1, 2. a) ¿Bautizaricui horasca ima shinataj tucuicuna sintirincuna? b) ¿Cai yachaipica imacunallatataj ricushun?

 ¿BAUTIZARIGRIJCUNATA ricushcanguichu? Conferenciata cuj huauqui ishqui tapuicunata rurajpica paicunaca imata mana dudashpami cutichincuna. Paicunapaj familiacunapish, amigocunapish cushillami cancuna. Paicuna bautizarishpa cushicuihuan yacumanta llujshijpicarin tucuicunami aplaudincuna. Cada semanami achca huaranga huaranga gentecunaca Yayitu Diosman mingarishpa testigo de Jehovacuna shina bautizarincuna.

² Can bautizarinapi yuyacushpaca Jehová Diospaj alli amigo canatami mashcacungui. Chaimantami canca Jehová Diospajca dimastij valishca cangui (Salmo 14:1, 2). Can jovenlla cashpapish, yuyajlla cashpapish cai yachaica cambajmi can. Caipica bautizaringapaj imata rurana cashcatami yachangui. Shinallataj cai yachaica ña bautizarishcacunatapish Jehová Diosta tucui shunguhuan para siempre sirvishpa catichunmi ayudanga.

3. ¿Jehová Diosta sirvijcunaca imamantataj mana llullata, allita ruranata cꞌuyanchij? (Salmo 119:128, 163).

³ Jehová Diosca paita sirvijcunataca mana llullata cꞌuyachunmi yachachirca (Zacarías 8:19). Jesuspish allita rurana imamanta importante cashcatami yachachirca (Mateo 5:6). Chaimantami ñucanchijcunaca Yayitu Dios munashca shina allicunata rurangapaj esforzarina canchij. Canpish mana llullata, allita ruranatami munangui. Chaimantami llullacunata, tucui mana allicunataca pꞌiñangui (Salmo 119:128, 163-ta liyipai). Llullajcunaca cai mundota mandaj Diablo shinami llullashpa purincuna (Juan 8:44; 12:31). Diabloca Edén huerta tiyashca horasmantami Diospaj shutita malpi saquichisha nishpa llullacunata  nishca. Diabloca Dios mitsa cashcata, llullaj cashcatami nirca (Génesis 3:1, 4, 5). Diablopaj llullacunamantami achca gentecunaca Yayitu Dios mana alli cashcata yuyai callarishcacuna. Diosmanta verdadta mana yachashcamantami achcacunaca millaillata rurashpa purishcacuna (Romanos 1:25-31).

4. ¿Jehová Diosca mana llullata nij Dios cashcamantaca imallatataj rurashca? (Fotomantapish parlapai).

⁴ Jehová Diosca mana llullata nij Diosmi can. Paica paita cꞌuyaj gentecunamanca mana mitsashpami Bibliamanta verdadta yachachin (Salmo 31:5). Chashnami paita sirvijcunaca Diablopaj llullacunataca ña mana crincuna. Shinallataj Jehová Diosca paita sirvijcunamanca ama llullachun, allita rurachunmi yachachishca. Chaita pajtachishpaca Diosta sirvijcunaca paicunapaj shungupipish, yuyaipipish tranquilos, cushillami sintirincuna (Proverbios 13:5, 6). Bibliata estudiai callari horasmantami canpish chashnallataj sintirishcangui. Yayitu Jehová canta pushachun saquinapish alli cashcatami intindishcangui (Salmo 77:13). Chaimantami Diospaj mandashcacunata cazunata, Diosmanta verdadta yachachinatapish munangui (Mateo 6:33). ¿Chaicunataca ima shinataj pajtachi tucungui?

5. ¿Cambaj tucui causaipica imacunatataj pajtachina cangui?

⁵ Canca Diablopaj llullacunata mana chasquishpami Bibliamanta yachashca verdadta difindina cangui. Diospaj mandashcacunatapish cazushpami Dios canta pushachun saquina cangui. Caicunataca cambaj tucui causaipimi pajtachina cangui. Chaimantami Jehová Diosta mañashpaca: “Ñuca tucui causaipimi canllata sirvisha” nishpa paiman mingarina cangui. Qꞌuipaca Diosman ña mingarishcataca tucuicunapaj ñaupajpi ricuchingapajmi bautizarina cangui. Caicama ricushca shinaca, bautizarina munaita charingapajca Bibliapi Diosmanta verdadtami yachana cangui. Allita ruranapish cambajllataj alli cashcatami intindina cangui.

6. Salmo 45:4-pi nishca shinaca ¿Jesustaca imamantataj cꞌuyangui?

⁶ Salmo 45:4-pica Jesusta imamanta cꞌuyana cashcatami yachachin (Chai versota liyipai). Chaipica Jesús mana llullata difindij cashcata, humilde cashcata, allita ruraj cashcatami yachachin. Cai Allpapi cashpaca paica mana manchashpami Diosmanta yachashca verdadta difindirca. Allita rurangapajpishmi esforzarirca (Juan 18:37). Jesús chashna cashcata  yachashpaca paitami achcata cꞌuyangui. ¿Jesusca humilde cashcataca ima shinataj ricuchirca?

7. ¿Jesusca ima shinataj humilde cashcata ricuchin?

⁷ Jesusca paipaj shimicunahuan, paipaj ruraicunahuanmi humilde cashcata ricuchin. Por ejemplo, paica shujtajcunapaj ñaupajpi alli ricurinata mashcanapaj randica tucuicunapaj ñaupajpimi Yayitu Diosta jatunyachin (Marcos 10:17, 18; Juan 5:19). Jesús chashna humilde cashcata ricushpaca canpishmi paita cꞌuyanata, paipaj ejemplota catinata munangui. Shinapish ¿Jesusca imamantataj humilde can? Paipaj Yaya Jehová humilde cashcamantami paipish humilde can. Jesusca paipaj Yaya ima shina cashcatami tucuita ricuchin (Salmo 18:35; Hebreos 1:3).

8. ¿Jesús ñucanchijta mandachunca imamantataj munanchij?

⁸ Jesusca tucuicunamanta yalli alli mandajmi can. Jehová Diosllatajmi paitaca ñucanchijta mandachun agllashca. Alli mandaj cachunpishmi Jesusman yachachishca (Isaías 50:4, 5). Ashtahuancarin Jesusca ñucanchijta dimastij cꞌuyashcatami ricuchishca (Juan 13:1). Chaimantami Jesús ñucanchijta mandachun munanchij, paitapish achcatami cꞌuyanchij. Jesusca: ‘Ñucata cꞌuyashpaca cancunaca ñuca mandashcacunatami cazunguichij. Ñuca mandashcacunata cazushpaca ñuca amigocunami canguichij’ nircami (Juan 14:15; 15:14, 15). Jesuspaj amigocuna canaca shuj jatun bendicionmi can.

9. ¿Jesuspaj discipulocunapish Jesús shina bautizarishpaca imatataj ricuchincuna?

⁹ Jesusca paita catijcunataca bautizarichunmi mandarca (Mateo 28:19, 20). Paillataj bautizarishpami ñucanchijmanpish chai alli ejemplota saquirca. Jesús bautizarishpaca paipaj tucui causaipi Diospaj munaillata ruranatami ricuchirca (Hebreos 10:7). Paipaj discipulocunapish bautizarishpaca Diospaj munaita pajtachingapaj paiman mingarishcatami tucuicunapaj ñaupajpi ricuchincuna. Chai horasmantami paicunapajca ña mana causashcata, ashtahuanpish Yayitu Diospajllata rurana cashcata ricuchincuna. Shinapish Jesuspaj bautismohuan, discipulocunapaj bautismohuanca asha chꞌicanmi can. (Chaita intindingapajca recuadropi  imata yachachishcata ricui).

10. a) ¿Jesustaca imamantataj cꞌuyangui? b) ¿Paita cꞌuyashcata ricuchingapajca imatataj rurana cangui?

¹⁰ Canca Jesús, Diospaj Churi cashcataca allimi yachangui. Jehová Diospish Jesusta mandachun churashcatapishmi cringui. Jesús humilde cashcatapish, paipaj Yaya shina cashcatapishmi intindishcangui. Shinallataj Jesús yaricaihuan cajcunaman micunata carashcata, llaquilla cajcunata cushichishcata, ungushca cajcunatapish jambishcatami yachashcangui (Mateo 14:14-21). Canllatajmi Diospaj pueblota Jesús pushacushcatapish ricushcangui (Mateo 23:10). Shamuj punllacunapicarin Diospaj Gobiernopi Jesús mandacushpa achca bendicioncunata apamunatami seguro cangui. Cai tucuita intindishpaca ¿canca ima shinataj Jesusta cꞌuyashcata ricuchina cangui? (Juan 14:21). Chaipajca paipaj ejemplota catishpami Jehová Diosman mingarishpa, bautizarina cangui.

11. ¿Bautizarina munaita charingapajca tucuimanta yallica pitataj cꞌuyana cangui?

¹¹ ¿Bautizarina munaita charingapajca tucuimanta yallica pitataj cꞌuyana cangui? Jesusca: “Jehová Diostaca cambaj tucui shunguhuan, cambaj tucui causaihuan, cambaj tucui yuyaihuan, cambaj tucui fuerzahuan cꞌuyangui” nircami (Marcos 12:30). ¿Canpish Jesús nishca shinachu Jehová Diostaca cꞌuyangui?

12. ¿Canca imamantataj Jehová Diosta cꞌuyangui? (Fotomantapish parlapai).

¹² Jehová Diosca tucuitami ñucanchijman cushca. Chaimantami paita cꞌuyana canchij. Por  ejemplo, paica cada unomanmi causaita cushca. Shinallataj achca bendicioncunatapish, ima ashtahuan allicunatapish paillami cushca (Salmo 36:9; Santiago 1:17). Paica mana mitsa cashcamanta, ñucanchijta dimastij cꞌuyashcamantami tucui allicunata cushca.

13. ¿Jehová Dios paipaj cꞌuyashca Churita cushcamantaca imamantataj agradicingui?

¹³ Jehová Diosca ñucanchijta quishpichingapajmi paipaj cꞌuyashca Churita curca. ¿Imamantataj caica shuj valishca regalo can? Jehová Diospish, paipaj Churipish miles de millones huatacunata cielopi causashcamantami dimastij cꞌuyanacurcacuna (Proverbios 8:22, 23, 30). Chaimi Jesusca: ‘Yayaca ñucatami cꞌuyan. Ñucapish Yayatami cꞌuyani’ nirca (Juan 10:17; 14:31). Chaimantami Yayitu Diospajca paipaj cꞌuyashca Churita sufricujta ricuna, huañucujta ricunaca dimastij llaqui cashcanga. Shinapish Jehová Diosca ñucanchijta dimastij cꞌuyashcamantami paipaj cꞌuyashca Churita curca (Juan 3:16; Gálatas 2:20). ¿Tucui caicunata Yayitu Dios rurashcata ricushpaca manachu canpish paita cꞌuyasha ningui?

14. ¿Tucuimanta yalli alli decisionca maijantaj can?

¹⁴ Jehová Diosmanta ashtahuan yachashpaca paitami ashtahuan cꞌuyai callarishcangui. De seguromi canca cunanpish, shamuj punllacunapish paihuan alli apanacunata munangui. Y chaitaca rurai tucunguimi. Chaipajca cambaj shimicunahuan, cambaj ruraicunahuanmi tucui vida Yayitu Diosta cushichinata  decidina cangui. Yayitu Diosllatajmi chaita rurachun animacun (Proverbios 23:15, 16). Chashnami Diosta shungumanta cꞌuyashcata ricuchingui (1 Juan 5:3). Chaica tucuimanta yalli shuj alli decisionmi can.

15. ¿Jehová Diosta cꞌuyashcata ricuchingapajca imatataj rurana cangui?

¹⁵ ¿Jehová Diosta cꞌuyashcata ricuchingapajca imatataj rurana cangui? Puntaca Yayitu Diosman mingaringapajmi shuj mañaita rurana cangui (Salmo 40:8). Qꞌuipaca shujtajcunapaj ñaupajpi Yayitu Diosman mingarishcata ricuchingapajmi bautizarina cangui. Ñajaman ricushca shinaca bautizarina punllaca shuj cushicui punllami can. Chai punllamantaca ña mana cambajchu causangui. Ashtahuanpish Yayitu Diospaj munaita rurangapajmi causangui (Romanos 14:8; 1 Pedro 4:1, 2). Caica shuj jatun decisionmi can. Shinapish bautizarinata decidishpaca achca bendicioncunatami charingui.

16. Salmo 41:12-pi nishca shinaca ¿Jehová Diosta sirvinata decidishcamantaca ima bendicioncunatataj chasquingui?

¹⁶ Jehová Diosca tucuicunamanta yalli generosomi can. Can imata cujpipish paica cantaca ashtahuanmi tigrachinga (Marcos 10:29, 30). Cai mundo tucurimucujpipish Yayitu Diosca canmanca alaja, cushilla causaitami cunga. Shinapish can bautizarinaca shuj ñanta puri callarij shinallami can. Jehová Diosca canmanca paita huiñaipaj sirvina oportunidadtami cucun. Paita huiñai huiñaita sirvinata agllashpaca canpish, paipish mana tucurij cꞌuyaihuanmi cꞌuyanacushpa catinguichij (Salmo 41:12-ta liyipai).

17. ¿Yayitu Dios canman tucuita cushcamantaca canca imatataj cui tucungui?

¹⁷ Jehová Diosca can cushilla causachunmi achca bendicioncunata canman cushca. ¿Pai tucuita cushcamantaca paimanca imatataj cui tucungui? Jehová Diosca tucuita ruraj cashpapish cambaj causaita, cambaj cꞌuyaita paiman cuchunca mana obliganchu. Chaimantami Diosta cꞌuyashcamanta cambaj causaita paiman mingashpa bautizarinata decidina cangui. Ima laya jaica laya tucushpapish tucui vidami Diosta sirvinata agllana cangui (Job 1:8; 41:11; Proverbios 27:11). Chaita decidijpica Jehová Diosca achcatami cushiyaringa.

18. ¿Bautizaringapaj listo cashcata yachangapajca imallatataj tapurina cangui?

¹⁸ ¿Cai tucuita ricushca huashaca bautizarigringuichu? Cai tapuitaca canllami cutichi tucungui (Hechos 8:36). Cai yachaipica bautizaringapaj quimsa yuyaicunata pajtachina cashcatami ricushcanchij. ¿Yuyaringuichu? Puntapica, Bibliapi mana llullata yachangapaj, allita rurangapajpishmi esforzarina cangui. Ishquipica, Jesucristotami cꞌuyana cangui. Quimsapica, tucuimanta yallica Jehová Diostami cꞌuyana cangui. Shinaca bautizaringapaj listo cashcata yachangapajca cashna nishpami tapurina cangui: ¿Tucuicuna Diosmanta mana llullata yachachun, allicunallata rurachun munanichu? ¿Jesús ñucata mandachun, paipaj ejemplotapish catinata munanichu? ¿Jehová Diosllata sirvishpa paita cushichinata munanichu? Tucui cai tapuicunata ari nishpaca ¿imamantataj manaraj bautizaringui? (Hechos 16:33).

19. ¿Bautizarinataca imamantataj mana dudana cangui? Shuj ejemplomanta parlapai (Juan 4:34).

¹⁹ Bautizarinata dudacushpaca Jesús ima nishcapi yuyai (Juan 4:34-ta liyipai). Paica: “Ñuca micunaca ñucata cachaj Yayapaj munaita rurana, pai rurai nishcatapish tucui pajtachinamari” nircami. Jesusca Diospaj munaita ruranataca shuj sinchiyachij micunahuanmi chꞌimbapurarca. ¿Jehová Diosca can imata rurachuntaj munan? Paica can bautizarichun, paita sirvichunmi munan. Chaita pajtachishpaca sinchiyachij micunata micushca shinami canllataj beneficiaringui (Hechos 2:38). Caipi yuyai. Shuj amigo canman mishquijlla micunata carajpica mana dudashpami micunguiman ¿nachu? Chashnallatajmi Jehová Dios canta bautizarichun nijpica mana dudashpa bautizarinata decidina cangui.

20. ¿Catij yachaipica imatataj yachashun?

²⁰ ¿Ima nishpataj huaquincunaca manaraj bautizarishcacuna? Paicunaca tal vez bautizaringapaj manaraj listo cashcatami yuyancuna. Yayitu Diosman mingarinata, bautizarinata mana jahua jahualla decidina cashpapish bautizarinataca mana yangamanta qꞌuipayanachu cangui. Chai decisionca tucuimanta yalli importantemi can. Chaimantami canca alli yuyarinaraj cangui. Alli preparado cangapajpishmi esforzarina cangui. Catij yachaipimi preparado cangapaj imata ashtahuan rurana cashcata yachangui.