1. ¿Salmo 18:​46-pi nishca shinaca Jehová Diosca ima shinataj can?

 CAI MILLAI mundopi causacushcamantami jatun llaquicunaca mana yuyashcapi japi tucun. Chashna jahuapish Jehová Dios tucuipi ñucanchijta ayudaj cashcata yachashcamantami tranquilo sintirinchij. Yachai 25-pica causaj Jehová Dios tucui horas ñucanchijta ayudangapaj listo cashcatami yacharcanchij. Pai ñucanchijta ayudajta ricushpaca David shinami ‘Jehová Diosca causaj Diosmari can’ nishun (Salmo 18:​46-ta liyipai). Shinapish Davidca Jehová Dios ‘causaj Dios’ cashcata nishca qꞌuipaca Jehová Dios causaita mana charij ‘jatun Rumi’ shina cashcatami nirca. ¿Imamantashi chaita nishcanga?

2. ¿Cai yachaipica imacunallatataj yachashun?

² Cai yachaipica cai tapuicunatami yachashun: ¿Bibliapica imamantataj Jehová Diostaca shuj rumihuan chꞌimbapuran? ¿Chaimantaca imatataj yachai tucunchij? ¿Jehová Dios ñucanchij Rumi shina cachunca imatataj rurana canchij? Shinallataj Jehová Diospaj cualidadcunata charingapaj imata rurai tucushcatami yachashun.

¿JEHOVÁ DIOSCA IMAMANTATAJ SHUJ RUMI SHINA CAN?

3. ¿Bibliapica imamantataj Jehová Diostaca shuj jatun rumihuan chꞌimbapuran? (Página 1-pi tiyaj fotomantapish parlapai).

³ Bibliapica Jehová Dios shuj jatun rumi shina cashcata nishpaca pai sumaj cualidadcunata charishcatami nin. Por ejemplo, Deuteronomio 32:​4-pica Jehová Dios shuj ‘jatun Rumi’ shina cashcatami nin. Shinallataj Anaca Jehová Diosta mañacushpaca: “Ñucanchij Dioslla, canllami shuj rumi shina sinchi cangui” nircami (1 Samuel 2:2). Profeta Habacucpish Jehová Diostaca: ‘Ñuca jatun Rumimari cangui’ nircami (Habacuc 1:12). Salmo 73-ta quillcaj runapish Jehová Diosca “ñuca shungu samarina rumica Jatun Diosmari” nircami (Salmo 73:26). Ashtahuancarin Jehová Diosllatajmi ‘ñucaca shuj jatun rumi shinami cani’ nirca (Isaías 44:8). Jehová Diosca quimsa cualidadcunata charishcamantami shuj jatun rumi shina can. Cunanmi chai cualidadcunamanta yachashun. Shinallataj Jehová Dios  “ñucanchij  Rumi” cachun imata rurana cashcatapishmi ricushun (Deuteronomio 32:31).

4. ¿Jehová Diosca imamantataj ñucanchij miticuna Rumi shina can? (Salmo 94:22).

⁴ Jehová Diosca ñucanchij miticuna Rumi shinami can. Shuj jatun acapana tiyajpica shuj jutcupi, mana cashpaca shuj jatun rumi ucupimi miticui tucunchij. Chashna layallatajmi jatun llaquicunahuan chꞌimbapuracushpaca Jehová Diospi miticui tucunchij (Salmo 94:​22-ta liyipai). Paimi ñucanchijtaca ayudanga. Huiñaita sufrichunpish manataj saquingachu. Y mana chaillachu. Shamuj punllacunapica tucui ñucanchij apacushca llaquicunatami tucuchinga (Ezequiel 34:​25, 26).

5. ¿Jehová Diospi miticungapajca imatataj rurana canchij?

⁵ Jehová Diospi miticungapajca paitami shungumanta mañana canchij. Chaita rurajpimi Yayitu Diosca sumaj causaita cushpa shungupi, yuyaipi tranquilo sintirichun ayudanga (Filipenses 4:​6, 7). Por ejemplo, huauqui Artiomtaca Jehová Diosta sirvishcamantami carcelpi churarcacuna. Carcelpi cajpica organizacionmanta achca tapuicunata cutichichunmi shuj policiaca paitaca mana alli trataj carca. Huauqui Artiomca: “Chai policía ñucata tapunaman shamujpica achcatami mancharij carcani. Chaimi Yayitu Diostaca alli yuyashpa cutichingapaj, tranquilo sintiringapaj ‘ayudahuai’ nishpa mañaj carcani. Chaita rurashcamantami chai policía ñucata Diosmanta caruyachisha nijpipish Yayitu Diostaca tucuipi cazurcani. Yayitu Diosca ñucata cuidaj jatun pirca shinami carca” nircami.

6. ¿Jehová Diospica imamantataj confiana canchij? (Isaías 26:​3, 4).

⁶ Jehová Diosca confianalla Diosmi can. Ima shinami shuj jatun rumi o shuj jatun urcuca siempre chai puestollapitaj can, chashnallatajmi Jehová Diosca ñucanchijta ayudangapajca siempre listo canga. Paica ‘huiñai huiñaita jatun pirca’ o jatun rumi shinami can. Chaimantami paipi confiai tucunchij (Isaías 26:​3, 4-ta liyipai). Jehová Diosca mana nunca huañungachu. Chaimantami paica paipaj nishcacunataca pajtachingataj. Shinallataj ñucanchij mañaicunata uyangapaj, ñucanchijta ayudangapajpish siempremi listo canga. Yayitu Diosca paita tucui shunguhuan cazujcunataca manataj saquingachu (2 Samuel 22:26). Ashtahuanpish paimanta tucui imallata rurashcata manataj cungarishpami sumaj bendicioncunata cunga (Hebreos 6:10; 11:6).

7. ¿Imamantataj Jehová Diospi confiana canchij? (Fotomantapish parlapai).

⁷ Jehová Dios ñucanchij jatun Rumi shina cashcata ricuchingapajca paipimi ñucanchij shunguta churana canchij. Jatun llaquicunahuan chꞌimbapuracushpapish chaitami rurana canchij (Isaías 48:​17, 18). Jehová Dios ñucanchijta ima shina ayudacujta ricushpaca paipimi ashtahuan confiashun. Shinallataj ñucanchijlla mana ahuantai tucushca llaquicunata ahuantangapajmi allichirishca cashun. Huaquin llaquicunata ahuantachunca shujtaj gentecunaca manachari ayudai tucunga. Pero Jehová Diosmi chai llaquicunatapish ahuantachun ayudai tucun. Paica ñucanchijtaca manataj saquingachu. Huauqui Vladimirca: “Jehová Diosta sirvishcamanta carcelpi cai horasmi Jehová Dios ñuca cꞌuchullapi cashcata sintircani. Carcelpi cashpaca ñucallami carcani. Chaimanta llujshingapajpish ñucaca imata mana rurai tucurcanichu. Pero chaipi cashpaca Jehová Diospi confianatami yacharcani” nircami.

8. a) ¿Jehová Dios mana cambiaj cashcataca imamantataj seguros canchij? b) ¿Jehová Dios jatun Rumi shina cashcata yachashcamantaca ima shinataj sintirinchij? (Salmo 62:​6, 7).

 ⁸ Jehová Diosca mana cambianchu. Jatun rumicuna, urcucunaca sinchi, mana cuyuchipajmi can. Chashnallatajmi Jehová Diosca sinchi, mana cambiaj Dios can. Paica siempremi cꞌuyaj, llaquij canga. Ashtahuanpish pai rurasha nishcacunataca pajtachingatajmi (Malaquías 3:6). Adán y Eva Jehová Diospaj contracuna tucujpipish Jehová Diosca paipaj munaitaca mana cambiashcachu. Chaimi apóstol Pabloca “Diosllatajca mana negari tucunchu” nirca (2 Timoteo 2:13). ¿Chaica imatataj nisha nin? Ima tucujpipish Jehová Diosca pai rurasha nishcacunata, paipaj mandashcacunatapish manataj cambiangachu. Chaita yachashcamantami llaquicunata apacushca horas Jehová Dios siempre ayudanata seguros canchij. Ashtahuanpish Jehová Dios pai rurasha nishcacunata pajtachinatami tucui shunguhuan crinchij (Salmo 62:​6, 7-ta liyipai).

9. ¿Tatianapaj ejemplomantaca imatataj yachanchij?

⁹ ¿Jehová Diosta sinchi Rumita shina ricungapajca imatataj rurana canchij? Pai ima shina cashcatami yuyarina canchij. Shinallataj cai Allpahuan, gentecunahuanpish imata ruragrishcatami yuyarina canchij. Chaita rurashpami llaquicunata charishpapish tranquilo sintirishun (Salmo 16:8). Pani Tatianataca Jehová Diosta sirvij cashcamantami paipaj huasillapitaj carcelpi cashca shina churarcacuna. Paica: “Huasipi ñucalla saquirichunmi obligarcacuna. Callaripica ñucalla sintirishcamantami achcata llaquirij carcani” nircami. Tatianaca Jehová Diospi pai cai Allpahuan imata rurasha nishcapimi yuyarca. Chashnami paica tranquila sintirirca. Paica: “Jehová Diosta cꞌuyashcamanta, paipaj munaita rurasha nishcamanta cai llaquita chꞌimbapuracushcatami yuyarircani. Chaita rurashcamantami ñucallapi yuyanapaj randica Jehová Diospi yuyai callarircani” nircami.

10. ¿Jehová Dios ñucanchij sinchi Rumi shina cachunca imatataj rurana canchij?

¹⁰ Ñallami jatun llaquicunahuan chꞌimbapurashun. Chaipica Jehová Diospi ashtahuan confianatami minishtishun. Chaimantami llaquicunata ahuantangapaj, paita tucui shunguhuan cazungapaj Jehová Dios ñucanchijta ayudai tucushcataca cunanmanta tucui shunguhuan crina canchij. ¿Ñucanchij crishcacunata sinchiyachingapajca imatataj rurai tucunchij? Ñaupa punllacunapi, cunan punllacunapipish Jehová Dios paita sirvijcunata ima shina ayudashcata liyishpami chaitaca rurai tucushun. Chai experienciacunata liyicushpaca Jehová Dios chai huauqui panicunaman sinchi Rumi shina cashcata ima shina ricuchishcatami yuyana canchij. Chashnami Jehová Dios ñucanchijpajpish sinchi Rumi shina cashcata seguros cashun.

JEHOVÁ DIOS SHINA CASHUNCHIJ

11. ¿Imamantataj tucuicuna Jehová Dios shina cangapaj esforzarina canchij? (“ Joven caita rurai” nishca recuadrotapish ricui).

¹¹ Caicamaca Jehová Dios huaquin sumaj cualidadcunata charishcamanta shuj jatun rumi shina cashcatami ricushcanchij. Cunanca ñucanchijpish chai cualidadcunata ima shina ricuchina cashcatami yachashun. Jehová Dios shina cangapaj esforzarishpaca congregacionpi caj huauqui panicunatami ayudai tucushun. Por ejemplo, Jesusca Simontaca Cefas nishpami shutichirca. Griego  rimaipica Cefas shutica Pedromi can. Chai shutica “rumi” nisha ninmi (Juan 1:42). ¿Jesusca imamantataj Simontaca Pedro nishpa shutichirca? Chai shutita churashpami Jesusca Pedro huauqui panicunata animashpa congregacionpi tucuicuna tandalla cachun ayudanata ricuchirca. Shinallataj Bibliapica congregacionta pushaj ancianocunamanta parlashpaca cai huauquicunaca “rupai punllapi llandurina rumi urcu shinami canga” ninmi (Isaías 32:2). Chaita nishpaca ancianocuna huauqui panicunata cuidana cashcatami nin. Pero mana ancianocuna cashpapish tucuicunami Jehová Dios shina cangapaj esforzari tucunchij. Chashnami congregacionpi tucuicuna tandalla cachun ayudashun (Efesios 5:1).

12. ¿Huauqui panicunapaj miticuna rumi shina cangapajca imatataj rurana canchij?

¹² Miticuna rumi shina cashunchij. Terremotocuna, acapanacuna, macanacuicuna tiyajpica tal vez ñucanchij huasipimi huauqui panicunata chasquina tucunga. Cai “tucuri punllacunapica” llaquicunaca ashtahuan ashtahuanmi mirashpa catimun. Chaimantami caishuj chaishuj ayudanacungapajca ashtahuan oportunidadcunata charishun (2 Timoteo 3:1). Shinallataj huauqui panicunapaj miticuna rumi shina cangapajca paicunatami animana canchij. Jehová Diosmanta ama caruyachunpishmi ayudana canchij. Por ejemplo, Salón del Reinoman shamujcunataca allimi chasquina canchij. Chashnami tucuicuna congregacionpi tranquilo sintirichun, cꞌuyaita ricuchichun ayudashun. Diosta mana sirvijcunaca cꞌuyaitaca mana ricuchincunachu. Pero huauqui panicuna congregacionpi tucuicuna cꞌuyaita ricuchinacujta ricushpaca tranquilosmi sintirishun.

13. ¿Ancianocunaca miticuna rumi shina huauqui panicunapaj cangapajca imatataj rurana can? (Fotomantapish parlapai).

¹³ Huauqui panicuna jatun llaquicunahuan chꞌimbapuracujpimi ancianocunaca miticuna rumi shina cashcata ricuchina can. Por ejemplo, terremotocuna, acapanacuna tiyajpi o shuj emergenciamanta hospitalman rina cajpica ancianocunaca ratomi huauqui panicunata ayudana can. Shinallataj  Bibliapi nishcacunata yuyachishpami tranquilo sintirichun ayudai tucuncuna. Shuj anciano cꞌuyaj, intindij, uyaj cajpica huauqui panicunaca confianzahuanmi paipaj ayudata mashcangacuna. Shinallataj anciano huauquicuna cꞌuyaita ricuchijpimi huauqui panicunaca valishca cashcata yachangacuna. Ashtahuanpish ancianocuna Bibliahuan ima consejota cujpipish chaitaca cushillami pajtachingacuna (1 Tesalonicenses 2:​7, 8, 11).

14. ¿Confianalla cashcataca ima shinataj ricuchi tucunchij?

¹⁴ Confianalla cashunchij. Huauqui panicuna llaqui horaspi ñucanchijpi confiai tucushcata yachachunmi munanchij (Proverbios 17:17). ¿Pero confianalla cangapajca imatataj rurana canchij? Chaipajca Jehová Diospaj ejemplotami catina canchij. Por ejemplo, ñucanchij nishcacunata pajtachingapaj, tucuipi puntuales cangapajpishmi esforzarina canchij (Mateo 5:37). Shinallataj huauqui panicuna imapi ayudachun minishtijpica paicunata ayudangapajmi listos cana canchij. Shujtajcuna imata rurachun mingajpipish paicuna mandashca shina chaita rurangapajmi esforzarina canchij.

15. ¿Anciano huauquicuna confianalla cajpica huauqui panicunaca ima shinataj sintiringacuna?

¹⁵ Confianalla caj ancianocunaca congregacionpica achcatami ayudai tucuncuna. Por ejemplo, congregacionpi tiyaj grupocunata pushaj ancianocunaca huauqui panicuna paicunapi confiachunmi esforzarina can. Chashna rurajpimi huauqui panicunaca imapi ayudachun minishtishpaca mana manchashpa paicunataca cayangacuna. Shinallataj anciano huauquicuna huauqui panicunata shungumanta ayudajpica paicunaca Jehová Diospaj valishca cashcatami yachangacuna.  Ashtahuanpish ancianocunaca paicuna yuyashca shina ima consejota cunapaj randica Bibliapi, shinallataj Diospaj organización cushca publicacioncunapi tiyaj consejocunata yuyachishpami aconsejana can. Chaita rurajpimi huauqui panicunaca paicunapi ashtahuan confiangacuna. Ashtahuancarin ancianocunaca huauqui panicuna paicunaman imata parlashcataca mana shujtajcunaman parlashpa purinachu can. Paicunapaj nishcacunatapish pajtachingapajmi esforzarina can.

16. a) ¿Jehová Diostaca imamantataj tucuipi cazuna canchij? b) ¿Jehová Diosta cazunata mana saquijpica shujtajcunapish ima shinataj beneficiaringacuna?

¹⁶ Jehová Diosta cazunata ama saquichu. Shinallataj Diospaj yachachishcacunata yuyaipi charishpami imatapish decidina canchij. Chashnami shujtajcunamanca alli ejemplota cui tucushun. Shinallataj Diospaj shimita punllanta estudiashpami ñucanchij feta sinchiyachishpa catishun. Sinchi feta charijpica cai mundopaj yachachishcacunaca ñucanchijtaca mana pandachingachu (Efesios 4:14; Santiago 1:​6-8). Shinallataj Jehová Diospi tucui shunguhuan confiashpaca ‘llaquicunami shamugrin’ nishpa huillajpipish mana yallitaj sustarishunchu (Salmo 112:​7, 8). Ashtahuanpish llaquicunata charijcunatami ayudai tucushun (1 Tesalonicenses 3:​2, 3).

17. ¿Huauqui panicuna Jehová Diosta cushilla sirvichunca ancianocunaca imatataj rurana can?

¹⁷ Anciano huauquicunaca tucuipi jarcarijcuna, alli yuyaiyujcuna, mana maipish cachun causajcunami cana can. Shinallataj Diospaj mana llulla shimipi nishcatami catina can. Chaita rurajpimi huauqui panicuna Jehová Diosta alli sirvichun ayudangacuna (Tito 1:9; 1 Timoteo 3:​1-3). Shinallataj ancianocunaca huauqui panicunaman alli ejemplota cungapaj, paicunata animangapajpishmi esforzarina can. Chaita rurajpimi huauqui panicunaca tucui tandanacuicunaman ringapaj, predicacionman llujshingapaj, Bibliata estudiangapajpish esforzaringacuna. Cutin huauqui panicuna paicunapaj llaquicunamanta sustarishca cajpica Jehová Diospi, pai rurasha nishcacunapi yuyachunmi animana can.

18. ¿Jehová Diosta jatunyachinata, paipajman cꞌuchuyanataca imamantataj mana saquina canchij? (“ ¿Jehová Diospajmanca ima shinataj cꞋuchuyai tucunchij?” nishca recuadrotapish ricui).

¹⁸ Jehová Dios sumaj cualidadcunata charishcata yachashca qꞌuipaca Rey David shinami sintirishun. Paica: “Jehová Diosca ñuca miticuna jatun rumimari” nircami (Salmo 144:1). Jehová Diospica siempremi confiai tucushun. Ñucanchijcuna yuyajyajpipish paica siempremi ñucanchij cꞌuchullapi canga. Chaimanta Jehová Diosca ‘ñuca Rumimari’ nishunchij (Salmo 92:​14, 15).