañacurcani” nircani. Chaimantami paica: “¿Imatataj nisha ningui?” nishpa tapurca. Chaimi ñucaca Romanos 13:​4-ta ricuchircani. Paica protestante religionmantami cashcarca. Chaimantami cai textotaca alli uyarca. Chai textota Bibliapi ricuchishcamantami cinco minutocunallata parlanacunapaj randica media horata parlanacurcanchij. Paihuan parlanacucujpica ñucanchij obrata achcata respetashcatami nirca.

Achca huatacunatami Europapi causaj huauqui panicunata difindingapaj trabajashcanchij. Por ejemplo, testigo de Jehovacuna politicapi mana chagrurisha nishcamantami autoridadcunaca paicunataca juicioman aparcacuna. Cutin, maijan testigocunapaj huahuacunata quichusha nishpa, o ashtahuan impuestocunata pagachun nishpami juicioman aparcacuna. Chaimi ñucaca chai huauqui panicunata difindishpa ayudarcani. Cunancamaca Tribunal Europeo de Derechos Humanos nishca juzgadopica testigo de Jehovacunaca 140 yalli juiciocunatami ganashcanchij.

Más o menos 1990 huatapica Cuba llajtapica testigo de Jehovacunaca mana libremente huillai tucurcacunachu. Autoridadcunaca testigo de Jehovacunamanta pandata yuyashcamantami ama huillachun jarcacurcacuna. Chaimi central mundialpi sirvij huauqui Philip Brumley, shinallataj Italia llajtamanta huauqui Valter Farnetihuan chai huauqui panicuna libremente huillachun ayudashun nircanchij. Ñucaca Belgicapi caj embajadamanmi shuj cartata cacharcani. Chai qꞌuipaca chaipi trabajaj shuj runahuanmi parlarcani. Paimanca testigo de Jehovacunamanta ama pandata yuyachunmi ñucanchij obramanta explicasha nircani. Pero huaquin cutincuna paihuan parlanacujpipish paica ñucataca mana tanto intindircachu.

Cuba llajtaman 5.000 Bibliacunata cachangapaj permisota cuchunmi Jehová Diosta mañarcanchij. Bibliacunaca Cubamanmi chayarcacuna. Chaimantami huauqui panicunaca shuj Bibliata chari tucurcacuna. Chaita ricushpaca ñucanchij esfuerzocunata Jehová Dios bendiciacushcatami cuentata curcanchij. Chaimantami 27.500 Bibliacunata cachangapaj cutin permisota mañarcanchij. Chaimi autoridadcunaca permisota curcacuna. Cubapi huauqui panicuna Bibliata charichun ayudashcamantami cushilla sintirircani.

Huauqui panicuna Jehová Diosta libremente sirvichun ayudangapajmi huaquin cutincuna Cuba llajtaman rircani. Chaimantami gobiernopi trabajaj autoridadcunahuan alli apanacui tucushcani.

1994 huatapica Ruanda llajtapi tutsi razamanta caj gentecunatami paicunapaj contracuna huañuchirca.  Chaimi 1 millón yalli gentecuna huañurcacuna. Huaquin huauqui panicunapishmi huañurcacuna. Chaimantami chai llajtapi causaj huauqui panicunataca rato ayudanaman rircanchij.

Ayudahuanca Kigali lugarmanmi chayarcanchij. Chaipica shuj oficina de traduccionmi tiyarca. Publicacioncunata huaquichina cuartoman yaicushpaca chaipi achcata disparashcatami ricurcanchij. Chaipi sirvij huauqui panicunaca millai gentecuna huaquin huauqui panicunata machetehuan ima shina huañuchishcatami parlarcacuna. Shinallataj huauqui panicuna paicunapura ima shina ayudanacushcatami parlarcacuna. Por ejemplo, shuj huauquica tutsi razamantami carca. Paica 28 punllacunatami shuj jutcu ucupi miticushca carca. Paita ama huañuchichunca hutus razamanta caj familiami paitaca cuidacurcacuna. Shinallataj Kigali lugarpica shuj alaja tandanacuitami charircanchij. Chashnami más de 900 huauqui panicuna espiritualmente sinchi cachun animai tucurcanchij.

Qꞌuipaca fronterata cruzashpami Zaire nishcaman chayarcanchij (cunanca chai llajtataca República Democrática del Congo nishpami rijsinchij). Ruandamanta testigocunaca Goma llajtapi saquirij campos de refugiados nishcamanmi miticushpa rishcacuna carca. Pero paicunata mashcashpapish mana japircanchijchu. Chaimi ñucanchijta ayudachun Diosta mañarcanchij. Ñapishmi shuj runaca ñucanchijman cꞌuchuyarca. Chaimi paitaca: “¿Testigo de Jehovacunata rijsinguichu?” nishpa tapurcanchij. Paica: “Ari, ñucaca testigomi cani. Cancunataca Comité de Socorromanmi apashpa rigrini” nircami. Comitepi sirvij huauquicunahuanmi tandanacurcanchij. Chai qꞌuipaca 1.600 testigocunata animangapajmi paicunahuan tandanacurcanchij. Shinallataj Cuerpo Gobernante huauquicuna cachashca cartatami liyircanchij. Chaipica: “Cancunamantaca siempremi mañanchij. Jehová Diosca cancunataca manataj saquingachu” nircami. Cuerpo Gobernante nishca shimicunaca pajtarircami. Cunanca Ruanda llajtapica más de 30.000 testigos de Jehovacunami Yaya Diostaca cushilla sirvicuncuna.

Ñuca huarmisitahuanca casi 58 huatacunatami cazarashca carcanchij. Shinapish paica 2011 huatapimi huañurca. Ñuca ima shina sintirishcatami Jehová Diosmanca tucuita parlarcani. Paimi tranquilo sintirichun ayudashca. Ashtahuanpish ñuca vecinocunaman alli huillaicunata huillashpami cushilla sintirini.

Cunanca 90 huatacuna yallitami charini. Shinapish cada semanami huillanaman llujshingapaj esforzarini. Shinallataj Bélgica sucursalpi Departamento de Asuntos Legales nishcapi ayudana oportunidadtami charini. Ñucaca shujtaj huauqui panicunaman ñuca ima yachashcatami comparti pudishcani. Betelpi sirvij jovencunata animangapaj visitana oportunidadtapishmi charishcani.

Jehová Diosman punta cutin mañashca punllamantaca ñami 84 huatacuna pasashca. Chai punllamantami Jehová Diosmanca ashtahuan cꞌuchuyai tucushcani. Jehová Dios ñuca mañashcacunata uyashcamantami achcata agradicini (Salmo 66:19). b